NSCN (IM) in ‘Register of Indigenous Inhabitants of Nagaland’ chepi ding doudal

NSCN (IM) in ‘Register of Indigenous Inhabitants of Nagaland’ chepi ding doudal

593
0
SHARE

NSCN (IM) in ‘Register of Indigenous Inhabitants of Nagaland’ chepi ding doudal

Dimapur , July 13: NSCN-IM hon Saturday nikhon Nagaland sorkar in ‘Register of Indigenous Inhabitants of Nagaland (RIIN)’ chepi dinga thulhuhna anei hi Naga ho ‘rights’ toh kitohlou ahi, tin asei uvin ahi.

“Naga jouse pupa gam a cheng ahiuvin, politics khat noiya Naga ho achen diu chule thulhuhna aneidiu hi amaho thaneina ahi”, tin NSCN-IM Information and Publicity Ministry in thuso aneiyin ahi. RIIN chepi nading a tohgon hi ‘politics’ toh kisai ahi’in, 16 point Agreement toson ho ding gelna ahi, ati. Nagaland state hin ‘national decision’ apom pon, Naga gam kisemdoh hi Naga ho bungkhenna ding ahi, tin aseiyui.

Hoilai mun hijong leh Naga jouse achennau hi pu pa khanga kon aumnau ahi’in, hiche hi kituh jom jing ding, koiman akhel louding ahi, ati. India sorkar in Naga gam hop jouse punkhom ding hetpehna anei ahi, tin jong asei uvin ahi. Centre leh NSCN in ja thei kinoptona (political agreement) asemdoh kahse a Naga thu a imacha hi thulhuhna/thuchaina hilou ding ahi. Hiche jeh a thulhuhna sem nadinga achesa phat thu kisei hi Naga jousen phatah a agel diu ahi, tin aseibe uvin ahi.

Nagaland sorkar in Thursday nikho a June 29 nikho a RIIN agon hi adoudal aumjeh leh Naga Students Federation, Naga Hohi leh Angami Public Organisation in ginchat lel na aneijeh a khongai dinga aseiyu ahi. Home Commissioner R Ramakrishnan in thuso aneina a hiche hi tohgon thah ahi’in, section jousen pan alah a seikhom ngai ahi, tia anasei ahi. Policy chepi nadinga guideline hi akisem til ahi nalaiyin, phatah a kihoutohna aum jouteng kisuchen ding ahi, ati.

Gamsung mi venna ding leh phatchomna ahina dinga sorka in achom chom chule atohkhah thei jouse toh kihouna aneiding ahi, tin aseibe in ahi. “Kibungkhenna ahilouleh nam/mi douna a thulhuhna kila louding ahi”, ati. Nagaland Chief secretary Temjen Toy in June 29 nikho a RIIN gon dinga notification anasodoh ahi’in, registry gonna hi July 10 a kon ni 60 sunga jo dinga notification a kisei ahi.

RIIN hi Nagaland gam a cheng gamsung mi dihtah ho ‘master list’ hiding ahi, ati ahi. Certificate lhem kisem theilou nading jong ahi, tia asei ahi. Alangkhat a Naga Students Federation in RIIN thu a sorkar in tohgon velvetna anei dinga asei uva chule Naga Hoho in Naga ho kibungkhenna hiding a ginna aneiyu ahi. Sorkar in hiche thu asuhchen dinga Angami Public Organisation hon jong aseiyu ahi.