President Rule hi BJP MLA kiphinna bol ho dinga achaina lampi ahi’in,...

President Rule hi BJP MLA kiphinna bol ho dinga achaina lampi ahi’in, adeiyu ahi: Political observer 2015 Framework Agreement a kisei ho thu NSCN in seidoh ‘Frontier Nagaland’ gamtum thumna awgin hat cheh cheh; Centre in Multi-Disciplinary Committee semdoh

1013
0
SHARE

President Rule hi BJP MLA kiphinna bol ho dinga achaina lampi ahi’in, adeiyu ahi: Political observer

Imphal, Sept 12(ET): Thinglhang district a Assembly constituency phabep a State Assembly General Election a dinga candidate phabep in campaign apan tai, ti thu akisei toh kilhon a kiphinna bol MLA, tua New Delhi a camp bol hon Chief Minister panmun a kon N Biren Singh lahdoh nading tohgon akhel uva, 17th Manipur Legislative Assembly suhmang nadinga centre a lamkai ho henga asei diuvin political analyst hon aginmo nau thu asei uvin ahi

Chief Minister Biren hi Home Minister Amit Shah leh BJP lamkai luboh phabep in adeilhen ahi’in, ahivanga kiphinna bol BJP MLA hon thumna aneijing u ahi, tin thulhut in aseiyin ahi. Centre a BJP lamkai ho N Biren Singh khelding lamkai lhenna dinga alungboi uve, tin thulhut in aseibe in ahi. N Biren Singh hin ama langa pang MLA 30 anei nahlai ahi.

Manipur Legislative Assembly Speaker akikum masangse a Biren in angaicha jat aneiding ahi. Manipur gam a politics dinmun hi Centre a lamkai hon ahet ahi’in, September nisim 20 chan angadiu tahsan ahi. “Centre in tuhi aphat ahijeh a state assembly hi ‘animated suspension’ a akoi maithei ahi”, tin political observer khat in thuso miho henga aseiyin chule gamsunga politics a boina umhi kisulham loulai ahi, tin aseiyin ahi. Prime Minister Narendra Modi hi India Prime Minister kipehlutna sangtah nei ahi, tin amin seidoh ding nomlouva political observer khat in aseiyin chule NSCN-IM thu leh kinel baotamna CAB thu hi President Rule a gamsung akikoi teng asuhlhap na phat phapen hiding a aseiyin ahi.

2015 Framework Agreement a kisei ho thu NSCN in seidoh

Kohima, September 12: Lamchom chom in nasatah a asei jouva National Socialist Council of Nagalim (NSCN) in Framework Agreement thu aseidoh tauvin ahi.

Civil society organization leh akidoupi u kiloikhomna chom chom in achesa August nisim 3, 2015 kum a India sorkar leh NSCN-Isak Muivah in Prime Minister Narendra Modi leh Home Minister anahi Rajnath Singh umna a New Delhi khopi a Framework Agreement soi kaina anei thu aseidoh diuva thumna anei jing u ahi. Ahivanga NSCN thingnoi hon kinoptona kisem hi ipi thu ahi aseidoh louvu ahi’in, aphat ahiteng leh kisei ding ahi, tia ana im chahkheh u ahi.

Framework Agreement a ‘sovereignty’ thu asei uvin, hiche hi NSCN leh India sorkar in phabep phabep asei ahitai, tin thulhut khat in aseiyin chule alangni chamna neitah a akiloikhom theina ding thu jong apang’e, ati. Ahivanga Union Government in Indian Constitution toh kitoh a kipunkhom ding thu asei ahi’in, NSCN hon Naga chenna jouse a chepi dinga aseiyu hi aseilouvu ahi.

