Reamei thi thu a thudih a thutanna aumna dinga kijotna nei holeh...

Reamei thi thu a thudih a thutanna aumna dinga kijotna nei holeh police ho kinotona a mi 12 kisukha; NH a phat teplou bandh bol dinga JAC in gihna nei Moreh bandh lahdoh hita: Kiphinna bol hon AR camp um-khum; Moreh CSO hon government heng’a ngehna phabep nei Kangvai Block sung’a mipi ho ading’a Free Eye Screening & Cataract Surgery Camp chelha Police hon Chungamlu thu a kiphinna nei ho thal akap khum ATRPFM in demna nei Forum for Naga Reconciliation (FNR) in tup le doi inei uhi kigel phao hite tia sei J&K kikhen hin gamtum thumna dinga Tripura party ho atilkhou ahi: Debbarma

152
0
SHARE

Reamei thi thu a thudih a thutanna aumna dinga kijotna nei holeh police ho kinotona a mi 12 kisukha; NH a phat teplou bandh bol dinga JAC in gihna nei

Imphal, Aug 22(ET): Athi sa kimudoh a min atha hiding a ginmona um Reamei Chungamlu chunga thudih a thutanna thum dinga kisemdoh JAC hon kiphinna abol nauva police hotoh kinotona sangtah aumin, thilsoh a police 4 leh journalist khat panna a mi 12 akisukha in ahi. Police hon tear gas, mock bomb ho anakap u ahi.

Thangmeiband mun a kijotna nei ho police hon lamtin ding agot nauva kinotona soh ahi. Police ho rally bol ho alamtin uva kinotona aum jouva Reamei Chungamlu thi thu a kisemdoh JAC hon National Highway a phat teplou bandh bol ding chule Zeliangrong ho chenna a state leh national project ho kha soh dinga phondohna anei uvin ahi.

Tarung Community Hall a kon Thangmeiband lang jon a kijotna aneiyu ahi’in, Savio School kom, Thangmeiband Sinam Leikai a police hon alamtin ahi. Kijotna neiho nomang nadinga police hon smoke bomb, mock bomb leh tear gas aman ahi. General Secretary, Rongmei Naga Students Organisation, Zenthui Pamei in police ho chonval demna sangtah aneiyin, mipi veng dinga umhon mipi abulu ahi, ati.

Themmona neiho akimat nadinga boina sem louva kijotna kinei ahi, tin jong aseiyin ahi. JAC hon memorandum apehlut ding phalpeh louva Chief Minister demna thu jong aseiyin ahi. Reamei Chungamlu hi achesa August nisim 17 nikho a Moirang Pangsang Leikai a kikhailih sa kimudoh ahi’in, min atha hidinga ginmona aneiyu ahi.

Thilsona mun’a kitongkha nupi ho panna mi 6 hochu hospital alhut uvin, Tarung Community Hall ah mipi kihoukhomna khatjong aneiyuvin ahi.  Akiha tohkhah hochu RIMS a kipat in Shija hospital analhut  uvin ahi. Police ho chaloh dan hi langnei sihnei bol ahiuve tin Rongmei Naga Student Organisation Manipur a President chuleh JAC member jong hi Jeanthui Panmei in thuso mihotoh akihoulimna ah aseiye. Mona nei police officer ho chung’a gotna alhun kahse’a Zeliangrong area ho’a kibol State project ho chung’a khamgahna kikoi ding chuleh National Highway ho kikhah ding ahi tin aseijin ahi.

Moreh bandh lahdoh hita: Kiphinna bol hon AR camp um-khum; Moreh CSO hon government heng’a ngehna phabep nei

Imphal, Aug 22(ET): Hill Tribal Council (HTC), Kuki Women Union and Human Rights (KWU and HR), Kuki Students’ Organisation (KSO), Moreh Youth Club (MYC) chule All Moreh Traders Association (AMTA) in nidan 48 bandh abol ni ni alhin nikho a jong Moreh tolpi a bandh ahat in, kiphinna bol hon AR sepai ho camp sunga aum diuvin asam uvin ahi.

