Pasal le pasal kikoi ho kiban kap chapna

Pasal le pasal kikoi ho kiban kap chapna

194
0
SHARE

America gam Florida khopia thalchoi khat in ‘Gay Night Club’ (pasal le pasal kidei le kicheng hon jaan’a party abolnau) khat a mi 50 lang akaplih-a akitongkha jong ajabep-a aum chu America gam jong hi gam nasatah ahivang’a mipi dia bitna leh lungmuonna umlouna gam ahi mutheina ahi. Hiche thilsoh hi June 12 jaan ahin mibulu pa hi pasal kum 29 a tah/upa Sadiqui Mateen kiti, Orlando mi jong hilou, ahungkonna hi Orlando akon Mile 100 val hinalaiyin akiseiye. Hitobang thilsoh hi “domestic terror” (gamsung mama a kuon mipi suhkichatna natoh) ahi tin America a thunei vaipo hon asei uve. America te kichatpen hi gam khangtou dang le galmanchah nasatah-tah nei gam ho hilouva vannoi muntin’a Muslim galguhbol ho huoilaiya kon gamsung’ah ahung kithol lut-un 2001 kum lang’a New York khopi’a World Trade Centre kibuluna tobang ahung umkha kit dem ti hi ahi. New York khopi ana kibuluna tobang ho’a kuon iti kiven di ham ti ichan ham’a ahet-u ahitan hinlah agamsung mama’a kuon thingnoi thalchoi ho’a kuon buluna hi akivenje jong um tahbah lou ahi. Hitobang thalchoi le thil bol ho hi gamlah thingnoi Camp hamkhat-a pansa jong hilou u, aguh-a meithal leh meichang khopi sung’a akisel uva phan te atiphat-u leh chom doh uva anop-nop abol ji’u ahi. Mi tamtah panna kiloikhomna (party) khat natoh jong ahiloujeh-a security lang po ho dia jong hetdoh le matdoh hahsa ahi. Chunakah-a USA (America) deh-deh hi meithal License hongphal tah-a kipiehna gam ahijeh in chapang cha-cha’n jong Automatic meithal License um akichoi thei jeh uva alunghannau khat umjeh maimaiya kho helou mipi chung’a chuh lo jiu ahi. Mi aban kaplih jouva jamdoh-a kiselmang, chomkhat jouva police in amat-a Jail lhung ti jong umkit lou, amun mama’a police hon akaplih pai jiu ngen ahikit-e. Achuti leh “kathi le kathi masang’in mi ijat ham that ing’e” ti lungput tina ahi. Hitobang lungput hi alunghanna’u miho chung’a abol ji’u hile thukhat ahin tua hi kho helou chung ngenbeh-a chuji’u ahi. Khatvei vei leh kum chapang nalai khat in School dung’a School chapang ho leh a jilkung (teacher) ho aban kaplih ji thu jong America gam’a um jing ahi.
Tuchung Florida thilsoh-a mi bulu pa hi Islamic State galguh bol ho natoh dan’in jong akiseiyin hinlah akichiehsel aumdeh poi. Pasal le pasal kidei kingai le kichen ho adeilou jeh jong himaithei ahi. Bomb le meichang lhingset-a kigo’a abol, athi di mong’a kuon doh jong tina ahi. Hitobang hi Muslim galguhbol ho natoh ahijeh in hiche thilsoh-a kuon’a America gam’a Muslim ho ginmo leh suhgentheiya hung umbe cheh diu tina jong ahikit-e. Security (kivenbitna) lampang’a America hi vannoi leiset-a akidoupi thei gam umlou ti thei ahi. Ahin khatvei vei leh alung kisuhlou leh ama michang hinkhoa thangtomna khat aneijeh ham’a thalchoi khat in khohelou mi-lham alomchang’a aban kaplih ji hi America mi-lham dia jong bitna lungthim umdehlou tina ahi.