NSCN-IM leh RN Ravi in Naga flag leh constitution thu seikhom; NSCN...

NSCN-IM leh RN Ravi in Naga flag leh constitution thu seikhom; NSCN in ‘Naga integration map; jong pelut u

1028
0
SHARE

NSCN-IM leh RN Ravi in Naga flag leh constitution thu seikhom; NSCN in ‘Naga integration map; jong pelut u

Kohima, Jan 18: Chief negotiator leh ‘Ato Kilonser’ Thuingaleng Muivah lamkaina a NSCN-IM lamkai hon Naga Peace Talk Interlocutor leh Nagaland Governor RN Ravi toh Police Complex, Chumukedima a Saturday nikhon kihouna anei uvin, ‘Naga integration map’ apelut uve, tin thulhut in aseiyin ahi.

Saturday nikho a meeting a NSCN-IM delegate hon amaho ‘competency’ leh ‘Naga integration map’ apelut uve, tin East Mojo thulhut in aseiyin ahi. “Naga Peace Talk interlocutor in Prime Minister Narendra Modi akimupi’a, chule NSCN-IM leh Centre kihouna toh kisai thu ho aseikhom diu ahi. RN Ravi in PM Modi toh kihouna anei jouteng NSCN-IM lamkai ho akihoupi kit ding ahi. Hiche hi Naga jouse phatchomna ding ahi”, tin thulhut chun aseiyin ahi.

NSCN-IM delegate hon Ravi toh akihou nauva Naga flag leh constitution thu jong asei uvin ahi. Kum masa December nisim 27 nikho a kimuto dinga um u ahi’in, ahivanga boina chom chom jeh a kihouna anei louvu ahitai.

Meeting a sum kidon thu jong asei uve, tin thulhut in aseiyin ahi. Ravi in Dimapur-Kohima four-lane project velvetna aneina a NH-29 a natoh amachal theilou chule quality ahoi lou hi society deilouva chatloh a thingnoi kiloikhom hon sum adon jing jeh u ahi, tia asei ahi. Kum 22 lhing akinga jouva Naga peace talk hi akisei chai kon ahitan, ahivanga kum masa October lha a NSCN-IM ho thumna hi ‘pre-condition’ phabep a Centre in san dinga thulhuhna anei ahi.

Achesa October nisim 31 nikho a New Delhi khopi a kihouna thupitah anei nauva NSCN-IM ho thumna khoh ho Centre in san peh dinga nopna anei ahi. Centre in hiche chungchang a dan phabep asem e, tin thulhut in aseiyin, ahivanga dan kikoi hohi khonunga kihouna anei teng uleh phatah a aseikhom diu ahi.

IRB kilahna a Congress ho alungkham angaipoi, tia Chief Minister in sei; gamsung mi dihtah ho venna neiya party hi BJP bou ahi, tia jong sei

Imphal, Jan 18(UNA): IRB battalion ni kilahna process hi dihtah leh thengtah a kibol ding ahi, tin Chief Minister N Biren in aseiyin chule Congress party alungkham angaipoi, tin aseiyin ahi.

Congress in nehguh beiya recruitment bol dinga thumna anei CM Biren in demna aneiyin, Congress vaipo sunga recruitment ho a adihlou tamtah um ahi, ati. Thil dihlou bol a pang Congress kiti party hon thengtah leh dihtah a kivaipoh ding gelkhohna neiya BJP sorkar thuhilna anei angaipoi, tin aseiyin2013 kum a Police constable kilahna a candidate ho lungkham tah a court a cheuva chule recruitment kitup tah a akibol loujeh a Supreme Court chan cheu ahi’in, tua sorkar noiya MR, Jailor kilahna hi boina umlouva kiphong ahi. Hiche jeh a Congress in IRB kilahna alungkhampi angaipoi, tin CM in aseibe in ahi.

BJP Manipur Pradesh office, Canchipur mun a Saturday nikho a athah a BJP a lut Congress ADC member khat leh Oinam Municipal Council a councilor 6 akipapinau kin aman peh nauva CM in asei ahi. Sorkar in IRB battalion a candidate aching dinga lom lhenna aneiding ahi’in, photchenna pethei aumle nehguh bol a pang ho chunga action kila ding ahi. Recruitment Chairman in dihtah a recruitment abol dinga thupeh um ahi’in, adih louva thil kibolna umlou ding ahi, ati.

Politics hi gamsung dinga kitah tah a natoh ding tina ahi’in, social worker gamsung khantou ding dei hon BJP tilou party dang alut ngailou ahi. BJP hi Hindutva thu a amachang phatchomna ding deihon adih louva avetsah u ahi. BJP lamkaina Centre in North East gam mi dihtah ho huh angaisah jeh a Inner Line Permit gamsunga akehlet ahi’in, gamsung miho lungtup abulhit ahi, ati.

