RIMS a Covid-19 case thah koima admit kibol be talou ding ...

RIMS a Covid-19 case thah koima admit kibol be talou ding QC a umhon guidelines phate ajuilou jeh uva Covid case kal ahi, tia sei CM in sei

141
0
SHARE

RIMS a Covid-19 case thah koima admit kibol be talou ding

QC a umhon guidelines phate ajuilou jeh uva Covid case kal ahi, tia sei CM in sei

Imphal, June 13(ET): Chief Minister N Biren Singh in Saturday nikhon Regional Institute of Medical Sciences (RIMS) a COVID 19 case athah admit kibol be tahlou ding ahi, ajeh chu general hospital a kikoi ding ahi, tin aseiyin ahi.

Tua kon COVID 19 positive ahi kihedoh athah hohi JNIMS Hospital le COVID Care Centre, UNACCO School, Meitram chule district hospital ho a kijen ding ahitai, tin Singh in aseiyin ahi. Health Services Director Dr. K Rajo le official dang dang hotoh Chief Minister in UNACCO School, Meitram, Imphal West district a lupna 100 umna COVID Care Centre inspection tunin abol u ahi.

CM Biren in thuso miho akimupi na a, Quarantine centre a umho umchan aphatlou jeh chule guidelines ajui lou jeh uva gamsunga COVID 19 case kal ahi, tin aseiyin chule umchan phalou bol a centre a umho jail a kikoi ding ahi, ati. Chule tuchan geiya mi 8 jail a kikoi ahitai, tin jong aseiyin ahi. MLA, CSO chule simlai kiloikhomna tamtah in Quarantine centre a umhon boina asan dan chule guidelines jui angai dan ho ahetthem nading uva pan alah jing uhi kitilkhouna ahi, ati.

COVID Care Centre athah a adamlou mi 48 kijen ahi in, sorkar in lupna hi 100 a kon 300 a kalsah ding agel ahi. Chule Centre kitup tah a akivaipoh a, adamlou ho phatah a akijen nadinga angaicha natong ding kikoi ahi, tin aseiyin chule natna a kon damdoh jong kal cheh cheh ahi, ati.

Tua kon RIMS a Covid 19 case athah ho admit bol tahlou dinga Chief Minister in aseiyin, RIMS hi general hospital a kimang a chule Covid natna neiho JNIMS le COVID Care Centre, Meitram chule district hospital phabep a umdiu ahi, ati. Inspection a Advisor to CM K. Leishiyo, MLA Kshetrigao AC N. Indrajit, MLA Naoriya Pakhanglakpa AC S. Subhaschandra, Health Services Director Dr. K. Rajo chule official dang dang jong pang ahi.

Manipur a covid-19 case 64 kimudoh be; Natna nei agom a 449 hita

Imphal, June 13(ET): Manipur gamsung’a dinga Covid-19 natna nei mi 64 akimudohbe toh lhon in nikhat sung a kimudoh tampen a melchihthei ahitai. Additional health director Dr K Sasheekumar Mangang in aseina achun Jawaharlal Nehru Institute of Medical Sciences (JNIMS), Virus Research and Diagnostic Laboratories (VRDL) ah sample test kibolna lah ah 44 positive akimudoh in chule Regional Institute of Medical Sciences (RIMS) ah sample 20 positive ahidan akimudoh e ati. Tuhin Manipur gamsung ah Covid-19 natna veikha mi 449 aphatan hiche lah achun mi 358 hi active ahi in chule mi 91 ana damdoh tauvin ahi. Tuni a positive case kimudoh lah achun mi 36 chu numei ahiuve.

Saturday nichun sample 1,846 test akibol in hiche chu RIMS ah sample 1,208 aki test in chule JNIMS ah sample 638 test akibol in tuni chan in sample 24,046 test akibol tan ahi. RIMS isolation ward ah tuhin mi 125 akijen jing uvin chule JNIMS isolation ward ah mi 135 akijen uvin ahi. Covid-19 care Centre UNACCO school ah tuhin mi 64 tobang akijen uvin chule midang 34 chu Bishnupur district hospital ah admit akibol uvin ahi. Tuni chan in Manipur gamsung ah Covid-19 jeh a thina toh aum naipoi.