Framework Agreement bou hilouva NSCN hon kihouna a asei houjong aseidoh louvu ahi. ‘Naga Peace process’ hi amachal a kisei ahi’in, ahivanga NSCN hon Naga Flag leh Naga constitution achom a thumna aneiyu hi athumu pipen ahijeh a hiche hi asan louvu leh soi kai loudinga aseiyu ahi. Hiche hi ‘Yezhabo’ tia aseiyu ahi. Centre in Naga flag achom ahiding nopna aneiyin ahivanga government office ho hondohna aneithei lou ahi, tin thulhut in aseibe in ahi.

Naga ho kipunkhom ding hi Manipur sorkar leh Meilhei kiloikhomna hon sangtah a adoudal jouva boina thu hi kinga ahi. Hetthei khat chu state sorkar in Naga mite dinga Naga customary law asem ahi. Chule Naga thu Governor level a akisei hi NSCN ho alunglhai loujeh a Interlocutor athah thumna aneiyu ahi. Centre Interlocutor RN Ravi hi Nagaland Governor dinga alhendoh jou uva kon NSCN hon Interlocutor thah apeh diuva thumna aneiyu ahitai. NSCN hohin phat masa a banga kinoptona soi kikaina a Governor hon pan lentah alahna hohi bol kit tahlou dinga aseiyu ahi. Achesa 1947 kum a Nine Point Agreement, 1972 kum a Revolutionary Government chule 1975 Shillong Accord soi kikaina tobang bol kit ding adei louvu ahi.

‘Frontier Nagaland’ gamtum thumna awgin hat cheh cheh; Centre in Multi-Disciplinary Committee semdoh

Dimapur, Sept 12: Naga Peace Talk thu amachal jig laiya Frontier Nagaland tia kisei gamtum thumna asang cheh cheh in, Centresorkar in athu vesui dinga Multi-disciplinary Committee’ asemdoh in, Eastern Nagaland district ho boina avetlhah diu ahi.

Multi Disciplinary Committee hin tribal kiloikhomna chule Eastern Nagaland a um district jouse a CSO hotoh kihouna sem ding a mopohna aneiyu ahi. Eastern Nagaland People’s Organization ahilouleh ENPO in achesa 2010 kum a kon gam tum athum u ahi’in, achesa lha phabep sunga thumna aneiyu sang cheh cheh ahi. Gamtum thumna aneiyu nahsah louva koithei ahilou Centre in ahet jeh a August lha a ENPO hotoh kihouna sem dinga kouna apeh u ahi.

August nisim 13 nikho a ENPO delegate holeh Union Cabinet Secretary Rajiv Gauba in New Delhi khopi a kihouna anei uva, meeting kichaiya ENPO thumna hi political level a pohdoh dinga MHA in kitepna anei ahi. Centre in Multi- Disciplinary Committee asem thu a lunggel aseidoh loulai ahi’in, ama ama district leh block unit in Committee henga scheme ahilouleh project proposal apehlut lou diuva thuhilna aneiyu ahi.

ENPO in Centre phat ateppeh jouva kihouna sem dinga kouna aneiyu ahi. Hetthei khat chu ENPO lamkaina noiya Eastern Nagaland a rally chom chom anaum ahi’in, Frontier Nagaland state chom sem dinga August 24, 2012 kum a dinmun alah u avel a asei kit u ahi. Centre in Naga politics thu suhlhapnadinga pan alahjing lai ahi.

Alangkhat a Centre in asem Multi-Dsciplinary Team’ hon ENPO panna a Eastern Nagaland a kon kiloikhomna chom chom toh Kohima khopi a kihouna anei uvin ahi. Committee hi memorandum dungjuiya kisem ham tihi suhthengna anei diuva thumna um ahi, tin ENPO president K Yimchunger in aseiyin chule Centre henga ENPO in memorandum apeh ahi, ati. Memorandum a hi ENPO in athum sangpen hi statehood ahi, tia kisei ahi.

