PM Modi leh CM hon kihouna anei jouva gamsung pumpi a kichepi...

PM Modi leh CM hon kihouna anei jouva gamsung pumpi a kichepi ‘lockdown’ April 30 chan kisusaobe

118
0
SHARE

PM Modi leh CM hon kihouna anei jouva gamsung pumpi a kichepi ‘lockdown’ April 30 chan kisusaobe

Imphal, April 11: Prime Minister Narendra Modi in state Chief Minister hotoh Saturday nikho a video-conferencing a kihouna anei jou uva, Covid-19 nat douna dinga lockdown phat April 30 chan akisuhsao be e, tin thulhuhna anei tauvin ahi.

Prime Minister Narendra Modi in tu masanga ana phondoh Lockdown hi April nisim 14 nikho chan chelha ding ahi’in, hiche hi kal ni kisuhsaobe kit ahi’in, April lha kichai chan kiche jom pi ding ahi. Modi in state chom chom a Chief Minister hotoh nidan 5 val video conferencing a kihouna anei jou uva thulhuhna um ahi.

Gamsung mun phabep a ‘community transmission’ um hidinga kichatna um ahi’in, aniseh a case athah kisei atam cheh cheh jeh a sorkar in hitobang thulhuhna anei ahi. April nisim 30 chan lockdown phat suhsaobe ding hi state 7 a chief minister hon atosot u ahi.

“State atamjo in lockdown hi kal ni suhsaobe dinga PM henga temna anei uvin, centre sorkar injong angaito ahi”, tin PS Dhatwalia, Principal spokesperson in aseiyin ahi. Meeting kichaiya Delhi Chief Minister Arvind Kejriwal in, “PM in lockdown phat suhsaobe dinga thulhuhna anei hi thulhuhna dih/apha ahi. Tuni a India dinmun hi gam khangtou tamtah sanga phajo ahi’in, hiche hi lockdown ibol pat vah jeh u ahi. Tua hi ingah uva ahile machalna ho mangsoh ding ahi’in, hiche jeh a aphat suhsaobe ngai ahi”, tin aseiyin ahi.

Odisha le Punjab gam in Friday nikho a ‘lockdown’ phat suhsaobe dinga thuphon anei ahitai. Opposition chule BJP Chief Minister tamtah in ‘extension’ atosot u ahi. Aam Aadmi Party (AAP) lamkaina Delhi, Maha Vikas Aghadi (MVA) lamkaina Maharashtra, Telangana Rashtra Samithi (TRS) lamkaina Telangana, Trinamool Congress (TMC) lamkaina West Bengal chule Congress-lamkaina Rajasthan le Chhattisgarh gam in ‘lockdown’ phat suhsaobe ding hi nasatah a atosot u ahi.

Ahung lhung ding kal 3-4 hi coronavirus nat achal vettup nadinga thupi ahi, tin aseiyin chule state sorkar in ‘lockdown’ phatah a achepi dinga prime minister in temna anei ahi, ati. Doctor le paramedic ho protective gear alhasam e, tia kisei thu jong aseiyin, Covid-19 douna a ‘frontline worker’ hon PPE chule angaicha khoh ho amutei nading uva pan kila ahi, ati.

Pandemic douna a Centre in ‘fiscal assistance’ apeh dinga akihou nauva Chief Minister hon Centre henga thumna anei uvin ahi. “Gamsung pumpi a lockdown phat suhsaobe ngai ahi. Chule rabi (winter crop) ho dinga dan olsah ngai ahi”, tin Rajasthan Chief Minister Ashok Gehlot in aseiyin chule West Bengal Chief Minister Mamata Banerjee in lockdown hi phatah a jui theiya chepi ding ahi, ati.

“Lockdown hi ni 15 kisuhsaobe ding ahi ti ngaidan kamu in, PM in hiche nikho 15 a dinga guidelines hi nikhat ni-ni sunga phondoh dinga asei ahi, tin Karnataka CM BS Yediyurappa in aseiyin ahi. Lockdown kilahdoh ding hi tuni a kadei louvu ahi’in, tu dinmun a lahdoh louding ahi. Hinkho huhdoh ding athupi jeh a lockdown ngai ahi, tin Shivraj Chouhan, Madhya Pradesh CM in aseiyin ahi.