Wednesday jingkah nidan 5:00 a kon civil society organization hon ni-ni umding bandh apat u ahitan, 43 Assam Rifles, Moreh in Moreh Gate no 1 a mipi che le asuboi uvin, hahsatna asempeh uve tia ngohna anei uva, AR ho chaloh leh kimanchahna demna sangtah aneiyu ahi. Kiphinna bol ho lunghanna asan jeh a police honjong alona je ahe pouvin chule Assam Rifles honjong bandh bol ho vettup na a thohhatna sangtah avetsah uvin ahi.

Bandh sunga dukan leh sumkol veina mun jouse, government office hojong akikhah soh in ahi. Mun chom chom a bandh toson hon tyre meiya ahal uvin, AR camp kom a jong tyre ahal uvin ahi. Mun tamtah a sepai holeh kiphinna bol numei ho akinoto uvin ahi. Bandh bol hon Pallel-Moreh lamlen ating uvin ahi. Bandh kichai masanga sorkar in thumna suhlhap nading angaito louleh kiphinna khoh cheh bol dinga tu masanga Civil society hon gihna jong anei ahi.

Bandh vesui ding in Manipur Police akon IG Law and Order L. Jayenta in Moreh lam ana jon in ahi akiti. Tuni Moreh sunga thinglhang mi kiloikhomna le IG Law and Order L. Jayenta  in  SP Tengnoupal Th. Vikramjit Singh jao na in kihou khomna ana nei uvin ahi. Bandh khumkha na dingin tunin Moreh police station a toumun kiphin khat jong ana bol uvin ahi chule Assam Rifles duty che ho jong ana ting tan uvin ahi. ICP mun a Assam Rifles buthah a hung ho jong bandh tosot hon che sah lou in ana nung sol uvin ahi. Tengnoupal DC in mipi ho dei ho Assam Rifles lamkai ho ang a hetsah ding ahidan le kholchil na kinei ding ho toh kisai in hetsah na anei toh lhon in mipi ho in bandh chu tunin ana nga uvin ahi. Bandh kichai toh lhon a jing nikho jingkah lam nidan 7 vel leh Hill Tribal Council office mun a maban a bol ding ho chunga kihou khomna umding ahi.

Assam Rifles ho chunga lunglhai lou na vetsah na a bandh ana kikou toh lhon in Moreh CSO hon Forest minister heng a ngehna phabep ana nei uvin ahi. Ngehna kinei ho chu Assam Rifles in nel, cheh, thing le pon Moreh gate no. 1 akon hung ki polut ho asuh genthei lou ding u chuleh Namphalong akon bel sem ho le thil kiu dang dang a kivei ho abol gimlou ding u, adamlou kivetsah khopi kom kho ho akon khojin teng hung ho asuh genthei louding u, Assam Rifles in Moreh sunga, police, excise, le forest natong ho dan a aum u angah ding u, Moreh post akon Col. Sumit Sood le Major Ankit agan na thei pen a lahdoh hi lhon ding chuleh Indian constitution Article 20 toh kisai a niseh a nehding kilo ho hinna kihol na a koimaan asuhboi louding tiho ahi.

Kangvai Block sung’a mipi ho ading’a Free Eye Screening & Cataract Surgery Camp chelha

B.Lalboi Gangte

CCpur. August 22(ET): Shija Eye Care Foundation, Autonomous District Council CCpur, Young Vaiphei Association (YVA) Kangvai Block leh YVA Joint Hqtr Imphal tohgon nan  tuni jinglam nidan 10:00 in Kangvai Community Hall, Kangvai a Free Eye Screening & Cataract Surgery Camp anei uvin ahi.

Hiche kin’a chun mi 300 val in kivetsahna anei uvin, Camp Phatsung hin  mitlang boina chom chom neiho akivetsah uvin, Cataract, mit laimu kang, Junlhum jeh’a mit lang boina nei, Glaucoma, pen lhah apat mit hatlou, Cornea & Pterygium, Conjunctivitis & Allergy, mitsan leh thah kiti ho vetna anei uvin ahi.

