NPP le BJP kah a boina suhlhap hita; Deputy CM Y Joykumar...

NPP le BJP kah a boina suhlhap hita; Deputy CM Y Joykumar in Finance portfolio tuh kitta

36
0
SHARE

NPP le BJP kah a boina suhlhap hita; Deputy CM Y Joykumar in Finance portfolio tuh kitta

Imphal, July 6(ET): Manipur politics kal thum aboi jouva Yumnam Joykumar Singh (NPP) in Deputy Chief Minister panmun atuh kit tan chule Finance jong atuh tha in ahi. Biren Singh lamkaina sorkar tosot tahlou dinga NPP in asei jouva coalition government a akile kit nungu ahi.

Anukhah pen a portfolio akihop nauva Y Joykumar Singh (NPP) in Finance, Science & Technology chule Economics & Statistics jong atuh tha ahi. Chief Minister N Biren Singh in Home, Personnel, Planning, GAD, Vigilance, Transport, Minor Irrigation, Tourism, Minority Affairs, OBC & SC, Information Technology, MAHUD, Horticulture & Soil Conservation chule adang akipe lou department hotoh atuh tha ahi.

Kal phabep masanga NPP MLA 4 panna a MLA 9 in BJP lamkaina state sorkar tosot tahlou dinga thulhuhna anei jouvu ahi. June 13, 2019 ni a CM Biren in Deputy CM Y Joykumar in Finance portfolio atuh alahpeh a, BJP le NPP kah a kiloikhomna ana boi pan ahi. Hiche jou April 10, 2020 kum a JOykumar in atuh portfolio jouse CM in alahpeh jouva akah uva boina umhi mipi het a hung kilangdoh ahi.

Portfolio ima kipe louva Deputy Chief Minister Yumnam Joykumar Singh in achaina a sorkar adou pan a, hiche jouva government a minister jeng hi a NPP MLA 4 hon Rajya Sabha election (June 19) masanga haina aneiyu ahi. June 17 ni a Deputy CM Y Joykumar panna a NPP Minister hon haina aneiyu ahi in, ahivanga sorkar in asan pehlou ahi.

Biren lamkaina BJP sorkar in thunei achang a achoi jeh a sorkar kitosot tahlou ahi, tia NPP in ngohna aneiya chule coalition partner ho tahsan chan nading Steering Committee sem doh ding BJP nomlou ahi, atiu ahi. Sorkar a kon haina aneiyu ni 8 jou, June 25 ni a NPP MLA ho kile kit u ahi in, BJP lamkai Himanta Biswa Sarma le NPP Chief chule Meghalaya CM Conrad Sangma in pan alah jouva, sorkar a kinungle kit u ahi.

CM Biren Singh jong tu naicha Delhi a Home Minister Amit Shah le BJP chief JP Nadda toh akimuto jouva hung kile ahi. NPP Legislator thum ho portfolio thu akisei louvanga sorkar thulhut dungjuiya, abon uva hi tu masanga anatuh portfolio ho atuh kit diuvin aseiyin ahi. L Jayanta in Health and Family Welfare, Law & LA, Art and Culture, CADA atuh a, Letpao Haokip in Water Resources, Youth Affairs & Sports chule N Kayisii in Tribal Affairs & Hill Areas Development chule Fisheries anatuh ahi.

Centre a BJP lamkai hon party thahatna ding natong chule CM pha ahina dinga Chief Minister N Biren thuhilna ahin nei utoh kilhon a CM Biren in Minister post ho apeh doh ahi. Naga Peoples Front (NPF) ho party kah a boina ima aumpoi, tin jong aseiyin ahi.

Manipur a Covid 19 positive athah 24 kimu be, natna a kon mi 45 damdohbe

Imphal, July 6(ET): Monday ni jan nidan 6.30 chan, achesa nidan 24 sunga Manipur a Covid 19 positive case 24 akimube e, tin COVID 19 Common Control Room in thuso aneiyin ahi.

Health Department spokesperson Dr Sasheekumar in thuso aneina a, gamsunga natna nei agom a 1390 alhingtai, tin aseiyin ahi. Alangkhat a, RT PCR test akibol jouva Covid 19 positive anahi mi 45 natna a kon adamdoh toh kilhon a discharged abol tauve, tin jong aseiyin ahi. Gamsunga tu le tua active case 656 um a chule natna a kon kijen dam 734 lhing ahitan, recovery rate hi tua 52.80 lhing ahitai.