Modi in video conferencing abol masanga Principal Secretary to Prime Minister in New Delhi khopi a janni a high level meeting thu mopohna ala in ahi. Achesa nisim 8 nikho a Prime Minister in political party chom chom a lamkai hotoh COVID-19 chungchang a ngaidan seikhom dinga kihouna ana lamkai ahi. PM in state Chief Minister chule Union territory a LG (lieutenant governor) toh lockdown chungchang a video conferencing a kon kihouna nivei asem ahitan, March nisim 20 chule April nisim 2 nikho a kihouna aneiyu ahi.

Health and Family welfare data nukhah pen dungjuiya, gamsunga Covid-19 active case 6,565 um a chule mi 239 thi ahi. India gam a ni phabep sunga natna neiya hatah a kal ahi’in, April 7 nikho a natna neiya mi 5,000 vel hi April 10 ni a 7,000 a kal ahi. Tamil Nadu, Maharashtra le Rajasthan gam a case kisei kal ahi. Chule natna jeh a thi jong achesa nithum sunga mi 136 a kon mi 200 val a kal ahitai.

Nidan 5 lockdown kihon sunga Imphal khopi a thil choding mihem tamval; ‘community distancing’ kijui lou, sepai honjong alo naje helou

Imphal, April 11(ET): District administration in Saturday nikho jingkah nidan 6 a kon nidan 11 sung dukan chule petrol pump ho hon dinga aseitoh kilhon a Imphal khopi a gari atehchet in chule kailhang a mi tamtah akisukhom uvin ahi.

Order kisodoh hi chomkhat jouva update abol uva, petrol pump hi mipi ding hilouva ’emergency service’ a dinga bou kihong ding ahi, tia kisei kit ahi. Imphal khopi a bou hilouva, lockdown kihon sunga anche, me chule insunga angaicha khoh khoh cho dinga mipi chule tamtah tamtah kailhang jouse a adim in ahi.

Mi lhomcha inbou mask akibol in, ahin, Nagamapal, Imphal West, Lamlong, Imphal West, Yairipok, Churachandpur le adang dang a alhompen a metre khat a kigamlhat ding a kisei ‘social distancing’ jui aum pouvin ahi. Ahin, pharmacy ho a thil cho dinga ngah ho ‘queue’ a akigol uvin,  ki gamlhat tah a ading uvin ahi.

Lockdown nidan phabep akilha ong hi insunga angaicha khoh cho nom a mi tamtah dinga lung olna ahivanga sorkar in coronavirus nat douna dinga pan alahna a hi hiche hi adih hinam ti thudoh lentah jong um ahi. Kihinso nadinga angaicha khoh thil hohi ‘social distancing’ sanga mipi dinga thupi jo ahi’in, social distancing hi ‘coronavirus pandemic’ jeh a jui dinga tu dinmun a thupi tah hi ahi.

Vannoi gam dang dang a natna jeh a thi tamtah um ahi’in, hiche pet a gamsung mihon kitho to ding ahi, tihi asuhmil loudiu ahi. Phat hahsat pet a eima chang kitho ding ngai ahi’in, hiche hibou alampi ahi, ajeh chu tu dinmun a natna akijen dam nathei lou chule vaccine kisemdoh loulai ahi. Sorkar in petrol pump ho ’emergency service’ a dinga bou hon dinga thuso avel a asokit vanga Imphal East le West a petrol pump atamjo a gari neo chule gari len tamtah akigol in ahi.

Jingkah a kon queue a ngah a mi phabep thao achan lou jeh uva lunglhai loutah a akile uvin ahi. Nidan 11 chan hon dinga kisei ahi’in, police hon nidan 11 alhin a pump ho akha sah u ahitai. Chule Ukhrul district a District Administration in agon dukan ni- Viewland a khat chule Wino Bazar a khat a anchang choh nadinga Open Market Sale Scheme (OMSS) agon nauva anchang choh thei loujeh a Ukhrul gam mi tamtah lunglhai lou tah a in a akile uvin ahi.

Alangkhat ah Thoubal District sung’a Lockdown leh Curfew palkeh mi 231 police hon ana henden uvin ahi. Amaho chu Thoubal PS  a mi 98, Lilong PS a mi 91, Yairipok PS  a mi 8, Heirok PS a mi 5, N-Sekmai PS a mi 18 ahivin chule gari 190 jong ana man uvin amaho akon fine Dk. 23,800 ana mouvin ahi.

Social Welfare Minister Nemcha Kipgen in Kangpokpi leh Senapati a hahsa leh simlai tangden ho kithopina nei

Kangpokpi, Apr 11(UNA): Covid-19 boina toh kisai a bolding atam jeng vang in  Social Welfare and Cooperation Minister Nemcha Kipgen in gamsung a koima gilkel a umsah louding tin Kangpokpi le Senapati district sung ho a tahlel le simlai atangden  a in lam kile thei lou ho kithopina ananei in ahi.

