NPP MLA ho Biren lamkaina sorkar a kinungle kit ta; minister panmun...

NPP MLA ho Biren lamkaina sorkar a kinungle kit ta; minister panmun tuh kit diu

44
0
SHARE

NPP MLA ho Biren lamkaina sorkar a kinungle kit ta; minister panmun tuh kit diu

Imphal, June 25(ET): BJP lamkaina coalition government a kon legislator 9 in haina anei jeh a ni 8 sung politics a boina um ahi in, Biren Singh lamkaina sorkar a kon haina neiya National People’s Party (NPP) MLA hon term kichai kah a sorkar tosot kit dinga akile kit utoh kilhon a boina tu dinmun a hi thip ahitai.

Thursday ni a NEDA convenor Himanta Biswa Sharma le NPP chief Conrad K Sangma chule Manipur NPP legislator 4 ho New Delhi a kon Imphal khopi ahung lhung uvin, chule NPP in BJP lamkaina state sorkar tosot kit dinga thulhuhna anei thu thuso miho henga asei uvin ahi. NPP legislator ho minister a pang kit diu, hijongle portfolio kikhelna umding ahi, tin NPP chief Sangma in aseiyin ahi.

Centre a BJP lamkai hon boina ho suhlhap dinga kitepna anei jouva NPP hon BJP lamkaina sorkar a kinungle kit dinga thulhuhna aneiyu ahi, tin Sangma in aseiyin chule Manipur ding gelna le political stability aumna dinga BJP sorkar party in tosot kit dinga kigel lhahna anei ahi, ati. “SPF a kon haina kaneiyu ahitai”, tin aseibe in ahi.

Centre a lamkai ho thuhilna banga N Biren Singh sorkar in NPP MLA 4 ho portfolio le minister panmun peh kit dinga nopna anei ahi. Hijongle health minister anahi L Jayantakumar in Power department portfolio tuh dinga asei ahi, tin thulhut in aseiyin, hiche hi Chief Minister in asan peh ding le asan pehlou ding photchen hiloulai ahi.

NPP MLA 4, BJP MLA 3 chule TMC le Independent MLA khat cheh in achesa June 17 (Wednesday) ni a Biren lamkaina sorkar a kon haina anei uva, Congress toh SPF min a kiloikhomna asem u ahi. June 19 ni a anaum Rajya Sabha election kon a haina anei uva Congress atosot u ahi. Centre a BJP le NPP kiloikhom ahijeh a NPP lamkai Conrad Sangma le NEDA lamkai Himanta Biswa Sharma jong party kah a boina sulham dinga June 21 ni a Manipur hung lhon a, NPP MLA 4 chule Chief Minister N Biren Singh toh kihouna anei lhon ahi.

Athu aseilhah thei lhonlou jeh a lamkai teni ani ma ma a kile lhon a, June 23 ni a hung kit lhon ahi’in, aseilhah thei dehlou jeh uva NPP MLA 4 hohi New Delhi khopi a centre a BJP lamkai hotoh kihou dinga apui kit u ahi. Achesa kal khat sunga NPP legislator hon CM Biren hi ‘autocratic’ athu thu a chon a ngohna anei uva, chule nungchon loudinga thuphon chan aneiyu ahi. Manipur unit chief Thangminlien Kipgen injong lunggel kikhel louding ahi, tia anasei ahi.

NPP MLA 4 hon Centre a BJP lamkai hotoh kihouna anei jou uva Himanta Biswas le Conrad Sangma toh lenna a Imphal khopi hung kile uva, sun nidan 11.30 don a hunglhung u ahi. Ahung lhun jou uva BJP MLA L Sushindro panna a team hon Governor akimupi uva, hiche jou nidan 2 don a CM Biren akimupi kit u ahi. Hetthei khat chu akimuto (meeting) nauva hi NPP MLA 4 lah a Yumnam Joykumar bou pang ahi.

