Rajya Sabha in ‘Triple Talaq’ bill phatsah ta

Rajya Sabha in ‘Triple Talaq’ bill phatsah ta

258
0
SHARE

Rajya Sabha in ‘Triple Talaq’ bill phatsah ta; Narendra Modi in lolhinna lentah ahi, tia sei

New Delhi, July 30: Rajya Sabha in Tuesday nikhon Triple Talaq bill phatsahna anei tan, Narendra Modi lamkaina sorkar dinga goljona lentah ahi. Rajya Sabha a Triple Talaq bill thu a phat sottah kinelkal na anei jou uva vote avol uvin, 99-84 vote a ajou uvin ahi. Parliament in Triple Talaq bill asuhmang a Muslim numei ho chunga thil dihlou lhung suhdihna anei ahi, tin Narendra Modi in aseiyin chule hiche hi numei leh pasal thakhat ahina ding, society a kibahna aumna ding ahi, ati.

Muslim Women (Protection of Rights on Marriage) Bill hi tua President Ram Nath Kovind in phatsahna apeh nadinga athot diu ahi. Bill hi President in phatsahna anei teng leh sorkar in notice asodoh ding chule achesa February lha a kisem doh Triple Talaq ordinance khel a kimang ding ahi. Triple Talaq thu hi Narendra Modi sorkar chule Opposition ho kah a achesa December 2017 kum a kon kinel baotamna leh boina lentah ahi’in, December 2017 lha a Lok Sabha a Bill ana pohdoh masat pen u ahi.

Hiche kum August lha a Supreme Court in ‘Triple Talaq’ kichepi hi dan toh kitohlou ahi’in, ‘talaq’ kiti thucheng thumvei seiya iji kikhen hi kisang louding chule dan dihlou ahi, tia aphondoh ahi. Triple talaq thu hi term kichai jeh a Lok Sabha ana kisuhmang jeh a athu ana seilhah man louvu ahi’in, atil a hi Rajya Sabha in ana phatsah lou ahi. 2019 Lok Sabha election a Narendra Modi lamkaina sorkar in election ajo kit jou kal masa a Lok Sabha a hiche bill apohdoh uva, aphatsah u ahi. Lok Sabha a ‘majority’ ahijeh uva bill phatsahna dinga hahsatna ato louvu ahi.

Bill hi Tuesday nikho a Rajya Sabha a apohdoh uva NDA noiya um Janata Dal (United) in adoudal ahi’in, hiche jeh a NDA thahatna hi 113 a kon 107 a nemsuh ahi. JD-U in Bill thu a vote apeh louvu ahi’in, Telangana Rashtra Samiti injong vote apehlou ahi. Arun Jaitley, BJP, Oscar Fernandez, Congress eh Sharad Pawar, NCP panna a member 14 Rajya Sabha kikhopna a panglou ahi.

Sorkar in bill phatsahna dinga vote 109 angaichat ahi’in, Biju Janata Dal in Triple Talaq thu a NDA atosot jeh a MP 113 tosotna aneiyu ahi. TRS jong vote pehna a apang pouvin ahi. NCP, Samajwadi Party, Congress member phabep jong vote pehna a apan loujeh uva Opposition ho vote lhahsamna um ahi’in, Rajya Sabha hi Opposition ho majority hina ahi.

Police leh JAC member hon Babysana aumna hostel room vil kit u; Police hon Principal nu chapa lhumpen man

Imphal, July 30 (UNA): Mipi lungboi suhthengna dinga JAC chule police hon Standard Robarth School a Babysana thi namun avel a avil kit uvin ahi.

JAC in hiche mun vil dinga thumna anei ahi’in, IGP Clay Khongsai, Imphal West SP K Meghachandra, Special Investigation Team, Forensics leh JAC hon school avil kit ahi.

Manipur Police a kon SIT hon Standard Robarth Higher Secondary School, Canchipur Founder leh Principal Pheiroijam Landhoni chapa lhumpen Pheiroijam Robinson aman uvin, um 14 a upa simlai nu thi dan thukholna dinga amat u ahin  nikho 7 police custody a umding ahi.

Ngohna kineiya Pheiroijam Robinson (32), s/o Pheiroijam Ibohal hi Monday jan nidan 9 don a Special Investigation team hon amat ahi. Pheiroijam Robinson akimat thu akithan jouva school toh kisaina neiya mi tamtah in Imphal Police anokhom uvin ahi. Police hon Robinson amat jouva Chief Judicial Magistrate, Uripok Cheirap Court, Imphal West Judge Lamkhapao Tonsing anga a pui uvin, IPC section chom chom leh Juvenile Justice (Care and Protection of Children) Act noiya Tuesday nikhon hehna asem khum uvin ahi.

