NPP sunga boina sang cheh cheh; NPP National chief in ‘expulsion order’...

NPP sunga boina sang cheh cheh; NPP National chief in ‘expulsion order’ asodoh jouva Thangminlien Kipgen in Minister Kayisii joh party a kon nodoh

87
0
SHARE

NPP sunga boina sang cheh cheh; NPP National chief in ‘expulsion order’ asodoh jouva Thangminlien Kipgen in Minister Kayisii joh party a kon nodoh

IMPHAL, Aug. 27(ET): Party a kon kinodoh president Thangminlien Kipgen in party constitution douna a ka chaloh na aumpoi, tin NPP national Chief Conrad Sangma thusei donbutna anei toh kilhon a Thursday nikho a National People’s Party, Manipur State Unit sunga boina um asang cheh cheh in ahi.

“National president in ngohna einei banga party constitution douna a kachon na um khalou ahi in, mi phabep in politics a ama machal ding gelna a adih louva apui ahi. President kahi na term kichai ding ahi tah jeh a party constitution toh kitoh a election kibol ahi”, tin Thangminlien Kipgen in aseiyin chule party president kahi nalaiye, tin thuso aneiyin ahi.

National president in ama lekhathot jouse chule ahoulimna ho a party constitution asei hi NPP referred constitution a akimulou hi lungdon umtah ahi. Referred document hi ECI website chule NPP Manipur state unit office a jong umlou ahi, ati. Party president thah lhenna dinga August 25 ni a election procedure kipan a, achesa 2017 kum a kon ana kichepi party constitution dungjuiya kibol ahi, tin jong aseiyin ahi.

NPP national general secretary in August nisim 20 nikho a notice kisodoh ni a kon nikho 15 sunga donbutna kapeh dinga ‘show cause notice’ eipeh vanga National President Sangma in August 24 ni a party a kon nodoh nadinga order (expel) order asodoh ahi in, aseiyu phat sunga donbutna kapeh masang a hitia abol uhi dan toh kitoh lou chule angaicha louhel ahi, tin Thangminlien in aseibe in ahi.

National president in interim president dinga tu naicha alhendoh Minister N Kayisii hin party douna na atoh a chule party membership renew abol lou ahi. Hiche jeh a amahi NPP Manipur member hilou ahi. Hiche jeh a disciplinary committee in party constitution article 19 noiya recommendation apeh dungjuiya, kum 6 sunga dinga party a kon ka nodoh (expel) ahitai, tin aseibe in ahi.

NPP State Unit General Secretary (Admin) Thongkham Haokip injong Disciplinary Action Committee, NPP Manipur recommendation dungjuiya MLA N Kaysii party a kon kum 6 sung expel akibol na order asodoh in, order copy hi NPP national president, Secretary to CM, Manipur, Secretary, Manipur Legislative Assembly henga jong athot uvin ahi.

Hetthei khat chu achesa ni li-ni nga ho masanga Manipur unit president kum 3 term tuh dinga party in avel a Thangminlien akitetpi umlouva alhendoh jouva party national president Conrad Sangma in Thangminlien party a kon anodoh a, party constitution toh kitoh louva achon in, Central Election Authority ho dohna anei poi, tia ngohna anei ahi.

NPP chief in Ch Ajang Khongsai (Working president), Dr. Ph Jilasana (vice president) leh Sushil Huidrom (Vice president) jong Thangminlien toh pankhom jeh a party a kon anodoh tha ahi. National president in Tribal Affairs Minister N Kayisii hi party interim president dinga alhendoh ahi in, hiche hi Thangminlien in dan dungjui ahipoi, tia asei kit ahi.

NPP national chief leh Meghalaya CM Conrad K Sangma in achesa Wednesday nikho a video message a Kipgen party a kon akinodoh thu aphondoh a, party constitution jui louva election bol dinga aphondoh a achepi ahi, tia ngohna anei ahi. Show cause notice akipeh vanga election abol jom ahi, tia Sangma in video a themmo achan ahi.

Thangminlien Kipgen chule dan dihlouva election bol a pang NPP member ho NPP a kon kinodoh ahitai. Manipur a party office achejom nadinga Tribal Affairs Minister jong hi a N Kayisii hi interim president dinga lhendohna kinei ahitan chule Manipur a party office-bearer ho lhenna dinga election kibol vah ding ahi, tia Sangma in asei ahi.