Internet jeh a thuso hom hon natoh neilouva umding lungkhampiu

Thoubal, Sept 12(ET): Internet hi tukhang a dinga phattheina ahivanga thuso hom ho (hawker) ho dinga lungjinna ahi, ajeh chu mi atamjo in news (thuso) amu masanga thusoh ahet u ahitan, chule cell phone ahilouleh internet umna computer a news sim man peh ngailou ahi.

Smartphone hi mi jousen achoi jou tobang ahi’in, achesa lha phabep sunga newspaper subscribe bol a mi phatah a lhomsuh a ahi, tin Tairenpokpi a thuso hom a Tomba in aseiyin ahi. “Tu masanga chu inn 200 vel a news kahop ahi’in, tua hi akehkhat tobang inbou alah ahitai”, tin Tomba in aseiyin chule khovei teng news subscribe bol a alhomcheh kit ding alungkhampi na thu aseiyin, insung vahna dinga ka natoh kakhel ngai dinga kagel ahi”, ati.

Newspaper industry a hawker hohi poimo tah ahiuvin, dap lai, nisat noi, go noiya news ahop u ahi. Hawker hon suty aphon a ahileh print media in publication angah ahi. Yaoshang festival sunga hawker hon news hop ding anop loujeh uva ni 5 sung thuso kisolou ahi’in, newspaper a dinga suty asot na pen ahi’in, hichan geiya hawker hon tha aneiyu ahi.

Tomba in anatoh khel ding chan a lunggelna anei hi ‘Telegram’ kiti App call jeh ahi, tia asei ahi. Telegram App a hi newspaper atamjo kisim thei ahi. “Imphal a hawker hon thinglhang a keihon kato tobang hahsatna aneilou diu katahsan e, ajeh chu amahon jingkah matah a thuso ahop theiyu ahi’in, keiho thinglhang a hohin thuso alhun vahthei loujeh a nilhah langa bou kahop u ahi”, tin Tomba in aseibe in ahi. Tomba hi lekha he, internet phatchomna he a ahi’in, PDF format a e-newspaper full page akipeh jeh a anatoh asuhboi ahi.

News bol hon thuso social media a upload abol uhi angah thei diuva ahileh hawker ho ichan gei hamkhat a houidoh ding ahi, ati. Web portal a revenue mu nading tamtah um ahi’in, ahivanga hard copy print newspaper a akimu toh web portal a hi tekah thei ahipoi. Hawker leh media house in sum amuna amansah masanga media house hon thuso hi social networking site a so louna dinga dan khoutah asem ngai ahi.

CJM Churachandpur in bail’a lhadoh dia mi 4 aphatsah nunga jong judicial custody’a tang nalai

Imphal, Sept 12(ET):  Achesa july nisim 5 2019 nikho’a CJM Churachandpur in judicial custody a konna bail a lhadoh dia aphatsah mi 4 chu ginchat umlou tah in custody a atangden nalaiye tin Imphal Times thuso miho henga thulhut akipelut in ahi.

UNLF thingnoi mi 2 chuleh PREPAK thingnoi mi 3 ho hi  Assam Rifles hon june nisim 2 nikho’a chu Singhat Border Area a konna amat u ahin, Assam Rifles hon Singhat police station ho khutna apedoh ahi. Akimandoh Galguh bol ho hi, achungthu’u akitan kah a, ni 13 songkhul tangdia kiphatsah ahiuve. Mi 5 lah a mi 4 hi Legal Aid Counsel (LAC) khutna kipelut kit ahin, amahon july nisim 4 nichun, bail a lhadoh na din remand abol uvin, amaho chungthu seina dingin Chief Judicial Magistrate First Class, Churachandpur in charge Letkho Kipgen henga akipelut in, july nisim 5 nikho chun bail akiphat sah peh un,  PR bond dangka 60,000 apeh jou nung un, july nisim 19 nikho’a chu thutanna  anga dingdoh kit dia kiphatsah ahiuve. Ahin tuni chan in amaho hi songkul a atang jinguvin ahi.