Tua sorkar in gamsung mi dihtah ho ventup ding hi building sah ding leh adang dang sanga akhohsah ahi. Building sunga cheng ding ho alungmon theilou le building ipi phatchomna hiding ham, tin thudoh aneiyin ahi. Thinglhang leh phaicham a khantou machalna kibanga a akisem poi, tia ngohna thu seiya Phungyar AC a NPF MLA Leishiyo Keishing CM in adonbutna’a, Centre sorkar in thinglhang gam Phungyar AC a lamlen semphat nadinga dangka crore 250 apeh ahi, ati.

Gaiphundai a kon Haflong chena lamlen National highway status a upgrade bol nading tohgon um ahi’in, Jiribam-Tipaimukh lamlen, Imphal-Mao lamlen, Imphal-Moreh lamlen jong tu masanga sanga nasatah a khangtou ahi. Lamlen aphat louleh khantou machalna umthei lou ahi, ati.

Narendra Modi sorkar in khantouna ding programme tamtah achepi ahi, tin CM in aseiyin chule Ayushman Bharat hi vaicha genthei ho akijen nauva sum a kithopina akipeh nading ahi’in, LPG connection man beiya, genthei ho dinga housing scheme chule adang dang jong kipandoh ahitan, BJP sorkar in natoh pha aboldoh mutheiya tamtah aumvanga political party phabep in demna thu aseijing ahi, ati.

Anatoh beiya athu a bou seiho hi gamsung mihon akhop ahitan, BJP inbou Manipur leh North East ahuhdoh ahi, ati. State Assembly election 2022 a BJP in lolhinna sangtah aneina dinga party hon pan alah diuvin kouna aneiyin ahi. Sorkar sunga boina aum’e, tia thuthang chungchang a CM in legislator ho kikah a kihetkhelna aum tapoi, tin aseiyin ahi.

Boina hi insunga angaina ahi. BJP jong insung ahi’in, hiche jeh a member hookah a lunggel kibah louna um ahi. Party in mipi tosotna a gamsung dinga na atoh ding ahi. State in fund ho aphatchomna dinga amanchah dinga centre sorkar in thuhilna aneijing ahi’in, sorkar in vaicha genthei ho kijenna ding a sum leh pai alhinga aneiya, chule School Phagathansi Mission noiya school dinmun semphat nadinga sum alhing’a anei ahi, ati.

Tukum February lha kah a athah a kisa school building athah 30/40 hondohna kinei ding ahi. Party dang hon kitepna lhem aneiya gamsung mi ajoulhep vanga BJP party in mutheiya kikhelna sem ding adei ahi.

DGP in kitepna aneitoh kilhon a KSO Sadar Hills in nidan 48 bandh akou vochon

Kangpokpi, Jan 18(ET): Achesa January nisim 15 nilhah a National Highway 2 lamlen Yaikongpao leh Kalapahar kikah a KSO member leh Theologian khat gari in atalih na thilsoh a themmona nei ho mat dinga state DGP in kitepna anei toh kilhon a KSO Sadar Hills in January nisim 19 jingkah nidan 6 a kon nidan 48 bandh bol dinga tohgon anei avohai tauvin ahi.

KSO Sadar Hills in asei dungjuiya State DGP toh office chamber mun a kihouna um’a chule DGP in themmona neiho akimat doh nadinga KSO henga phat athumbe jeh a kiphinna bol nadinga tohgon kivochon ahi. State DGP in ngehna anei KSO Sadar Hills in asanpeh a, National Highway 2 a nidan 48 bandh bol dinga tohgon anei January nisim 20 chan a dinga avohchon ahi.

Ahivanga nidan 48 sunga state DGP in kitepna anei dungjuiya themmona neiho akimat louva ahileh January nisim 21 jingkah nidan 6 a kon bandh kipan ding ahi, tin KSO Sadar Hills in aseiyin ahi. Chule themmona nei ho akimat a vangsetna toh ho insung mite dinga thudih a thutanna aum kahse a thilong kila louding ahi, tin aseibe uvin ahi.

NH-37 a nidan tin a gari lhai vahding ahitai: CM Biren

Imphal, Jan 18(ET): Imphal-Jiribam lamlen, NH-37 a lei lentah tua akisa hi akijo teng leh nidan 24 sung gari lhai ding ahitai, tin Chief Minister N Biren Singh in BJP office, Canchipur, Imphal a thuso miho akimupina’a Saturday nikhon aseiyin ahi.