CCpur Distirct a Covid-19 positive case thah 24 kimudohbe; agom’a case 79 lhingta

B.Lalboi Gangte

CCpur, June 13 (ET):  Churachandpur District sung’a tuni Covid-19 test Result anasodoh dungjui in Positive case 24 ana kimudohbe in ahi. Chuleh tuhin CCpur District sung’a Covid-19 Positive Case agom’a 79, active  Case 57, adamdoh mi 22 alhing tan ahi. CQC leh IQC akon in mi 8 discharged akibol tan ahi. Alangkhat’a Churachandpur Govt. College ah Quarantine Centre aum inmate hon avekol ho heng’a nikho 14 Quarantine achai utoh lhon’a pohdoh ding’a ngeh naleh kiphinna anei nao’a Doctors leh CCpur Police Officer hon inmate ho heng’a test result angadoh ding uva hetsah na anei jou uvin boina semgo loi jong ana um nung in tuni nilhah lam chu inmate mi 24 Positive case ana kimudoh thah in ahi.

Hetthei khat chu hiche positive case mi 24 lah’a hin CCpur Govt. College aum inmate 9 (Delhi akon hung kile) apang in, Dawn School Thingkangphai Quarantine Centre akon inmate 3 (Haryana akon hung kile); Quarantine Centre St.John School, Gothel akon inmat 4 (Haryana akon hung kile); Hmuia Veng aum  Hotel Asiatic, Room No 4 akon inmate 1 (Delhi akon hung kile); V.K Tawna High Quarantine Centre akon inmate 3 (Haryana akon hung kile); Gandhi Meorial High School CQC akon inmate 4 ahi. Chuleh Ccpur District sung’a Positive Case thah akimudohbe toh lhon’a hiche Quarantine Centre positive case kimudoh namun ho jouse Containment Zone in District Magistrate CCpur District Pawan Yadev IAS in aphongdoh tan ahi.

 

India a Covid-19 case athah 11,000 val akimudoh be toh lhon a ni 10 sunga Lakh 2 a kon Lakh 3 a kal; thina toh mi 8,884 hita

New Delhi, June 13: India gam a Covid 19 case lakh ni alhin ni som (10) jou Saturday nikho a natna nei lakh thum alhing tan, Saturday nikho a natna nei athah a 11,458 akihetdoh be hi nikhat a natna nei kihedoh gamsunga dinga atamna pen ahitai.

Natna jeh a thi jong 386 umbe a, agom a mi 8,884 thi ahitai, tin Union Health Ministry in aseiyin ahi. India gam a natna nei hi case 11 a kon lakh khat alhinna dinga nikho 64 ana lut ahi in, gangtah a lakh ni lhing a chule tu a hi agom a case 3,09,993 um a, vannoiya natna akisei khohna gam ali channa pang ahitai, tia Worldometer in asei ahi.

Ahivanga, Health Ministry in achesa Friday nikho a coronaviryus natna akal (doubling) hi nikho 17.4 a kon 15.4 a aphatou e, tia asei ahi. Saturday jingkah nidan 8 a update abol nauva active case 1,45,779 um a chule natna a kon mi 1,54,329 kijen dam a, mikhat agam a kile ahitai. Natna a kon damdoh hi 49.9 percent ahi, tin ministry official khat in aseiyin ahi.

Coronavirus case kisei holah a gamdang mi jong pang ahi. Athah a thi mi 386 holah a Delhi a mi 129 thi a, Maharashtra a 127 thi ahi. Virus hi Delhi a hatah a chal a Friday nikho a case 2,000 val kisei ahi in chule Maharashtra a case lakh khat val ahitai. Gujarat a mi 30 thi a , UP a 20, Tamil Nadu a 18, West Bengal, Telangana le Madhya Pradesh a mi 9 cheh, Karnataka le Rajasthan a 7 cheh, Haryana le Uttarakhand a 6 cheh, Punjab a 4, Assam a 2, Kerala, Jammu and Kashmir le Odisha a mikhat cheh thi ahi.