CCpur  SP in khopi sung’a Helmet Drive TCP in achelhah pi dan leh Security Force leh CCpur Police ho panlah dan phongdoh

 B.Lalboi Gangte

CCpur. Sept. 12 (ET): Amrita Sinha IPS SP/CCpur in tunin ama office chamber mun’a Press / Media ho anakimupi na’a CCpur District sung’a cham leh lungmon na aum theina ding’a CCpur Police ho panlah na leh accident tamtah peldoh theina ding’a Traffic rule toh kisai’a Police in panlah na aneiho mipi ho hetding’a tahlang na ananei’a CCpur District, Lamka khopi sung’a gari apunbe jing toh lhon in accident jong niseh in aum jing tan ahi. Chuleh accident akipat kivenbit theina ding leh traffic dan hoitah’a jui ahi theina ding in CCpur Police in nasatah in pan akila jing in ahi.

Helmet khuh louho toh kisai’a SP/CCpur thupeh anei bang in James Vaiphei Officer In-charge TCP in Helmet khuh louho Toffee ape in chuleh panlah nachom chom mangchan in mipi hon Helmet akhuh tei na ding uvin pan ala jing uivn ahi. Khatvei vei leh Helmet khu louho fine anakibol ji in hitobang Helmet khuh lou ho fine kilaho CCpur district mipi hon thildang’a heikoi lou’a Helmet khuh lou jeh’a fine kibolsah hi Traffic daan’a Helmet akhuh ding kiti apal keh jeh’a Police in ki fine sah ahi in Police hon athu thu’a fine abol’u ahipoi  ati. Kingon achun Sangboi Gangte, Addl SP (Law & order) leh Lawrence K. Munluo Addl SP (operations)  tenin jong pan anala lhon in ahi.

Amrita Sinha in aseibe na’a Traffic rule jui ding ti’a akisei bang hin mipi te jouse in jui cheh leu hen koima fine kibol ding ahi. Traffic rule hi mitakip ading in ahoi in chuleh traffic rule jeh’a khopi lamlen jong ong thol tah’a um thei ding ahi naban’a mipi te ding’a jong lamvang ding ahi. Traffic rule ho kijui cheh heng lang hileh accident tamtah jong kipel doh thei ding ahi. Modified Silencer ho jong vetlhah na natoh kipan ahi dan aphongdoh in chuleh tua panlah nahi maban’a jong kisu jom jing ding ahi ati. Law & Order dinmun toh kisai’a khopi sung’a mipi ho lah’a lungmon na um lou jeh in CCpur district ah Law enforcement Agency chom chom District Police, Assam Rifles leh IRB in daan leh thupeh hoijo aum theina ding in sun leh jaan in pan ala jing uvin ahi. Hiche ho toh molso nading in District Police ho team ni in akikhen in team khat’a VDF, IRB leh Police personnel agom’a 150 umna in Route chom chom’a nilhah seh leh patrolling achelha jing uvin ahi. Police hon daan leh thupeh dinmun hoitah aum theina ding’a panlah na anei ho mitakip in kithopina aphecheh ding uvin temna aneiyin ahi.

Alangkhat’a Law & Order suboi thei ding ho’a kon kivendoh na ding in District Magistrate in 144 CrPC nilhah nidan 6:00 akipat jingkah nidan 5:00 chan khopi sung’a aphongdoh in ahi. Police hohi mipi ho suboi ding’a (harassed) um hilouvin mipi ho lungmong tah’a koi’a pang ding ahi jeh uvin mitakip in Police ho chung’a lungmonna anei cheh ding uvin atahlang in ahi. Tuhin CCpur leh Pherzawl District sung’a VDF leh Police agom in 1,399 aki um in ahi tin Amrita Sinha in aseibei.

