NPP MLA 4 ho Cabinet Minister akon resign kibol tao BJP...

NPP MLA 4 ho Cabinet Minister akon resign kibol tao BJP MLA 3 in Congress jop; NPP, TMC, Independent hon Congress atosot toh lhon a BJP lamkaina state sorkar lhu thei ding dinmun a um

66
0
SHARE

NPP MLA 4 ho Cabinet Minister akon resign kibol tao

BJP MLA 3 in Congress jop; NPP, TMC, Independent hon Congress atosot toh lhon a BJP lamkaina state sorkar lhu thei ding dinmun a um

Imphal, Jun 17(UNA): COVID 19 pandemic jeh a gamsung boina akhoh laiya kum thum lhing BJP lamkaina Manipur a coalition government aboi thei ding dinmun a aumin ahi.

NPP 4 leh BJP 3 panna a MLA koh (9) in Wednesday nikhon sorkar atosot nauva kon haina anei uvin, hiche toh kilhon a Manipur sorkar a kikhelna aumding hi ginchat ahi. Thulhut dungjuiya, Minister hina a kon haina anei jou uva NPP in coalition sorkar atosot nauva kon haina aneiyu ahi. Trinamool Congress MLA khat seh um hinjong sorkar atosot tahlou ahi.

BJP MLA thum in coalition government tosot tahlou dinga asei jouva State Legislative Assembly member hina a kon haina lekha ape tauvin ahi. Jiribam Assembly constituency a kon Independent MLA khat seh Ashab Uddin panna a MLA 8 hohin Congress tosot dinga phondohna anei jou uva kon Congress camp a um u ahitai, tin thulhut in aseiyin ahi.

Party atosot u thu aphondoh masang u, Wednesday nikho a Chief Minister henga Cabinet Minister hina a kon NPP Minister hon haina anei nau lekha apehlut u ahi. Haina lekha pelut a Cabinet minister 4 hohi Deputy chief minister Y Joykumar, Health and Family Welfare minister L Jayantakumar, Agriculture Minister Letpao Haokip chule Fisheries minister N Kayisii ahi.

Haina lekha apehlut jou uva NPP in state sorkar henga coalition government a kon party in haina anei (formal withdrwal) thu a lekhathot ape uvin ahi. “Tuni a kon sorkar ka tosot tahlou diu ahi”, tin NPP legislator party Y Joykumar in Wednesday nilhah a thuso miho akimupi na a aseiyin chule party in BJP lamkaina coalition government douna a ‘no confidence motion’ apohdoh ding ahi, tin jong thuphon aneiyin ahi.

Alangkhat a State Assembly member hina a kon haina lekha pe a BJP MLA thum hohi S Subhashchandra Singh, TT Haokip chule Samuel Jendai ahiuve. Amaho hin BJP primary membership hina a kon a jong haina anei uva chule Congress ajop u ahi. Congress in apet pet a MLA thum ho liemna anei uvin ahi.

Congress tosotna neiya MLA 9 ho Chief minister anahi O Ibobi Singh in thuso miho akimupi na a aliemna thu aseiyin, chule party dinga sorkar sem nathei dinmun ahi, tin aseiyin ahi. ‘Disqualification’ toh mi 7 ho panna a Congress hi tu le tua 27 ahi in, NPP 4, BJP 3, TMC 1 le Independent 1 panna a Congress in aban a sorkar sem nadinga angaicha jat sanga tamjo anei ahi, tin Ibobi in aseibe in ahi.

India in chamna adeiyin hijong le alunghanna ding thil akibol le alethuh thei ahi: PM Modi

New Delhi, June 16: India in chamna adeiyin, hijong le eikichou a ahile kilomtah a lethuhna apeh thei nading tha anei ahi, tin Prime Minister Narendra Modi in Wednesday nikhon aseiyin, Ladakh solam gamkaiya India le China sepai ho Monday nilhah a akidel nau thilsoh chungchang a thuso aneina masapen ahi.

Prime Minister in Covid 19 chungchang a Chief Minister hotoh meeting aneina a Galwan Valley a thi sepai 20 ho jana pehna a ‘minute 2’ thipbeh a aum uvin ahi. Ahoulim hi gamsung lungmon nading bou hilouva Beijing thuthot aneina jong ahi.

“Igamsung sepai ho kiphalna hi aliem a che louding ahi tihi gamsung miho henga kakitepna ahi. Eiho dinga kipunkhom le sovereignty hi athupi pen ahi”, tin PM Modi in aseiyin ahi. Home Minister Amit Shah le Defence Minister Rajnath Singh jong kihouna a pang ahi.