Hiche  Free Eye Screening & Cataract Surgery Camp neina  chung’a damdoi poimo holeh Surgery bol ngai dingho manbei in abol peh uvin, Damdoi inn ah nini geman jong Shija Eye Care Foundation in manbei ah agesah ding uh ahi.

Hiche  Camp ading in Shija Eye Care Foundation akipat Dr. Sachindra Laishram, Consultant Opthalmologist, Shija Eye Care Foundation; Ningthoujam Isori Devi, Opthalmic Nursing Officer, Shija Eye Care Foundation; Thongam Abenao Devi, Opthalmic student of Shija Para Medical of Research Academy, Laishram Metuchanchan, Opthalmic student of Shija Para Medical of Research Academy, H. Bruno Singh, Ophthalmic Assistant, Shija Eye Care Foundation, P. Serina Devi, Opthalmic Assistant, Shija Eye Care Foundation, L. Chemsilla Devi, Ophthalmic Assistant, Shija Eye Care Foundation; Robin Thoidingjam, Counsellor; Maibam Rohenjit Singh, Camp Organiser leh Somokanta, Driver hon mitlang boina neiho vetna anei uvin ahi.

Chuleh  Shija Eye Care Foundation in ahileh India Govt. in  2020 chan’a India gamsung pumpi ah khomu nalang ah boina neijeh’a mitcho umsah louding ti’a Mission apatdoh u Vission 2020 Eliminating Avoidable Blindness” kiti tohmol sona ding’a CCpur district ah khomu nalam’a boina neiho ading ah Cheingkawnpang ah Shija Vission Centre jong ahongdoh vin, hiche Centre ahileh Monday apat Saturday chan kihong in, Shija Hospital, Imphal apat Eye Specialist Doctor ho gal kei jiu ahi.

Hiche kin’a K. Chung Vaiphei, President, YVA Kangvai Block in aseina, block sung mipi kholna ah phat ong neilou jeh ham, gamlhat jeh’a Hospital nailut theilou leh nailut joulou ho kholna ah tuni’a Free Eye Camp kinei ahi in, Camp ah mi 200 vel kivetsah thei dia panlah ahi vang in mipi lang apat ngeh na aumdung jui’a mi 300 val akivetsah uvin ahi ati.

Chuleh Genneikhup Vaiphei, Deputy Chairman, ADCC in Chongkhozou Area ah hitobang camp nei nading akigon vang in  khosit jeh’a neiding alemchang theilou jeh’a YVA Kangvai Block leh YVA Joint Headquarter, Imphal toh kitho khom’a tuni’a Kangvai Community Hall mun’a chelha ahi in, maban ajong district sung’a hitobang Eye Care Camp gong nom, kiloi khom na aum leh kithopi dia kimansa ahi dan atahlang in, aphat ding kiseithei nai hih jong leh Santing, Chongkhozou area mipi ho adia jong hitobang Camp neihi ding ahi ati.

Police hon Chungamlu thu a kiphinna nei ho thal akap khum ATRPFM in demna nei

Imphal, Aug 22(ET): All Tribal Rights’ Protection Forum Manipur (ATRPFM) in Chungamliu Riamei kitha thu douna a kiphinna bol Kabui numei khat police ho meithal kap na a akisuhkhah demna sangtah anei uvin ahi.

State sorkar leh police hon achesa August nisim 17 nikho a ajineina a inmun a miphalou hon atha vangsetna toh nu chunga thudih a thutanna apeh da theilou ding chule thutah aselguh louding ahi, tin ATRPFM thuso chun aseiyin ahi. Tribal numei ho chunga thilse lhung ho Forum in demna sangtah aneiyun, thilsoh hi toltha na ahi, ati.

Ama leh ama kithat tobang a kivetsah ahi’in, chule state sorkar leh authority hon thudih a thutanna nei louva akoi theilou ding ahi, tin aseiyun chule postmortem report jong authority hon aselguh theilou ding ahi, ati. Themmona nei ho amat uva, gamsung dan dungjuiya achungthu atan diuvin Forum in ngehna aneibe in ahi.