MP Dr RK Ranjan in sorkar tohgon alolhinna dinga media in pan lentah anei ahi, tia sei

Imphal, Sept 12 (ET): Press Information Bureau, Ministry of Information and Broadcasting, Government of India, Imphal in ‘How to make our cities better’ ti thupi a Conference Hall, Hotel Classic, Imphal khopi a ‘Vartalap’ media workshop abol uvin ahi.

MAHUD Director Harikumar in Director, PIB, Imphal Abhishek Dayal umna a thaomei avah in workshop hondohna aneiyin ahi. Jingkah session a resource person li- Harikumar, Director (MAHUD), Y Narmada Devi, State Mission Director, Town Planning Department, M Manas Singh, Associate Town Planner in Smart City Mission, Pradhan Mantri Awas Yojana (Urban) leh Atal Mission for Rejuvenation and Urban Transportation (AMRUT) thu a ‘power point presentation’ ape uvin chule N Sabita, Gandhian Thought expert in Gandhi thuthot thu a houlimna aneiyin ahi.

Nilhah session a Lok Sabha MP Dr RK Ranjan Singh leh Director General, NEZ, PIB, LR Vishwanath chief guest leh guest of honour a apang lhonin ahi. MP Dr RK Ranjan in ahoulimna a media hon government scheme chom chom ho thu hillhang nadinga pan lentah anei ahi, tin aseiyin ahi. Media in Imphal khopi hi Smart City Mission a semdoh nadinga pan alah diuvin jong temna aneiyin ahi.

Sorkar tohgon ho phondohna aneiyin, na kitong ho media in avetsuiya chule sorkar in asuhkhel aum jongleh asuhdih nathei ding a pan alah diuvin aseiyin ahi. Khopi sung athenna ding, nen leh boh ho mun kitup a pai ding thu jong aseiyin ahi. Media inbou mipi ho panlah nadinga geldohna apeh thei ahi, ati.

Smart City kisemna a nen leh boh chule nullah vetsuiona hi hahsatna khat ahi’in, ikimvel suhtheng jing nadinga gamsung mihon pan alah ngai ahi’in, lamlen a nen pai ho media hon alim alah a asodoh diuvin jong aseibe uvin ahi. Hiche teng lebou khopi thenging ahi, ati.

Mipin Imphal khopi khonung a ahoi leh athenna dinga thuhilna nei dinga thuso mihon pan alah diuvin temna aneiyin ahi. DG NEZ, PIB Guwahati LR Vishwanath in guest of honour hina a houlimna aneiyin, media panlahna thu aseiyin ahi. Khopi sung athen a ahoina dinga media in pan lentah anei ahi’in, mipin alunggel angaidan asei louva ahileh khantouna dinga sorkar in lungtup anei amolso theilou ding ahi, ati. Media in pan ahalah cheh a sorkar tohgon hohi abon a akhantou theina dinga anatoh kalval a pan alah diuvin temna aneibe in ahi.

Vumhao Govt. H/S a jilkung 6 bouvin Nursery-Class X simlai 370 hil; Govt. in thinglhang gam’a simlai ho ngaichat suhbulhit pehlou

B.Lalboi Gangte

CCpur. Sept. 12 (ET): Churachandpur District hopsung Henglep Sub-division sung’a Government themjil na inn ho Zonal Education Office (ZEO) leh Autonomous District Council (ADC) ho vetkol nanoi’a um ho nahsah lou leh simlai ho themjil na School ho’a ngaichat hou suhbulhit pehlou in mopoh na neihon akoi jing nalai uvin ahi.

Tuni Henglep Sub-division sung’a simlai ho themjil nalam’a khou-khah ding leh simlai ho ngaichat ho vetsui peh ding’a um simlai kiloikhomna Kuki Students’ Organisation – Henglep Block lamkai hon themjil na inn vetlhah na ananei phatsung  uvin simlai ho genthei naleh jilkung nilhing lou ahidan ana mudoh uvin ahi.