Kin ajo jou uva NEDA convenor Himanta Biswa Sarma kile pai louva MLA L Sushindro inmun a phat chomkhat aumin, hiche mun a Power Minister Th Biswajit in Himanta Biswa akimupi a, gamsung politics thu aseikhom lhon a, hiche jouva athum uva Imphal airport jon a cheuva, hiche mun a Conrad Sangma le NPP MLA 4 hotoh kimuto u ahi. Lamkai teni tuni nilhah nidan 4 don a kinungle lhon ahitai.

Sorkar in private school ho kithopina apeh joh dinga ATSUM, KSO le ANSAM in thakhat a thuso nei

Imphal, June 25(ET): All Tribal Students’ Union Manipur (ATSUM), Kuki Students’ Organisation (KSO-GHQ) chule All Naga Students’ Association Manipur (ANSAM) in Covid 19 pandemic jeh a phat hahsat pet a private school ho ‘financial grant’ peh nading policy kilom khat state sorkar in asempeh dinga ngehna dihtah le kilomtah kinei sorkar in khohsahna aneipoi, tin alung lhai lounau thuso anei uvin ahi.

Gam pumpi a Covid 19 case akal a, lockdown phat akisuhsaobe jing a kon private school hohi sangtah a atohkhah sector ahi. Hiche jeh a sorkar in simlai ho tuition fee angaijang a chule teaching le non-teaching staff ho lo hi financial grant a kon apeh dinga kisei ahi, tin Seiboi Haokip, General Secretary, ATSUM, Khaiminlen Doungel, Information Secretary, KSO-GHQ chule AC. Thotso, general secretary, ANSAM in soi akaina thuso a asei uvin ahi.

Alangkhat a, state Education Department (Schools) in June nisim 20 nikho a order (vide No 41/1/2020-SE(S), asodoh a, simlai 200 noilang umna private school hon tuition fee alah loudiu, teaching le non teaching staff ho lo 50% apeh dinga chule simlai 700 chunglang umna school hon tuition fee alah loudiu, ama ama school a teaching le non teaching staff ho lo 100% (alhinga) apeh diuva order asodoh hi nu-le-pa, jilkung chule school authority ho phatchomna ding kibang tah a kigel a kibol ahipoi, ati.

Stakeholder ni- nu le pa chule jilkung ho khohsahna kipe a ahivanga school authority ho ding kigel peh lou ahi in, school hi nu le pa chule jilkung ho kingapna ahi in, school aum loule adang ho khohsahna thu kisei lou ahi. Boi pet laitah chule mijouse Covid 19 pandemic in atohkhah pet a private school ho nu-no in acha abolna banga akibol hi thudih hilou ahi. Tuhi private school ho chunga kipathu sei phat joh ahi, ati.

Gam dang dang toh tekah dinga Manipur a private school a enroll kibol simlai hi government school a sanga hatah a tamjo ahi. Hiche hi state sorkar in hetpehna aneiya, chule thinglhang le phaicham a dinmun akibah lou ahet ngai ahi. School jousen ajui dinga order kiso hi adeh a thinglhang gam a achepi hahsa ding ahi, tin asei uvin ahi.

Tribal simlai kiloikhomna thum in private school douna a hitobang order kisodoh hi state sorkar in aganna thei pen a alahdoh dinga temna anei uvin, hiche sanga private school hon teaching le non-teaching staff ho lo apeh thei uva chule simlai ho tuition fee jong akilah louna dinga kithopina anei joh diuvin temna aneibe uvin ahi.

 

Khamnathei kiman

Tengnoupal, June 25: Tengnoupal district police commando hon tunin Tata Safari khat akon in khamnathei brown sugar ana mandoh uvin ahi.

Tengnoupal district police SP Th. Vikramjit in thuso miho toh akhihou limna a tuni jingkah lam nidan 9:30 vel in thuguh kimu toh lhon in Loisi le Saivom  kho teni kikah a Tata Safari 4X2 gari Regsitration No. DL. 3CAF 3880 khat an akikham toh lhon a vetchil na ana kinei na a brown sugar packet 10 lam matdoh na ana kinei ahi akiti.

