Phatah-a Geltuoh Chet-a Seidoh Ding Martinthang Haokip (Dec. 2, 2015)

Phatah-a Geltuoh Chet-a Seidoh Ding Martinthang Haokip (Dec. 2, 2015)

265
0
SHARE

July 2015 lhabul apat August 2015 lha kichai chan chu Meilhei te’n Inner Line Permit System (ILPS) ana ngeh uvin, phaituol ah kiphinna ana khohsie lheh in ahi. Hiche ILP thua kiphinna hi amasapen ahipoi. 1980 langa pat ana ngeh pan u ahitai. ILP hi Tribal ho venbitna dinga Arunachal, Nagaland leh Mizoram a kichiepi khat ahi. Federation of Regional Indigenous Societies (FRIENDS) in 2006 chun kiphinna ana lamkaiyin, 2012 jong chun kiphinna ana gimnei lheh in ahi. 2015 kiphinna hi kiloikhomna 30 vel kithokhomna “Joint Committee on Inner Line Permit System (JCILPS)” in a lamkaiyin, Manipur State Government toh pangkhom bang leuvin adei dantah uvin draft akisiem uvin State Assembly passed abolsah tauvin ahi. Meilhei ho sei dan in 1891 masang laichun Manipur a hunglut leh potdoh ding hon Lengpa koma phalna ana kilah jiu ahi. British ten Manipur ahin lauvin, 1950 chan ILP ana chiepiuvin ahi. ILP kilahdoh masang (1941-51) chun Manipur mijat chu 12.80% in akhang in, ahin ILP akiladoh jouva pat mihiem pundan anasa lheh tai (1951-61: 35.04%; 1961-71: 37.56%). “Hitia aum peh leh Manipur gammi (native) hohi phatkhat leh umtalou ding ahi,” tin kichatna lientah aneiyun ahi. “Gampammi – Bangladesh, Nepal leh Burma akuon – bailamtah in ahunglut un, thinglhang leh phaicham ah inn-mun lou-mun akichoh un, nuomtah in acheng un ahi…” Akiphin tillaiyu chun, “Bihari leh Bengali etc., hon katoh diu leh kaneh diu jouseu eiloilhah pih uve,” atiuvin, aban in “Naga toh Metei sopi ahin, Kuki hohi foreigner ahiuve” ahin ti kit uvin ahi. Hiche thucheng ho hin Kuki mipite lungsung asuna lheh jieng in ahi. Naga ho vang Manipur mi’n akisim pouve. Eiho vang Meilhei hon “foreigner” ihin tiuleh ilaiyu ana lheh jie. “Adih e. Phaigam a chu foreigner kahiuve. Keiho gam – thinglhanggam – a nahung phat leh nang ho jong foreigner nahiuve,” ti pieh jieng ding ahi. Eima gam’a khosa ihiuve. Moreh ILP Rally: Kiphinna hi thinglhanggam a jong ginsah ding tohguon ahin neiyun, amasatah in Churachandpur ah ahin guong uve. Agam mi’n aphallou jieh in ana bol tapouve. Moreh ah aguong kit un, Moreh eimi hon “ILP rally” neilou ding in ana kihoupiuvin ahi. Kijot talou ding’a akinoptuo nung un, 18 August 2015 ni chun rally abol thou thou uvin, kibuoina nasatah ana sohdoh tai. Meilhei hon meithal in eikap un, thusuo ah Kuki hon Meilhei kijot ho akap in ahin suo kit uve. Sangai Express (August 19) chun Kuki Women’s Union (KWU) president Rose Mangshi Haokip in “rally bol ho subuoi ho” thiemmo achanna thu ahin suovin ahi. Kuki ho chu miphalou dan in ahin sei nalaiset uvin ahi. Kihoulhahna sukeh ho joh miphalou ahidan tahlang in aum tapoi. Mitampi’n Rose Mangshi thusei chu apuona’n, ipi jieh a hitia chu thu nasei ham? tin ana dong uve. “Kasei lou lou eisuo pieh uve,” tin aseiyin, ahin suhchietna jong abol dieh poi. Two Union Territories (UTs): Nisim 31 August 2015 nichun Manipur State Assembly in ILP toh kilouthim Bill 3 passed ana bol in, hiche nia pat chun kiphinna chu thinglhanggam ah ahung kichuon lut tan ahi. Adieh in Churachandpur khopi sungah akhoh dieh e. Thinglhang leh phaicham mi buoi jingna suhbeina ding in “Separate Administration” “UT” etc., ngehna jong ahung jaotha ngal in ahi. Nisim 16 September 2015 chun thusuo ho ah “Thangso Baite, MP in Manipur hi UT ni (Valley le Hills) in kihomkhen leh ibuoinau suhlhap theina khat hinte ti’n aseiye…” tin ahin suo uve. Manipur thinglhangmi ho kipana chu ana sang lheh e. Ajieh chu