Hiche toh lhon’a Tuilaphai kho mun’a um Vumhao Govt. High School mun’a Class A akipat Cl – X chan themjil simlai 370 aum in ahin chapang ho kichuh nape ding in jilkung 6 bou Education Department in appoint abol in ahi. Hiche achun Rashtriya Madhyamik Shiksha Abhiyan (RMSA) akon in jikung 2 leh Education Department in jilkung mi 4 bou ape in chuleh IV grade khat toh akoi in ahi. Vumhao Govt. H/S mun’a jilkung 6 bou aum na chung chang thu’a Lunkhosei Haokip, Vice President, KSO-Henglep Block in houlimna aneina’a Tulaiphai khosung bou’a khangthah themjil naho ding bouva Vumhao Govt. H/S hi um ahipon Tuilaphai Area sung’a kon kho chom chom’a khangthah ho ding’a jong um ahi. Hitobang’a jilkung 6 in Nursery akipat Class- X chan simlai ho kichuh na apeh hi thil hahsa tah ahi toh lhon’a mopoh nanei Govt. injong hitobang themjil na inn ho khohsah nalen tah ahin peh’a hiche Govt. H/S ahi jilkung 10 beh ahin koilut beding in temna anei in ahi. Hiche Govt. H/S a jilkung kining lhinlou nathu’a mopoh nanei Education Department in akinthei lam’a ahin gelkhoh ding leh simlai ho makho ding gelna’a jilkung ahin koibe ding in ngehna leh temna anei in ahi. Hostel mun’a twi nehding leh kiman chah nading lhahsam jeh in hiche mun’a um simlai hon hahsat na lentah jong atoh uvin ahi.

School Management Committee, Member Jangminlal in aseina’a mopoh nanei Education Department in hiche themjil na inn’a jilkung ding ahin koibe leh phate cha’a simlai ho class lah kitup tah’a kichelhah pi thei ding ahi. Ahin tun simlai ho jong agenthei uvin chuleh jikung ho jeng jong aki genthei in ahi ati. Autonomous District Council (ADC) vetkol nanoi’a Phiran Kho aum Lower Primary School hi education lam’a improvement mu ding aum pon ahi. Ajeh chu hiche mun’a hin school chapang 20 bou aum in chuleh simlai ho kivon na ivet leh Govt. akon School uniform kipe lhingsel muding umlou in Govt. in ahop school uniform ho jaolou school chapang aum in ahi. Hiche school ahin class 1 akipat class II simlai ho bou akai uvin chuleh School building jong sah chailou in akikoi in ahi. Hiche mun’a hin jilkung 2 koi ahi na’a jilkung 1 bou in niseh’a simlai kichuh na apeh ahi. Chuleh hiche mun’a School building hi 2017 kum’a 30% tobang akichai jou nung in tuni chan’a banjom talou in akikoi tan ahi. Ahin hiche School building kisah nading’a Fist installment hi department hon apeh doh jou’u ahi tan natoh na aban sutjom lou’a akikoi nung’a department in natong ho holdoh na neilou’a School building mangthai ding’a hitia akoi jeng hi School um na kimvel’a chapang lekha sim ho ding gelkhoh naleh khoto na aneilou uhi simlai hoding’a vangset um tah khat ahi.

Hiche School building ahi ding bangtah’a jotheng ahung hi’a hiche mun’a kai school chapang hon lungmong leh lhamong’a athemjil anei ding’u khohsah na leh gelkhoh na neipeh ahi nading in mopoh nanei hon natoh bangkhai asutjom thei nading uvin KSO-Henglep block in ngehna anei in ahi. chuleh hiche natoh neiho injong gamsung mipi ngailut na achan’a kho nung’a chate ho kichuh namunpi ahung hi’a hiche school akon chate ahung khanlet thei nading’u ngaito pum’a natoh bangkhai ho ajotheng ding uvin ngeh naleh temna aneiyin ahi.