Power duchatna ngen (Aumsa khat jop sang’a adang khat boldi ti)

Power duchatna ngen (Aumsa khat jop sang’a adang khat boldi ti)

262
0
SHARE

Power duchatna ngen
(Aumsa khat jop sang’a adang khat boldi ti)
           Thil thah kiti jousen hi mijousen adei ahidehpoi. Thil thah kiti lah a Political Party leh thingnoi thingchung kiloikhomna thah kiti hi mipin adeimopen hinalai ahi. Manipur a Congress a kon BJP anajop MLA 7 holeh aumden nalai MLA 12, agom uva MLA 19 hon Regional political party thah khat semdohdi ago uve kiti thu hung umkit hi ichan ahinphah diu seithei ahiloulai vang’in hinboldoh tahbah jongleu achesa kum 20 masang’a MSCP bang’a asot hin diu tahsan umlou ahi. MSCP chu Congress a kon anachomdoh MLA hon anabol uva chomkhat chu State govt jong anapoh thou u ahi. Tua Congress MLA 19 hohin Regional political party thah khat boldoh jongleu govt (ministry) semkhamla ahipouvin, ‘anti-defection law’ injong aphal kitlou ahijeh in BJP a lutna thei gelna ahidi hi anailampen ahi. Party thah asemtheilou diu vang’a Congress MLA 27 lah a 19 hin BJP ham, party dang khat ham’a alut uleh ‘two third majority’ (hop thum’a hop ni) ahijeh uva anti defection law in aphal thei ahi. Hiche chet hi akidoile akituppipen ahidi ginchat ahi. Centre a BJP hung hat kit keu hitalouva Congress hi alhahdah nakah a lamkai pha umlou jeh a akit MP election teng jongleh kinepna umbehsehlou ahijeh a Manipur Congress MLA hojong hin akit Assembly (MLA) election a BJP ticket munathei tia angka akhotpan u ahidi hi tahsan ha umjo ahi.
     Tua Centre lang’a Congress ho kibolna hi abolthei domdom ho abanban’a Case lui ho kiphoh khum uvin akilang’in Centre lang’a hobon ahiti kithamleh State Congress a boltheidom ho jong ipi ahung kilodem ti gichatna khat jong um maithei ahi. Ahin Manipur a Congress MLA 19 hohin suhkhel kaneijeh in eihung kibolchah khante ti kichatna jong hipontin akit MLA election a power a umnathei tilang hidapveh jodin akimui. Manipur sehseh a Regional party thanglha jengta a athah khat bolbe di kiti chu abolgo ho tilou kon jong ahinai atidi tahsan umlou ahi. Political party hihen, thingnoi party hihen, civil kiloikhomna hileh, aumsa hijat lah a khat penpen ijopma isuh hat jongleh ahimolouhel di khat ahi. Political party 8 kipunkhomna ‘Manipur Democratic Alliance’ (MDA) kiti jong um ahin athua chu hat lheh leu kilom jeng, ahia MLA khat beh neijong aumkitlou jeh un ipi sei jongleu kon thulah a akoilou u ahi. MDA hon Naga Framework Agreement thua kihouna in Manipur gamgi atohkhah theiloudi tia apen vang uva MLA khat jong neijoulou ahijeh un kon thupi lapia agellou diu ahi.
MLA jouse Ruling party hijoujilou, hinama jongleh abon uva Minster hijoulouhel ahijeh a Minister changjoulou hon kiphinna khat ahinbolpaiji, Non-Ruling party a kon MLA honjong Ruling party a choplutdi ti ahingelpai jiu hi power duchatna jeh hipenji ahi. Opposition a um’a govt nin adihlou abol holeh boldia lom abollou ho tahlang di mopohna ladi umtheiji louhel hi aboina ahi. Ruling a um Minister honla aloi apai MLA maimai hodi gelna umkitlou tobang ahijeh a Minister leh MLA maimai kikhetna asanval teng akiphindi, achomdoh di, party thah semdi ti ho hung umdohji ahi. Thingnoi thingchung langa party thah thah umdohna jong power kibahlouleh power duchatna jeh ahiji.