Alangkhat a Imphal West SP K Meghachandra, IGP Clay Khongsai, Forensic Science leh Special Investigation Team member holeh JAC hon Babysana athi na dormitory avil kit uvin ahi. Imphal West SP K Megachandra in thuso miho akimupi na’a, kum 14 a upa simlai nu hi athidan ginmona kinei ahi’in, boarding a um simlai ho vetup ding leh mopohna neiya school authority leh warden in gelkhohna aneilou ahi, ati. “Social media a ginmo thu chom chom akiseiyin, atamjo hi abul umlou jouthu ahi’in, police hon dihtah a thukholna anei ahi”, ati.

Thulamleng moh sem loudinga temna aneiyin, chule police hon thukholna anei toh kilhon a mi tamtah thudohna anei ahi, tin aseibe in ahi. Police hon hiche thu toh kisaiya boina thu semdoh thei ding thu social media a seiya mi ni amat ahitai, ati. Koitobang athu he a ‘witness’ a pang thei aumleh police ho akithopi diuvin jong ngehna aneiyin ahi.

Babysana thu sorkar in suhthip ding agot ahi: MLA Joykishan

Imphal, July 30(ET): Standard Robarth School a kai Babysana thi thu a authority hon pan alah ding MLA Joykishan in aginmo na thu aseiyin, sorkar suthip theiya thunei tah um hidinga ginmo ahi, ati.

Thangmeiband a a inmun a Joykishan in thuso miho akimupi na’a Manipur gam mi simlai Pravish Chanam case jong vaipo hon asuhthip got a CBI apehdoh lou ahi’in, Babysana chung a thilsoh jong hitobang ahi. Pravish Chanam in thudih a thutanna amu kahse a thudih a natohna umlouding ahi’in, Babysana thu mipin asuhmil tokah a phat kisuhmang tho jing ding ahi, ati.

JAC in sorkar henga case CBI khut a pehdoh dinga asei jouva CBI akipelut tai, tia aseiyu ahi’in, ahivang a proposal bou athot nahlaiyu ahi’in, hiche jong hi FIR section 305, IPC noiya ahi, tin MLA pa in aseiyin ahi. Thepna neiya JAC member a pang advocate hon asei jouva IPC section 302 kikoi be kit ahi, tin Joykishan in aseiyin, sorkar in section chom chom noiya avel vel a iti proposal athot ham, ati. “Case hi CBI khut a kipelut lou ahi’in, gamsung miho sorkar in ajoulhep loudinga temna kanei ahi”, tin aseibe in ahi.

Chule Babysana chunga thudih a thutanna dinga pan la a AMSU chule simlai kiloikhomna adang dang holeh CSO jouse apachatna thu jong aseiyin ahi.

Mi bolthei tah hon RIMS a gam lah ding gou

Imphal, July 30(ET): Regional Institute of Medical Sciences (RIMS) Imphal sung a gam leiset acre 33.78 hi mi bolthei tah hon lo ding ago uvin ahi.

Imphal khopi a um thuso khat in RIMS complex sunga pukhri aum thu asei jouva hiche thu kihedoh ahi. Thuso mihon hiche thusim akhol nauva pukhri aum’e tihi adih ahi hetdoh ahi’in, ahivang a pukhri hi RIMS authority hon alaiyu ahipon, The Popular Pisciculture Association kiti NGO a member bolthei tah hon abol ahi’in, amaho hin RIMS a hiche kah loding agot jing u ahi.

July 23 jingkah a Director, RIMS chule Head of Department jousen Chief Minister N Biren Singh hiche chungchang thu a akihoupi uvin ahi. PPA member phabep jong pang u ahi, tin thulhut in aseiyin ahi. Chief Minister umna a akihounau thuchen ho kihe loulai ahi’in, ahivang a thulhut dungjuiya PPA member hon Chief Minister heng a RIMS sunga um gam leiset acre 33.78 hi amaho a ahi ti photchen ding agot uva, slide show chule document phabep jong avetsah uve, ati.

Ahivang a PPA ho thusei hi Director RIMS in asan pehlou ahi’in, state sorkar in RIMS in alo gam leiset acre 108.384 apeh a chule acre 93.46 jong (Mechanised Farm pattaland gam leiset acre 65.64 panna) AIIMS, Delhi Delhi status a upgrade bol nadinga 2007 kum a RIMS Director in asei asanpeh a apeh ahi, tin nelkalna aneiyin ahi. RIMS hi tua Union Ministry of Health and Family Welfare noiya um ahi’in, Union Ministry of Health and Family Welfare a order beiya koiman gam alah theilou ahi.

