Oct 1, 2016 Local news

Oct 1, 2016 Local news

1441
0
SHARE

Khopi ho’a Pakistan-based galguhbol hon buluna tohguona ahin nei diuva Centre in gingmo, mipi kiging jing’a um dia thupeh nei

534111-indian-forcesNew Delhi: Friday ni’n Centre in gamsung pumpi kigingsa diem’a um din thupeh aneijin ahi. Hiche thu toh kimat in Home Minister Rajnath Singh in Indo-Pak border a security ho dinmun velvetna (review) aneijin ahi.

  Punjab gamgi’a chun security akhou lheh in chuleh gamsung’a airbase ho jong kigingsa’n aum uve.

  Gamsung top security ho kihouna’a chun Singh in official ho jah’a thupeh aneijin ahi. Gamgi’a kikoi Sepai ho chingthei tah leh pil tah’a aumdiuvin thupeh aneijin ahi, tin official thulhut in aseiye.

  Metro khopi dunglah’a jong terrorist hon buluna tohguon aneidiuvin ginmo ahi. Hijeh chun metro khopi ho’a security ho thoni a koi din official thulhut in aseiye.

  Hetthei ding’a Jammu and Kashmir, Punjab, Rajasthan, chuleh Gujarat gam ho’a security hatsah ding leh limgehcha um din thupeh aum’in ahi.

  Alangkhat’a terror mastermind leh Jamaat-ud-Dawaah luboh Hafiz Saeed in Friday ni’a Zee News in LoC a India Para Commando hon surgical strike abol’u hangsan tah’a ‘cover’ aneinau chung’a gihna apeuvin ahi.

  26/11 terror thilsoh’a lhohbu seng Hafiz Saeed in aseina’ah, ” Surgical strike tahbeh ipi ham India mite jouse kihil ding ahi” ati.

  Zee Media in tunia thuphon aneina’ah, terrorist kikaplih ho agom’a 30 leh 70 kikah alhing tan,operation chelhahna kom vel’in thilong ho chu akivui in ahi ati. Hiche’a thina tuoh terrorist ho hi Jaish-e-Mohamad, Lashkar-e-Toiba chuleh Hizbul Mujahidden galguhbol ho hidin ginmo ahi ati.

  Hetthei chu September 28 leh 29 nikho’a chu Line of Control khokhel’a Indian Army’s Elite Special Armed Forces noiya Para Commando hon Pakistan occupied Kashmir (PoK) a um ‘launch pads’ mun sagi ho anabulu’u ahi. (ZMB)


Thal-choi hon AR convoy bulu

Imphal, Sept. 30 (ET): Ukhrul district hopsung Kamjong munvel’a thal-choi hon Friday jingkah’a Assam Rifles ho anabulu nauvin Major khat akitongkha’n ahi.Thulhut kimu dungjuiya, jingkah nidan 4.30 vel’in thal-choi, thingnoimi hon 31 AR convoy abulu-u ahi. Thilsoh’a Major Mandeep Singh, C-Coy chu meichang in akha’n, apet pet’in helicopter mangcha’ hospital’a din anapodoh tauve.


Free Computer Course
nielit ScreenshotImphal, Sept. 30 (ET): KSO Langol leh NIELIT kithokhom’a thinglhang mite ding’a manbeidin “Course on Computer Concepts (CCC)”, “Diploma in Computer Application (DCA)” kichuhna apeh ding ahi. Hiche training hi October 15, 2016 nikho leh KC Hall, Hebron Veng, Langol a kipan ding ahi. Hiche nadinga form pehlut phat, agei pen’a October 8, 2016 hiding ahi.

  Chuleh form hi C-17/II, Langol Housing Complex a muthei hiding, boina nei hon Philemon Haokip, Education Secy. (KSO-Langol) mobile no. 7085970485 a akijahmat pi thei diu ahi.


Gangte Cemetery lhandoh hita

daf424ae-15dd-webLien Gangte
Ccpur, Sept. 30 (ET): Gangte Youths’ Organisation, General Headquater (GYO-GHQ) gonna in Gangte Cemetery kipapi na kingon leh Pathien a lhandoh na kingon 30th Sept., 2016 jinglam nidan 11:00 apat chun aum in ahi. Hiche kingon tokilhonin, Tuinom kho toh kinai cha’a um Gangte Cemetery Pathien a lhandoh na Rev. Khaigin Gangte, Ex. Executive Secy., ESC in aneiyin ahi. Chuleh, D. Angam Gangte in ana molliemsa, apa (L) Dr. L. Kampu Gangte hetjing nadia Gangte Cemetery ding gam ahin tuodoh na chunga kipapi na kingon H. Shawnthang Innmun, Gangte Veng ah aum in ahi.