Hetthei khat chu NPP hi Manipur a BJP lamkaina coalition government a pang ahi in chule CM Biren lamkaina Council of Minister a Legislator 4 aneiyu ahi.

Xxxxxx

Minister Biswajit in ‘Modernisation of Handicrafts Scheme’ noiya artisan 77 kithopina pehdohna nei

Imphal, August 27(ET): Textiles, Commerce and Industry Minister Thongam Biswajit Singh in Thursday nikhon Scheme of Modernisation of Handicrafts, 2019-20 noiya National/State Awardee ho kithopina (Financial assistance) hopdohna aneiyin ahi.

‘Financial Assistance’ hopdohna kin goun hi Handloom & Textiles Directorate in Conference Hall, Manipur Secretariat North Block office a agon ahi. 2019-20 kum sunga kithopina mu dinga artisan leh crafts-person thepna sangtah neiya agom a mi 77 kilhengdohahi in, amaho lah a hi National awardee 7, National Merit Awardee 3 chule State Awardee 67 pang ahi.

Chief guest a pang Biswajit in ahoulimna a, tuni a hi kikhelna lentah imu u ahi, tin aseiyin chule Awardee ho akipapina leh apachatna thu aseiyin, tomngai tah a pan alah nau hetpehna um ahi, ati. Tukhang hi kitetna khang ahitan, thil kisem ho ahoina thei pen a isem diu ahi, ati. State Governor tohgon MEETAC thu jong Minister pa in aseiyin, scheme noiya sorkar in thil kisem ho standard nei ahina ding chule ajoh na ding platform gon peh ding agot ahi, ati.

Society a handloom leh handicraft athupi dan aseiyin, khangthah ho hiche sector a apan nading uva tilkhou dinga aseiyin ahi. Handloom and handicraft sector hi natoh mu nading jong ahi in, entrepreneur atam chan a tohmun neilou jeh a boina kisulham ding ahi, tin hilchenna aneiyin ahi. Artisan leh crafts-person (khut them) ho tilkhouna thu jong aseiyin ahi.

Scheme of Fund for Regeneration of Traditional Industries (SFURTI) noiya directorate in project li apehlut ahitai, ati. National leh State Aard hohi khat apot thon a kihetpehna ahi, tin aseibe in ahi. Covid-19 pandemic jeh a Lockdown aum vanga guidelines leh protocol ho jui pum a kihinso/kivah na ding a sum ihol nau ngah thei ahipoi, ati.

Commission, Devesh Deval injong houlimna aneiyin, handloom and handicraft hi culture leh tradition alet dan vetsahna ahi, tin aseiyin chule kum phabep sunga khantouna lentah um ahi, ati. Entrepreneur khangthah hon subsidy chule loan facility amu thei nading uva Start up Scheme apply abol diuvin aseiyin chule e-market space kehlet angaiye, ati.

Director K Lamlee Kamei in lemna thu aseina a Manipur a National Handicraft awardee 22 aumin, hiche hi Northeast a dinga atamna pen ahitai, ati. Ministry of Textiles, India government in asemdoh ahi in, hiche chungchon a Department of Textiles, Commerce & Industry, Manipur government in State Handicrafts Award hi tuchan geiya artisan 257 apeh doh ahitan, Manipur gam hi North East state ho lah a state handicraft award sanga artisan atam na pen ahi, tin aseiyin ahi.

Joint Director, Handlooms & Textiles, Manipur, E Jiten in kipathu aseina a, tu a kin gon a hi Covid-19 pandemic jeh a National Awardee ho bou kouna kipe ahi, tin aseiyin chule artisan 77 ho sum a kithopina hi ama ama bank account a kithot ding ahitai, ati.

Scheme noiya National Awardee ho dangka lakh 2 kithopina kipe ding chule National Merit leh State Awardee ho dangka lakh 1 kithopina apeh diu ahi. 2019-20 kum a talent neiya artisan 77 hohi agom a dangka lakh 84 ahop peh diu ahi.

XXXXXXXXXXX

Nambul vadung kisuhtheng CM Biren in kipana sangtah nei; sun leh jan a panla ho chunga kipathu sei

Imphal, Aug 27: Chief Minister N. Biren Singh in Keishampat lei leh Wahengbam Leikai Maharani lei kikah vadung pam a pahcha lei kibol hondohna anei na a Nambul vadung akisuhtheng amu akipana thu aseiyin ahi.