Tuchan geiya natna jeh a thi mi 8,884 lah a Maharashtra gam a athi 3,717 lhing a tampen ahi in, aban a Gujarat a 1,415, Delhi a 1,214, West Bengal a 451, Madhya Pradesh a 440, Tamil Nadu a 367, UP a 365, Rajasthan a 272 le Telangana a mi 174 thi ahi. Andhra Pradesh a 80, Karnataka a 79, Haryana a 70, Punjab a 63, J&K a 53, Bihar a 36, Uttarakhand a 21, Kerala a 19, Odisha a 10 chule Jharkhand le Assam a 8 cheh thi ahi.

Chhattisgarh le Himachal Pradesh a 6 cheh, Chandigarh a 5, Puducherry a 2, Meghalaya, Tripura le Ladakh a 1 cheh thi ahi, tin Health Ministry in aseiyin chule natna jeh a thi hop 70 val hi natna dang dang aneijeh ahi, ati. Maharashtra a Covid case kisei 1,010,141 lhing a, atam na pen ahi in, aban a Tamil Nadu- 40,698, Delhi – 36,824, Uttar Pradesh 12,616, Rajasthan 12,068 chule Madhya Pradesh 10,443 ahi.

West Bengal, Karnataka, Haryana le Bihar a Covid case hi 10244, 6516, 6334 le 6103 a kal ahi. Andhra Pradesh, J&K le Telangana a 5680, 4730, 4484 a kal a, Odisha le Assam a 3,498 a kal ahi. Punjab le Kerala a 2986 le 2322 lhing ahitai. Uttarkhand a natna nei 1,724 hi a, Jharkhand a 1,617, Chhattisgarh a 1,424, Tripura a 961, Himachal Pradesh a 486, Goa a 463, Manipur a 385 chule Chandigarh a 334 lhing ahitai.

Ladakh a covid case 239, Puducherry a 157, Nagaland a 156, Mizoram a 104, Arunchal Pradesh a 67, Sikkim a 63, Meghalaya a 44, Andaman and Nicobar Island a 38 chule Dadar and Nagar Haveli le Daman and Diu a case 30 cheh um ahi.

 

Leilon le Konsakhul Village Authority in NSU Haraothel thu a SKSCJDO demna nei

Kangpokpi, Jun. 13(UNA): Kangpokpi district hopsung Kangchup Geljang Sub division noiya um Leilon Vaiphei le Konsakhul Village Authority hon NSU Haraothel thu a Senjam Khunou and Senjam Chirang Joint Development Organisation (SKSCJDO) demna anei uvin ahi.

Khupneilun Vaiphei, Leilon Vaiphei haosapu le AB Lempu, Konsakhul kho haosapu in soi akaina thuso a chun, tua ministry, BJP lamkaina sorkar hi ngohna ahilou kisem ho sulham dinga mopohna nei ahi, ati. L Tangnuam @ Haraothel kho hi tu naicha kisemdoh a kisei ahi in chule Misc. case No. 434 of 1827-28 (SI Duncan in soi abol) na a jouthu a statement kipe ahi. SKSCJDO in nam kah a kiboina thei ding lunggel ahi tia jong asei ahi, ati.

Vannoi pumpi a COVID 19 natna douna a gal um ahi in, state sorkar in natna douna dinga abol thei jouse abol ahi, tin asei uvin chule igam u Manipur a kingailutna aumding hi kisem jing chule deisah hi ahi, ati. National Sports University, Haraothel Village project a natohna akipat hi pachat umtah ahi, hiche hi Congress lamkaina sorkar vaipoh sunga tohgon ana kisem pan ahi. NSU kisahna natoh achelhah hi akimvel a nam chom chom chenna khosung ho a dinga kinepna lentah hi ahi, ati.

State sorkar in igam uva hitobang project lentah agon kipa aumin, ahivanga gam leisei anei (land holding) thu a boina aumhi boina lentah ahi. Tua BJP lamkaina sorkar in administration amanchah a khosung kinai ho kah a boina sem nadinga tohgon anei hi dem thei tah ahi, ati. NSU Complex sah nadinga kipe chule kimang gam hi thinglhang miho – Konsakhul le Leilon Vaiphei khosung miho a ana hijing ahi in, a itih a kon hi ahi, tin aseibe uvin ahi.