  Hiche kingon toh kilhon in, Keynote Address seina Gouminlun S. Gangte, President GYO-GHQ in aneiyin, chuleh Shawnthang, President, GYO, Ccpur in kipa vetsah na in Gangte custom toh kitoh in Gangte pondum leh Samal peh na D. Angam aneiyin ahi. D. Angam in asei na’ah, nam ngailut na jeh leh ana molliemsa apa Dr. L. Kampu hetjing na ding a Gangte Cemetery ding gam ahin tuodoh dan aseiyin ahi. Chuleh, Th. Neka Gangte, S. Lungin Gangte, Lamboi Gangte hon houlimna aneiyun ahi. Chuleh, Gangte Cemetery hi thupi tah’a lopna kingon kinei kit ding ahi ti’n GYO, Gen. Hq akon thulhut akimun ahi. Chuleh, GYO-GHQ in 2017 kum leh Ambulance khat jong kicho ding ahi tin jong thulhut aki mun ahi.


JAC Sadar Hills in Sadar Hills thua ‘Mipi Kikhopna’ kouta

Kaybie Chongloi
SADAR HILLS, Sept. 30 (ET): Joint Action Committee Sadar Hills in Sadar Hills district thu’a ‘Mipi Kikhopna’ ahunglhung ding October nisim 4 le Kanggui khopi mun’a akoutan ahi.

  JAC Sadar Hills akon’a thulhut kimun aseina’a, ahunglhung ding October nisim 4 nia Kanggui khopi mun’a lhangphong’a Brig. Thomas ground a ‘Mipi Kikhopna’ kikou hi giltah ahin, moh notthap thei ahipoi ati. Mipi Kikhopna a hi Sadar Hills thu’a thutah le giltah’a seikhomna um ding ahin, Sadar Hills sunga chengkhom jat namkim jouse dia panlah louva poimotah ahina chungchon’a hiche ‘Mipi Kikhopna’ hin Sadar Hills mite khonung dinmun kikhelna jong ahinsemdoh mo ahipoi. Hijehchun, Sadar Hills sunga chengkhom mipite chungchon’a adeh’a jat le nam kiloikhomna chomchom, Kuki civil bodies, Naga frontal organization, Nepali (Gorkha) civil bodies le meetei kiloikhomna lamkai jouse apantei ding akul’e tin JAC Sadar Hills thulhut chun aseije.

  Hiche ‘Mipi Kikhopna’ a hi navahtah’a mipin pan alahthei cheh nadin alhang alhang chule amun mun’a lamkai hon gari angaitodiu hichu JAC Sadar Hills in kipodoh ding ahijeh in che le va le nadinga lung opkaina ding aumpon ahi.

  JAC Sadar Hills akon thulhut kimun aseibena’a, hiche ‘Mipi Kikhopna’ na’a hi lhangphong tah’a tuchan geija ichan iphah uva, ipi dinmun’a ium tah uvem ti kiseiding ahin, politics hihen election thu hijongle ima akimatna aumpon, seijong iseibeh loudingu ahin, chule koima lhep chatvai a jong iumtah loudingu ahijeh in, Mipi kihoukhom lou akhohtan, hijeh a chu hiche ‘Mipi Kikhopna’ hi kigonga ahin, iumnau muncheh’a ilunggel u seina dingdol mun hung kisemdoh khohten ahijeh in thonlouva ipancheh diu akul’e ati.

  Tumasangin hoilai mun hile, pha itina lailai uva, aphachom loubeh dia ilunggel’u inasei sei hou hi apamaitan, aphatchomna theiding, aseina dingdol mun kisem’a hin kihoutoh din hung kalsong cheh un tin mipi temna jong JAC Sadar Hills in aneije. October nisim 4 a ‘Mipi Kikhopna’ JAC Sadar Hills in akoutolhonin, Manipur sunga CSOs, JACs, le kiloikhomna dang dang koiman bandh, blockade, strike kitiho abollou diuvin temna jong aneijun chule amimal in kikhop lolhing nadia pan alahcheh diuvin ngehna aneijun ahi.