Tuni a test akibol na a positive ahi kihedoh mi 24 holah a pasal 17 le numei 7 apang in ahi. Hiche lah a Senapati district mi 12, Jiribam mi 9 chule Imphal East district mi 3 ahi. Abon uva Covid Care Facility a achon diu chule angaicha containment le contact tracing hojong chelha ahi, ati.

Achesa Sunday nilhah a kum 7 bou hinalai numei chapang khat Covid 19 positive ahi kihedoh ahi. Numei chapangnu hi anu apa toh June 22 nikho a Delhi a kon hung kileu ahi in, June 28 ni a anu leh apa positive ahi kihedoh a, ahivanga ama hi negative hi ahi. Anu leh apa JNIMS a achon uva, chule ama hi achenna Thangmeiband inmun a ‘home quarantine’ abol u ahi. Positive ahi akihetdoh jouva CCF, JNIMS a achon u ahitai, tin thuso chun aseibe in ahi.

Driver kiloikhom hon sorkar in NH-2 Motbung le Laikha kikah asem phat dinga ngehna neiyu

Imphal, July 6(IFP): Manipur a drivers association hon highway a vangsetna thilsoh alhun masanga National Highway 2 lamlen, Motbung le Koubru Laikha kikah lockdown sunga state sorkar in asemphat dinga ngehna anei uvin ahi.

All Manipur Driver Welfare Association, Truck Owner Welfare Association leh Innovation and Friends Mission in achesa Sunday ni a highway vetlhahna anei uvin, chuh akipat le lamlen a kotong umho len cheh cheh a pukhri ho tebep tobang ahitai, tin asei uvin ahi. General secretary, All Manipur Driver Welfare Association, Sanjoy Kshetrimayum in Motbung le Koubru Laikha kikah a lamlen phatlou akhoh cheh cheh in, driver tamtah dinga boina ato nathei ahi, tin aseiyin ahi.

Mopohna nei department in highway a thilse alhun masanga asemphat diuvin aseiyin chule Truck Owner Welfare Association leh All Manipur Driver Welfare Association in CVO chule highway kom a cheng khosung mihon ngehna anei jeh a amun vetlhahna anei ahi, ati.

Secretary, Innovatory and Friends Mission, Manipur Nehkhothang Kipgen in NH 2 hi Manipur gam pumpi a dinga neh leh chah, ngaichat khoh ho kipohna ahi in, South East Asian Highway hop ahi, ati. Hiche jeh a sorkar in kimanchah angai tobang ahi kah a lockdown umsunga asemphat ding ahi, ati. Lamlen a vutvai kho hohin highway kom a cheng ho chule avah le ho tahsa jong asuhkhah ahi, tin aseibe in ahi.

Private school ho boina thu’a Education Minister thuphon HiDiPSAM in kipapi

Imphal, July 6(ET): Hill District Private Schools Association, Manipur in achesa May nisim 26 nikho a sorkar in ‘information’ peh nadinga Order asodoh chule June nisim 20 nikho a Pivate school a jilkung ho lo peh ding le simlai ho fee lahlou dinga order aso thu kholtoh a chule atahbeh a dinmun vetlhahna neiya mopohna nei intellectual ho jana le pachatna thu asei uvin ahi.

HiDiPSAM in achesa June nisim 29 nikho a thuso anei Education Minister in July nisim 4 ni a Pree Meet chule Radio Talk show a donbutna apeh, tua official record a um a, mipi hettheiya um donbutna apeh chungchang a jong kipathu asei uvin ahi.

Private school a staff chule non-teaching staff ho lo hi school authority, nu le pa chule jilkung (teacher) hon managed abol diuva Education Minister in asei ahi. Hiche hi policy tah chule logical ahi, tin asei uvin chule thinglhang a um school atamjo hi ‘No Fee-Give Salary’ order jeh a hing lel ahi. Hiche hi mipi dinga kipana hijong le sum hahsat val jeh a private school ho akikha a ahile suhdih theilou boina hiding ahi, ati.

Private school (hill district) hon fee concession chule April lha a ‘special consideration’ bol dinga thuphon aneiyu ahitan, nu le pa chule jilkung hon private school adouna dinga tilkhou ngailou ahi, ati.