Tamenglong leh Noney district noiya um Barak leh Makru vadung, NH-37 a RCC lei kisa teni hi tukum May lha kah a sah jou dinga tupna um ahi. Lei kisemna ‘foundation’ natoh ho kijousoh tobang ahitan, lei semna ding part hohi Siliguri, West Bengal a kito ahi, ati. Centre in Irang vadung a Irang lei sahna dinga jong dangka crore 43 sanction abol ahi’in, lei sahna dinga angaicha tender ho kilapan ahitai, tin aseibe in ahi.

Tua chelha project jouse akijo teng leh NH-37 hi nidan tin a kihong a gari lhai theiding ahi, ati. 2022 kum kah a Imphal leh India gam dang dang railway a kijonto theiding ahi, tin CM in aseiyin chule Tupul-Imphal railway line a tunneling works akehkhat kijou ahitan, railway line kisahna hi tukum April lha kah a Kaimai, Tamenglong district lhung ding ahi, ati.

Railway project a dinga natoh hi aphat sunga akijo nadinga nasatah a chelha ahi’in, 2022 kum kah a Imphal a railway lhunsah ding hi bidoi ahi. Hetthei khat chu ajeh chom chom jeh a railway project jo nadinga phat kitep hi avel vel a kivochon ahitan, hiche jeh a project a sum kisumang hi hatah a kal ahi.

Manipur mi 3 Meghalaya a Dk. Core 2.5 man khamnathei toh kimat tah

Shillong, Jan 18: Manipur a kona mi 3 dangka 2.5 crore manding Heroine toh Meghalaya muna akimandoh than ahi. Press a kona thuso kimu dungjuiyin ANTE, Khliehriat Ps, Lumshnong Ps le Umkiang PP in Maroo cloud Maruti Suzuki Swift car (ML-05-L-8177) hung lhai chu Khliehriat muna nisim 15, Tolbol lha, jan nidan 10:45pm chun anakham lhonin heroine 430.01 gms(savon khum 40 a kikhum) 2.5 crore man chu amudoh un ahi. Hiche garia hungjao jouse jong thudoh dinga hentang ahiuvin chujouva kiman u ahi.

Akimandoh hochu Thangsiam @ Robinson (24yrs) S/o Kamzathang Haokip R/o M Songgel, Shri. T. Sonlian (22 yrs) S/o Paupi Tonsing R/o Zogam Bazar Zenhang Lamka, Churachandpur leh Hatneikim Kuki (21 yrs) D/o- Yanglet Kuki R/o- M Songgel, Churachandpur, Manipur ahive. Amuna Khliehriat Ps case no. 6(1) 2020 u/s 8(c)/21(c)/29 NDPS Act noiya register akibolin tuchanin athu akikhol jing nalaiyin ahi.

Governor Dr. Hajma Heptullah toh AR officer hon Raj Bhavan a kihoukhomna nei

Imphal, Jan 18(ET): Tunin Raj Bhavan a 43rd 12th le 26th Assam Rifles commandant hon Governor Dr. Hajma Heptullah ang a anatoh naotoh kisaiyin houlimna ana nei uvin ahi.

Hiche battalion thum ho hin Moreh Tnengoupal le Thouba ho venbit na anei u ahi. Battallion hon akisei lhang sung a ana toh doh ho ule thil umchan ho chung a Governor nu hetding in phondoh na ananei uvin ahi. Battalion ho alhang sung a tahlal le genthei mipi ho kithopina a camp le thil jat chom chom abol dan ho u jong tahlang na ana nei uvin ahi. Hitabang ana toh na chung uva Manipur mipi te thalheng in Government in kipa thusei na ana nei uvin ahi.

 

NYK leh District Police CCpur kithokhom nanoi’a “Community Policing cum Anti-Human Trafficking” chung thu’a kingon anaum

B.Lalboi Gangte

CCpur. Jan 18 (ET): Nehru Yuva Kendra (NYK) Churachandpur leh District Police, Churachandpur kithokhom nanoi in tunin District Training Centre (DTC), Tuibong mun’a National Youth Week toh kisai in “Community Policing cum Anti-Human Trafficking” kingon ananei uvin ahi. Kingon chu Women Inspector Sandy Tonsing leh Kimneihoih, National Youth Volunteer (NYK), Churachandpur in alamkai lhon in chuleh Lawrence Kapkhenmang, MPS, Additional SP (Operation), Churachandpur in kipa thusei najong ananei in ahi. Henkholun Doungel, District Youth Coordinator, NYK Churachandpur in kingon kibol lona ajeh tahlang na anei naban’a Roindro Salam, District Child Protection Officer (DCPO), Churachandpur in gamdang’a natong ding’a joldoh aum numei leh chapang chung thu kisai ho tahlang na anei in ahi.