Lamyanba Hijam Irabot pen kum 120 lhinna kimang

irabot webImphal, Sept. 30: Gamsung mihon Lamyanba Hijam Irabot pen nikho kum 120 lhin ni’a lamkai masapa jana sangtah apeuvin, CPI ho panna in kin-gon mun chom chom’a kiloikhomna chom chom in amang’un ahi.

  MDU ‘a kimang kin-pi’a Chief Minister Okram Ibobi Singh chief guest ‘a apang’in, Hijam Irabot Birthday Celebration Committee in kin-gon analamkaiyin ahi. Mun kisuhtah khat’a lamkai pa statue hondoh ding’a Okram Ibobi in ahoulimna’a aseiyin ahi. Hijam Irabot hi social activist ahiseh ahipon, political activist jong ahi’in, society’a kikhelna pohlut ding dei mi ahi, tin aseiye. Irabot hi gamsung mi seh hilouva India injong ageldoh ahi, ati.

  Socialist Student’s Union Manipur (SSUM) leh Manipur Proletariat People’s Democratic Union (MPPDU) injong THAU ground, Thangmeiband’a kin-gon anit uvin ahi. Imphal khopi’a um Imphal Public School leh Mekola Higher Secondary School panna’a school chom chom in 6 March Pass Contingent ‘a pan alauvin chule Salam Indubushan Chief Guest hina in kin-gon achelha in ahi. Irabot hin mijouse kibangcheh’a aum nathei ding society kikhelna pohlut ding adei ahi’in, socialist’a peng ahi’in, communist’a lut ahi, tin aseiye.

  Achesa September nisim 26 nikho’a SSUM in painting leh song competition abolna’a lolhinna neiho kipaman hopdohna jong aneiyui. Communist Party of India (CPI) Manipur injong Lamyanba Sanglen mun’a Hijam Irabot pen kum 120 lhinni anit uvin ahi.

  Handicapped Development Foundation injong kin-gon nitna in 3rd Integrated Literary meet agong uvin chule People Protection Committee Manipur (PPCM) in Rup Mahal Theatre ‘a 120 lhinna pen nikho geldohna anei uvin, lamkai masa pa jana pehna aneiyui. Hijam Irabot kiti ‘play’ vetsahna jong anei uvin ahi. Moreh, Jiri, Cachar, Hojai leh Agartala gam ho’a jong nikho nitna um ahi’in, mun chom chom’a gam ngailutna la kitetna jong aumin ahi.


TKSU-GHQ leh IGSSS in Road Safety Campaign nei

ed3a8fdf-aef8-webLien Gangte
Ccpur, Sept. 30 (ET): Thadou Kuki Students Union, GHQ leh Indo Global Social Service Society kithona in 30th Sept., 2016 nikho chun Road Safety, Poster Campaign ana um in ahi. Road Safety, Poster Campaign lhahdoh na kingon TKSU-GHQ Office, KIC Complex, Tuibong ah aum in ahi. Hiche ahin, IGSSS lang akon Thangboi Cordinator leh TKSU-GHQ lang akon Robert, Info. Secy., in houlim na anei uvin ahi.

  Thangboi, Coordinator, Youth Development IGSSS in asei na’ah, Ccpur dist. sung lamlien ho’a Accident apun chet chet toh kilhon’a IGSSS in jong akingai khoh in, hiche toh kilhon a TKSU-GHQ toh kitho’a Road Safety, Poster Campaign hung kigong ahi ati. Chuleh, Robert, Info. Secy., TKSU-GHQ in asei na’a, masang apat chun Road Safety Campaign nei ding ti hi ana kingaituo jingin, hinlah, ima bol theilouvin ana kium in ahi ati. Tuchung’a IGSSS panpi naleh kithopi na jal’a Road Safety, Poster Campaign akinei thei jeh in akipa na thu aphongin ahi.

  Road Safety, Poster Campaign nei ahi toh kilhon in, Tiddim Road leh Accident lhun na thei ding lamlien mun chom chom ho’a Road Safty toh kisai Poster 20 val atah doh uvin, maban’a jong poster tahdoh na chelha ding ahi.


“Meeyamgi Thougalloi Manipur” kiti political party thah kisemdoh

Imphal, Sept. 30 (ET): 11 Manipur Legislative Assembly election umna ding lha nga tobang akivat, Friday nikhon Directorate of Information and Public Relations (DIPR) complex’a ‘Meeyamgi Thougalloi Manipur (MTM)’ kiti political party thah semdoh ahitai.