Gari chu phate a aning dung anakivet kit na a brwonsugar packet 33 lam an akimu be in agom in gram 474 lam a gih ahi akiti. Hiche brownsugar hin po teni chu Mangminlen haokip, 25 yrs s/o Paoson haokip, Kangpokpi district Kotlen akon le Letkhohem haokip, 36 yrs s/o Lhungjang haokip Pangmol Motbung akon ahi akiti. Letkhohem Haokip hi kum masa a School jilkung anahi ahi akiti. Akiman doh teni chu Tengnoupal district police station a pehlut ahilhon tan ahi.

 

Bihar gamsung district chom chom a keh lhah jeh a mi 83 thi; Dk. Lakh 4 cheh ex gratia pehdia govt in thuphon nei

Bihar, June 25 (PTI): Bihar gamsung mun chom chom a keh lhah jeh a mi 80 val athi in, district chom chom a agom a mi 83 thi ahi, tin Bihar sorkar in aseiyin ahi.

Thuso akipeh til a mi 26 athi e, tia ana kisei ahi in, chule thulhut dungjuiya  atamjo hin phailei a na atoh na a thi ahi. Thursday nilhah a, Bihar sorkar in thilsoh a thi jat velvetna aneiya, athi agom a 83 alhing e, tia asei ahi in, chule district chom chom a athi jat jong apeh ahi.

Thina toh district dungjuiya apeh nauvah Gopalganj 13, East Champaran 5, Siwan 6, Darbhanga 5, Baka 5, Bhagalpur 6, Khagaria 3, Madhubani 8, West Champaran 2, Samastipur 1, Sheohar 1, Kishanganj 2, Saran 1, Jahanabad 2, Sitamarhi 1, Jamui 2, Nawada 8, Purnia 2, Supaul 2, Aurangabad 3, Buxar 2, Madhepura 1 chule Kaimur a mi 2 ahi.

Gopalganj district a athi 13 lhing a, athi atamna pen district hi ahi. Gopalganj district block chom chom a mi 13 hohin phailei a na atoh nauva keh in ase a thi ahi, tin Gopalganj Sub-Divisional Officer Upendra Pal in aseiyin ahi.

Darbhanga district a chapang 3 panna a mi 5 athi in chule midang ni akisukha e, tin District Disaster Management Officer Pushpesh Kumar in aseiyin ahi. Athi holah a hi Hanuman Nagar block a um pasal chapang ni le Bahadur block a um numei chapang khat, chule Biraul police station le Baheri police station noiya um numei khat le pasal khat jong pang ahi.

Belha kho, Phulpara police station a phailei a natong nupa ni athi e, tin Madhubani district SHO Mahfuz Alam in aseiyin ahi. Chule Shikarpur police station noiya um khosung ni a loubol mi 2 jong ama ama phailei a na atoh na a keh in ase khah a thi ahi, tin West Champaran district SHO K K Gupta in aseiyin ahi. Department in thuso abolna a keh lhah hi district 23 sung a soh ahin mi 20 val akisukha in hospital a admit ahiuve ati. Chule Chenna in jong asuhset ahi ati.

Thilsoh toh kisaiyin Chief Minister Nitish Kumar in thina toh insung miho ex gratia Dk. Lakh 4 cheh peh ding in thuphon jong aneiyin ahi.

Weather department akon thuphon in seina ah ahunglhung ding nikho phabep sung’a go hattah juding in akisei in chule hitobang keh lhah hin district 38 lam ahin tohkhah ding ahi jong ati.

CM Nitish Kumar in mipi lunglim gehcha aumdiuvin thupeh aneiyin ahithei channa koima vahdoh louva incheh a kikhumtup ding in jong ngehna aneiyin chule Disaster Management Department thuhilna phate cha juicheh ding in temna aneiben ahi.

 

Mi khat tanglih a jammang Alto car leh aneipa Moirang Police hon mandoh

Imphal, June 25: Police thulhut khat in aseina achun achesa 17/6/2020 nilhah nidan 7:45 don chun Okshongbung Leikai a cheng Hemam Manichandra Singh (55) chu lampi a achena a car khat in atatkha in amun achun amuollem den in hinlah atatkha car chu ajammang pai tan ahi.