Sorkar in tu masanga simlai alhomna private school a jilkung ho lo peh dinga thulhuhna ananei ahi in, ahivanga private school hon detail statement apeh lou jeh a thulhuhna hi tuni chan a kichepi theilou ahi, tia Education Minister in asei jong donbutna anei uvin ahi. Government in tu masanga fund aneipon, sum aneipoi, tia anasei akhel hi kakipapi uve, tin asei uvin ahi.

Government in private school (achang ding lom) ho sum a kithopi dinga thulhuhna anei chungchang a official circular asodoh a chule condition ho mipi het a atahlang diuvin HiDiPSAM in temna aneiyin ahi. Private School hon bol dinga tohgon anei kiphinna chom chom ho kisuhmang na hiding chule themjilna aphatchom na hiding ahi, tin aseibe uvin ahi.

Vadung a lhalut numei chapang khat huhdoh jeh’a mipa khat thi

Pherzawl, July 6: Manipur gamsung thinglhang gamlha tah a um insung genthei a kon hi a Lalnghetlien in achate themjilna pha pen apeh jou nadinga asun ajan a na atoh ahi in, ahin, amatah hinkho vangset umtah a akichai tan ahi.

Vadung a lhalut numei chapang khat ahuhdoh na a kum 50 a upa cha thum neiya mipa hi thi lo ahi. Barak vadung a achesa Sunday ni a kum 8 bou hinalai numei chapang Lasangpui ahuhdoh na a thi ahi. Lalnghetlien hi Tieulien kiti Pherzawl district, Mizoram gamgi a cheng ahi.

Tieulien village authority chairman L Ramnhnai in thuso miho akimupi na a Sunday jingkah nidan 6 vel a kong (motor boat) sutheng a Lasangpui hetman louva twiya lha lut ahi, ati. Jingkah taona man jouva houin a kon hung kile a Lalnghetlien in numei chapangnu pen ajah a, apet pet a adel lut ahi. Avon kisut man louva vadung a chomlut a numeinu vadung pam a akai ahi, ati.

Chapang nu ahuhdoh vanga, ama hi vadung pam a kijap jou talou, vadung twi hattah in akai ahi, tin Ramnhnai in aseibe in ahi. Thilso nidan khat jouva thilong amudoh u ahi. Lalnghetlien hin kum 4 le kum 8 kikah cha thum anei ahi in, Ramhnai in asei dungjuiya, Lalnghetlien hi insung hahsa a kon hi a, loubol mi chule insunga sum hol a ama bou ahi. Chule ajinu Lalhrietpui hi tahsa bukimlou ahi.

Achate ho themjilna pha peh thei nadinga school pha a sol dinga lungtup aneijing ahi. Lalnghetlien thilong Monday nikho a avui tauvin ahi.

 

Thangmeiband Polem Leikai ‘containment zone’ a phondoh hita; natna nei numei chapang nu toh kimuto ho kholna chelha jing

Imphal, July 6(ET): Deputy Commissioner, Imphal West, Naorem Praveen in Thangmeiban a home quarantine a um numei chapang khat Covid 19 positive ahi jouva Thangmeiband Polem Leikai abon a ‘containment zone’ dinga Sunday nikhon phondohna anei tan ahi.

Hiche mun alut na le achedoh na ho abon a kikhah soh ahitai. Thuso aneiya kon hiche mun a school, office leh institution adang dang hojong kikhah a chule ipi kin hijongleh mipi kikhopna ho abon a kikhah ahitai. Dukan chule sumkol vei na mun hojong akihon ding kiphal talou ahi. Numei chapang khat home quarantine abol nauva positive ahi janni jan a akihet doh jou ahi.

Numei chapang nu le anu leh apa hi Delhi a kon lha masa nisim 22 nikho a lenna a hung kileu ahi in, Imphal khopi a um paid quarantine centre a um u ahi. June nisim 28 nikho a anu leh apa hi positive ahi kihedoh a, hospital a kijen lhon ahitan, ama negative ahi jeh a Home quarantine abol u ahi. Vangset umtah a avel a Covid 19 test abol kit nauva positive ahi janni a kihedoh ahi.

Numei chapang nu panna a insungmi 4 medical team hon jen dinga apuiyu ahitai. Alangkhat a District administration in numei chapangnu chenna inmun Thangmeiband Polem Leikai a mistry na tong a Yumnam Patlou, Imphal East a cheng mistry ni aumna ahol jing u ahi.

