NPP leh BJP kah a boina suhlhap ahi vanga Joykumar in adei...

NPP leh BJP kah a boina suhlhap ahi vanga Joykumar in adei portfolio achan kah a akipe ho lah nomlou

79
0
SHARE

NPP leh BJP kah a boina suhlhap ahi vanga Joykumar in adei portfolio achan kah a akipe ho lah nomlou

Imphal, July 7(ET): Manipur a NPP leh BJP kah a boina suhlhap ahi a, CM N Biren Singh sorkar in Deputy CM Y Joykumar a kon ana lahpeh portfolio jouse anung peh kit vanga, Joykumar in adei thil moh lhaso loudinga kigotna anei ahi.

Tahsan umtah thulhut in asei dungjuiya, Joykumar Singh in portfolio thum anung peh jeh uva athu neocha gel louding chule Union Home Minister Amit Shah toh kihouna anei jouva moh thip loudinga lunggel anei jong asei ahi. Finance Department in charge apeh nau chunga Deputy CM in Home portfolio jong adei ahi, tin thulhut in aseiyin ahi.

“Kathusei hi kila khel ahi. Union Home Minister Amit Shah toh athu akisei kah a portfolio thum einung peh uhi kalah louding ahi, tia kasei ahibouve”, tia Joykumar in asei ahi. Ahivanga, NPP lamkai hon Delhi a ache sung uva Amit Shah toh itobang kinoptona asem u aseichen loulaiyu ahi. Manipur Chief Secretary J Suresh Babu in Sunday nikho a thuso aneina a, Joykumar Singh in tu masanga anatuh Finance, Science & Technology chule Economics portfolio hi anungpeh kit u ahi.

Ahivanga, portfolio kipehna a NPP MLA thum ho hi minister panmun apeh vang uva portfolio kipehna thu pang dehlou ahi. Panmun akihop phat kit nauva Chief Minister N Biren Singh in Home, Personnel, Transport, Tourism, Minority Affairs, MAHUD panna a portfolio 13 atuh ahi.

Manipur a NPP MLA 4 panna a MLA 9 in BJP lamkaina coalition dalhah dinga thulhuhna anei jou uva gamsung politics boina kihedoh ahi in, CM Biren in amachang thuneina amangcha e, tia ngohna aneiyu ahi. Ahivanga, Meghalaya CM le NPP lamkai Conrad K Sangma le NEDA convenor leh Assam Minister Himanta Biswa Sarma in pan alah jouva NPP MLA ho BJP lamkaina sorkar a kile kit u ahi.

 

Delimitation thu a ATRPFM in Tribal MLA ho chunga alunglhai louna thu sei

Imphal, July 7: All Tribal Rights’ Protection Forum Manipur (ATRPFM) in Delimitation chungchang a Scheduled Tribe reserved constituency ho a kon Members of State Assembly ho lungput chunga alunglhai lounau thu asei uvin ahi.

MLA hohi tribal miho thalheng a kilhengdoh lamkai ahiuvin, tribal miho constitutional rights huhna ding le aphatchomna dinga na atoh diu hi amaho mopohna ahi, tihi Article 82 chule Article 170, 330, 332 leh adang dang a kipe ahi, tin ATRPFM in aseiyin ahi.

Ahivanga, lungdon umtah a, eiho MLA hon hiche thu gelkhohna anei louvu hi vangset umtah ahi. Phaicham a um politician ho leh political party hon phaicham a um organization hotoh kitho a mopohna nei authority, New Delhi henga Delimitation adoudal nau lekha apehlut uva chule amun a thutah kholna ngai louva delimitation exercise achelhah louna dinga Manipur High Court a jong PIL apehlut u ahi. Ahivanga eiho Minister leh MLA (Tribal reserved seat a kon kilhengdoh lamkai) hon tuni chan a ima abol louvu hi tribal nam jousen sangtah a demna anei thei ahi.

Jammu and Kashmir Union Territory chule Assam, Arunachal Pradesh, Manipur le Nagaland gam a Assembly le Parliamentary Constituency ho a ‘delimitation’ bol dinga March nisim 6 nikho a Ministry of Law and Justice, India government in notification asodoh a, Delimitation Commission asemdoh a kon ATRPFM in pan alah jing a, India President, Prime Minister, Chief Election Commissioner, Chairperson, Delimitation Commission chule Registrar General of India leh Census Commissioner, New Delhi henga delimitation exercise phatah a achelhah na dinga lekha apeh ahi, ati.

