Nungah 2 in Rio a India huhdoh

Nungah 2 in Rio a India huhdoh

240
0
SHARE

Vannoi leiset a mitamnapen gam lah-a anichanna India hi tuchung Rio Olympic ah chom hileh kijumsona lientah atoh tavang’in, numei 2 – PV Sindhu leh Sakshi Malik chakhat in Medal hinla lhon hihleh India mi khat kahi tidi jong jahchadi mi tamdi ahi. Ahin Medal kilah joulou teng lebou Govt lang’a mopohna nei ho demdi hung kichutho tamji, Sports leh gam ngailu honjong hitobang vannoiya kitetna sang ho um masang’a ipi loa gamdang mi phahjou theiham ti ngaito umkitlou ahi. Tuchung Rio (Brazil) Olympic ah India in nahchangsal’in Silver medal khat leh Bronze medal khat ahinlajouvin, hiche hi 2012 London Olympic a sang’a gamcheng’a khehsuhna ahi. 2012 London Olympic a chu India in Silver medal 2 leh Bronze medal 4 analah ahin India a dia Olympic a abolhoinapen ahidoh e. China ho bangdia vang medal maimai hitalouva USA bantah-a Gold medal tampen alahjoulou hi jachat leh thangtomna tah-a alah jeng u ahi. 1980s lang’a Olympic hoa chu India in Bronze medal khatbeh jong analahlouna ana umji ahi. Hicheto tedia tuchung’a medal 2 kila jong hi phajah ti thei ahi. Ahin India tobang vannoiya mi het thei gam minthang leh gam khangtou khat dia Sports lang’a amitmodan hi aseije bei ahi. Hiche hi amiho mitmo jeh leh thepna (talent) neilou jeh hilou, sorkar leh Company ho lang’a kon Sports lam khohsahna ha umlou jeh ahipen’e. Mi khat le ni akihabolten’a Olympic a Medal ahinlah leh ama changtum minphatna bou hitalouva gam pumpi minphatna jong ahijeh in sorkar hin Sports lang hi khohsahna hapieh jep leh hitilom’a Sports lang’a mi phahlelna hiloudi ahi. Government holeh Company ho Sports lang akhohsahlou uham itijongleh khat nin medal ahinlah leh kipaman pedi kichutho kit u ahi. Tuchung injong Badminton a Silver medal hinla PV Sindhu (Telangana/Andhara Pradesh) leh Wrestling (kibot) a Bronze medal hinla Sakshi Malik (Delhi) jong hi Training abollai lhon’a konjong tilkhouna leh kithopina apiehlam jong kihedohlou, medal ahinmu lhon tah-a dangka Crore lang’a pedi kichutho jeng ahi. Medal amujou lhon ni khat ni ni sung’in Sakshi dangka Crore 5, Sindhu in Crore 10 lang pedi State govt leh Company hoa kon’in ahung umdoh jeng’e. Hiche hi kitilkhouna ahinan hinlah Training bollaiyin jong ‘Sports’ mi ho khohsahna ha-umhen lang Training bolna manchah hojong gam dang’a ho bang kikoileh medal mubena hiteidi ahi.

Bronze medal munadi themchakhat bou vat nungah Dipa Karmakar (gymnastics) hi koima atilkhoudi leh sum pedi kiseidoh kitlou ahi. Alalkhalou alal leh aboiye kitidan’in India te khat nin Olympic medal ahinlah teng akidopsang behsehji jeh in Company hon athilsem uho Advertise bolna din bou amangcha jiuvin, V.I.P. mongmong ahung hiji teng uleh kichep lang khehsuhlo jiu ahi. Tuchung’a Badminton a medal ladia kineppi anahi nungah Saina Nehwal jong khup kisuhkhah jeh tijongleh hitobang chet ahi. Ipi hileh Sindhu leh Sakshi hin ulsa long leh hahsa genthei nasatah ahinthoh lhon’a hitobang lolhinna ahinnei lhon ahijeh in gam le nam achoisang lhonna hi kipapi louthei ahilhonpoi. Anatohna lhon (Sindhu : Bharat Petroleum a Assistant Sports Manager chuleh Sakshi : Indian Railway a natong) chieh-a Gazetted Officer a promotion amulhon jong hi achanlhon dia lom ahi.