Hiche toh lhon’a Sivanand Surve, IPS, SDPO Churachandpur leh Lalmalsawm Zou, in-charge, Community Policing Centre, Churachandpur tenin “Community Policing” toh kisai tahlang na anei lhon in. Chuleh Hasby Haokip, MPS, Additional SP (IUCAW) Churachandpur leh Women Sub-Inspector Marlyn Khumbiakmang, in-charge, AHTU, Churachandpur tenin “Anti-Human Trafficking” toh kisei atahlang lhon in ahi. Kingon kimanchah naphatsung in District Level Officer, National Youth Volunteer, NYK Churachandpur, District Police apat personnel holeh kho chom chom akon  Youth Club member hon jong pan anala uvin ahi.

Alangkhat’a SP Amrita in houlimna aneina’a District in Community Policing Centre kinei jong leh mipin phatchom pi naleh hamphat pinan amang pouvin ahi. Mimal, insung thu leh kholhang boina neihon itih phat hijong leh agadel lut thei jing chuleh Anti-Human Trafficking Unit jong Hasby Haokip vetkol nanoi injong aum in ahi ati. India polam mun chom chom’a insung natong ding leh lhalo hoitah pe ding’a temna nei agent hon CCpur khopi sung’a kipat mi tamtah ajol doh jing tan ahi. Hitobang’a kon hetlou gam’a koma toh jong kithu jatmat to theilou nachung chon’a hahsatna jong athoh uvin ahi. Hitobang ho puidoh kit thei nading thil bailam hilou jeh hin mitakip kichih thei ding in ngehna jong aneiyin ahi.

Chief Minister in Martial Arts Meet, 2020 hondohna nei

Imphal, January 18 (ET): Chief Minister N Biren Singh in Khuman Lampak Indoor Stadium mun a Saturday nikhon 1st Chief Minister’s Indigenous Martial Arts (Thang-Ta/Cheibi) Meet, 2020 hondohna aneiyin ahi.

Kin gon a Deputy Chief Minister Y. Joykumar, Works Minister Th. Biswajit, CAF & PD Minister Karam Shyam, Youth Affairs and Sports Minister Letpao Haokip, Agriculture Minister V. Hangkhanlian, Social Welfare Minister Nemcha Kipgen leh Manipur leng khangui Leishemba Sanajaoba apang uvin ahi.

Association chom chom 43 a kon participant 1500 vel in kitetna a pan ala uvin, January nisim 22 nikho chan umding competition a medal agom a 159 kichu diu ahi. Cash prize leh medal a hi dangka 15,000, 10,000 leh 5000 ahi’in, goljona neiho gold, silver leh bronze medal apeh diu ahi. Overall team champion, overall team runner up leh overall team third place in kipaman asum a dangka lakh khat, 70,000 chule 50,000 cheh trophy toh amu diu ahi.

Best disciplined team, overall boys team champion chule overall girls team champion jong dangka 20,000 cheh award apeh diu ahi. Chief guest a pang CM Biren in ahoulimna a Thang-Ta hi kum 2000 lhing Manipur gam gamdang miho a kon ahuhdohna a kimang ahi’in, ahivanga, achesa kum phabep sunga aloupina ho mang cheh cheh ahitai, ati. Hiche jeh a state sorkar in malaiya a kon ana kibol chonna hi suhhing kit nading lampi akhol jing ahi, tin CM in aseiyin ahi.

Meeting phabep aum jouva state sorkar in Martial Arts Championship bol dinga kigel lhahna anei ahi, tin CM in aseiyin chule sorkar tohgon hi khangthah chule chapang ho khamnathei a kon akikangse uva martial arts kichuhna aneidiu tilkhouna a kibol ahi, ati. Hiche hi society damtheina ding bou ahipon, chonchan kihilna jong ahi, ati.

Chief Minister in gamsunga um khosung jouse a Martial Arts learning centre semdoh ding adeisah dan aseiyin, chutileh thinglhang gam panna a mun tin a martial arts lolhing ding ahi, ati. Association chom chom 43 in kitetna a pan alah ahi’in, khovei teng leh hiche sanga ajat ni a tamjo in kitetna a pan alahjou nadinga organizer hon pan alah diuvin temna jong aneiyin ahi.

Tua sorkar in martial arts khohsahna ape’e, tin CM in aseiyin, mipin atosot diuvin temna aneibe in ahi. YAS Minister Letpao Haokip in ahoulimna a tukhang a khangthah hon pupa khanga kon ana kichepi kichep golseh ho amansah lou diuvin temna aneiyin chule Chief Minister’s Indigenous Martial Arts Meet hi CM Biren lunggel a kon kipandoh ahi, ati. Sorkar in khovei championship a thinglhang gam a um kichep golseh chom chom jong apansah ding ahi, tin aseibe in ahi.

Kin gon a MLA ho, government official holeh Thang-Ta Guru hojong apang uvin ahi.