ATRPFM in RNBA Centre Church, Tarung, Imphal khopi a achesa June nisim 30 ni a tribal kiloikhomna 14 (tribe chom chom) toh Consultative Meeting aneiya, kilolna um dungjuiya, mopohna nei authority henga pehlut ding joint memorandum kisem ahi in, hiche a hi Manipur a um recognized tribe jousen (ama ama President/Secretary) soi akai ding ahi, ati.

Phaicham a um kiloikhomna chule political party hon High Court a apehlut PIL hojong ATRPFM in doudal dinga kigotna anei ahi. Hiche a dinga tribal thalheng ho tosotna kithum ahi in, hijongle koiman lunglutna anei louhi vangset umtah ahi. Tribal Minister le MLA hon Covid 19 thu a heimang louva gelkhohna aneidiu, mipi awging ajah uva, tosotna apeh diu ahi, ati.

Akilhengdoh tribal lamkai, member chule organization jousen eiho ‘constitutional rights’ hi nam lenjo/tamjo hon athu a abol louna dinga kithuto na aneidiu ahi. Naga, Kuki ahilouleh tribe adang min aumpon, hiche thaneina hi Manipur gam a um tribal jouse kipe ahi in, kipunkhom a ventup ding ahi, tin ATRPFM thuson aseibe in ahi.

 

AMCTA in Cease Work strike pan kit tading

Imphal, July 7(ET): All Manipur College Teachers Association in akivoh hai ‘cease work strike’ pat kit dinga kilolna anei uvin ahi. Chief Minister in achesa February nisim 11 ni a thuphon anei jana pehna a AMCTA in cease work strike bol dinga tohgon aneiyu hi February nisim 12 nikho a avohhaiyu ahi.

State sorkar in gamsunga college ho akihon kit masanga 7th UGC Pay Scales and UGC Regulations 2018 achepi dinga ngehna nei dinga jong meeting anei nauva kilolna anei uvin ahi. Sorkar in ‘lock-out’ phat sunga 7th UGC Pay Scales and UGC Regulations 2018 achepi louva ahileh college akihon kit teng AMCTA in kiphinna bol dinga jong gihna anei uvin ahi.

Covid pandemic jeh a college jouse akikha jeh a tu dinmun a college teacher hon kiphinna abol theilou jeh a hitobang kilolna aneiyu ahi. Alangkhat a, AMCTA in pandemic jong avetkol jing ahi. Hetthei khat chu AMCTA in tu masanga jong state sorkar henga 7th UGC Pay Scales chepi nadinga Cabinet in kilolna kicheh anei dinga ngehna aneiyu ahi.

Myanmar akon aguh a mi hunglut um jing

Ccpur, July 7(ET): Coronavirus akon kivenna ding a Manipur gov tin Myanmar toh gamgi Churachandpur hopsung gamgi ho a  CCPur District Administration makai na a Pakmual kho lam a gamgi barbwire a metre 220 lam ana get vang uvin mi aguh a lut aum jing in ahi akiti.

CCpur Police akon thuso kimu dungjui in  Lockdown toh kisai a state le state ho jong khatan ahi toh kisai a Mizoram toh gamgi jong kikhahtan ahin  hinlah Myanmar akon a India lam aguh a hung lut matdoh jing na akinei in ahi akiti. Athah beh a Myanmr akon hung lut matdoh na ana kinei teni chu Khamlunkap Simte (32) s/o Ginjakap, Sialsih kho akon le Sanglienthang (18) s/o Lalroutfela ahi lhon in ahi akiti.

 

Muallum kho a inn kiphet peh thu’a inn neipi’n hilchetna nei

B.Lalboi Gangte

CCpur. July 7(ET) : Muallum kho sung thilsoh toh kisai’a tunin (July 7) Press Club, Headquarter Veng mun’a Chingnunnuom W/o of S. Langsuanlian leh achaten  CCpur District sung’a Press/Media hoheng’a thilsoh toh kisai mipi hetding in hilchetna anape uvin ahi. Hiche achun Chingnunnuom in aseina’a Muallum Khotol Haosa Paulamsang in achesa June nisim 7 nikho in Village Authority meeting thulhuh ahi tin June nisim 30 kah’a Muallum kho dalha ding in lekha einape in ahi. Chuleh hiche lekha achun haosa hina sumang ding leh khosung ki thulhuh na suboi ti’a apansat vang in hitobang’a panlah na itih in jong akinei khapoi ati.