“Nambul vadung hi vadung theng ahina dinga phat sottah a kon pan kalah a, 2004 kum a Minister kanahi a kon natoh kipan ahi”, tin Biren Singh in aseiyin ahi. Keishampat a Thursday nikho a ‘flower plantation’ kibol alamkaina a CM in vadung thengset a amu a akipana mutheiya aumin ahi. State Environment Department tohgon ahi in, ahin, Biren in anem pen a kon natong hon sun leh jan a vadung suhtheng nadinga pan alah u akipapina thu sangtah aseiyin ahi.

Chief Minister N Biren Singh in grass root worker ho jana a lim akilahkhom pi in chule tilkhouna aneiyin ahi. Biren in politics ajop masanga Nambul vadung suhtheng nadinga article leh editorial tamtah ana sut ahi. Politics alut chomkhat jouva Minister hung hi a, 2004 kum a Nambul project ahin pat ahi in, ahivanga kum phabep sung kikhelna kimulou ahi.

Environment Minister Awangbou Newmai lamkaina a Nambul vadung suhtheng nadinga CM lungtup kimolso ahi. Minister pa in ahoulimna a Nambul suhtheng ding hi mijouse kin ahi chule Imphal khopi in mai a anei ahi, ati.

Kin-gon a Deputy Speaker Robendro, MLA Dingo, MLA Seityabrata , MLA S. Rajen, MLA RK Imo, Chief Secretary, DGP, Additional Chief Secretary chule government official luboh adang dang jong apang uvin ahi. Chief Minister in Nambul vadung athen jom nadinga tohgon jong kigong ahitai, ati. “Gojuh lai hihen lang hihih jong leh vadung twi vetkol jing nadinga department in tohgon asem ahi”, ati.

Nambul vadung a pollution aumlou nadinga natoh ding avat nalai um ahi, tin CM in aseiyin, chule hiche a dinga dangka crore 90 val hi Nambul vadung a longlut sewerage ho sah nadinga sorkar in natoh apat ahitan, sewerage hi Mongsangei a ‘treat’ kibol ding, hiche a kon twitheng hohi vadung a kilha lut a, Loktak Lake a longlut ding ahi, tin aseibe in ahi.

Xxxxxxxxxxx

Achesa nidan 24 sunga Manipur a Covid-19 positive 140 kimu be

Imphal, Aug 27: Achesa nidan 24 sunga Manipur a CAPF personnel 18 leh milham 122 Covid-19 positive ahi akihetdoh be in, milham lah a mi 47 hi numei ahi in chule pasal 75 pang ahi.

VRDL, RIMS a 12, VRDL, JNIMS a 19, Thoubal 8, Churachandpur – 2, Imphal East RAT – 3, Imphal West RAT – 73,  IRL – 1, Kangpokpi – 2,  Shija – 1,  Bishnupur – 2,  Babina -5,  Raj Medicity – 2,  Advance Hospital – 9, chule Ukhrul a 1 positive ahi kihedoh ahi.

Positive hohi Imphal West – 85, Imphal East – 10, Thoubal – 8, Ukhrul – 1, Senapati -1, Churachandpur -2, Kangpokpi – 5, Bishnupur – 4 chule Chandel district mi 6 pang ahi. Kangpokpi a mi 2 leh Senapati mikhat panna a mithum ho hibou gamdang a kon hung kile ho hiu ahi. Natna nei ho abon uva Covid Care facility a achon uvin, containment leh contact tracing ho apan tauvin ahi.

Natna a thi tuchan geiya mi 25 lhing ahitan, athah a vangsetna toh thulhut aumpon ahi. Achesa nidan 24 sunga mi 128 adamdoh toh kilhon a discharged abol tauvin ahi. CAPF 46, Senapati 2, CCC Lamboi Khongnangkhong 47, UNACCO 20, PR Kakching 3, RD Wing 2, TK Ukhrul 4, JNIMS 2 chule CCC Kangpokpi a kijen mi 2 avel a RT PCR test abol jou uva Covid-19 negative ahi tah jeh uva discharged abol u ahitai.

Manipur a positive case hi agom a 5725 (General Population -4251 leh CAPF – 1474) um a chule natna a kon kijen dam hi 3957 (General Population – 3245 leh CAPF – 712) ahi. Active case agom a 1743 (General Population – 982 leh CAPF -761) um a chule recovery rate hi 69.11% lhing ahitai.