Monday nikho a kipan Eastern Ladakh a India le China sepai ho akidel nauva India sepai 20 thi ahi. Sepai hohi khut le song a kidel uva, meichang kap louva kibon tho u ahi. Kinahna thilsoh kichaiya, alangni kinahna mun a kon chedoh ahi, tin Indian Army thuson aseiyin ahi. ANI thulhut dungjuiya, sepai ho akidel jou uva India sepai 4 hi sangtah a kisukha ahi.

Alangkhat a, China gam a vangsetna toh 43 aum e, tin thulhut in aseiyin ahi. Defence Minister Rajnath Singh in India sepai martyr chang 20 ho alunghempi in ahi. “Galwan a sepai thi hi pohnat umtah ahi. Amaho hin duty abol nauva hangsan tah a pan alah uva Indian Army chonna ngaiya kiphalna aneiyu ahi”, ati.

“Gamsung in amaho kiphal na le hangsan tah a pan alah nau asuhmil louhel ding chule phat hahsat pet a gamsung dingkhom ding ahi”, tin aseibe in ahi. Achesa October 1975 kum a China sepai hon Arunachal Pradesh gamsung Tulung La sector a Indian patrol ho alamtin uva, sepai 4 akap lih jou uva kon gamgi a PLA hotoh kinahna a India sepai athi aumna thilsoh masapen ahi.

 

PM Modi in June 19 teng India-China gamgi thu a ‘all-party meet’ umdinga kouna nei

New Delhi, June 17: Prime Minister Narendra Modi in Wednesday nikhon June nisim 19 nikho a all-party meeting umdinga kouna aneiyin, China toh gamgi mun a boina dinmun ho thu seikhomna ding ahi.

PM Modi lamkaina a ‘virtual conference’ a hi political party chom chom a president ho pang diu ahi. “India le China gamgi thu seikhom nadinga Prime Minister Narendra Modi in June nisim 19 nilhah nidan 5 teng all-party meeting umdinga kouna anei ahi. Meeting a political party chom chom a president ho pangdiu ahi”, tin PMO in aseiyin ahi.

Achesa June 15 ni a Galwan valley, Ladakh a China sepai hotoh kidelna a Colonel rank officer khat panna a Indian Army sepai 20 thi ahi. China sepai hon Eastern ladakh a boina suhlhap nadina ‘status quo’ hi acham uva khel ding agot nauva kinahna soh ahi in, high level a kihouna umhi China in ajui hile hitobang thilsoh hi umlou ding ahi, tia India in June 16 nikho a asei ahi.

Kinahna a Chinese Unit a commanding officer khat panna a amaho jong phabep athi um ahi, tin thulhut in aseiyin ahi. Thulhut dungjuiya, Tuesday ni a kinahna thilso namun Galwan Valley, Ladakh Region a India sepai athi chule akisukha ho po dinga helicopter 16 vei leng ahi.

Tuesday jan a, Indian Army hon thuso anei nauva, “India sepai 17 in duty abolna a sub-zero temperature a aum uvin, akisukha uvin, akisukhah nauva kon damdoh louva athi uvin, hiche toh kilhon a kinahna a thi mi 20 alhingtai”, tia asei ahi. India Defence Minister injong, “Gamsung in sepai ho kiphalna le hangsan tah a pan alah nau asuhmil loudiu ahi. Amaho lunglet hi kithang at pi jing ding ahi”, tia asei ahi.

Thilsoh chungchang a opposition hon sorkar in thuchen apeh dinga thumna aneiyu ahi. Ipijeh a hiche thu a Prime Minister thipbeh a um ham, tia Rahul Gandhi in thudoh aneiya, thilsoh umchan thutah gamsung in ahet angaiye, tia asei ahi.

Tujang DCC Member Lamkholen Kipgen in HSLCE 2020 a Rank 11 Satmunchon Kipgen kipapi

Kangpokpi, Jun 17(UNA): Tuchung High School Leaving Certificate themvetna’a Rank 11 hin mu Satmunchon Kipgen hi achenna lhang Tujang District Council Constituency a MDC Lamkholen Kipgen le ainneipin sangtah in kipapina ana neilhonin ahi.

Lamkholen Kipgen, Executive Member, ADC Sadar Hills le ainneipin jan hi nilhah lam’a S. Jalenmoul kho a Satmunchon Kipgen achenna inmun’a vilna aga neilhonin, alolhin nachung’a kipana jallin namjem’a kisem ngong-o (Muffler) hoitah khat a o peh lhonin chule kithopinan Dk. 5,000/- jong anape lhonin ahi.

Vannoi COVID-19 a lungjin tah le linglaotah’a aumlaija, Tujang lhang in hitobang hachangpa kipana thupha kija hi mantam kasan, kalung alhai ta ngeijin, hijehchun, chapa Satmunchon Kipgen in hitobang thusim’a mangtalou dinga kipana ahin boldoh na chunga achunga kakipa asangin ahi tin Lamkhlen Kipgen in aseijin ahi.

