Nuclear Bomb a kigih tona (Nam ngailutna achekhel valteng gal umji ahi)

Nuclear Bomb a kigih tona (Nam ngailutna achekhel valteng gal umji ahi)

377
0
SHARE

Nuclear Bomb a kigih tona
(Nam ngailutna achekhel valteng gal umji ahi)
Gam le nam ngailutna hi neicheh didol ahinan hinlah India leh Pakistan alang lang’a angailu dehset mi-ngol (fanatic) hon vai ahinpoh jeh uva achainaleh ahiloudi Nuclear Bomb a kibulu tona khat ahung umdohdem ti hi kigih tona hoa kon nailam thimle kilomji ahi. India le Pakistan kikah a thu ahungsanji teng Pakistan nin Nuclear bomb a India bulu dia gihna aneiji hi angaina dan’a aum vang’a tuchung Kashmir thua Pakistan Muslim League lamkai khat nin ngolhuoi tah a Delhi khopia Nuclear bomb khat kahin lhah khum uleh nakhut nadop uva ‘surrender’ nakibol jeng diu ahi tia gihna anei chu India injong mi-ngol moh khon-khon ahi tia alah theiloudan ahi. Hiche jeh a hi India Defence minister Rajnath Singh in India in Nuclear bomb a koima kibulu masa lou di ti kichepi hi athu khoh dungjuija kichepi jomlou maithei di ahi ati chu Pakistan legihna ahi. Nuclear bomb hi kivenna di bou ahin khat nin Nuclear bomb a ihin bulu masat le bou alethuhna a kimang di ahi ti “No First Use” policy hi Nuclear gal manchah nei hon achepi vang uva achepilou loi lah a Pakistan jong khat ahi hi tijat umtah khat hithou ahi. India in Nuclear bomb aneilou dan’a Pakistan ten Nuclear bomb a India gihna aneijing jeh uva tua India in akhoh dungjuija Nuclear bomb thua policy kikhel’a khat bulu masa’a kipang thei ahi ti ‘indirect’ tah a ahinsei hi Pakistan te jong aguh a asul kihot jeng kit u ahi. India le Pakistan sepai ho meithal’a kikap tona gal hung khoh lheh taleh ahat mojojo chun jum manna Nuclear bomb ahinman jeng diham ti hi ahi. India a Hindu gam le nam ngailu dehset RSS holeh akibahpiu Pakistan a Muslim gamle nam thipi ngapchat Army leh thingnoi hon alang lang’a govt athunun u ahijeh a khohelou mi tamtah hung moh sagai thilo thei hijing ahi. Leiset chung’a gal len nina (world war-II) chu ajeh dang tam jongleh Hitler in German gam le nam kiletsahpi leh kukal tah a ana ngailut chuleh Japan ten jong agam u kehletbena dia nam ngailutna sangtah ananei jeh u ahipen’in achaina’a America ten Japan khopi 2 a Atom bomb ana lhahkhumlo ahi.
Galguh bol lamkai minthang Mao Tse Tung (China) in meithal long’a kon thaneina (power) hung putdoh ahi tia anasei chu tu khang’a hi meithal leh sepai tamnei jeh bouva thaneina um hita louva Bomb nasa tah tah lah a ‘Nuclear bomb’ (Atom bomb, Hydrogen bomb) leh Biological bomb nei gam ho bou hi vannoija thaneina khat nei, gin-le kichatna um ahitaove. Ahin Nuclear bomb nei chung chon’a sum le pai inchen louchen lam’a tha hatna nei jong ngaitha ahi. North Korea leh Pakistan jong Nuclear Bomb aneilhon vang’a sum le pai lang’a vaicha tah gam ahilhon jeh a ipi sei lhon henlang Nuclear Bomb a mi bulu masa din gihna neijing lhon jongleh mi-ngol ahijeh a kichatna khat tilou kon kichatna tahtah a aneilhonlou ahi. Nuclear bomb nei hi ihin bulu thei khat suhtangna di (deterrence) ahibouvin man tahtah di ahipoi akiti vang’a amale agam pumpi thigamdi jong khohsalou ngolna leuva nam le gam ngailutna neihon hinmangcha taleh alonaje bei hikit ahi. Hindu bou, Muslim bou tia nam ngailutna ngolna jat khat (fanaticism) jeh a kitomona um banga ‘society’ neo neo holah a jong “hiche bou” tia ngolna jat khat neiho jeh a kitomna umjing ahi.