‘Overdraft’ thu kholna ding’a kisemdoh committee hi anempen a Retd Chief Justice...

‘Overdraft’ thu kholna ding’a kisemdoh committee hi anempen a Retd Chief Justice lamkaina hihen, tia Gaikhangam in sei; Re-poll bol dinga thumna nei

79
0
SHARE

‘Overdraft’ thu kholna ding’a kisemdoh committee hi anempen a Retd Chief Justice lamkaina hihen, tia Gaikhangam in sei; Re-poll bol dinga thumna nei

Imphal, June 15(ET): Manipur Pradesh Congress Committee President leh CWC member jong hi a Gaikhangam in state sorkar ‘multi crore’ lhing a ‘overdraft’ ache agelkhohna thu asiyin, anempen a retired Chief Justice lamkaina a sorkar in ‘high level enquiry committee’ asemdoh ding a ngehna aneiyin ahi.

Chule 17th Lok Sabha election a BJP in sum thahat amanna kicheh tah a het ahijeh a Re-poll bol ding a jong MPCC president in thumna aneiyin ahi. “Hiche hi ken kasei ahipoi, sorkar in Election Model Code of Conduct akichepi sung a PWD leh Power Department a sum tamtah akiladoh e tia asei ahi’in, sorkar in hiche a ding a enquiry jong asemdoh ahitai”, ati. Sum tamtah akilahdoh e ti thutah ahi akicheh toh kilhon a sum hohi election a aman u ahi ti jong kicheh ahitan, election hi dihtah leh thengtah a kibol lou ahi, tin Gaikhangam in aseiyin ahi.

Election hin Model Code of Conduct apalkeh jeh a san louva (null and void) koiding ahi, tin Re-poll bol ding a thumna aneiyin ahi. “Election chungchang hi Election Commission of India khut a um ahitai”, ati. Babupara office quarter mun a thuso miho akimupi na a Gaikhangam in thutah kholna ding a enquiry committee asemdoh akipapina thu aseiyin, ahin, amin mai maiya thukholna kinei hi aphatchomna umlouding ahi’in ‘high level committee’ ngai ahi, ati.

Mipi aboi louna ding chule khantou machalna natoh aboilou nading a athu suhlhap vah ahiding akinepna thu aseiyin, ahin, BJP lamkaina sorkar sung a boina hi party thu ahi, tin imadang aseibe pon ahi. “Financial year kichaiya budget session kipan a June lha hi ahitai. Khantouna ding natoh akipat ding phat a boina aumhi gamsung suboi ahi”, tin aseiyin chule sorkar adet teng lebou machalna um ahi, ati. “Thil umdan hi Indian Constitution article 166(3) a kipe Rules of Business and Allocation of Business Rules kipalkeh ahi”, ati.

Tuphat a lamkai hon gamsung khantouna ding sang a lamkai panmun agelkhoh uhi vangset umtah ahi, tin aseiyin chule MCC umsung a sum tamtah akilahdoh thei hi lungdon umtah ahi’in, sum tamtah kilahdoh hi Chief Minister hetna beiya iti kilahdoh thei dingham, ati. “Tu naichai kichai election a voter ho sum thahat a akilhep thu akicheh tan, Manipur High Court a retired judge lamkaina a sum lamdih louva akiman kholding ahi”, ati.

Rule of Business Article 166 Clause 3 dungjuiya minister khat in atampen a dangka crore 2 chan alahdoh (withdraw) thei ahi’in, crore 2 val ahileh Chief Minister in phatsahna apeh ngai ahi, tin aseibe in ahi.