Forum for Naga Reconciliation (FNR) in tup le doi inei uhi kigel phao hite tia sei

Dimapur, Aug 22: phat le nikho achal bang’a, thil jouse kitol mang ahin, thu le laa jong nikho khat le amang jitai, hijeh chun, Nagate, kigel pha u hitin, doi le tup inei hou jong velvet kit u hite tin, Forum for Naga Reconciliation (FNR) hon mipite temna aneiuvin ahi.

FNR in amudol in, 21st century ahitan, India in lunggel thah aneiding ahitan, phat masa a konna eki phinnao, Naga gam le nam dinmun hi velvet  na pha asa uvin ahi,  “Naga homeland” chung changa hin, amite dia kitah na, ponthona leh democratic justice dinmun thudoh ahung ging doh tan ahi.

Achesa kum1960, a chun Naga mite lah’a divide and rule policy jeh a kibungkhenna umjong leh tunvang, boundary umlouvin Nagate chengkhom hen, phatmasa laiya suhkhel ho banjop in umda hen lang, khonung khankho ding gelnan naga khat le naga kidou da hen, conflict leh militarization jeh’a maha suhdam joulouva um’a tua, nopsah na ding phat mu di konna epidinga ekilung to lou uham tin PNR in aseiye.

 Naga te dia kito mona um doh ho, changa kivai pohna, politics jeh a kibung khenna hohi hi, lhagao langahat, lamkai hon bou kikhel na ahin poh lut thei ahin, hijeh chun, Nagate lah a lamkai ho hi mipi te lung hol them, japi kingaina thei ho hihen tin PNR in temna aneiye.

Kikhelna dihtah hi, kithokhom na a konna bou pengdoh ding,

Naga Homeland sunga alen aneo in, “political reconciliation”  nei u hitin, e kamcheng u, e kaa nao, sorkar jahphah hihen chuleh namkhat kikah a thisan kiso na ho jeh a PNR in lunghemna aphong in ahi. ‘Naga political group’ hojong kibungkhen louvin, ki sumsel tona beiya,

‘Nagas without borders’ lungtup enei uhi domsang cheh u hite tin PNR in ngehna anei ye.

J&K kikhen hin gamtum thumna dinga Tripura party ho atilkhou ahi: Debbarma

Agartala , August 22: National Federation of New States (NFNS) in Tuesday nikhon Jammu and Kashmir gamsung Union Territories ni a akikhen hin gamtum athum nading uva hangsanna apehbe ahi, tin asei uvin ahi.

NFNS hin gam neo neo gam tum sem nadinga kiphinna alamkai ahi. Khumulwng kiti Agartala khopi a kom km 25 a gamlha mun a Friday nikho teng ‘statehood’ kithum tosot na a rally bol dinga NFNS lamkai hon asei uvin ahi. Indigenous People’s Front of Tripura (IPFT) hi Tripura gam a NFNS a pang khat ahi. IPFT in achesa 2009 kum a kon gam tum semdoh dinga kiphinna aneiyu ahi’in, Tripura Tribal Areas Autonomous District Council (TTAADC) upgrade bol ding a aseiyu ahi. Hiche hop sunga hi mihem 12,16,000 val cheng ahi.

IPFT spokesman Mangal Debbarma in TTAADC headquarter, Khumulwng mun a rally kibol na a Meghalaya Chief Minister Conrad Sangma leh NFNS general secretary Manish Tamang in houlimna aneiding ahi, ati. “Centre in tu naicha J&K gam UT ni a akhen hin gam tum thumna dinga NFNS ho thahatna apeh cheh ahi”, tin Debbarma in aseiyin ahi. Friday nikho a umding rally hi J&K kikhen thu a hetthei umtah  hiding ahi, tin aseibe in ahi.

New Delhi khopi a Thursday nikho a ‘statehood demand’ thu a IPFT delegate hotoh meeting bol dinga ngehna PM Narendra Modi in eisanpeh u ahi, tin jong aseiyin ahi. “Friday ni a rally bol nadinga kisahlelna aumjeh a PMO in nikho thah eisempeh diuva ngehna kinei ahi”, tin Debbarma in aseibe in ahi.