  Chungkham Joyraj, Convenor, adhoc Committee, MTM in thuso miho akimupi in, national party hon gamsung miho lungtup abulhit joulou ahi, tin aseiye. MTM hi political party seh ahipon, hiche hi ‘movement’ khat ahi’in, gamsung’a nehguh suhmang nading chule japi ho chan ding kipehlou ho doudal ding ahi, tin jong aseiye. Mohen Naorem, member, MTM in Lamyanba Hijam Irabot in society pha sem nading’a lungtup anei hi tu’a khangthah hon akhonung ajuiya abulhit nading’a mopohna anei ahi, tin aseiyin ahi. National party hon gamsung boina thu’a lunglutna anei louvu ahi’in chule gelkhohna jong anei louvu ahi, tin Mohen Naorem in aseiye.

  Alangkhat’a, Rajivkumar, member, MTM in kibungkhenna leh kibahlouna hi dettah’a umjing nalai ahi’in, society’a hitobang boina suhlhap nading’a khangthah hon politics’a pan alah ngai ahi, ati. Hetthei khat chu Convenor, adhoc Committee, Chungkham Joyraj hi achesa 2013 kum’a kon BJP Manipur Pradesh member anahi ahi’in, nikho thum masang’a party adaha’a Meeyamgi Thougalloi Manipur (MTM) party asemdoh ahi. MTM in ST/SC, ILP chule thudang dang hohi sangtah’a gelkhohna aneiding ahi.


‘Ningel chi’ amanthah louna ding’a khosung mihon sorkar kithopina thum

fffff -webLaishram Ranbir
Imphal, Sept. 30 (ET): Private leh government department official tamtah in Manipuri chi (local Salt) venna ding’a kithopina peh ding’in kitepna anei uvin, ahin, kitepna hohi atah akisodoh poi, tin Khujam Ongbi Maipakpi in aseiyin ahi.

  Ningel Mayai Leikai, Yaripok’a cheng kum 66’a upa Khumukcham Ongbi Maipakpi hin kum 40 val ‘Ningel Thum’ tia kihe gamsung’a kisem chi (salt) semna’a na atoh ahi’in, tuchan’a atoh jom nahlai ahi. Ningel kho’a chi sem’a (producer) 30 val um ahi’in, tu’a hi 6/7 bou um ahitai. Meitei Thum (chi) hi kichenna leh maicham (ritual) kisemna ho’a sangtah’a kihol ahi’in, hiche phat sung’a hi natoh ding ahao ji-u ahi’in, dinmun hahsatah hijong leh chi sem angah thei loujeh uva abol jing-u ahi, ati.

  Manipur gamsung’a phat masa laiya gamsung’a kisem chi hi leng ho’n gal-hang ho ahansan najal uva thilpeh’a apeh’a kisei ahi. Kum sottah Maipakpi in na atoh jouva tu’a hi Ningel khosung mi phabep athalah thei ahitan, chule amaho inchen semna’a kithopina ding lo jong apeh ahi. Tohman hi nikhat’a chi asemdoh jat dungjuiya kipe ahi, tin Maipakpi in aseiye. Thumsung (chi semna) mun’a guha’a kon twi khai ding, mei tih ding chule chi sem ding achom chom’a atha lah ahi. Ningel kho’a thi putna guha (slat-well) thum aumin, hiche lah’a aluipen Ching-Yenjin tia kihe hi thing’a kigen ahi’in, khosung mihon hiche hi aman nom ahi. Chule Ningel kho kom’a jong Chundrakhong, Seekhong leh Waikhong kiti chi putna guha thum um ahi’in, ahin, hiche hi phabep kisuse ahitah jeh’a chi soh joulou ahitai.

  Gamsung’a kisem chi hohi jat nga aumin, Thumjao (salt cake lenpen), Thum Talak, Thum Samer, Thum Koiga chule Thum macha ahi. Kum phabep masang’a khosung mihon mopohna nei authority holeh sorkar in Ningel Thumkhong amanthah louna ding’a kithopina apeh diuva thumna aneiyu ahi’in, hiche hi tuchan’a kisan peh loulai ahi. Sorkar leh mopohna nei hon Ningel Thumkhong amanthah ding adei louva ventup ding adeiya ahileh kikhelna umding ahi, tin Maipakpi in aseibe’e. Tuchan’a Ningel khosung mihon sorkar in kithopina apeh ding anga jing nahlaiyu ahi.