Alangkhat a, Jiribam district administration injong police le Village Defence Force (VDF) personnel 28 Covid 19 positive ahi akihetdoh jouva Lockdown akoi jom nalai uvin ahi. Jiribam district a coronavirus natna nei kihedoh holah a mi 5 dam doh ahitan chule tu le tua active case hi 31 um ahi.

 

Minister Nemcha Kipgen in Kangpokpi a ‘Micronutrients fortified food’ hopdohna nei

Kangpokpi, Jul 6(UNA): Naosen, chapang, naovop chule nao vah lai minu ho damthei ding chule neh pha aneh dingu khohsahna a Social Welfare Minister Nemcha Kipgen in Monday nikhon Kangpokpi district a ‘micronutrients fortified energy dense food’ hop dohna aneiyin, hitobang akibol na masapen ahi.

Social Welfare Department, Manipur government tohgon na noiya Kangpokpi ICDS Project mun a kin goun abol nauva Social Welfare Minister Nemcha Kipgen, DC Kangpokpi, Somorjit Salam, IAS, Joint Director, ICDS Bantee Konthoujam, Deputy Director, ICDS Ela Magdalene, Scheme Officer, SNP Kh. Jogendra, DPO ICDS Cell, Kangpokpi, Miranda Zimik, Kangpokpi, Saitu le Saikul noiya um ICDS Project noiya CDPO ho leh Supervisor ho chule Anganwadi worker le mini Anganwadi worker hojong apang uvin ahi.

Minister nu in Manipur a um chapang ho neh pha peh ding akhohsahna thu aseiyin, hiche hi ‘micronutrient deficiency’ (an pha lhahsamna) ho douna ding ahi, tin aseiyin ahi. Hiche hi ‘child malnutrition’ vetkol nading ahi in, vannoi muntin a ‘micronutrient malnutrition’ suhnem nadinga method hoipen li holah a khat ahi, tin Nemcha Kipgen in aseiyin ahi.

Chapang in nat adouna (immune system) athahat thei nading chule adamthei na ding vitamin le mineral ho panna neh leh chah alhing a peh ding ahi, ajeh chu hiche ho chapang akhanna ding, adamthei nading, nat ahoui jou nading, lhoh khan nading chule adang dang a dinga thupi ahi, ati. PM Modi lamkaina noiya India sorkar in Anganwadi centre ho a 2017 kum a micronutrient angaicha khoh ho akoi be ahi in, hiche hi India gam a khangthah chapang hon saotah a aphatchom pi diu ahi, ati.

I chate hou neh leh chah pha pehding hi thupi ahi, tin aseiyin chule ICDS official ho leh worker hon guidelines dungjuiya chapang akidalha aumlou nadinga pan alah diu thupi ahi, ati. ICDS/CDPO official chule Anganwadi worker le helper hon mihem natoh hi Pathen natohna a agel diuvin temna aneiyin chule guidelines palkeh a aumleh kilomtah a action kilah khum ding ahi, tin aseibe in ahi.

District dang dang a jong ‘micronutrients fortified energy dense food’ kihopna natoh aganna thei pen a bol dinga Minister nu in aseiyin ahi. National Social Assistance Program noiya kihom ‘micronutrients fortified energy dense food’ a hi Daliya Sweet leh Khichidi pang ahi. Daliya nehthei a hi gehu, chini, soya, groundnut, milk powder, edible oil, Ragi, vitamin le mineral premix pang a chule energy, protein, vitamin B1, B2, B3, Zinc, Folic Acid, vitamin A le C, iron le Calcium pang ahi. Chule khichidi a hi anchang, moong dal, soya, ai eng, masala, chi, edible oil, vitamin le mineral pang ahi.

Kangpokpi district a Anganwadi centre 656  um a hi beneficiary 35,000 vel um ahi in, worker 1,312 um ahi. Chule Anganwadi Centre (Mini) 65 a mini worker 65 um ahi. Kin goun a DC Kangpokpi, Somorjit Salam, IAS, Joint Director, ICDS Bantee Konthoujam, Deputy Director, ICDS Ela Magdalene leh DPO ICDS Cell, Kangpokpi, Miranda Zimik injong houlimna anei uvin ahi.

