PR kouna a soi kai dehdeh tau (Delhi langa che kitet jing’u)

PR kouna a soi kai dehdeh tau (Delhi langa che kitet jing’u)

41
0
SHARE

Aug 22, 2020 Editorial

PR kouna a soi kai dehdeh tau
(Delhi langa che kitet jing’u)

Tuchung Works minister Biswajit Delhi langa kikou hi ipi hung kibapeh diham akihetlou vangin Presidents’ Rule (PR) hung naina hithei ahi. Chief Minister (CM) a pat minister/MLA ho Delhi langa aki toltol jiu hi kivaipohna kisuhlou mutheina ahi. Hiche hi vaipo lamkai hon kivaipohdan leh politics bolje ahetlou jeh u hijeng ahi. Coalition govt adet/alhou theipoi kiti jongleh chutilom’a boina thei ahilouna di chu Coalition partner lah a MLA 4 chieh nei party 2 – NPP le NPF jao ahijeh in hiche party teni hi alunglhai laisea boina umlou di ahi. NPP in kiphinna aneiji vanga NPF hin tuchan’a boina asemkhah loulai ahijeh a CM Biren dia chutitah a boina hiloudidol ahi. Daan to kikal’a thil kibol jouse Assembly Speaker aki ngoh vanga CM le Centre a chabi tuh a pang ho seisei abol bou hidi ahi. CM Biren nin Raja Sabha MP thah leng Sanajaoba Delhi a anapui jong chu centre BJP lamkai ho kom’a ama (CM) dinmun kisemtupna dia thu gasei ‘vanomba’ (lobby) abolna khat bou hidi ahi. NPP minister 4 ho Delhi langa anacheu chu amahon macham’a cheu hilou, party lamkai jin apui joh anahivanga Imphal a boina ho Delhi langa thuneina choi ho thu thua aum vetsahna bou ahi. Hiche jouvin BJP Minister 4 Delhi lang’ah ana kitol kit nun ama ama department thua gacheu ahi tijongleu asung langa ipi thu agasei diujong hisapma het jeng thei ahi. Ruling minister/MLA ho Delhi langa agachejiu leh Camp gei anabol jiu jong thukhat ahitan tun MLA leh Congress a kon haina nei MLA 5 kisan Delhi langa CM in agapui kiti gei hung umdoh ahitai. Hiche congress Ex-MLA ho BJP a lutna le lahlutna chu Delhi lang khel khel’a gabol ngai louva Imphal a kichai jeng thei mama ahi. By-election a BJP ticket munai dia Delhi cheu ahi jong koiman a-imjou pouve.

Covid jeh a lockdown chakhat umjing hihleh Manipur govt chunga hiche khuche thu tia kiphin’a lamlen le bazaar dunga mipi kijotna ham, bandh bol ham dim ta maithei ahi. Congress Vice President Moiranthem Hemanta in govt nin covid natna akimaitopidan ademgopsetna tekahna jatjat aneilo tai. Covid natna vei symptom kihelou (asymptomatic) ho Covid Care Centre (hospital) a koi louva ama ama inn cheh a akijen diu ti govt order hi adihloudan mijouse covid natna ah thigam hen tina ahi tia M.Hemanta in asei chu dih chet hihjongleh govt nin covid positive jouse jenna di hospital le mijen di Doctor le Nurse aban aneitahlou jeh hipen ahi. Covid umlouva jong angaija ana adammo dim jing hospital ijat aum vanga a-ong um louna tamji ahi. Tu hi doctor le Nurse tamtah lah (recruit) phaat ahin Covid natna a mi athigam jouva lahdi ti ahileh gal kichaija sepai kila tobang hidi ahi ti jong Hemanta in govt ademna ahi. Govt nin covid hi alonaje ahetlou ahipon, hiche natna sanga govt sunga boina joh akhohsah joh hidi ahi. Delhi a chelena Chartered Flight manle sum kisumang jouse covid douna’n kineile jong tu dinmun lom hilou maithei ahi. Hiche kahlah hin BJP minister 2 paidoh a Congress a kon BJP lut thah minister hisahdi kiti ahung umkit hi tahso ahung hileh PR dia CM in soi akaina hung hijengdi ahi. Ajeh chu Ex-Congress MLA ho cabinet peh malah BJP minister khat khel’a BJP MLA mama khat minister akipeh jongleh boina aumdi hetsa ahi.