Hiche nikho apat chun Moirang police hon matdoh tei ding guo in pan ala jing uvin ahi. Tuni jingkah nidan 8:50 don chun Moirang police hon frisking abol nau achun Alto car khat Regn No. MN06 LA 6547 chu Ningthoukhong lang akon Moirang hinjon a hunglhai chu police hon ginmo jeh in ana kham uvin gari chu amailang bumper aum pon chule amai glass akeh in ahi.

Police hon ahin tolpa Paonam Ramachandra s/o Kamni of Tronglaobi Mayai Leikai chu thudohna anei uvin gari chu ama workshop a semphat ding a aga lah ahidan asei in chule amasang lang bumpum chu adong uvin asiet jeh a ama workshop a umden ahi dan asei in police hon June 17 nikho a thilsoh namun a bumper ahal (piece) alah uchu ama workshop a um bumper chutoh asuhto uleh akibang chet in hiche akon chun ahin mandoh uvin agari neipa Ningthoukhong w/No. 13 (L) O. Mangi chapa Oinam Surash Singh (41) jong chu aga mandoh pai uvin ahi.

 

Kpi DHQ a gamdang mi lockdown jeh a genthei ho KNF Home Secretary in KWWO le KYU toh kitho a kithopina thil hop peh u

Kangpokpi, Jun 25(UNA): Thursday nikho a KNF Home Secretary Jangneo Kuki in Kangpokpi DHQ a local body ho, KWWO leh KYU toh kitho in District headquarter a um ahahsa jep gamdang miho le gamsung miho anchang, dal, thao le adang dang ahop peh uvin, kithopina anei uvin ahi.

Gamdang mi panna a insung 100 val a kon mi 500 vel in KNF Home Secretary inmun a kihom kithopina thil ho akilah uvin, kithopina chang holah a Bihari, Marwari, Deshwali, Nepali, Meilhei le adang dang pang ahi. Kangpokpi DHQ a sumkol vei dinga gamdang mi tamtah um ahi in, sumkol veina neocha cha bol ho le ahahsa jep ho kithopina apeh u ahi. Amaho hin March lha a kon lockdown akipat jeh a neh le chah akihol thei tahlouvu ahi.

KNF Home Secretary, Jangneo Kuki in amaho hahsat gentheina ho hetpeh louva aum jeh a Kangpokpi Women Welfare Union chule Kangpokpi Youth Union toh kitho a jat le nam chule hou khenna umlouva pan alah u ahi. KWWO le KYU lamkai hon KNF Home Secretary inmun a kithopina thil ahop u ahi.

Jangneo Kuki, Home Secretary, KNF in sorkar in virus douna dinga ajo chan a lockdown kipat a kon pan alah ahi, hijong le sorkar chunga imalam jouse a kingap ding ahipon, lunggel kibang neihon ama ama hithei na a sorkar kithopina chule mihem ngailutna a pan alah ding ahi, tin aseiyin ahi.

Government department chom chom- District Administration, Medical Department, police department chule acham a kipedoh CSO hon choltih neilouva natna lah a pan alah uva mipi na atoh jeh uva achung uva akipana thu jong aseiyin ahi. Kangpokpi mite jouse, Institutional Quarantine Centre a umhon jong IQC  SOP chule guidelines ho palkeh louva dan ajui cheh diuvin jong temna aneiyin ahi.

Lockdown achesot jeh a sorkar in guidelines a ol sah ahi in, ahivanga, mipi anop nop a dan jui louva vah le ding tina ahipoi, tin aseiyin chule eima le ingailut cheng ho huhna dinga dan juiding ahi, ati. Kangpokpi DHQ a sam tan na dukan hong a Sikanker in March lha a lockdown akipat a kon relaxation akibol jou tuchan geiya saloon kahong theipon, hiche jeh a insung mite toh hahsat gentheina sangtah kato ahi, tin aseiyin ahi.