Xxxxxxx

Covid-19 a thi ho thilong vui/go nadinga dk. 19,000 ala uve, tia kho upa khat in sei

Imphal, Aug 27: Imphal East district noiya um Chingmeirong Maning Leikai village authority hon Covid-19 natna a thi ho thilong vui nadinga dangka 19,000 alut e, tin asei uvin, hiche thulhut hi lungdon umtah ahi.

Thulhut dungjuiya achesa Wednesday nikho a RIMS a Covid-19 natna a thi numei khat thilong vui dinga August 25 ni a apoh nau thilsoh ahi. “Manipur a Covid-19 natna a thi ho thilong vui nadinga dangka 19,000 alut e. Khosung lamkai hina a dinmun ho kavet kola hi in, sorkar in thilong vui ding, safety kit, ambulance leh adang dang lahna a sum hijat alut in chule August 25 ni a ka kho uva thilong kisumang numeinu Imphal Municipal Corporation in aboipi na a dangka 11,000 alah ahi, ti thu eihetsah u ahi”, tin khosung upa leh Shinglup secretary Ram Wangkheirakpam in ama Facebook page a aseiyin ahi.

Thuso miho akihoupi na a Wangkheirakpam in, thilong go nadinga dangka 19,000 lut ding ahi tia Additional district magistrate in kakom a asei ahi, tin thil umchan photchenna aneiyin ahi. Aman asei dungjuiya, insung miten thilong alah loudiu ahi ati jou uva NOC hard copy pelut dinga nilhah nidan 2 don a DC office a che ahi.

Vangsetna toh nu chapa khat seh jong Covid 19 positive ahi jeh a hospital a kijen ahijeh a village authority hon pan alah a NOC aboipi ahi. “August 25 jan a, meeting kanei uvin, vangsetna toh nu achapa RIMS a Covid-19 positive ahijeh a akijen jeh a keihon ama thalheng a phalna kalah uva chule thilong kathum loudiu, state in asuhmang thei ahi tia lekha kijih a soi kakaiyu ahi”, ati.

DC Ratnabali Waikhom henga ngehna kanei jou uva sum hi district administration office in apeh dinga um ahitai. Hijong leh hitobang toh a insung mihon Covid-19 a thi ho kin chaina semna dinga sum hijat asuhmang diu hi pohnat umtah ahi, tin aseibe in ahi. Boina sangtah toh sa insung ho ibol a kisuhgim be ham, ati.

Thuso mihon thusoh photchen nadinga Imphal East DC  Ratnabali Waikhom a kon suhthengna ahol uvin, ahivanga tu dinmun a kihouna umthei lou ahi. Alangkhat a Imphal West DC Naorem Praveen in, Covid-19 toh kisaiya thi ho chule insung miten thilong lah loudinga aseiyu auma ahileh office in thilong suhmang na a sum kisumang jat apohdoh ahi, ati.

“Keiho office in district dang dang mi hiya ahivanga Imphal West district crematorium a kigou/kisumang vangsetna toh ho jouse dinga sum kapohdoh u ahi”, tin DC Praveen in aseibe in ahi.

Xxxxxxxxx

India gam a nidan 24 sunga Covid 19 positive 75,000 val kimu be; natna a thi 1000 aval na ni-ni kijom ta

New Delhi, Aug 27: India gam a achesa nidan 24 sunga Covid-19 case athah 75,000 val akimu be in, chule Thursday nikho chan a natna nei lakh 33 aval tan, adam doh jat lakh 25 alhing tai, tin Union Health Ministry data in aseiyin ahi.

Nikhat sunga natna kihetdoh be India gam a dinga atam na pen ahitan, 75,760 positive akimube toh kilhon a natna nei agom a 33,10,234 lhing ahitai. Nidan 24 sunga mi 1,023 athi be in, natna a thi 60,472 lhing ahitai, tin jingkah nidan 8 a update kibol data in aseiyin ahi.

Coronavirus natna neiya agom a mi 25,23,771 damdoh ahitan, recovery rate 76.24 percent a um a chule Covid-19 jeh a thi jat jong 1.83 per cent a nemsuh ahitai. Active case agom a 7,25,991 um ahi in, total caseload toh tekah dinga 21.93% tina ahi.