Court of PMSD Hill Mics. Case no. 388 of 1920-21, Court of Hill Minister misc .no.94 0f 1947-48, court of SDC Sadar and Thoubal Hills Criminal case no 121/ S + Th. Hills of 1952, court of Chief Commissioner Manipur CC Hill cril. Appeal case No.5 of 1953, (C.Gimson ICS, President Manipur state Darbar dated 06/12/1920 le R.Khuthing, BA, MBE M-C minister ri/c Hill administration 02/07/1948, Maisnam Nabakumar Singh SDO Sadar dated 08/11/1950 chule R.P Bhargava, Chief Commissioner Manipur dated 07/08/1953 in soi akaina) a jong gamsung hi thinglhang miho a ahi kisei ahi.

Hiche ho tilouva jihtho a record jong um ahi. Masang a Senjam Chirang le Senjam Khunnou pu pa teho kiloikhomna ana hoi/phat dan thu asei uvin, tua hi thinglhang miho (Konsakhul le Leilon Vaiphei) chule Senjam Chirang le Senjam Khunnou kikah a hetman louva kihetkhelna um a, boina thei dinmun a um ahi, tin asei uvin chule nam jouselungmong a chenkhom ding chule Manipur gam phatchomna dinga pu pa gam todoh dinga kigotna aneiyu thu jong aseibe uvin ahi.

Nepal in Political Map thah sem nadinga thulhuhna anei hi gamgi thu a kihetthem to na um kipalkeh na ahi, tia India in demna nei

New Delhi, June 13: Nepal Parliament in agamsung political map thah update bol nadinga Constitution semphatna dinga kilungtoh tah a vote apeh u nidan phabep jou, Saturday nikhon New Delhi in sem thu a gam kikehlet hi kisang louding chule chejom louding ahi, tin demna anei uvin ahi.

Map thah a hi Lipulekh, Kalapani le Limpiyadhura hi Nepal in agamgi hop sunga asei ahi. “Nepal House of Representatives in Nepal map khel nadinga Constitution Amendment Bill phatsahna anei tauvin, hiche a hi India gam hopsung jong pang ahi ti thu hetpehna akineiye. Hiche thu a dinmun kicheh tah a kisei ahitai”, tin MEA spokesperson Anurag Srivastava in Bill kiphatsah chungchanga thudoh donbutna aneiyin ahi.

Tua semthu a kagam ahi tia aseiyu hi thusim lui (historical fact) a kon kisem hilou ahiloule aphotchenna umlou ahi in, tosot thei ahipoi. Hiche hi gamgi thu a kihetthem to nadinga kihouna chelha jing kipalkeh na ahi, ati.

Nepal in kipunkhom vetsahna a Nepali Congress (NC), Rashtriya Janata Party-Nepal (RJP-N) le Rastriya Prajatantra Party (RPP) panna opposition party hotoh Nepal Constitution Schedule 3 semphat nadinga bill phatsahna aneiyu ahi in, national emblem update bol na le kinel baotamna thei map akoi be u ahi. Bill phatsah ahina dinga Nepal House of Representative member 275 umna a two-third majority ngai ahi.

June nisim 9 nikho a Parliament in India toh Nepal gamgi thu a aboi laiya political map athah sem nading a Constitution amendment bill proposal ana bol u ahi. Bill hi tua National Assembly a athot diu, hitobang process ma ma chelha kit ding ahi. Nepal Communist Party (ruling) in National Assembly a two-third majority anei ahi. National Assembly in bill provision deilou aumle lawmaker hon apohdoh nading uva nidan 72 phat apeh ding ahi.

National Assembly in Bill aphatsah jouteng President henga apehlut diu, authentication abol jouteng le Bill hi Constitution a akoi diu ahi. Sorkar in achesa Wednesday nikho a hiche toh kisaiya ‘historical fact le evidence’ la dinga member 9 umna team of expert ana semdoh ahi. Ahivanga, diplomat le expert hon hiche chungchang a sorkar tohgon thudoh aneiyu ahi in, map akisodoh a Cabinet in phatsahna anei jouva ipijeh a task force kisem ham, tia thudoh aneiyu ahi.