Gotwi hah jeh’a phailei hectares 56,000 vel chang tu nathei hi talou; Manipur State hi Drought State ahi, ti’a Agri. Minister in sei

 B.Lalboi Gangte

CCpur. July 30(ET): Manipur State Govt. in tukum phailei lho nathei ding’a dei bang tah’a go ajuh tah lou toh lhon’a phailei Hectares 56,000 alen twi um lou jeh loubol nathei ahi tah lou jeh in Manipur State hi Drought state hi dan in anaphong uvin ahi. Chuleh hiche thu’a Agriculture Minister V. Hangkhanlian in aseina’a go juh lou jeh in chang kithe leh kiphut saho tamtah jong agop lha gam tan ahi. Chang kiphu namun Hectares 20,000 vel’a go twi umlou jeh leh twi longlut ding umlou jeh in lou ho bol theilou in aum tah jeh in State Govt. in Cabinet meeting thupeh nabang in Centre Govt. heng’a Drought State hi ding’a aphondoh ding’a recommend abol nung in tu hin leiset got hin setlam amano diu diu tan ahi. Manipur State sung’a chang kitu thei na gam leiset Lakh 1.95 hectares apha in, hiche ho lah’a thinglhang lou Jhuming Cultivation bol theina mun Hectares 78,000 aum in ahi. Tua bang’a go ajuh lou jing peh leh phailei mun phaitol aum 56,000 hectares vel hi leiset khekeh ding dinmun in aum tan ahi. Chang leh muchi kitusa hojong nisan akah gop theiding din mun jong aum gam tan ahi ati. Aman aseibe na’a State Cabinet in Central Government heng’a Manipur State hi drought-affected State hi ding’a phongdoh ding in recommendation pe jong leh State’s Relief and Disaster Management Department in official tah’a aphondoh ding dol ahi ati. Relief and Disaster Management Department in State pumpi leiset phat lou dan official tah’a  aphondoh teng leh Agriculture Department in documents poimo chom chom ho Relief and Disaster Management Department ah apelut ding ahi. Ahin tuni chan in Relief and Disaster Management Department in Manipur State hi drought-affected State hi official tah’a imacha aphongdoh pon ahi. CCpur District sung’a jong Water Pump Set apoimo leh lahlut leh koi hi ding chuleh phailei chang kitu thei lou na mun ho’a Alternative plan koi’a umho Agriculture Department in loubol mite heng’a ahopdoh ding ti ahi. Tuhin CCpur District sung’a adeh’a IFCD Department in avetkol Khuga Dam Right & left canal jot pa naho’a phailei chang kitu na pari 2000 val in twi amu lou jeh in chang phu nathei ding din mun in aum naipon ahi tinjong aseibei.

Hiche toh lhon’a Manipur gamsung’a twi lhahsam jeh’a Bishnupur leh Imphal East District sung’a loubol ho ding in Agriculture Department in phailei’a twi lahlut thei nading water pump-sets hopdoh beding in lampi aholbe jing nalai uvin ahi. Chuleh phailei kilho namun akhitkeh nalou ding in jong Agriculture Department in Water Pump set ana homdoh in ahi. Tuhin Water Pump set 100 vel state sung’a manchah ding in achobe in ahin State sung vang ahung lhung naipon ahi. Ahung lhung phat phat leh Department in twi lahna mun ding ahol’a hiche mun ho’a akoi ding in atahlang in ahi. Loubol na mun leh chang kituna ho losam ta jong leh muchi chom chom loubol mihon atu theina ding uva lampi thah gon peh ding’a Agriculture Department in ahol jing lai ahi.

Imphal West Commando hon KNF cadre 5 leh manchah man

Imphal, July 30(ET): Imphal west police commando in tuni in Pather Bazar, Phayeng Khoyathong crossing le New Checkon akon in KNF(P) mi 5 ana mandoh uvin ahi.

Akiman doh ho chu Lalkhohao Khongsai @ Robin @ Lalneo (23) S/o Dongkam Khongsai, Motbung Tongneh Village, Kangpokpi District, Manipur, David Neihsial @ Hendavid (35) S/o (L) Khama Neihsial, Kolasip Village, Mizoram A/P B. Venom Village, Churachandpur,  Ngainu Kipgen (32) D/o (L) Paolunlal Kipgen, Leikot Village, Motbung, Kangpokpi district, Manipur, Thangminlen Haokip @ Lelen (34) S/o Letkhomang Haokip, N. Boljang, Kangpokpi district le Lamgoulen Khongsai @ Gougou Khongsai (19) S/o Seikhomang Khongsai, Loibol Khunou, Kangpokpi district, Manipur akon ahiu vin ahi.Police Commando ho in akiman doh ho akon in A1 Rifle khat MA-3 MK II tia kisun, HK (Heckler Koch) Rifle, HK 33 5.56×45 tia kisun, Magazine 2, 5.56 chang 130 lam le mobile phone 6 lam ana mandoh uvin ahi. Thuso chun asei be na a Thangminlen Haokip @ Lelen (35) le  David Neihsial @ Hendavida (35) chu S/S PRO, KNF(P)  Demkhohao Kipgen (41)achesa 22/07/2019 a Kangchup Chiru a kithana a pan alah lhon ahi akiti.