Von chule thil dang dang joh a dukan bol honjong lockdown jeh a agenthei nau thu asei uvin ahi. Sikanker in kithopina chang ho thalheng a Kangpokpi miho heng, adeh a KNF Home Secretary le CSO ho chunga kipathu aseiyin, nei ngailut nau hi keiho dinga lungmonna ahi, tin aseiyin ahi.

VK CQC thilsoh thu leh Dist. Adm. in Covid-19 a pan alahdan thu’a thuso miho toh kihoukhom nanei

B.Lalboi Gangte

CCpur. June 25 (ET): Churachandpur District sung’a thuso mihon tuni (June 25) nilhah lam nidan 2:00 vel in SP leh DC Churachandpur  ana kimupi uvin hiche achun Covid-19 doudal nathu toh kisai’a District panlah dan chom chom ho seikhomna ananei uvin ahi. Hiche achun Amrita Sinha, IPS, Superintendent of Police toh akimuto nao’a VK Tawna High Community Quarantine Centre ah thilsoh chung chang thu aseikhom uvin chuleh SP Amrita in hiche phatsung in Inmate mi 4 FIR akijih khum tan ahi ati. Chuleh phat chesa’a Quarantine Centre kimkhat’a thil anasoh toh kibang’a panlah hi ding hiche nading’a FIR jih khum’a um jouse Quarantine akon apot teng uleh daan toh kitoh’a action kila ding ahi tinjong aseibei.

Hiche thilsoh hung kipat dan hi Medical Team hon hiche Centre mun’a kon positive khat pohdoh ding ati’u inmate dang hon anaphal pouvin chuleh inmate dang Block chom chom’a um jouse Negative ahi toh lhon’a potsah ding’a Medical Team in kihou ding’a anakou vang uvin inmate ho jouse Room ah kot akikha khum jeh uvin kihoukhom thei louvin aum uvin ahi. Hiche jeh chun Police anakou uvin Additional SP, Hasby Haokip, in-charge Quarantine Centre in amun anadel lut pai in chuleh Shivanand Surve, IPS, SDPO injong amun anadel lut pai in ahi. Chuleh Medical Team holeh Police hon inmate ho kihoupi ding’a nidan khat lam pan analah vang uin inmate koima kihoupi ding in anakoudoh jou lou phat uvin Police hon room kot asuh hong uva Medical Team in Positive veipa anapohdoh thei’u ahi.

Alangkhat’a hiche thilsoh nachung’a social media dung’a Video viral hi positive pa kipohdoh jou nung thilsoh ahi. Chuleh hiche thilso nachung’a atamjo Thadou pao mang ahi dungjui in KSO lamkai ho jong anakou uvin ahin inmate ho nasah in anakoi pouvin ahi. Quarantine Centre sung’a inmate ho umna chan galut Police ho Quarantine kibol ding ding ahi tinjong asei uvin ahi. Hiche hi Positive akipohdoh jou nung leh inmate dang ho result negative ahi jeh’a Medical hon Quarantine ngailou ding’a anasei ahi. Chuleh Quarantine Centre aum hon  guideline kipe ho hoitah in jui’u henlang face mask, social distancing hoitah in maintain bol uleh VK Tawna High CQC a hi positive kimudoh lou ding ahi ati.

Hetthei khat chu Quarantine Centre vekol ho adeh’a Community Quarantine Centre ho’a panla hohi koima sumlo hi lou ahi jeh uvin hetthem apoimo in ahi.Chuleh Centre khat sung’a inmate kichang chihsah leh mithu sei ngailou ho jeh in Centre vekol volunteer ijat ham alhase jong aum tan ahi. Hiche naban’a mipi ding’a kipedoh volunteer hon a-insung mite toh jong kimuto man lou khop’a Quarantine Centre avetkol nao chung’a mosah na kamcheng ajah kithou jeh in alungthim’u asuna lheh jeng tan ahi.

