Post Mortem avela kibolna (CBI in Babysana thi thu kholna nei...

Post Mortem avela kibolna (CBI in Babysana thi thu kholna nei dia kisei kit)

344
0
SHARE

Post Mortem avela kibolna

(CBI in Babysana thi thu kholna nei dia kisei kit)

                                  Phaicham mi hon kiphinna thei ipi aumdem tia ahollai tah tobang dinmun’a Standard Robarth School Hostel a Class 7 simlai nungah chapang- Babysana thi thu hi anchah phatah khatna hung umdoh tidi ahi. Babysana hi amale ama kithat (kikhailih) ham, ahilouleh kivolih a akikhailih dan’a kikoi hidi ham ti thudih kihetlou jeh a athu khol dia CBI khutna pehlut di ti State govt injong nopna ahinpeh ahi. Hiche CBI in kholna aneidi ti hi athinu insungmi te leh JAC ho dei (demand) dungjui ahi. Ahin hiche jeng jong hi State govt nin amitmo selna di leh abailam lam aholna ahi tia dem loi umkit ahi. Hostel Warden 2 jong police in amatsa ahitan hinlah akiphin di hi bei dehlou, Student kiloikhomna leh ipipi kiloikhomna jatjat hon hiche thina thua akikumdi kichutho abah jeng u hi datmo umleu ahi. Babysana thi hi athupipoi tina ahipon hinlah State sung’a kithana leh kikhailihna thilsoh hija umjing’a Babysana thi thua mipi hibangse aso jeng hi School Hostel ho chung’a lunglhai louna hung kikhol ho bulhahna khatna hung kineidoh hidan ahi. Chuleh School ho kikah a kithang thip tona leh kitetna thu jong lut jep maithei ahi. Babysana thi thua ainsung mite, JAC, Student leh Civil kiloikhomna jatjat ho dei (demand) jouse govt nin anoppeh ahi. Thilong chu angai bang’in ipi iti thi ham ti hetdohna din Post Mortem ana kibol in akimudoh dungjuijin amale ama kikhailih ahi ti chu Report ahi. Hiche hi athinu insungmite leh JAC hon atahsanlou jeh a avel’a Post mortem bolkit di ti jong ‘demand’ khat ahi. Hicheto lhon chun doctor dang in Hospital chuom –JNIMS a (amasa a RIMS a kibol) post mortem anavelbol kit ahi. Ahin anivei channa a kibol post mortem jong chun Babysana chu amale ama kikhailih ahi ti amudoh kitne. Hiche phat hin Babysana thina chung’a aolahlah ho thip taleu kilom chu thip malah Private School a Hostel bol hon School le hostel dihtah a bolna dia govt ‘guideline’ imacha jui aumpouve ti thua kiphinnalai u ahi.

            Tua chu CBI in kholna nei henlang State police in kholna boljom jongleh Babysana chu amale ama kithat ahi ti hi adihpoi tina di umtheilou ahitai. Ajeh chu Post mortem report a adih immnang, selmang ahilouna dia anivei channa a kibol’a chu athinu insungmi thalheng ho kijaosah ahi.  Ahileh akikhailih ahi ti photchetna um nung’a CBI in athu (case) kholna neihen kiti hi akiphin ho jum selna di ham, asung lang’a bolchah dia kitup khat le ni um hidiham hithei ahi. Babysana chu amale ama kikhailoih ahitah jongleh kon ipi aloa, abolgim khat tou jeh a kikhailih kha hidiham ti hi ahi. “Nang jeh a kikhailih ahi” tia mi khat le ni matdoh a gotna peh di ti deina hidi ahi. CBI hon thukholna anei di deisahna hi Local State police ho athempouve ti jeh hilou, langnei sihneina bei Central Agency in akholdi ti ahiji. CBI hon thukholna aneileh Local MLA, Minister, Politician ho kikum theiponte ti jeh jong ahi. Ahin CBI hon Case kipelut jouse thanom tah a alah ujong hidehlou ahi. Lha khat sung’a kholchaina anei uva gotna pehdia lom gotna pehdi ti hi ahi. Koiman mona neita hihleh akikhailihnu gotna pehtheila hiloudi ahi.