Achesa August 7 ni a India gam a natna nei lakh 20 val a, August 23 ni a lakh 33 val ahi. ICMR thulhut dungjuiya, August 26 chan a sample 3,85,76,510 test kibol ahitan, Wednesday nikho a bou sample 9,24,998 test kibol ahi.

Athah a athi kisei 1,023 lah a Maharashtra gam mi 295, Karnataka 133, Tamil Nadu 118, Uttar Pradesh 90, Andhra Pradesh 81, West Bengal 55, Punjab 41, J&K 19, Madhya Pradesh, Delhi leh Gujarat a 17 cheh, Jharkhand 15, Assam 14, Odisha leh Kerala a mi 13 cheh, Rajasthan 12, Bihar leh Haryana a 11 cheh, Chhattisgarh 10, Goa, Puducherry leh Telangana a 8 cheh, Uttarakhand 6, Andaman and Nicobar Island 4, Tripura leh Himachal Pradesh a 2 cheh chule Chandigarh, Ladakh leh Manipur a mi 1 cheh pang ahi.

Tuchan geiya athi 60,472 kisei holah a Maharashtra gam a mi 23,089 thi a asang pen hi nalaiyu ahi. Tamil Nadu a 6,839, Karnataka 5,091, Delhi a 4,347, Andhra Pradesh a 3,541, UP a 3,149, West Bengal a 2,964, Gujarat a 2,945, Madhya Pradesh a 1,282, Punjab a 1,219, Rajasthan a 992, Telangana a 788, J&K a 657, Haryana 637, Bihar 530, Odisha 441, Jharkhand 362, Assam 274, Kerala 257, Uttarakhand 219, Chhattisgarh 231, Puducherry 180, Goa 165, Tripura 85, Chandigarh leh Andaman and Nicobar Island a 41 cheh, Himachal Pradesh 32, Ladakh leh Manipur a 25 cheh, Nagaland a 9, Meghalaya 8, Arunachal Pradesh 5, Sikkim 3, Dadra and Nagar Haveli leh Daman and Diu a 2 cheh ahi.

“Natna a thi 70 percent val hin natna dang dang jong akop ahi”, tin Health Ministry thuson aseibe in ahi.

Xxxxxxxx

AMSU in Hungers Marchers day nit

IMPHAL, Aug. 27(ET): All Manipur Student Union (AMSU) in Pishum Chinga mun a kum 55 lhinna Hungers Marchers Day, 2020 amang uvin ahi.

AMSU in thuso anei dungjuiya, program hi achesa 1965 kum a Hungers marchers kiphinna lamkaiya ahinkho pedoh a Athouba Nabakumar, Athouba Nilamani, Athouba Choubal leh Athoubi Pramodin geldohna a kimang ahi, tin asei uvin ahi.

Martyr chang ho insung mite panna a AMSU president Peter Laishram lamkaina a kin amang uvin, jana pehna a pahcha akoi uvin, ponlap akhaidoh uvin ahi. Ahivanga, tukum kin hi WHO in Covid-19 a kon kivenna dinga guidelines apeh dungjuiya chelha ahi, ati.

AMSU president in ahoulimna a, Covid-19 lockdown sunga mi bolthei tah tah hon society a khamnathei a kiveina aneiyu akal/atam cheh cheh ding aginmo na thu aseiyin chule gamsung mihon dan dihlouva hitobang sumkol vein a umho douna a pan alahkhom diuvin temna aneiyin ahi.

Program a AMSU president Peter Laishram, Dilip Babloo Loitongbam leh AMSU adviser Suresh functional president, chief guest leh guest of honour a apang uvin, martyr chang ho insung mite jana pehna a thilpeh jong anei uvin ahi.

Xxxxxx

NE a kiveina lam hatsah ding tohgon semdia Minister Biswajit in ngehna nei

Imphal, Aug 27(ET): North East gamsung a kivei nalam hatsah thei nading tohgon semdoh ding in Textiles, Commerce and Industry Minister Thongam Biswajit Singh in video conference a tunia Commerce and Industry Minister Piyush Goyal toh kihouna aneipet chun ngehna aneitan ahi. Biswajit in ama Secretariat office a pat video conference chu anei ahi.

“Aatma Nirbhar” Bharat noi a “One District One Product Initiative” thu a state tin a Industry Minister jouse Piyush Goyal chun Video Conference a kihouna tunia chu aneipi ahi.

Video conference kihou sung chun state 6 a manchah ding  Geographical Information System online land bank jong Goyal chun hondohna aneiye.