Hiche toh lhon’a achesa June nisim 10 nikho in melhet lou mi phabep ahin sol jeh in inn um thei talouvin mun dang’a kaum tauvin ahi. Hiche phat lai tah’a July nisim 1 nikho in kachen nao inn eiphet peh jeng hi ipi suhkhel kanei uva hitobang’a hi neibol uham tin haosa dohna kana nei in ahi. Chuleh hiche thilsoh nachung’a Police ho heng’a July nisim 2 nikhon Police ah FIR kabol khum uvin ahi. Ahin FIR kanbol vang uvin tuni chan’a Police lam akon imacha toh molsona kamu pouvin ahi ati. Alangkhat’a kaloipa jong Police ahi jeng vang in Police khat ji le-cha ten hitobang hahsatna ato Police hon ngaisah’a akoi lou leh koi in angeisah ding hitam tin dohna jong aneiyin ahi. Hiche nachung chon’a inn phetlhah hi jong leh insung thil keu ho jouse hoilang um hitam tin jong doh najong aneiyin ahi.

Munchim jeh a Twilang area mun dang toh kijot to na hithei talou; lamlen semphat dinga lhang lamkai hon temna nei

Kangpokpi, Jul 7(UNA): Twilang lamlen tia kihe minthang Imphal-Tamenglong lamlen a munchim jeh a assembly constituency chom chom- Kangpokpi, Tamenglong leh Senapati district noiya um Twilang area a cheng mihem 30,000 val che le nading akikhah tan soh tan ahi.

State highway lah a aluipen Imphal-Tamenglong lamleng hi gamkaiya cheng ho dinga akihinso nau lamlen khat seh bou ahi in, lamlen hoilou hi state sorkar dinga minsetna lentah hi ahi. Monday ni a munchim hin Twilang lamlen metre 150 val atohkhah ahi in, P10 miles oudel Basti leh 13 Miles Thonglang Atongba kikah ahi. Kangpokpi DHQ a kon km 20 vel a gamlha mun hi abon a munchim in akai set ahitai.

Thonglang Atongba a chenna inmun 10 dinga kichat umtah ahi. Munchim hin Wangsanbou Charenamei (35), s/o Pirang Charenamei; Ch. Joseph (36), s/o Ch. Karambou;  M. Amon (28), s/o M. Sainiubou; Pirang Charenamei (58), s/o Ch. Apingbou, M. Bijoy (65), s/o (L). M. Karambou, Wikambou Charenamei (50), s/o (L) Tapong Charenamei; M. Ajaibou (54), s/o (L) Sama; Ch. Lungkimbou Roland (32), s/o Ch. Karambou; RK. Happyson (32), s/o (L) RK. Talong leh RK. Stenhop (46), s/o RK. Majangbou inn phabep asuhset ahi. Lutngam Manlun, Chairman, Joint Monitoring and Development Committee in thusoh miho akimupi na a, Twilang area a cheng ho dinga boina sangtah ahi, ajeh chu Covid 19 nat kisei khoh laitah a gamdang toh kijonto thei talouva kikhah tan soh ahitai, tin aseiyin ahi. Munchim hin lhanga kihong Community Quarantine Centre 14 surveillance bol ho chule inmate ho kipoh le na jong sangtah a atohkhah ahi, ati.

Lamlen hi aganna thei pen a akisem phat louva ahile dammona jeh a boina umthei ahi. Tu leh tua jong PHC T Waichong noiya um health centre ho a gari lhai thei talou ahi, tin aseiyin chule local MLA, Minister leh akilhengdoh lamkai ho panlahna hi gel tobang ahipoi, tin alunglhai louna thu aseiyin, lamlen dinmun hi ichan a kitahna anei uham avetsah ahi, ati.

