Police DPC a thudih kimumosah ngen

Police DPC a thudih kimumosah ngen

280
0
SHARE

  Police DPC thua BJP MLA Th Biswharjit in Assembly a thudoh aneina’a Home Minister Gaikhangam in donbutna apieh chu akidong chet donbutlouva kileple-lea asei ngai-ngai asei chu ahidisa ahi. Hiche hi thudoh dongpa (dongho) hihen adonbutpa hileh “mula munang, seila seilou” kiti chet chu ahi. 2013 Police Recruitment DPC chu akichaidi kon’a ana kikahlhah-a pat ajehpen chu DPC Chairman a anapangpa’n BJP a MLA atetgot jeh-a ama (chairmanpa) het/thun guot candidate hosese kahlhah-a Congress MLA ho candidate ho hetdi/thundi ti ahiban’a ahunglhung ding MLA election’a di sum holna’a hiche DPC velbolkitdi ti hi BJP holeh Congress ho akuoi kitilouva ki benglam hetmosah uva athu hi kikaltona’a aman u ahi mijouse het ahi. Home Minister pun thudih (justice) umna dia hiche 2013 DPC hi abul’a pat kivelbolkit ahi ati-e. Candidate 37,000 (sangsomthum le sagi) hodia thudih (justice) umna dia kivelbol ahileh mi sangni bou hung kiladi ahijeh in mi 35,000 hodia thudih umdidan’a kisei ahi. Politics a hi thudih kivuimangji ahi seilouva het ahi. Vel ijatvei kithahbol jongleh adihsel, athengsel’a kiboldi hinam ti hi ahi. BJP hojong hin thudih deina’a hapan ten dan’a aum vang uva mi khat le ni leh a party udi gelna ahijong doh gehguh ahi. Gaikhangam hi Home Minister keu hilouva Deputy Chief Minister jong ahijeh in police kilahna thua hi mopohna anei, adih-a akibol jongle aminphadi, adihlouva thil akibol jongleh aminsepoa pangdi ahi. Kum masa lang jong chun police kilahna thu mama’a Assembly a thudohna khat ana um’in, ipijeh-a district dang dang sang’a Thoubal district akon mi kitamlah (kitamlhen) ham tia thudohna khat a chun Home Ministerpu hin “Thoubal district akon candidate hohi district dang’a kon hosang’a tahsa hatna leh lekha thep kitetna’a achungnun joh jeh uva Thoubal district mi kitamlah ahi” tin donbutna anape-e. Hitobang tahsanho chu nathitai kiti jongleh atahsandi ahi.

  Tuchung’in jong 2013 police DPC chu adihlou kibol aumjeh-a kikahlha ahileh “koiham adihlou bol chu” tia thudohna aumkitnin hinlah Home Ministerpu hin adihlou bol chu hiche khuchepa ahi ti umlouva asuh atung’a aseichai kit ahi. Thildihlou akibolleh adihlou bol chu umteidi, gotna jong piehteididan ahi. Tua adihlou bol akiseidohlou hi abanteng lejong adihlou bolho kiseidoh loudi, gotna jong kipeloudi tina tobang ahi. Hiche hi ahatpa, aboltheipa chu adih ahijeng’e kiti chu ahi. Ahin hitobang jeh-a gamsung leh society a thudih kiti um mo cheh cheh, thudih seingam jong um mo cheh cheh, setna leh boina jong tamlo cheh cheh ahi mijousen ageldoh a pha ahitai. Khatvei jou akiseipatleh aban jong seitei dia umji ahijeh in tua police recruitment DPC avel’a kibolkitpa thua jong hi thudih kibol hitam tia hung kidoh phaat hung umkitdi, chuteng jou khat chung’a jou dang khat hung kiseidi tina ahi. 2013 DPC a Viva gei anachaisa ho Physical leh Written a pass taloludi hung umsausau teng thudih hung kitidi hinam hin vetdi ahitai.