Biswajit in video conference sung chun Manipur le north east state ho se hi achombeh a ga umdoh mol le lhang lah ahijeh in kiveimi hon adeibang tah in atohga ho in state dang aphajou pon, hiti ho jeh a NE a dia kiveimi ho ding tohgon chombeh semdoh angai e tia asei ahi.

BJP makaina state government gon noi in gamga thing, a-eng, lengthei, anchang ho state chom a joh din toldoh ahi in chujongle gamsung a limestone le chromite umtei dia ginchat jong amuntah hetdoh ahitolhon a kholchil dia central ministry a pat phalna kithum ahi e tin Biswajit chun asei e.

One District One Product Scheme bolthei nading district jong holdoh a hapta khatsung a thulhut pehlut thei ding le Handloom le Handicraft hi Manipur mipi dia kihinsona lampi anichan na jong ahi e tin Biswajit chun aseiben ahi.

Video conference phatsung chun Minister Biswajit chu Manipur, Food, Industries Corporation Limited Managing Director, Peter Salam in aumpi ahi.

State tin a “One District One Product” tohgon hi kum 2022 a state jouse toh kithokhom a tohmolso dia centre government in amadel jing tohgon khat ahi.

Xxxxxxxxx

State Government in neh le chah ninglhing a umsah jing

Imphal, August 27(ET): State sung pumpi a neh le chah lhahsam sah lou dia state government in aboipi jing tolhon in Assembly Constituency jouse a din anchang le dal government in ape jing e.

Hitolhon in Senapati district sung Tadubi AC in September lha a ding Pradhan Mantri Garib Kalyan Anna Yojana (PMGKAY) noi a anchang quintal 632.75 leh National Food Security Act (NFSA) noi a anchang quintal 583.55 aladoh in chuban a PMGKAY noi a anchang quintal 1,167 leh NFSA noi a anchang quintal 1,390.10 jannichun aladoh tan ahi.

Chule Tamenglong District Tamei Sub-Division noi a Tamei AC in PMGKAY noi a anchang quintal 1,182.10 jong Sangaiprou FCI godown a pat tunichun atoldoh e. Chutobang chun Jiribam FCI godown a pat Jiribam AC in anchang quintal 1,870.70 September lha a achanding tunichun akitoldoh e. Churachandpur district Henglep AC in jong PMGKAY noi a August lha anchang quintal 1,729.45, Churachandpur AC in September lha a avatse anchang quintal 371.60 leh Saikot AC in NFSA noi a August lha anchang alah bangkhai quintal 981.45 ban a Singngat AC in jong July lha whole chana dal quintal 101.42 leh Saikot AC August lha a ding whole chana dal quintal 175.25 jong lahdoh ahi e.

Hetding chu National Food Security Act , PMGKAY leh jalhang a johding anchang ho state government in aphatcha a hoisel a ahomdoh jing ahi.

xxxxxxxxxxx

Gamsung pumpi kiphinna khumkha hita; CPI(M) Manipur makaina munchom chom a kiphinna chelha

Imphal, Aug 27(ET): Achesa August 20 nia CPI (M) makaina gamsung pumpi kiphinna ana kipan chu tuni’n khumkha ahitai. CPI (M) State Committee office in Paona Bazar, Imphal office le mimal insung ho a pat lunglhai lou suhlah na kiphinna chu chelhah pi ahi e tin thulhut kimu chun aseiye.