Kangpokpi khopi sung a tunin minister nu in tahlel ho kithopina ding in anchang bag 100 lam pehdoh na ana nei in ahi. Anchang ho chu tunin Kangpokpi town committee ho ang a pehdoh na ana kinei in ahi. Committee ho in khopi sung  a tahlal hop hate cha a hop peh na anei uva, koima gilkel a akoi na lou ding uvin minister nu in hetsah na ana nei in ahi. Kangpokpi le Senapati mipi hon ama district in charge a anei khah uhi avang pha u ahi tin minister rnu chun phondoh na ana nei in ahi.  Govt. in hiche lockdown toh kisai in mip kithopina ape jing uvin hinlah niseh a nehkihol ho ding a hitabang thil kipe mei mei ho chu hithei lou ahi toh lhon a hitabang tohgon hi hung kinei ahi tin ministernu chun asei in ahi. Niseh a  natong kivah mi khat in hitabang kithopina hung kipeh na chung a kipa thu minister nu ang a ana sei in ahi.   Alangkhat a minister Minister Nemcha Kipgen in Maram a kai simlai gampam a ho atang dan ho kithopina in anchang bag 15 le dal bag khat an ape in ahi. Hiche kithopina toh kisai in Senapti sung a mipi phabep in simlai ho kithopina in thil le lo ana toh uvin ahi. Hiche ho kithopina hung lut na chung a SDS caretaker Hopeson Mao in Minister nu le thil hint oh ho jouse chung a kipa thu seina ana nei in ahi. Hetthei khat chu Arunchal le state sung mun chom chom akon simlai 200 lam Senapati a lockdown jeh  a tangdan u ahi. Hopeson in asei na a hitabang ngaichat le hahsat laitah a kithopina hung lut hi kipapi umtah ahin, mip in khonung jong le ahin nei cheh na ding uvin temna ana nei in ahi.

 

Mopohna nei hon anchang le dal agannathei pen a ahop diuva ATRPFM in temna nei

Imphal, April 11: Chief Secretary, Manipur government in Public Distribution System noiya anchang le hawai (dal) kihop thu toh kisaiya achesa April nisim 2 nikho a order asodoh dungjuiya, state sorkar in April 2020 lha a anchang man beiya akihop na dinga quota phondohna aneiyin, lockdown dungjuiya, insung a mikhat cheh in anchang kg 5 chan amuding, atampen a kg 25 hiding ahi.

Pradhan Mantri Garib Kalyan Anna Yojna noiya India sorkar in April, May le June lha a dinga ‘additional entitlement’ phatsahna anei ahi. Insung mikhat in anchang kg 5 man beiya amuding, atampen a insung khat a kg 25 kipe ding chule insung khat in dal kg 1 manbeiya amu ding ahi. Akisei thu phatah a akichepi theina dinga District Deputy Commissioner hon FCS godown a kon aphatcha thil alah uva chule mipi ahop diuva mopohna apeh u ahi.

Hiche order hi state sorkar in asodoh a chule state sorkar in apalkeh ahi. Order kichepi lou kisodoh hi thudohna um ahi. Koi tobang dan palkeh ho National Disaster Management Act, 2005 (NDMA) noiya achunga action kila thei ahi, tia order jong um ahi. Mopohna neihon achepi lou ahi’in, tua hi koi chunga action kila ding ham. In bahara a um phabep in mikhat a anchang kg 1 le 2 chule in neihon anchang kg 5, hawai beiya amu u ahi.

Chule tuchan geiya anchang ahiloule dal mulou lai jong tam ahi. PDS, Pradhan Mantri Garib Kalyan Anna Yojana le NDMA noiya anchang, dal manbeiya a kipe ding chule donation le fund ho hoiya um ham, tin ATRPFM in thudoh aneiyin, gamsunga anchang, dal le mask ho lenna a hung kipo hohi itih le ahop diu ham, tin aseibe uvin ahi.

Lockdown a thil khoh kipo ho kilha ong ahi’in, ahivanga lockdown min a dukan tamtah in thil ho angaiya sanga ajoh mantam u ahi. Hitobang hohi koiyin avetsui ding ham. Wholesale a ajoh hon ajoh mantam jeh a retail dukan hon aman akal sah diu mong ahi. Mopohna nei authority le civil organization hon hiche thu avetlhah diuvin jong asei uvin ahi.