Joint Monitoring and Development Committee on IT. Road Kangpokpi to Tamei Chairman in sorkar chule mopohna nei authority ho leh akilhengdoh lhang MLA le Minister hon aganna thei pen a lamlen asuhtheng uva chule highway asem phat diuvin temna jong aneiyin ahi.

Thonglang Atongba Village Authority Vice Chairman, Kohopou Charenamei in munchim in asuhset kah lamlen asemphat u tilouva sorkar leh mopohna nei authority hon inn chimlha dinga um vangsetna toh a Thonglang Atongba khosung miho kithopina anei diuvin jong aseibe in ahi. Tadubi, Tamei, Kangpokpi le Saitu assembly constituency noiya um Twiland area (IT Road) a hi Minister thum le MLA khat tua sorkar noiya um ahi in, ahivanga, kum tamtah sunga hi highway luipen semphat nading natoh umlou ahi, ati.

Tuni chan a mopohna nei official chule sorkar thalheng ho hetsahna akinei vanga koiman amun avil loulai ahi. Joint Monitoring and Development Committee on IT. Road Kangpokpi to Tamei Chairman Lutngam Manlun leh Thonglang Atongba Village Authority Vice Chairman, Kohopou Charenamei in CQC a um holah a boina, dammona toh tobang umleh itobang dinmun ato diu ham, tin alungkhampi na thu aseibe in ahi.

State sorkar in apet pet a highway asemphat a chule khonunga hitobang thilsoh aumkit nadinga pan alah diuvin lamkai tenin temna sangtah aneibe in ahi.

 

FEGOCTA in ‘online class’ vohai ta; College admission, exam leh adang jouse ‘boycott’ bol

Imphal, July 7(ET): Federation of Government College Teachers’ Association (FEGOCTA), Manipur in online class ‘suspend’ abol uvin, chule government college ho a examination, admission chule academic activity adang dang ho boycott abol tauvin ahi.

Syaye sorkar in government college leh technical institute teacher ho 7th Pay achepi loujeh a hitobang kiphinna bol dinga thulhuhna um ahi, tin FEGOCTA general secretary N Somorendro in Tuesday nikho a Ema Panthoibi Sanglen, Thangmeiband mun a thuso miho henga aseiyin ahi. CM in tukum February nisim 11 nikho a thuphon anei dungjuiya State Cabinet in 7th UGC Pay and Regulations, 2018 phatsahna anei ahitan, ahivanga tuchan geiya order akisodoh louhi vangset umtah ahi, tin Somorendro in aseiyin ahi.

FEGOCTA in sorkar henga hiche thu a lekha thumvei apeh ahitan, sorkar in gamsunga college teacher ho hahsatna apeh ding ahi. Gamdang a um college teacher hon 7th Pay amu ahitai, tin aseibe in ahi. Quarantine centre a natong college teacher hon badge vom akibol uva atohdiu atoh dingu ahi in chule association in member 1,40,000 vel umna Manipur Government Services’ Federation (MGSF) in kiphinna abol atosot ding ahi, ati.

Hijong leh FEGOCTA in kiphinna abol hin Disaster Management Act, 2005 noiya duty abol ding ho ahop louding ahi, tin general secretary in aseiyin ahi. Sorkar in 7th Pay achepi ding ahi tihi FEGOCTA in kinepna sangtah leh tahsanna anei nahlai ahi in, sorkar in 7th UGC Pay and Regulations, 2018 asodoh a boina asuhlhap dinga temna aneiyin ahi.

UGC National policy chepi louva PM Modi in lungtup anei ‘Sabka Saath, Sabka Vikas’, ‘Sabka Vishwas’ leh ‘Atma Nirbhar Bharat’ hi bulhing louding ahi, ati. Chief Secretary Suresh Babu in Monday nikho a National Disaster Management Act, 2005 order asodoh thu a, general secretary in Order hi mipi adih louva akihilna ahi, tin aseiyin, ‘National Disaster Management ct, 2005’ kiti act aumpoi, ati. Chule hiche thu demna jong anei uvin ahi.

Act dihlou akisei thu a President leh Prime Minister henga hehna lekhathot kipe ding ahi, tin aseibe in ahi. Alangkhat a, All Tribal Students’ Union, Manipur general secretary Seiboi Haokip in Manipur thinglhang gam jouse a mobile network akimu nading a pan alah a chule simlai insung genthei ho dinga smartphone hop nading scheme apohdoh dinga sorkar henga ngaidan aseiyin ahi.