CPI(M) Manipur Secretary Kshetrimayum Santa le CPI (M) Manipur lamkai Sarat Salam le Yumnam Ratan ho chun kiphinna toh kimat a tuni toukhomna sung a houlimna anei u ahi. Government dan sem SOP jui a party toson phachompi panna a kihouna chu chelha ahi. Kihou sung a mipi ding gel na a Central government le Manipur government in atohdoh loi ngai dia atahlah hochu; Income tax pelou insung jouse lha gup sung lhakhat a Rs. 7,500 pehdoh pai ding; Panpi ngai insung mikhat a lhakhat sung a anchang kg 10 lhagup sung pehdoh tei ding; MGNREGA noi a natoh phatsung kumkhat a nikho 200 a suhsao ding, natoh neilou jouse unemployment allowance pehding; Interstate Migrant Workmen Act (Regulation of Employment & Conditions of Services) Act 1979 semphat dia kisei suhmang a hatsah johding; Dammo veiset a manchah ding sum GDP 3 percent gei a kalsah ding; Neh le chah navah sel a poh le thei nadia APMC Act semphat ding; Labour law suhbei ding, semphat dia kisei jouse lahdoh ding; Indian railways, electricity, petroleum, coal, banks/insurance, defence production sector ho privatise hisah lou ding; PM min a sum lahkhom jouse Covid-19 natna boipi state ho pehdoh loiding; National Disaster Relief Fund noi a Covid-19 natna in atohkhah insung a one-time financial assistance pehding; SC/ST/OBC le elbai ho chanvou akigong dungjui a phatah a musah ding; Graduate le post-graduate chaiding simlai ho kum masa tohga dungjui a pachanna pehding; Achesa August 2019 a Jammu and Kashmir gamsung a henden a um jouse agangthei pen a lhadoh a navah a mipi lhatsah ding; UAPA, NSA, Sedition Act noi a lamkai hentang jouse lhadoh ding; Environment Impact Assessment 2020 lahdoh ding; Chule Nam lhasam ho sumang le suse dia kisaboi jouse gotna pehding ti ho ahi.

Xxxxxxx

Nupi naonei ding khat lang mangcha’a CCpur District Hospital anakilhut

B.Lalboi Gangte

CCpur. August 27 (ET) : Churachandpur District hopsung Henglep kho sung’a nupi naonei ding kigo khat in hahsat na anato jeh in khosung mipin lang mangcha in District Hospital, Churachandpur a vetkol ding in kenglam’a anapo lut uvin ahi. Nupi naonei ding nu hi Nemneikim Simte (32) W/o Sonminthang Simte of Henglep, Henglep Sub-Division akon ahin chuleh amahi janni (Aug. 26) jaan a naoso nat in anapha in ahin khosung’a dispensary/ Primary Health Centre kitup leh Doctor, Nurse um lou jeh chun inn mun’a neisah ding’a aum uvin ahi. Ahin Nemneikim chu tuni (Aug. 27) jingkah nidan 1:00 vel’a naonei ding din mun’a aum lai tah’a aboise in atha acholbehset phat chun khosung mipin kho vahlhah lhah in CCpur Dist. Hospital a poh lhung ding joh angaito utoh lhon in khosung mipi hapan najal in CCpur District Hospital analhut uvin hiche a chun Doctor le Nurse ho pan lah najal in chapa khat damsel in ananei in ahi.

Hetthei khat chu Henglep kho hi Lamka akon kilometer 86 vel’a gamlha ahi naban’a Primary Health Centre, Police Station, SDO Office ho jaonan Government office chom chom um thei na ding building aum vang in hoitah’a function ahilou jeh in gamsung mipiten kumseh in hitobang genthei hahsat na atoh jing uvin ahi.Tuchung’a Henglep akon damlou hung kipo hi akhat-vei channa ahitapon ahi.

Hetthei khat chu Nemneikim hi khosung mipin lampi short cut a Bungkot chan ahin poh uva hiche akon KKL Ambulance in nilhah lam nidan 1:00 vel’a District Hospital anapoh lut ahi. Chuleh Henglep Sub-Division hi Manipur Govt. in nasah lou leh akimu mosah na gam ahitoh lhon’a kijot matto na lampi kitup um thei lou jeh in gamkai mipi hon genthei hahsat na atoh jing uvin ahi. Hiche ho jeh in Henglep Sub Division sung hi khantouna jong um thei lou ahi.

xxxxxxxxxxxxx

Hapta khat masang’a accident jeh’a thina toh mi 2 thilong Aug. 27 nikho’a kimudoh

B.Lalboi Gangte

CCpur. August 27 (ET): National Highway 37 Imphal-Jiribam Road Kaimai leh Barak Lui kikah in Bolero khat toset anatoh in asung’a tou numei khat leh pasal khat in thina anatoh in ahi tin thulhut chun aseiyin ahi.

Hiche thilsoh chung thu’a thulhut kimu dungjui’a achesa Aug. nisim 23 nikho’a Jiribam akon CCpur Lamka jon ding’a hung’a Bolero (Registration No. MN02-B 0999) khat Kaimai leh Barak Lui kikah’a lamlhang feet 300 vel’a sang’a analhai lha kha ahi akiti. Chuleh gari ahi mi tou ahin atolpa hi Paominthang Haokip (34) S/o Lunkhojam Haokip of Phoilen, Near Valpakot leh Kimjahat Vaiphei(47) W/o Thangtinlen of Tuibong ahi.

