Power kichu thua boina kichailou (Koiman mi adasasa a ju donsahlou)

Power kichu thua boina kichailou (Koiman mi adasasa a ju donsahlou)

46
0
SHARE

Power kichu thua boina kichailou
(Koiman mi adasasa a ju donsahlou)
    Deputy Chief Minister Y Joykumar in Home department portfolio atup jeh a portfolio anatuhsa lah a athupipen Finance akipeh kit jou nung’a jong lunglhai dehlou hi sakhi tuplel’in ngalchang atup ahintho thei ahi. Ama (Joykumar) Finance portfolio ana kilahpeh jeh a govt sunga boina hung um’a NPP Minister dang ho kisan tugeija minister ahinao kilepeh louva um ahi. Joykumar Finance ana kilahpehna chu ningkum (2019 June) lang anahitan, hichea pat boina hung kipan ahihipeh e. Tukum March lha a Minister (ex) Shyamkumar disqualify ana kibol masang’a anatuh Forest portfolio chu Dy. CM Joykumar ana kipe ahin chomkah louva hiche jong kilahpeh kit ahi. Joykumar minister portfolio ana kilahpeh lona jeh ho chu asunglanga ipipi thu kitomona umjongleh Finance chu sum tamtah avalsetna kikaidoh (overdraft) kiminputsah anahi. Forest hung kilahpeh kit chu Covid Lockdown hung umto lhon’a PDS anchang MLA/minister ho kihop thua Chief Minister (CM) toh thu ngei louva kihouna jeh a kihe/kisei ahi. Deputy CM Joykumar hi lekhathem, miching leh kum le lha a CM (Biren) sanga voh eh chon masa khat jong ahi. Ahin Democracy kivaipohna’a hi isanga kum upa le chihna thepna langa nasajo khat jong chu ‘protocol’ dungjuija alenjo ahileh jana neitah a “Sir” tidi hi umchan le chena thupi khat ahi. Meihei ho dehdeh lah a “Bhebar” kiti mi jana neitah a bol hi agel thupi dehset u ahi. Kum’a upajo le lekha hetna langa asangjo hijongleh Deputy CM khat nin CM khat jana neilou tah a amin ham’a akou/aphah jing hitaleh kitona umloudi mong ahi. Ahin hiche ho hi BJP le NPP kikah a kiboina jeh thupi hilouheldi ahi. Kiboina jeh pipen’a kisei chu CM in imajousea Govt Officer khat le ni toh kihoutoh a minister/MLA dang ija selouva anopnop abol jeh ahi akiti. Mi 2 kikah a changtum kivetdana jeh ham’a govt apumboi jing thei kiti hi gam (state) pumpi dia vangset le jachat umtah ahi.
Power kichuna jeh a kiboina akichai theilouvin NPP minister dang hojong hitihchan ahiti kimohtun uhi amahodileh agam mipi te dia manna lentah ahi. NPP minister ho sanga amanggop deh vang chu govt kikhel diham tia suhchop touchop anatho MLA phabep toljepna’a kineilo ho ahiuve. BJP MLA resign kibol holah a mi khat (Subhas) in abolkhel dapveh akihetdoh phatna Congress ho angohlo vang’a ima aphachomdi umtalou ahi. Thildang danga bothut policy pohdoh jong aphatna tah aumji vanga politics a hi oltah a geltohsel nunga thulhahna (decision) boldi ahidan politics a kichem tamtah ahelou um ahi. Judon ho koiman ada sasa’a akam akeh a ju adonsah umlou vanga midang hon adonsah dan’a ngoh umji ahi. Hiche tobanga hi BJP MLA haina lekha anapea kimohtunlo khat nin Congress hon hung jamlut nin tia eina kou jeh uva MLA haina lekha gei kanapehlo ahi ahinti ahitai. Hiche hi adihlou hita jongleh Congress hon adih ahi tibehleu phadi chu koima Congress a hung jamlut din akikoupoi tia Congress hon donbutna/hilchetna aneipai kit u ahi. Congress hon BJP MLA ho anakouloi umjongleh anople noploudi chu akikou ho thu ahin koiman meipum toh asuhtoa akou hilouheldi ahi. Ada ho chu ada, avangse in umjeng uhenlang NPP hojong portfolio kipepe kilah jeng uleh govt kivaipohna a boina hi kichai jengdi ahi. BJP honjong apehloudiu ahileh NPP/Dy CM pa tup portfolio kipelou di ahi tin kicheh in seijengleu hung kicheh tante.