Cease work strike College Jilkung hon tosotna nei ding

Imphal, July 7(ET): College jilkung ho le technical educationan a jilkung ho in tuni in natoh na lou ding kiphinna a government employee ho ajop ding dan’u phondoh na anei uvin ahi.

Federation of Government College Teachers’ Association (FEGOCTA) in tuni a phondoh na ahin nein a uva kiloikhomna inonline class ho jong abol talouding u chuleh exam ho a jong panlah na anei louding u ahitai tin hetsah na ahin nei uvin ahi. Government college ho a admission ho jong aboipi tah louding u toh lhon a thil jouse kha ahi tah ding dan jong tahlang na ahin nei uvin ahi.

Kiloikhomna in hetsah na ahin nei be na uva college quarantine centre a kijah na mun ho  a panla ho in vang anatoh ajom jing ding dan u hetsah na ahin nei uvin ahi. Govt in thumna kinei ho nahsah lou a akoi jeh a hitabang tohgon hi hung kinei ahi tin kiloikhomna na lamkai ho khat chun hetsah na ahin nei in ahi.

Jiribam a Covid-19 natna mipi lah a kilahson thu kijah toh lhon a medical team khat kalsong 

Imphal, July 7(ET): Manipur sung a mipi lah a covis-19 natna kilah tona masa pen a Jiribam a hetdoh ana hi toh lhon in tuni in ajen na ding manchah phabep ana kilhoh in medical team khat jong vetsui na nei ding in Jiribam ana kalsong uvin ahi.

Hiche team le manchah ho chu Helcopter a ana kipo ahi. Tema in Jiirbam lhunna an anei utoh lhon in hiche natna kipat dan le ahung kondoh na kholchil na ana nei uvin ahi. Team chun mipi ho test ana bol u toh lhon in police ho test ana bol masapen uvin ahi akiti. State govt in Jiribam a Covid care facility khat hondoh ding a jong tohgon anei u ahi. Jiribam sung a police hiche natna nei 5 an aum be toh lhon in Jiribam sung a police covid-19 positive hi mi 42 alhing tan ahi akiti. Test kibol jing toh lhon in result soh thah akon  a jani a chu police 9 lam positive hetdoh ana hikit ahi.

Ukhrul dist a Curfew kikoi 

Ukhrul, July 7(ET): Covid-19 toh kisai a mipi kipumkhomna le che le vale vetsui angai jing toh lhon in Ukhrul District magistrate in  CrPC noi a section 144 chesah na nilhah lam nidan 5:00 akon jingkah lam nidan 6:00 chan ding in phondoh na ahin nei in ahi. Hiche daan plakeh aum le daan dungjui a gotna pehding ahi dan jong tahlang na ana nei in ahi. AHunglhungding July nisim 15 akon a district pumpi a curfew kikoi ding dan jong hetsah na ahung kinei in ahi. Thuso chun asei be na a angai cha dungjui a kailhang ho vang Sunday ni tilou a jingkah nidan 6 akon nilhah lam nidan 3 chan a kihongding ahi akiti.

Manipur a covid-19 case thah 40 kimudoh be

Imphal, July 7: Additional Health director Dr. K Sasheekumar Mangang in aseina achun tuni chun Manipur a covid-19 case thah 40 kimube thu asei in ahi. Tuni a kimudoh be lah achun Senapati akon mi 26, Jiribam leh Kangpokpi akon mi 5 cheh, Kakching akon mi 2, Imphal East leh Ccpur akon mi 1 cheh ahiuve. Tuhin Manipur a hiche natna veikha mi 1,430 aphatan hiche lah achun active case 659 aum ahi. Tuni ma chun mi 37 a damdoh kit tauvin amauho chu Meiteam akon mi 23 adamdoh uvin, Ukhrul CCC akon mi 1, Thoubal district hospital a Isolation ward akon mi 5, RIMS akon mi 1, JNIMS akon mi 7 ahiuve. Mi 37 adamdoh kit utoh lhon chun tuhin Manipur a hiche natna akon damdoh mi 771 apha in a percent a vet in 53.91% apha in ahi.