Hiche thilsoh chu apet tah’a koiman anahetdoh pon ahin phatsot tah jou nung’a atahsa lhon ahung uidoh phat’a hiche mun lah jotpa hon ginmo jeh’a khosung mipi anahetsah uva hiche akon Nungba Youth Club leh Nungba Police Station kitho’a amun kholchilna ananei nao’a kon thilong chu anamudoh’u ahi akiti.

Hiche toh lhon’a toset natoh kisai’a mi kimkhat in Bolero Registration Number hi Zammuanlal min’a um ahi jeh in mitam tah in ama hiding in ginmo na anei uvin ahin amahin achesa lha 3 vel masang’a gari hi anakijoh doh’a lockdown jeh’a Bolero neipan min akhelman lou lai ahi. Chuleh tuni mama in thilong chu Ccpur District pohlut ahi nading in KKL GHQ in panlah na anei in ahi.

Xxxxxxxxx

RIMS in a Doctor ho private hospital a na tong taloudinga hetsah

Imphal, Aug 27(ET): Tuchung a doctor ho ang a private a natong louding uva hetsah na hung kinei hi  allowance chung chang ahipon, RIMS a kijan ho natna ho akon hoidoh sah na ding a tohgon noi a hetsah na hung kinei ahi.

Medical Superintendent, RIMS, Prof. Ch Arunkumar akon thuso kimu dungjui in private natoh aho akon natna hi hung ki the thang thei a RIMS  a hung kipolut thei ahi toh lhon a hitabang bol an louding a hetsah na hung kinei ahi tin RIMS vaipo hoin hetsah na ahin nei uvin ahi. Hiche thuso chu RIMS doctor phabep in tulai taha  private a mi vetna anei jing u hetdoh ana hitoh lhon a hung kinei ahi.

Xxxxxxxxx

Naga kiloikhomna ho in Mao Gate a Martyrs’ Day mang

Senapati, Aug 27:  United Naga Council (UNC) in achesa 1948 kum a Mao Gate thilsoh hetthei jing ding ahi dan tahlang na ahin nei utoh lhon in, hiche thilsoh hi Naga te politics toh kisai a het ding dol nikho ahung hitah dan tahlang na ahin nei uvin ahi.

Hiche thu chu UNC in Mao Council makai na noi a a 72nd  vei channa Martyrs’ Day kiman na a phondoh na an anei u ahi.  Hiche kingon chu Song Song Youth Club Hall, Mao Gate a anakibol ahi. Tuni kingon chu Asiisii Hepuni, Mahriili Lohrii, Modo Kholi, Daikho Hesho le Obow Adani ho kithana toh kisai a geldoh na ding a kibol ahi. Amaho chu Security Force ho in anakap lih u ahi. Tuni kingon achun All Naga Students’ Association Manipur (ANSAM), Naga Women Union (NWU) le adang dang ho in panlah na ana nei uvin ahi.

Xxxxxxxxxx

Child right kiloikhomna khat in tahlal chapang ho kithopina pe

Imphal, Aug 27(ET): Gamsung a tahlal chapang ho vetsui na ding toh kisai in Wide Angle Social Development Organization, Manipur Alliance for Child Rights le CRY- CHILD RIGHTS and YOU volunteer ho in Patsoi, Namching Kabui Village, New Keithelmanbi Kuki & Meitei Villages, Khonglong Kabui village, Longjang village ho a um tahlal chapang 250 lam ang a kithopina ana kipe in ahi. Hiche kithopina ho chu achesa 25th, 26th le 27th  August nikho a ana kibol ahi tin Montu Ahanthem, Convener Manipur Alliance for Child Rights in asei in ahi.

Chapang ho chu achan cheh uvin anchang kg 10, Dal, Skimmed Milk, Salt, local Bori, Atta , Noodles, Edible oil, Chengpak (rice flakes), Suji, Multivitamin syrup le adang dang ho hop peh na ana kinei in ahi. Covid-19 jeh a tahlal chapang ho chunga genthei hahsat na lentah ahung um toh lhon a hitabang kithopina ho hi hung kibol ahi akiti. Hitabang tahlal kithopina ho bol ding a State vaipo ho in tohgon ahin nei ding uvin jong kiloikhomna ho chun hetsah na ahin nei uvin ahi.