Hetthei khatchu, Lamkholen Kipgen, EM ADC Sadar Hills chapa jong hi lekhathem tah ahin, alekhathep na le akihambol na jallin, Manipur Civil Service (MCS) ana jihdoh in tuhin Manipur Government noija Sub Divisional Officer (SDO) tohmun tuh in japi natongin apangtan ahi.

Lamkholen Kipgen aseibeina’a, tu masang se chun keima constituency Tujang DCC sung hi thina man na chule lungjin lungdon na jeng in anabom’in, chapa Satmunchon Kipgen in sangtah’a HSLC themvetna a Pachanna le lolhinna ahin neihin lhangsung maipahna le kithang-atna seh hilouvin, kipana thah kipat kitna ahung ding jong kinepna lentah kaneije ati.

Chapa Satmunchon Kipgen insung genthei hahsatna hi kalunggil tah in kapolel lheh jengin, amavang, aman (Satmunchon Kipgen) in hiche ho jouse hi alekhasimna a kalse be nan aneijin, kaki thang-atpi lheh in, khonunga khangthah tampi kitilna le chouna’a hung pang jing ding ahitai tinjong aseibei.

Alangkhatna, anu le apa chule adeh’a a-upa kipedohna jong sang kasan, amaho kipehdohna jalla chapa Satmunchon Kipgen hin hichan’a lolhinna hi aneithei ahi tijong kiseinom’e tia Lamkholen Kipgen in aseibe tolhonin tunung tuban le a insung uva hamphatna le vangphatnan aumpi jing uva inchen na le phattheina aneijing theina diuvin jong phatthei aboh in ahi.

CM Biren in HSLC a lolhinna nei holah a akhangdong pen Isaac Vaiphei kipapina nei

Imphal, June 17(ET): Manipur Chief Minister N Biren Singh in Wednesday nikhon tukum High School Leaving Certificate (HSLC) Examination, 2020 a matric a lolhinna nei holah a akhangdong pen Isaac Paulallungmuan Vaiphei kipapina kin aneipeh in ahi.

CM Biren in khonunga lolhinna anei ding adeisahna thu jong aseiyin ahi. “Kangvai kho, Churachandpur district a cheng Isaac Paulallungmuan Vaiphei hin kum 12 a HSLC (Class X) exam, 2020 a pachanna ahin nei toh kilhon a akhangdong pen hi ahi in, amahin 72% amu a ahi in, alolhinna kipapina kin kaneipeh theiya, ama kamu thei hi kakipana ahi. Khonunga jong lolhinna nei jom hen”, tin CM Biren in aseiyin ahi.

DGP LM Khaute le ajinu jong CM Secretariat a Isaac lolhin alop peh lhonin ahi. Isaac Paulallungmuan nu leh pa, Genkholian leh Boijem jong ajao lhon in ahi. Paulallungmuan in Vaiphei traditional Coat leh Vaiphei pondum khat CM pa asil peh in, Isaac Paulallungmuan nu leh pa teni LM Khaute DGP leh Aji in pon asilpeh lhon in ahi. CM N Biren Singh injong Isaac Paulallungmuan lolhinna akipapi vetsahna a pon khat asil peh in, Dictionary kichoh na ding in Dk, 20000/- ape in, LM Khaute DGP injong kipapi na in dk, 10000/- ape in ahi.

Isaac in marks 600 lah a 432 amu a, MIL (Vaiphei) a 91, English a 86, Mathematics a 73, Social Science a 61, Science a 53 chule Home Science (Additional subject) a 68 marks amu ahi. Kum 12 bou hinalai Isaac hi Board of Secondary Education Manipur (BOSEM) in ama pen nikho tahbeh a exam peh nadinga amin register abol thei dinga phalna anapeh ahi.

Dan dungjuiya hi simlai khat in class 10 Board exam apeh nadinga exam apeh nading kum April 1 chan a hi kum 15 alhin tei ngai ahi. Isaac exam peh thei dinga phalna hi Administration Board member, Manipur Board in chapang pa ‘psychological test’ abol dungjuiya apeh u ahi. Administrative member hon chapang pa mental age le IQ san dan hi avet uva ‘special case’ ahi, tia aseiyu ahi.

Clinical Psychology Department, RIMS Imphal in test abol dungjuiya, Isaac lhoh (mental age) hi kum 17 le lha 5 lhing ho a toh kibang a chule ama ‘basal age’ hi 14 hi a, ‘terminal age’ hi 22 hi ahi. Isaac IQ hi 141 ahi in, hiche hi chihna/thepna sangtah neiya kihe ahi.