Pawan Yadav, IAS, Deputy Commissioner tah Quarantine Centre thu’a thuso miho tah akihoulim nao’a Quarantine Centre thu’a Update chung chang aseina’a tunin Community Quarantine Centre 6 akon in inmate 199 akipotsah tan hiche hochu NEILIT akon mi 42, Kangvai akon 27, St. Stephen, Saikot akon 58, Tuitengphai Government High School akon 8, Savior Public School akon 41 chuleh DIET Centre akon 23 ahi. Tuni chan’a mun dang’a kipat District mi 4,124 ahung lhung in chuleh Quarantine Centre ah mi 1,168 um nalah’a mi 199 potsah ahitoh lhon’a inmate 969 ho CCpur District sung Quarantine Centre chom chom aum nalai uvin ahi. Covid Care Centre ding toh kisai aseikhom nao’a NEILIT hi official ah proposal bola um ahi in hiche hi adim teng leh Lanva TD Block jong mangchah ahi nading’a kigon tupna achelhah jing lai ahi. District Hospital ah Isolation Ward kibol hi ginmo ho vetkol nading’a kimang ahi nabna’a positive case akibe lap toh lhon’a JNIMS, RIMS leh UNACCO Covid Care Centre ho jouse lodim ahung hiteng District tin’a Covid Care Centre ding gontup sa’a koi hiding’a hetsah ahi dungjui’a amun ho gontup sa’a koi masat ngai ding ahi ati. Hiche nading’a NEILIT ah lupna 50, Lanva TD Block ah lupna 30 leh District Hospital ah lupna 20 um ding ahi.

Hiche toh lhon’a Covid Care Centre vekol ding jouse training hoi tah’a peh ahi dungjui’a polang mi ading’a kichat behset ding aum pon chuleh hiche mun ho’a lut leh-pot jouse Ambulance mangcha’a pohtho hiding ahi tin Pawan Yadav chun aseiyin ahi. Chuleh Covid Care Centre sang’a Quarantine Centre ho joh hi kichat umjo ahi. VK Tawna Quarantine Centre mun’a chungthu’a DC in aseina’a hiche mun aum inmate jouse hi Haryana akon hung kipan ho ahi uvin amaho hi May 29 nikho’a umpan’u ahi naban’a June 3 nikho’a sample lah’a um result asodoh na’a mi 4 positive akimudoh dungjui’a Containment Zone ah kiphongdoh ahi ati. Ahin result Negative jouse jong potsah ahi naipon chu jouvin June 15 nikho in sample anakila thah kit in ahi. Hiche result ahung pot toh lhon’a inmat khat positive ahi akihetdoh akon hiche thilsoh hi hung kipan ahi tinjong aseibei.

Alangkhat’a Quarantine Centre vekol nalam’a Village Authority leh Civil Society Organization ho DC in alem jing in ahi. Quarantine Centre ding’a Government in apoimo jouse apeh thei lou ding ahi dan hetthem’a mitakip in pan alahkhom ding apoimo in ahi. Hijeh chun Quarantine Centre ah inmate um ho ding gelkhoh najal in District Administration in Delivery Service patdoh ding dan lampi angaito in hiche nading’a deliver person ho jong training hoitah’a peh angai ding leh order bolpa/bolnu injong ajui ding’u daan chom chom um ding ahi na’a hiche patdoh’a juithei hiding ham ti lampi chom chom kive nalai ahi tinjong aseibei.

MP Leisemba Sanajaoba RS member thah lah’a avaicha pen hi

Imphal,  Jun 25(UNA): Association for Democratic Reform (ADR) in thuso khat abolna achun tuchung RS candidate lolhing ho lah achun Manipur akon kaidoh Lengpa tia jong kihe Leisemba Sanajaoba chu avaicha pen in ama’n gou/sum 5, 84,594 anei chule Congress ticket akon kaidoh Alha Ayodhya Rami Rede chu akaidoh holah ading in ahausa pen hi ama’n gou/sum 25,77,75,79,180 anei in ahi.