Sum muna ding lampi dang neilou in bahara a um tamtah in in bahara pehna a hahsatna atoh uvin, innei ho, hostel bol ho chule in bahara a lha hon lockdown sunga bahara angaijang diuvin ATRPFM in temna aneiyin ahi. Simlai, lo sanglou ho in bahara alah lou diuva ngehna aneiyu ahi.

Hiche ho jeh a mopohna nei authority chule state sorkar in achang dinga lom ho aganna thei pen a anchang le dal ahop diuvin ATRPFM in temna sangtah aneiyin, vaicha genthei ho dinga hiche hibou lockdown sunga kihinso na ahi, ati. Min kijihlut a atheng aumpon, mijousen amin akhum thei ahi’in, amun a dinmun kholtoh ngai ahi, tin ATRPFM thuson aseibe in ahi.

 

CM in PM le state chom chom CM hotoh akihouna a Northeast gamkai mihon kibolsetna ato thu podoh

Imphal, April 11 (ET): Chief Minister N. Biren Singh in gamsung mun chom chom a coronavirus natna akisei khoh laiya Northeast gam mi hon kibolset na ato ho thu Prime Minister Narendra Modi henga aseiyin ahi.

PM Modi in state chom chom a Chief Minister hotoh video-conferencing abolna a CM Biren in hiche thu apohdoh ahi. CM hotoh PM in video conferencing abol nauva CM Biren jong pang ahi. Manipur gam mi 30,000 vel hi gamsung mun chom chom a lockdown jeh a tangden ahi, tin CM Biren in PM chule kihouna a pang Chief Minister ho henga aseiyin ahi.

Northeast gamkai mi tamtah in kibolset na thilsoh chom chom ato u ahi’in, chule ama ama gam a Chief Minister hon agam uva um gamkai miho avettup diuvin temna aneiyin, Manipuri simlai ho chule achen nau mun ho ama ama umna state henga kithot ahitai, ati. NE gam mi ho kisuhgim louna dinga state hon angaicha pan alah diuvin PM in temna aneiyin chule gamsung miho nungpui nadinga PM in tohgon asem dinga jong temna aneiyin ahi.

State sorkar in Manipur gam a tangden jouse avettup ahi, tin CM in aseibe in ahi. Covid-19 nat douna dinga gamsung in kigotna anei thu CM in aseiyin, lupna 3200 umna facility hi ‘quarantine’ a dinga gotsa kikoi ahi, ati. JNIMS le RIMS a lupna 50 cheh umna block ho Covid-19 positive ho dinga kigong ahi’in, hospital teni a  ventilator kikoibe ahi, ati.

Test facility kalsah nadinga ICMR in akilhengdoh private diagnostic centre phabep a jong Covid-19 test akibol thei dinga phalna apeh diuva kisei ahi, ati. Manipur le Myanmar hi km 398 lhing gamgi kikop ahi’in, state sorkar in dan dihlouva gamdang mi ahunglut louna dinga ‘fencing’ atun ahi, tin CM in aseibe in ahi.

 

Gamsunga politics a boina aumthu NPP President Conrad Sangma in thu lentah ahi, ti; boina suhlhap nadinga kihouna achelha e, tia sei

Shillong, April 11: National People’s Party (NPP) national president le Meghalaya Chief Minister, Conrad K Sangma in Manipur gam a hetman louva politics a boina aum thu chule CM Biren in Deputy CM le NPP lamkai Yumnam Joykumar Singh portfolio jouse alahpeh thu agel thupi dan aseiyin ahi.

CM Biren in achesa Thursday nikho a Deputy Chief Minister Yumnam Joykumar Singh portfolio jouse hi COVID-19 lockdown sunga NFSA noiya genthei ho anchang kihop thu a alahpeh ahi. “Hiche hi thu khohtah ahi’in, hetpehna kanei uvin, sangtah a party in alah ahi. Athu hi BJP lamkai ho henga kipodoh ding ahi’in, lunggel kibahlou na umho suhlhap dinga pan kila ding ahi”, tin Meghalaya CM in aseiyin ahi.

Hiche thu a Manipur Chief Minister N Biren Singh chule NPP Minister hotoh kihouna kanei ahitai, tin Sangma in aseiyin ahi. “Hiche thu hi BJP lamkai hotoh kiseikhom a, aganna thei pen a suhlhap ahiding kinep ahi”, ati. BJP lamkaina sorkar a kon NPP hai ding ham tia thudoh anei uchun NPP president in, tuchan a Minister hotoh kakimuto hih laiyin, ahivanga phone a kihouna kaneiyu ahi, ati.