Nepal Prime Minister KP Sharma Oli in nikhat masanga India in kihouna sem ding lunglutna anei hile asuhlhapna umthei ding ahi, tia anasei ahi. India in achesa May nisim 20 nikho a diplomatic dialogue gon dinga anasei ahi in, ahivanga foreign secretary level a kihouna hi tuchan geiya chelha theilou lai ahi.

“Community transmission” umlou nading’a kigin them ding’a Minister Nemcha in sei

Kangpokpi, Jun. 13(UNA): District sunga Covid positive case ginchat louva gangtah a akal Minister in-charge for Covid-19, Kangpokpi, Senapati, Nemcha Kipgen in district sunga community transmission aumlou nadinga District machinery hon pan alah jing akipapina thu aseiyin ahi.

DM/DC Kangpokpi Somorjit Salam, IAS, SP Kangpokpi Hemant Pandey, IPS, CMO Kangpokpi Nilakanta Singh, ADM/ADC Kangpokpi, Lalramsang Infimate, MCS, AC to DC Kangpokpi, Kaigoulal Kipgen, MCS, SDO jouse, EE PHED/PWD, MSPDCL chule district sunga frontline worker adang dang ho Social Welfare and Cooperation Minister Nemcha Kipgen lamkaina a Conference Hall, DC Office Kangpokpi a meeting abol nauva apang uvin ahi.

Tuchan geiya natna hise douna dinga district sunga natoh chelha ho chule frontline worker le official hon hahsatna ato ho thu jong asei uvin ahi. Minister Nemcha Kipgen in district machinery ho apachatna thu aseitoh kilhon a community transmission aumlou nadinga pan alah diuvin temna jong aneiyin ahi. Khamnathei ju, talab, khaini le adang dang jouse Institutional Quarantine centre sunga kha dinga asei uvin ahi, ajeh chu thil chohna a sum kilheh to na aumhi ‘community transmission’ sodoh na hithei ahi, tin jong thulhuhna anei tauvin ahi.

IQC vekol a pang SDO jousen asunga umhon SOP ahiloule IQC guidelines ajui tei nading uva awareness abol diu chule dan ajui lou uva ahile community transmission umthei ahi ti ahetchen sah diuvin jong aseibe uvin ahi. IQC a nen kipai hohi phatah a boh ding chule hiche chungchang a Shija Hospital bio-waste material toh kijahto dinga jong asei uvin ahi.

Chief Medical Officer, Nilakanta Singh in koi hijong le community transmission vendoh nadinga nikho 28 ‘surveillance’ a um angaidan athupi na thu aseiyin, chule IQC a aumna ding phat akichai nunga negative hi ho discharge kibol thei ahi in, hijong le akisei nikho 28 suhlhing nadinga home quarantine sanga Community Quarantine Centre a aumdiu hi pha jo ahi, ati.

Social Welfare and Cooperation Minister Nemcha Kipgen district sunga pan la jouse chunga kipathu aseiyin chule IQC a dan palkeh aum a ahile achung uva aphatcha action akilah thei nadinga report abol diuvin thuhilna jong aseiyin ahi. District Magistrate le SP Kangpokpi in IQC ho avil (inspection abol) a chule dan palkeh ahiloule umchan phalou tho ho chunga action alah a Sajiwa jail sunga akoi dinga jong thuhilna aneibe in ahi.

Minister nu in District Screening Screening Centre in-charge le CMO Kangpokpi in first aid box jong pehdohna aneiyin ahi. Alangkhat a, centre a um mi phabep hi aumna ding nikho 14 alhin tah vanga test kibolna sample result mu loulai aum e, ti thulhut jong aumin ahi. Test bol dinga athot u sample akehkhat hi result umlou lai ahi. Tuchan a district sunga covid 19 positive case 47 um ahi in chule natna a kon akijen dam district sunga umlou lai ahi.