Akaidoh holah achun member 16 hochu thutanna noiya umkha ahiu vin amauho chun masang in criminal case aneikha uvin chule member kaithah 11 ho case nei sangdan chu mithat kigo, numei hunam a chonsetpi chule michung thina thei chan khop a case nei ngencha ahiuve ati. Congress party akon kaidoh Nathawari Parimal in jong sum 3,96,83,96,198 anei in ama hi ahusa lah a ani channa ahi in aban a athumna ding a BJP akon kaidoh Jyotiraditya Sandhya ahi in ama’n sum 3,79,03,29,144 anei in ahi. Mi 62 lah ahin Manipur akon BJP ticket a kaidoh Leishemba Sanajauba hi avaicha pen ahi tin thulhut chun asei in ahi.

Congress MLA khat le Independent MLA pan BJP jopkit

Imphal, June 25: Jiribam MLA Ashab Uddin le Wangjing Tentha MLA Paonam Brojen in BJP ana dalhah nung uvin tuni chun athah lut kit tauvin ahi.

Ashab Uddin chu Jiribam AC akon Independent candidate a kaidoh ahi in chule Paonam Brojen chu Congress ticket a kaidoh ahi.

Manipur a Covid-19 case 1056 lhingta

Imphal, June 25(ET): Achesa nidan 24 sunga Manipur a Covid 19 positive case athah 86 akimudoh be in, hiche lah a pasal 53 le numei 33 apang in, mi 78 hi VRDL, RIMS a test kibol a chule mi 8 hi VRDL, JNIMS a test kibol ahi.

Natna anei athah a kihedoh hohi Bishnupur a kon mi 2, Churachandpur mi 2, Imphal East mi 1, Imphal West mi 3, Kakching mi 4, Kamjong mi 2, Kangpokpi mi 1, Senapati mi 2, Tamenglong mi 55, Thoubal mi 2 chule Ukhrul mi 12 ahi. Abon uva gamdang a kon hung kile ho ahiuvin, Covid Care Facility a achon u ahitai. ‘Contact tracing’ le ‘containment’ kiti kivenna dinga angaicha ho jouse abol tauvin ahi.

Alangkhat a, RT PCR test akibol jouva Covid 19 negative hi a natna nei mi 26 tunin discharged abol tauvin ahi. Churachandpur district hospital a kon mi 5, CCC, Meitram a kon mi 16 chule RIMS a kon mi 10 hi positive a kon negative ahi jouva in a kile dinga asol ahitai.

Manipur a tu le tua positive case 1056 lhing a, active case 702 hi a chule natna a kon damdoh mi 354 lhing ahitai. Recovery rate hi 33.52 percent hi ahi.

Pu T. Thangzalam Haokip thusuo hil chet na

Pu T. Thangzalam Haokip, Ex MLA, Chairman HAC, Govt, of Manipur in June 22, 2020 ni a Henglep lampi thu a Manipur Express mangcha a ahin thusei hi T. Manga Vaiphei, Ex-Minister Worker hon akive khom in, ki lom mo akisah jeh in, anoija bang hin hilchet na ka hin bol uve.

  1. 2006-2007 kum in Congress Government vaihop na noi a SPA Fund a kon in Rs. 5.99 crore in lampi ana ki sem in, chuleh maintenance fund in jong jo kham kham in ana kisem e.
  2. 2016-17 kum in NEC funding na noi a, Rs. 11 crore Former Chief Minister O. Ibobi recommend na noi ja, ina mu kit uvin. Hiche NEC Funding pen chu diversion lampi sem na in akimang in ahi e. Tu tu in jong gamsung mipi ten aki mang jinge.
  3. Henglep lampi semlou ati na chung chang a, ki sei thu hi datmo umtah thu ahin, chuleh bul le bal neilou thu ahin so hi, gamsung mipite a ding a vangset um tah ahi.

Sd/-

Seiboi Haokip

Manga Vaiphei workers


Warning: mysqli_query(): MySQL server has gone away in /mnt/BLOCKSTORAGE/home/330795.cloudwaysapps.com/bxpnatwntr/public_html/wp-includes/wp-db.php on line 1811

Warning: mysqli_query(): Error reading result set's header in /mnt/BLOCKSTORAGE/home/330795.cloudwaysapps.com/bxpnatwntr/public_html/wp-includes/wp-db.php on line 1811