“Hitobang boina hi thu hahtah ahi”, tin Sangma in aseibe in ahi. CM Biren lamkaina sorkar chunga NPP Minister 4 hon lunglhaina anei louva ahile haina nei uhen, tia Manipur government spokesperson le BJP legislator S Rajen in NPP Minister ho chouna thu anasei ahi. Joykumar in anatuh portfolio hohi Biren in alah ahitai.

Chief Minister in NFSA noiya ‘lockdown’ sunga anchang hop dinga asei hi Joykumar in ngol thu chule akimoh sei sei ahi’in, chule Uripok assembly constituency a ding hi alhingpoi, tia Joykumar in CM demna thu asei ahi.

 

Manipur gamsung a kholjin mi 5 ho result negative hi, Moreh akon mi 19 test bolding a kipodoh

Imphal,  Apr, 11(UNA):  Thusoh khat in aseina achun ADC Moreh Complex sung a vetlhah a kikoi gampam mi 5 result ho chu negative ahisoh kei e ati. Hiche toh lhon in tuni chun amauho hin Innova car mangcha in Siliguri jon in Moreh adalhah tauvin ahi. Tourist ho chu Spain gammi khat, Italy gammi khat chule France gammi ahiuve. Bangalore akon hung kinugle pasal khat Moreh khopi sung a aumna in hiche natna avei jehin apodoh uvin chule ama chapa leh midang 19 ho chu RIMS hospital, Imphal a test bolding in tuni jingkah chun apodoh tauvin ahi.

Hetthei khat chu natna veipa hi K. Ramachandran (66) 15/2, 2nd Cross Marappa Garden, Bension Town Post, Bangalore a cheng chu Manipur gamsung ah sumkolvei ding in ahung lut in Hotel South Indian Restaurant, Moreh ward No. 3 ah aum in ahi. Achapa Ranjit in aseina achun ani lhon in Manipur adalhah jou uvin apa chu Bangalore ah achanu heng ah ache in hiche chu Janta Curfew kipat ni 2 masang ahi ati. Hiche akon ni 2 jouvin apa chun aum dan nopmo asahthu asei in ahi. April hapta ani channa akon chun Bangalore Baptist Hospital ah aki vekol in ventilator jong akikoipeh e ati. Tulha April 8 ni chun sample ala uvin result chu positive in ahung soh tan ahi. April 9 apat chun hiche natna veipa number chu aki switch off tan ahi. IDSP Karnataka in aseina achun akinthei pen a kihou matpi nading lampi kigong ding ahi ati.

 

State sung district chom chom a PDS thil hopdoh ding a govt in tohgon nei

Imphal, April 11(ET): State gov tin covid-19 toh kisai a lockdown toh lhon in district chom chom ho a PDS thil ho hopdph na idng in tohgon anei jing uvin ahi.

Tunin kangpokpi district sung a AAY anchang quintal  1092.70  lam in 3122 adingin pehdoh na ana kinei in, chuleh PHH anchang quintal 6146.65 lam jong pehdoh na ana kine in ahi. Bishnupur District ading in agom in anchang quintal 10198.75  lam hopdoh ding in ana kipe dohin, hiche anchangho chu Nambol, Oinam, Bishnupur, Moirang, Thanga  le Khumbi A/C ho a hopdh na kinei ding ahi akiti. Churachandpur district ading in jong anchang quintal 10020.85 lam pehdoh na ana kinei inahi. Kamjong District ah jong achang quintal 1.9 chu inn 134 am ang a hopdoh na ana kinei in ahi.  Tuni ading in Imphal West district sung  a um  Thangmeiband, Uripok, Sagolband, Keishamthong, Singjamei, Yaiskul, Patsoi, Konthoujam, Lamshang, Sekmai le Saitu gam phabep, Wangoi, Naoria Pakhanglaka, Langthabal le Mayang Imphal ho ah 1600.85, 1419.35, 1431.30, 1459.05, 1259.35, 328.40, 2012.83, 1804.32, 2270.70, 1587.35, 1668.10, 1895.31, 1670.25 le 1888.35 quintal lam anchang hopdoh na ana kinei in ahi. Tu chan in  Thangmeiband, Uripok, Patsoi, Lamshang  le Mayang Imphal A/C ho in anchang 1600.85, 1419.35, 1472.90, 1940.50 le 1580.10 quintal lam ana kilah doh taovin ahi. OMSS Scheme noi a Imphal West district a chu anchang  quintal 190.25  lam inn 1,953 lam ang a hopdohna ana kinei ahitan ahi.