Kai don toh kisai’a NSCN-IM ngohna thuphon hi bul-le-bal umlou: KNF

SADAR HILLS, Sept. 30 (ET): NSCN-IM Senapati Town Commander in September nisim 29 nikho’a thusoh phabep le social media a Kuki National Front (KNF) in kai adong’e ti’a ngohna anei chu abul abal umlou thu ahi’n, KNF suhminsetna dinga abol ahi tin kiloikhom Department of Information & Publicity a kon kimu thulhut in aseiye.

  Thulhut in aseiyin in KNF hi Government of India toh SoO noiya um kiloikhom ahi ati. Chuleh KNF hi ipilam hijongleh NSCN-IM toh kitimatna kineilou ahi’n, Senapati Town Commander in kiloikhom chunga ngohna anei hi agangtheipen a asuhtheng ding ahi tin thulhut chun aseiye.

  Kuki National Front hi Kuki thalchoi kiloikhom ho hungkon dohna ahi’n, NSCN-IM in thil neocha a KNF min asuhmolphou theilou ding ahi tin thulhut chun aseiye. Thulhut in aseibena a chun NSCN-IM in KNF le NSCN-K Senapati tolpi sunga kai dong a ngohna aneihi aphotchetna (proof) jong aneidehlou ahi’n hitobang thilho hi’n kiloikhom ho kikah a boina asodoh sahthei ahi ati. Chuleh KNF hin Senapati tolpi sung a Finance Wing jong akineipoi tin thulhut chun suhtheng na aneiyin ahi.

  Thulhut in aseibena achun NSCN-IM hi revolutionary kiloikhom khat ahijeh a jana ana kinei ahi’n, hitobang ma a chu NSCN-IM in jong KNF jana apehding kidei ahi ati. Chuleh Senapti a cheng Kuki ho le kuki thalchoi kiloikhom ho ajeh apol umlouva ngohna kineiho hi tunung tuban teng le avel a asokitlouna ding in KNF in ngehna anei in ahi. Ijemtia hitobang thu hi avel a ahung ginkit a ahileh kiloikhom in kimohvetlou ding ahi tin thulhut chun gihna khoutah aneiyin ahi.


DLCKC Sadar Hills in anoiya um sub-committe ho heng a Kut kiman na ding tohguon ho hetsahna nei

SADAR HILLS, Sept. 30 (ET): District Level Chavang Kut Committee, Sadar Hills in tuni chun anoiya um sub-commitee ko (9) ho heng’a ahunglhung ding November nisim 1 ni’a Kangpokpi a District Level Chavang Kut manding tohgon aneiho hetsahna anei in ahi.

  Kangpokpi a Chavang Kut manding thu hi CSO ho’n September nisim 27 ni’a kihoulimna aneina’uva kilolna ana nei’u ahi. Hitolhon in tuni chun Chavang Kut Committee Chairman Lunthang Haokip, Executive Member, ADC Sadar Hills office chamber a kon in Sub-Committee ko (9) ho hetsah thupeh anei’uvin ahi. Tuni’a District Level Chavang Kut Commitee, Sadar hills in hetsahna anei sub committee ho chu Finance,Souvenir & Mementos, Sound & Light, Stage & Hall, Cultural, Miss Chavang Kut, Media, Security chule Hospitality ahi’uve.

  Finance sub-Committee a hi Lunthang Haokip, Kut Committee Chairman mama in Convenor mopohna apoh ahi. Chuleh Seikhojam Kipgen in Co-Convenor mopohna apoh ahi. Souvenir & memento hi Dr. Ngamkhohao Haokip le Hemang Singsit in mo apoh lhon ahi.

  Sound & Light lang a mopo hi K.S.S. Kangpokpi ahi’n Hall & Stage a mopo hi Jangkhogin Guite le Haolet Khongsai ahilhon e. Cultural Sub-Committee a convenor le Co-convenor mopoha nei teni chu Lamcha Chongloi le Hethang Kipgen ahilhon’e. Miss Chavang Kut Sub-Committee a Convenor le Co-Convenor mopohna nei teni chu Dennis Misao le Hatneng ahilhon’e.