PM Modi in ‘Lockdown’ thu kiseithang hi jou ahi, tia sei; Unlock 2.0 a dia CM ho akigot diuva sei

New Delhi, June 17: Prime Minister Narendra Modi in Wednesday nikhon Lockdown kikoi kit ding ahi tia ginchat thu kisei hohi jouthu ahi, tin aseiyin chule Chief Minister hon thulamleng kithang ho adoudal uva chule state le Union Territory ho Unlock 2.0 a dinga kigongsa aum diuvin aseibe in ahi.

6th PM-CM Video conference ni-ni channi a Prime Minister in Chief Minister ho henga ‘lockdown’ thu a thulamleng ho dou angaiye, tin aseiyin ahi. Metro khopi ho, adeh a Delhi, Mumbai le Chennai a Covid 19 natna nei akal cheh cheh jouva social media a lockdown thu kiseithang ahi. “Tua hi Unlock process phase 2 hi igelkhoh diu, chule gamsung miho tongkha thei ho suhnem nading jong iboipi tha diu ahi”, tin PM in Chief Minister ho henga aseiyin ahi.

Tuesday nilhah a meeting abol u ni masa ni a economy hon be ding thu jong asei ahi in, ahivanga mask bol ding, thenna hinkho man ding chule social distancing jui dinga dan kisem hojong khoutah a chepi dinga asei ahi. “Corona hi ilamtin jou chan uva kithe jal louding chule economy kihong a, office kihong a, kailhang kihong a, transport kihong ding, tohmun thah kisem na jong kihong ding ahi”, ati.

Wednesday nikho a PM Modi in aphatcha pan akilah jeh a India in natna sangtah a akithe jal ding akivetkol jou ahi, tin jong aseikit in ahi. India gam a adamlou lhomcha inbou ICU le ventilator angaichat ahi, tin aseiyin chule test kibolna kalsah ding thu jong aseiyin ahi.

Wednesday nikho a kihouna a Maharashtra, Tamil Nadu, Uttar Pradesh, Karnataka, Bihar le Telangana gam jong pang ahi.

Manipur a covid-19 positive 52 kimube; Mi 33 kijendam be

Imphal, June 17(ET): Tuni chun Regional Institute of Medical Sciences (RIMS) a um covid-19 vei mi 33 ho adamdoh utoh lhon in hospital apot tauvin ahi chule numei mi 20 jaona in mi 52 positive akimube in ahi. Tuhin Manipur a Covid-19 natna veikha mi 552 aphatan amauho lah ahin active case 360 aum in chule mi 192 ho adamdoh tauvin ahi.

Case thah 52 kimube ho chu Ukhrul akon mi 20, Bishnupur akon mi 10, Thoubal akon mi 6, Chandel, Kakching leh Kangpokpi akon mi mi 4 cheh ahiuvin, Imphal west akon mi 2, Ccpur leh Kamjong district akon mi 1 cheh ahiuve. Abon uvin Covid-19 care, Imphal a kijen ding in apolut tauvin ahi.

Tuhin Manipur a sample ho test bolna ding in RT PCR machine 5 akimangcha in, Ni chu RIMS a aum in thum chu JNIMS a aum in ahi. Chichung chon ahin covid-19 test bolna a kimang Truenat machine 1 JNIMS a akimangcha kit in chule 2 RIMS a akimangcha in ahi. Nikhat sung in sample 1,200 tobang test akibol jing in ahi.

Covid-19 thu’a thudihlou social media a post mi 1 police hon man

Imphal, June 17(ET): Police thulhut in aseina achun janhi nidan 3:30 pm don chun Tronglaobi Awang Leikai acheng Soibam Ajitkumar jinu Soibam(O) RK Ibetombi Devi (42yrs) in Covid-19 thu toh kisai a social media a mipi kichat theiding leh lunglinglao thei ding thu kichehlou a sodoh khah jeh in Moirang PS hon ana man uvin ahi.

Thudohna anei nauva aman aseina achun whastapp group khat akon amu bang a FB a post abol hindan in asei in ahi. Hiche toh lhon chun OC- Moirang PS  in Non FIR No. 130/MRG- PS/ 2020 U/S 107 CrPC in ajihlut in chule press leh social media mangcha in athil bolkhel nachung a hilchetna jong abol in ahi.

BOSEM in thuphon nei

Imphal, June 17(ET): BOSEM in thuso abol bang in answer paper thah check bolnon hon www.bosem.in a register bol a June 18 apat July 2 kikah a register bolding in ahetsah in chule paper khat check bolna ding a dk. 1000 lutding in asei in ahi.

Chule compartment a exam bolding hon ama ama school cheh a thuchen akidoh uva chule 02/07/2020 apat 20/07/2020 sung a form fill up ding in asei un chule simlai khat in dk. 2100 asuhlut ding ahidan asei in ahi.