NSA noiya kiman jail a kon jamdoh Kangleipal police hon man; Imphal...

NSA noiya kiman jail a kon jamdoh Kangleipal police hon man; Imphal khopi hin puilhung tau

490
0
SHARE

NSA noiya kiman jail a kon jamdoh Kangleipal police hon man; Imphal khopi hin puilhung tau

Imphal, Aug 11(ET): NSA noiya kiman Jail a kon jamdoh a Sapamcha Kangleipal Special Delhi Police team hon aman uvin, Maoist Communist Party Manipur thingnoi lamkai ahijeh a amat u ahi’in, midang mi ni- Wahengbam Thoi Luwang @ Thawai Lakpa leh Kangabam Roshan, People’s War Group (KCP) kiti thingnoimi adang jong Kotwala munvel, Bihar gam a ni phabep masanga aman uvin ahi.

Maoist Communist Party Manipur thingnoi lamkai Sapamcha Kangleipal hi police hon asei dungjuiya Sunday sun nidan 11 don a Indigo lenna a Imphal airport hunglhung ahitan chule KCP lamkai teni hi lenna achom a apuiyu ahi. Sapam Kangleipal @ Chirangelen @ Sarat (38), s/o S Shyamsunder, Nongada Awang Leikai a cheng hi achesa December 2008 kum a case asemkhum u thu toh kisaiya court in ‘transit remand’ (gamdang a mat dinga) thuso aneiya Imphal khopi a ahin puilhung u ahi. Court in ni 6 ‘transit remand’ phatsahna anei ahi’in, Chief Judicial Magistrate Court, Imphal East a police hon apui diu ahi.

Chule KCP PWG lamkai Wahengbam Thoi Luwang @ Thawai Lakpa (36), s/o (L) W Thaba, Wabagai Terapishak a cheng leh Kangabam Roshan (27), s/o (L) K Gogo, Brahmapur Thangapat Mapal a cheng teni jong ni 6 ‘transit remand’ dinga ngehna anei uva, Chief Judicial Magistrate Court, Imphal West a adin sah diu ahi’in, tukum May lha a Lamphel Police station in hehna asemkhum thu a ahi.

Hetthei khat chu Sapamcha Kangleipal hi achesa May 7, 2008 kum a Manipur Press Club mun a ‘sedition charge’ a kiman ahi’in, sorkar masa in asemdoh Special Police Officers (SPO) douna a pan alah a Heirok kho mi ho Salwa Judum tobang a meithal apeh na thu jeh a kiman ahi. Achesa May 13, 2008 kum a Chief Judicial Magistrate anga adinsah uva, court in ‘bail’ a alhadoh ahi’in, achunga ‘sedition charge’ kisem hi atah ahipoi, tia court in asei ahi. Ahivanga court room a kon ahungdoh jouva state authority hon National Security Act (NSA) noiya amat kit u ahi.

Sajiwa Jail a lha phabep aum jouva JN Hospital (tua JNIMS) a jail authority hon admit abol u ahi’in, Erosine Gastritis aneijeh ahi. Achesa December 28 leh 29 jan, 2008 kum a Sapamcha Kangleipal hi aumna JN Hospital security ward a kon jamdoh ahi’in, hiche a kon police hon mat dinga ahol u ahi.