  Media Sub-Committee lang a Convenor mopohna nei chu Kamboi Chongloi ahi’n, Security and Hospitality sub-Committee lang a mopohna nei teni chu Pagin Kipgen le Nehkam Kipgen ahilhon’e.

  Alangkhat a, Chavang Kut Committee in tuchung District Level kut a Jin-gun ding in Chief Minister Okram Ibobi Singh kouna lekha pehding in thulhuhna anei’uvin ahi. Chuleh Dy.CM Gaikhangam le IFC Minister Ngamthang Haokip Jin-ja’um le Kineipa apang ding’a kouna lekha pehding in jong thulhuhna anei’uvin ahi. Saikul AC MLA Yamthong Haokip, Kangpokpi AC MLA Nemcha Kipgen, ADC Sadar Hills Chairman Haokholal Hangshing le Vice-Chairman Thangjakam Misao jong deichom’a kou ding in thulhuhna anei’uvin ahi. District Level Kut Committee, Sadar Hills hin ahunglhung ding October nisim 4 nile Elite Higher Secondary School, Kangpokpi a kihoulimna aneikit ding’u ahi.


Assam Rifles in Educational tour kithopi

Assam Rifles conducts webSadar Hills, Sept. 30: Manipur gamsunga chamna le khantouna amuthei nadingin , HQ IGAR (South) noiya um 2th Assam Rifles (9 Sector Assam Rifles) hon Phoweibi Sadar Hills a um Faith Christian Academy a simlai chapang ho educational tour nikhat kigong chu kithopina anapeuvin ahi.

  School founder President Lulun Viaphei, School Principal H. Lunna chuleh 2th Assam Rifles official ho jauna’n tour chu anakihong doh in ahi. Agom’in simlai chapang 53 le jilkung 10 tour chun anajau un ahi, tour Imphal, Thoubal le Kakching munna cheu ahi. Thulhut kimu’n aseibena’a Assam Rifles te kithopi nahin Manipur’a simlai chapang ho themjilna lampanga lunglut nale hetgilna anei nadiu ahi tin aseiyin chuleh vengsung mite’n hiche tour kibol hi akipapiuvin ahi ati.


Assam Rifles hon Veer Naris holeh akinaipi asuopi ho kipapina kingon bol

Assam Rifles webPallel, Sept. 30: Gaal’a ahinkho anaphal, Sepai ho jaana pehna kingon khat HQ IGAR (South) noiya um 4th Assam Rifles (26 Sector Assam Rifles) hon HQ 26 Assam Rifles, Pallel munnin a anabol un ahi. Veer Naris (muollemsa sepai ji ho) leh a-innsung mite chunga gamsung ngailut najal’a ajiteu vin a hinkhou anaphal nauchunga hetpeh nale lhamon nadia kibol ahi.

  56th Raising Day man tokilhon’a Assam Rifles unit in kin-gon a, gal’a ana moulliem sepai ho Innsung mite chunga kipapi nathu anaseiyun, hitobang kin gon ho mutheina ding leh gamsung phat theina dinga a hinkho’u anapehdohna jal’uvin kipapina lentah Assam Rifles in anape’n ahi. Kin-gon kimang hi kum khat vel thu anakikhol jouva koboldoh ahi tin jong press release in aseiyin ahi.

  Kingon chun 26 Assam Rifles Commander in Assam Regiment noiya ana moulliem sepai 6 ho, a innsung mite’u kithopi na’n dangka 29,000 anapeuvin, innsung mite honjong hetpeh nale khohsahna amuna’u chungin alungthim’uh atongkha lheh’e tin jong thulhut kimu chun aseiyin ahi. Assam Rifle unit in jong gal’a thi, Innsung mite dinmun dopsang nadia pan alahjing ding ahi tin aseiyin ahi.


Andro mipi’n NSCN-IM chung’a kiphinna nei

Imphal, Sept. 30: NSCN-IM in khamna theiya kivei ahe ti’a dihlou tah’a ngohna aneiya anatha’u Hijam Irabanta Singh, mona neilou ahi ti’n Andro mipihon Panam Ningthou Kangjeibung apat Andro Bazar cha nana kijot’uvin ahi. Hijam kithana chung’a kisem Joint Action Committee in Hija kithana’a mona neiho state government in amatdoh dingin ngehna anei’uvin ahi. Public meeting jong ana umin hiche’a chun club 15 leh Meira Paibi organisation 11 in pan anala’n state government in NSCN-IM a kimaitopi joulouna chung’a nopmosahna thu anaseiyun ahi.