athalheng diuva asolpauvin “ka sou u ahetai” ti ahi. Ahinla nisim 18 September 2015 ni’n hiche thu aseilou dan ahin hilchien in ahi. “Hiche thu chu kasei khapoi. Itih chan hijongleh Manipur kelouna dia pan kalah ding ahi,” tin ahung kihahsiel jah-jah jieng tan ahi. Consultative Programme on Peaceful Co-existence: November 23, 2015 chun Sangai Express ah “The three day consultative cum cultural programme on peaceful co-existence among indigenous people of Manipur” kinguon ah Kuki Inpi Manipur (KIM) president Thangsei Haokip houlimna akimui. “Manipur buoina jouse hi Manipur sunga seilhap ding ahi. Manipur buoina Delhi a seilhap ding kiti hi phatah a gelphat angaiye…ILPS kiphinna jieh a Moreh leh Churachandpur a thilsuoh hohi vangsiet umtah ahi. Apam mi khut kigol hiding in ginmo aum e.” Asei lou-lou asuopieh u ahileh kahepoi. Lha ni val jen ikiphin uva thi le man ituona ho’u jouse chu ngolman a ituo dan uvin aseidoh tai. Eiho hi imacha helou midang khat in eihung tildoh dan uvin aseidoh in ahi. Manipur Government toh Meilhei kithutoh chiet’a thinglhanggam lah ding angaituo laiya Manipur a seilhap ding kiti chu ahilou ding tina ahi. Manipur a thutanna aum leh thinglhangmi a ding imacha umlou ding ahi. Manipur in aseilhaptheilou jieh a Delhi kilhut ahin, Delhi’n a seilhaptheilou leh Delhi sanga sangjo khat a lhut ding ahinalaiye (Bill 3 hi hing nalai ahi). Martyr Vui le Vuilou Thu: Manipur State Assembly in Bill 3 ho passed abol chu “anti-Tribal Bills” ahe tin nasatah in ina doudal un, mihiem 9 jen hinkho ana beitai. Deputy Commisioner, Churachandpur lamkai na’n ajing athai chun athu ana seiyun, ex-gratia pieh a vuiding tin ana kiphatsah uvin ahi. Mipi’n “thu kichieh tokah a vuilou ding” tin pan ahin la’n Joint Action Committee (JAC) siemdoh ahung hitai. Lha 3 lhing diehchet pi hi mithi vuilouva um’a kiphinna chielha nalai ahi. Hiche kahlah ahin vuidoh ding a phut loi jong aum jing e. November 9 nikho’a Ministry of Home Affairs in “Bill in atohkhahthei ho jouse toh kiseikhom ding ahi” tia jihtho’a ahin sei jou chun JAC in November 30 a mithi vui ding ahin phatsah tan ahi. Manipur Tribal Forum Delhi (MTFD) hon vui ding anoplou dan u ahin seiyun, hichu Nupi loikhat in atosot kit un ahi. JAC kiluolna chu isahlou toh abah phat chun alunghang tam tei ding chu ahi. JAC WhatsApp group ah lungdamlouna twi sun’a sunglha jong ana umtoh e. “Vuilouva a sa chu hop pieh diu ahe” “Paite ho mong mong hi khop aum uve… ipi dia Pathien in Paite ahin sem khel khel eidem ti ka gel doh e” tin Kimnei Lhungdim chu ana eojah tai. Sopi Paite hon social media lah ah asu minthang lheh jieng uvin ahi. Kuki Women Association a Secretary tohmun tuh dan in asuo uve. Lungsou pet a kisei vang hinan tin; jat le nam kihawttuona thu hohi lamkai hihen kailou hijong leh seilou hiel dinga phatah ahi. Geltuoh Sel’a Sei Ding: Paokai Haokip, former MP, in a thusei khumkhana khat ah hiti hin ana seiye: “Ka geltuoh sel’a kasei ahin, ka seikhiel umlou ding ahi. Hijieh chun ‘seikhiel seivaal aum le nei ngaidam un’ tin jong seida tang e.” Lamkai khat dinmun’a idin phat leh phatah’a geltuoh masat a seidoh ding ahi. Inung ima, ijet ivei vet angaiyin ahi. Lamkai khat in “mipi sou” ahetlou akhoh e. “Kaseidoh guot hi mipi lunggel toh kituoh hinam? Mipi ho dia thilphachuom ahin lhut ding hinam?…” tia ama le ama kidoh masat angaiye. Mipi lunggel toh kikal ahileh seilouva phajo ding ahi. “Mihiem in akam athipi’n, sa’n akhuonung athipie,” tia ipu ipa teuvin asei uhi achul hih laiye ti suhmil lou ding ahi.

SHARE
Previous articleThingnoiho jeh ham, Govt jeh ham (Dec. 2, 2015)
Next article