 

CoHSEM themvetna che jom kit ta; themvetna result July 15 a soh ding’a kisei

B.Lalboi Gangte

CCpur. July 6 (ET): Council of Higher Secondary Education Manipur (CoHSEM) tohgon nanoi’a Class XII exam anachelha Covid-19 Lockdown jeh’a anachelha thei lou chu tunin ana akipan kit tan ahi. Tuni jinglam nidan 10:00 akipat nilhah lam nidan 1:00 sung in Engineering drawing, Sociology leh Thang-ta exam achelha in chuleh jing (July 7) nikho jinglam nidan 10:00 akipat nilhah lam nidan 1:00 chan Elective Bengali, Elective English, Elective Hindi leh Elective Manipuri chelha ding ahi.

Hetthei khat chu Manipur State sung pumpi’a HSSLC examination Centre ding in Centre 16 akimangcha in hiche lah’a Ccpur District sung’a Examination Centre 5 (Rayburn High, Rayburn College, Donbosco (D.Phailen), Young Pillar College leh AG High School) aum in ahi. Chuleh Council of Higher Secondary Examination thuso dungjui’a tuni leh 7 July sung’a exam um ho leh exam kibol chaise ho result ahung lhung ding July nisim 15 a sohdoh tei ding tohgon anei’u ahidan aphongdoh in ahi.

Government natong hon 7th Pay Commission alhingset a munading a demand bol

Imphal, July 6(ET): Manipur Government Services Federation (MGSF) hon thuso khat abol nauva chun Seventh Pay Commission recommendations chule Dearness Allowance and Dearness relief (DA/ DR) rate jong Central government natong hotoh kibang a alhingset a mutheina ding in demand abol uvin ahi. Association in aseina achun Manipur govt. in MoU achesa June 8, 2018 nichun akai uvin chule DA/DR jong central govt. noiya natong ho a toh April 1, 2020 nikho apat kibang ding a ana sei u ahi. Pensioners’ Union Shanglen, Singjamei a thuso miho masang a MGSF a Vice President, Laishram Sarat Singh in aseina achun central a DA/DR hi 17% ahi in hinla state a hi 3 % bou ahi ati. Lhathum kah a pay toh kisai seichetlou ho jouse seichet ahitheina ding in jong asei in ahi. Pensioner thu toh kisai a aseina achun January 1, 2016 masang a ana retired ho chungthu a pension sum akipeh ding jat seichetna jong akinthei pen a bolding in asei in ahi.

Aseibena achun Manipur Secretariat a Stenographer ho tailou department dang ho a tong ho promotion ding dan jong ngaito peh ding in asei in chule Government College a teacher ho pay UGC 7th Pay Regulation 2018 dungjui a revision bolding in asei in ahi. State govt. noiya natong doctor ho muding a kilom tuchan a amulou u Allowance ho jong akinthei pen a suhtup hiding in asei in chule duty allowance leh nursing allowance hojoh suhtup ahitheina ding in asei in ahi. Chule Manipur Secretariat a natong ho amuding uh Secretariat allowance 10% jong akinthei pen a koikit ding in jong asei in ahi.

 

MGNREGA worker ho man ding Cr. 2 val man ‘mask’ hoilou RD & PR Dept in cho

Imphal, July 6(ET): Rural Development and Panchayati Raj Department in MGNREGA worker ho hop dinga sub standard protective mask le sanitizer tamtah acho in ahi.

Thulhut dungjuiya, Imphal East district a Monday ni a mask piece lakh 2 lhing aso lhah u ahi. Imphal East Zilla Parishad office mun a aso lhah u face mask hi sub standard anahi ahi in, chule trademark umlou, COVID 19 natna a kon kivenna thei ahi aphotchenna umlou ahi. Chule mask hi aman Rs 25 kiti a kipe ahi. Mask hi dukan ho a kijoh handkerchief akeh khat tebep bou hi ahi.

Thulhut dungjuiya, department in MGNREGA worker ho man dinga achoh mask, sanitizer le protective gear adang dang dang hohi dangka crore 2 leh lakh 32 man ahi. Imphal East a aso lhah u mask hohi M/S Romabati Handloom and Handicraft Production centre, Kongba Kshetri Leikai min a payment kibol ahi. Mask le protective gear ho kichohna sum hi MGNREGA Administrative cost a kon kimang ahi.

Dangka crore 2 val man thil tamtah choh nadinga tender notice akisodoh na jong umlou ahi, tin thulhut in aseibe in ahi.