  Hijam Irabanta hi nisim 16 October 2015 nikho’a hi U-Morok (King Chili) cho ding’a Kamjong, Ukhrul a anache na’a dihlou tah’a ana kingoh’a a sum jouse jong anachom jou’uva ana tha’u ahi. Hiche toh kilhon’a hi insung mite’n missing report jong anabol jing’u ahin, chomkhat jou’a Kamjong kho’a Thomson kitipa hin atha ahi ti thuchen anamu’u ahi. (source: Agencies)


Editorial web featured - 200pxCeasefire daan phate kijuilou jeh hipenji

  Thingnoi thalchoi ho kimatji teng leh numei ho lotna’a mipi in akimatna mun leh akiman ho kikoina mun ham adellut jiuva kiphinna aneijiu hi aumjingtai. Hiche hi phaigam’a kiboljing ahin tua hi thinglhang’a hung kihabol khat ahi. Hiche hi mipi in thingnoi ho atosot uleh athu uva anunnao phondohna khat ahijeh in mipi chung’a setna hung lhunna thei ahijodem ti jong gelthei ahi. Senapati Town (khopi) ah hitobang thilsoh hi achesa 28 jaan ah ana um’in ajing (29 Sept) nilhah lang geijin mipi kiphinna in anajuijin phulou helouva bandh kibol’a achele avahleh holeh thilpo gari ho ni khat tobang ana kitingden u ahi. Hichu Assam Rifles hon NSCN-IM thingnoi Cadre ho manchah pum’a amat jeh u ahi. IM hohi government toh ‘Ceasefire’ a aumpet u keu hilouva kihouna jong aneipet u ahi. ‘Ceasefire Ground Rule’ (daan) dungjui a chu thingnoi ‘Cadre’ (sepai) ho meithal pum’a Camp pam’a vahle le theilou diu, kai le don (tax) jong adonlou diu ti um ahi. Hiche Ceasefire Rule hi thingnoi hon akon-ajang’a ajuilou u khat ahi. Govt sepai/police tailou chu koiman License umlou meithal achoitheilou, achoichoi matdoh ahileh daan dungjuiya kiboldi hi ahisa ahi. Ceasefire a um thingnoi ho hi govt toh kikaptolou dia kihet themtona aum vang’a hitobang daan in ahuop thou thou ahi. Ahin Ceasefire a um thingnoi cadre ho manchah pum’a ahung kimat ji teng uleh akiman hoti, mipi hoti in kinuoisena’a alah jiu, govt toh kihet themtona nuoiya ki um’a iti chu govt sepai ho mama’n mi amat jeng thei diuham tia hung pangjiu ahi. Daan kiti hi govt sepai lang’in jong phatah in juiji photphot leh mipi kithin jeng jina ho hi umbehloudi ahi. Ajeh chu Assam Rifles hon thingnoi thalchoi amat teng uleh thal choilou khatbon akaplih uva thal khat to asipbeh nau thilsoh ana umji jeh-a mipi hin tahsanna neitalou, thal pum’a kimat tha vang chu ahing’in kilhaponte ti ginmona aneijeh ujong hidi ahi. Chuleh thingnoimi chu akimat leh nidan 24 (ni khat) sung’a akimatna mun to kinaipen police khut a pehlutdi dol ahin tua hi Assam Rifles hon amimat thingnoimi ho amaho Camp a apohlut jiuva thudoh aneinauva avohnalam uva avohlihlo ujong ana umji ahi.

  Senapati thilsoh a hi NSCN-K leh Kuki thingnoi group khat in Senapati Town sung’a Tax adon jeh uva akiman IM Cadre hon manchah pum’a anadel nalam uva Assam Rifles hon amat uvin jong akiseiye. Hiche hi ginchat umbehlou, jou thu ahileh chi le nam kikah a muchi phalou kitugo jong hithei ahijeh in akuoikuoi kichihtheididan ahi. Thingnoimi ho thal pum’in anopnop in vahle taleu govt dia vetnadi umloudi, adeh-a thingnoimi to kituohdia gamsung’a kikoi Assam Riffles ho dia atohdiu tonglouva um hijeng diu mipi mama hin “Assam Rifles hon ipi abol uham, atohdiu atongpouve” tia taimodi loi jong tamkitdi ahi.


*For more news, articles etc. please click “ET IN PDF.”