Thangmeiband a IED bomb kisuhpoh; Mi-3 kisukha

Imphal, July 30(ET): Thangmeiband munna TVS scooter show Ei Meitei maiya nidan 6:50 pm vel a IED bomb kisuhpoh jeh in milham mi thum tobang akisuhkha uve akiti.

Mithum suhkhah a umho chu Thangmeiband Hijam Dewan Leikai akonna M. Bhisma jinu Mayanglambam Surbala(38), Thangmeiband Hikam Fewsn Leikai akon N. London jinu Naorem Bindibala(33) leh Thangmeiband Hijam Dewan Leikai akon (L) H. Mani chapa Puyam  Manihar(60) ahiuve.

Suhkhah a um mithum ho jouse chu minor injuries pum in RIMS hospital munna akithahlutne, tin police thulhut kimu chun aseiben ahi.

IG Jone I C. Khongsai, SP I/W K. Megachandra jaona a Manipur Police a High Ranking Official hon amun leh RIMS munna suhkhah a umho vilna ana nei uvin ahi.

Manipur sunga thagum kiso apunbe deilouna jeh’a mipi kijotna um

Imphal, July 30(ET): State sunga thagum kiso punbe jingna Manipur government in avenbit lel na chunga deilouna leh doudalna jeh in United Women Rights Defender (UWRD) ponlap noiya mipin kiphinna neiyin kijotna ana nei uve.

July nisim 4 nikhoa Human Rights Defender U Nabakishore chanu U Natasha a hinkho kisuhmang pehgotna chunga nat ho jouse authority in amatdohna dingin kiphinna neihon ngehna ana nei uve. Standard Robarth Higher Secondary, School, Canchipur a hostel room sunga July nisim 18 nikhoa Babysana kithana melsetah jong demna anei uve. Mipi aja’a sim hon kiphinna’a kijotna anei masang uva chun Imphal East sunga Leikhurembi Nandav, Khurai munna tu masanga chun public meeting lentah jong ana nei uve.

State sunga numei leh chapang ho chunga thagum kiso apunbe jinga chunga government in avenbit lel jeh in United Women Right Defender a Convenor, Moirangthem Bina in alunglhai loudan thuphon aneiye.

Natasha chunga life attempt kibol na leh mun ni a police personnel hon Palace Compound munna WAD Office gihsalna aneiyu jong authority sangjo akon aguhcha thil kigong hi dinga ginmona aneidan aseiye.

Khurai Laikhurembi Mandav akon Lamlong Bazar jotpa a Imphal East sunga Kongba channa mipi kijotna chu ana kineiye. “NGOs chunga kigihna hi demna kanei uve Babysana kithana nunga thudih hin podoh uvin,” tin mipin slogan ana sam uve.

 Alangkhatna, hitobang kiphinna kinei sunga deilou um thilsoh asodoh louna dingin Imphal East Police hon jong phaten ana veng uve.

CM in avella Helicopter service hongdoh kit ding

Imphal, July 30(ET): Chief Minister N. Biren Singh in Manipur Helicopter service hondoh na athah nei kit ding ahi. Tuni in Global Vectra Helicorp Ltd  toh MoU  ana kinei toh lhon thil ijakai chai in ana um tan ahi. Ministry of Home Affairs (MHA) Helicopter Service hin Imphal International Airport akon a Jiribam, Tamenglong le Moreh kikah a passenger ho apohle ding ahi. Chief Minister pa in asei na a Helicopter service hi aman lhom na thei channa kin chal a hiche mun gamlha le ache hah ho lhun thei na dinga natoh apat ding ahin, hiche natoh na hi gamsung a khantou na hung lhun nakhat ahi ati.   Akijang ding helicopter BELL 412EP, mi 8 apat 12 chan tou thei na ding hi ahung lhungding August nisim 10 nikho le Imphal International airport hung lhungding, weather condition dung jui a trial jong abol jing ding ahi akiti. Hetthei khat chu hiche helicopter service adinga ana kijang helicopter chu amasa a Pawan Hans Ltd. te a ana kijang ahi.