Manchah kimandoh

Imphal, July 7(ET): Tuni in Imphal Airport a um 13 Dogra ho in Imphal West police toh kitho a search operation Langthabal Phuramakhong lhangsung a ana bol na uva AK khat le  magazine khat, carbine khat le magazine, carbine magazine khat, Chinese hand grenade  khat, 1. 32 pistol(local) le magazine, set ni le charger, AK chang 10 le 9mm chang som ana mudoh uvin ahi.  Hiche operation toh kisai in koima matdoh na vang ana kinei pon ahi akiti. Manchah ho chu SIngjamei police station ang a pehdoh na ana kinei tan ahi.

AMSU volunteer hon Dk. 1,50,000 man lhing gamdang a kisem ju man

Imphal, July 7(ET): All Manipur Students Union (AMSU), Imphal East leh Imphal West volunteer hon Tuesday nikhon dangka 1,50,000 man vel lhing gamdang a kon kipolut ju aman uvin ahi.

AMSU volunteer hon Lamphel leh Thangmeiband munvel a drive abol nauva khamnathei ju ho amat u ahi. Ju hi auto rickshaw khat a kon amat doh u ahi in, Kanglatongbi vel a poh ding agot nauva amat u ahi. Akiman ju ho AMSU headquarter office mai, DM College campus a asumang tauvin ahi.

AMSU Imphal East district committee in kal khat masanga Mantripukhri a kon dangka lakh 1.5 man lhing dum (tobacco) thil amat jouvu ahi. AMSU external affairs Yambam Pauljit in thusoh miho akimupi na a, ju kipohna auto rickshaw hi ni ahi in, ahivanga mithum atouna auto rickshaw khat hi jamdoh man ahi, tin aseiyin ahi.

Volunteer hon Kangpokpi a cheng Prem Tamang (24) leh Raj Tamang (23) touna auto rickshaw hi amat man ahi, ati. AMSU in dan dihlouva thil kibol Thangmeiband munvel a aumjing e ti thu ajah ahi, tin aseiyin chule adihlou bol lou chunga state sorkar in action alah a chuleh athu akhol dinga temna aneibe in ahi.

Covid 19 pandemic sunga ngaichat khohtah tah ho mu nadinga mi tamtah akisah lel laiya hitia dan dihlouva natong ho state sorkar in avetsui ding ahi, tin Paulijit in aseiyin chule akiman teni police station a kipelut ding ahi, ati.

MCS, MPS Posting and Transfer

Imphal, July 7(ET): T. Manihar Singh, MCS, ADC/Imphal West & PD/DRDA, Imphal West apat Joint Secretary (SCERT); Yumnam Nelson, MCS, Joint Director (MAHUD) apat ADC/Imphal West & PD/DRDA, Imphal West; Mohd Yasser Ahmed Khan, MCS, Under Secretary (MAHUD/Tourism) apat Under Secretary (MAHUD) & i/c Joint Director (MAHUD) in addition ahiuve. Chule MPS ho chu S. David Plaklian, MPS, Dy. CO/2nd IRB apt Addl. SP/Pherzawl and i/c SP/Pherzawl in addition; Lunzamung Tungnung, MPS, Addl. SP(LO)/Pherzawl and i/c SP/Pherzawl in addition apat Addl. SP/Pherzawl.

AMNEWA cease work strike

Imphal, July 7(ET): Achesa June nisim 9 nikho a kihou na kinei toh lho a June nisim 30 nikho a State Mission director le  Principal secretary (Health) ang a NHM Contract staff ho regular lhah sah ding hetsah na ana kinei tu channa natoh na le hetsah na kinei na uam loutoh lhon in NHM contract staff ho in ahunglhungding July nisim 8 akon a cease work strike patding in hetsah na ahin nei uvin ahi.

DHS Ccpur cease work strike

Ccpur, July 7(ET):  Achesa June nisim 29 nikho kihou na toh kisai a State Mission Director, SHS, NHM Manipur le Principal secretary, H&FW, Govt of Manipur ang a lekha thot kinei tuni channa lethu na akkimu toh lhon in National  Health Mission Staff CHurachandpur ho in  Cease work strike  July nisim 8 akon botahding in hetsah na ahin nei uvin ahi.