Northeast lamkai hon CAB doudalna thu’a Home Minister kimupiu; Northeast gam ho...

Northeast lamkai hon CAB doudalna thu’a Home Minister kimupiu; Northeast gam ho Bill a kon kivengding ahi, tia Amit Shah in sei

296
0
SHARE

Northeast lamkai hon CAB doudalna thu’a Home Minister kimupiu; Northeast gam ho Bill a kon kivengding ahi, tia Amit Shah in sei

Guwahati, Dec 1: Union Home Minister Amit Shah in Citizenship Amendment Bill thu a Northeast gam a um lamkai ho chule civil society member leh lamkai ho akimupi in ahi.

Shah in meeting kichaiya Assam, Meghalaya, Tripura a tribal ho gam chule Inner Line Permit (ILP) umna mun ho CAB in atohkhah louna ding kibol ding ahi, tia kitepna anei ahi, tin thulhut in aseiyin ahi. New Delhi khopi a kihouna aneiyu ahi. Shah in kitepna anei dungjui ahileh Bangladesh, Pakistan leh Afghanistan gam a kon hunglut a non-Muslim hon citizenship anei uva ahi jongleh akisei mun ho a chengden theilou diu ahi’in, mun dang dang a cheng diu tina ahi.

Meghalaya delegate hohi Chief Minister Conrad K Sangma lamkaina ahiuvin, political party chom chom, CSO thalheng ho jong pang uva chule Saturday nikho a kilolna anei hou Home Minister henga apehlut u ahi. “State sorkar, political party, autonomous district council, civil society chom chom in November 29 leh 30 nikhon Delhi a kihouna anei uvin Meghalaya gam a CAB 2019 chepi ding doudal dinga kilolna akineiye”, tin resolution apehlut nauva chun aseiyin ahi.

Meghalaya gam a um simlai kiloikhomna Khasi Students’ Union injong Home Minister Amit Shah henga CAB thu a adinmun u achombeh a memorandum a apelut uvin, Bill akiphatsah a ahileh gamsung miho kisuhmang nathei hiding ahi, tin asei uvin ahi. “India sorkar in kinel baotamna CAB hi Northeast gammi dihtah ho chunga akoikhum loudinga temna kaneiyu ahi, ajeh chu hiche hi Meghalaya chule Northeast gammi dihtah ho tongkha thei ahi”, tin KSU in aseiyin ahi.

Alangkhat a North East Social Organisation (NESO) in Bill doudal dinga dinmun dettah a atuh jing uvin, Northeast pumpi a dinga kadin u ahi’in, Citizenship Bill ka doudal jom diu ahi, tin asei uvin ahi. Home Minister in gamkai huhna dinga  tohgon anei ho akipapinau thu NESO in aseiyin, ahivanga 2016 kum a kon CAB kidoudal ahitan, tua jong NESO in adoudal jom ahi, ati.

Chief Minister Pema Khandu lamkaina a Arunachal Pradesh team honjong gamsung mi dihtah tribal ho alungkhampi nau thu asei uvin ahi. Delegate a hi MoS In charge Sports, Kiren Rijiju leh Lok Sabha MP Tapir Gao jong pang ahi. Gamsunga um tribal ho venna dinga ‘special provision’ koi dinga Chief Minister in ngehna aneiyin chule gamsung mi deibanga bol dinga aseiyin ahi.

Alangkhat a Pradyot Manikya Deb Barman lamkaina a Tripura team honjong November nisim 29 nikhon Home Minister henga memorandum apelut uvin, Bill adoudal nau thu asei uvin chule Parliament a akipohdoh masanga CAB draft apeh uva, ngaidan akisei thei nadinga thumna anei uvin ahi. Home Ministry lamkaina a committee sem ding, chule committee a hi gamsung mi dihtah hi a stakeholder nam chom chom a kon ho pansah dinga delegate in ngaidan asei uvin ahi.

Achesa kum 70 sunga mipi panlahna leh kiphaltheng na hetpehna a Assembly chule TTADC representation jong kalsah dinga lunggel asei uvin ahi. Achesa kum 22 val relief camp a um Reang Community ho ‘rehabilitate’ bol angaidan thu jong aseibe uvin ahi. Indian Constitution a kipe Schedule VI hi gamsunga apanna umlou ahi’in, thahat sah angaiye, tin Deb Barman in aseibe in ahi.

NESO in Northeast gam pumpi a ILP leh NRC chepi dinga thumna nei

New Delhi, Dec 1(IANS): North East Students’ Organisation (NESO) in North East gam jouse a Inner Line Permit (ILP) Centre in achepi dinga thumna anei uvin chule Indo-Nepal Treaty of Friendship, 1950 a kon apansah lou diuvin thumna anei uvin ahi.

Saturday nikho a NESO in Union Home Minister Amit Shah henga asei ahi’in, North East gam jouse a National Register of Citizens (NRC) hi ama ama gam a ‘base year’ achom chom a chepi dinga thumna aneiyu ahi. Citizenship Amendment Bill (CAB) chungchang a NESO ina dinmun jong kicheh tah a avel in aseikit uvin, gamsung mi dihtah ho deilou hi kidoudal jom ding ahi, ati.

Bangladesh Liberation War, 1971 sung chule gal kichai jouva Bangladesh gam a kon refugee hohi Assam gam a um district 24 lah a alhompen a district 11 a lut u ahi’in, amun hohi tua hi gamsung mi dihtah hilou ho hatjoh leh thunei joh namun ahitai, tin NESO in aseiyin ahi. 2011 census a ‘decadal population growth’ 27.8 percent ahi hi Centre in agelkhom ahi’in, Bangladesh gam a kon tantin umlouva mi hunglut jing na ajeh ahi, ati.

CAB hin Assam Accord, 1985 jong asuhmang ding ahi, tin asei uvin chule Bill hin gamdang mi gamsunga hunglut atam cheh jing jeh a boina asan sah cheh ding, achaina teng leh gamsung mi dihtah hohi agam uva nam lhom a pangdiu ahi, ati. Eastern Bengal Frontier Regulation, 1873 leh Sixth Schedule neiya Northeast gam ho CAB in atohkhah louding ahi tia Centre in kitepna anei vanga Centre in gamkai pumpi hi block khat a alah ding ahi, tin NESO in aseibe in ahi.

CAB in gam phabep atohkhah a ahileh adang hojong ol a asuhboi ding ahi, ati. Home Minister toh kihouna a pang NESO member holah a Mizo Zirlai Pawl, All Arunachal Pradesh Students’ Union, Khasi Students’ Union leh Garo Students’ Union jong apang uvin ahi. NESO lamkai hon CAB thu a kihouna a Manipur gam a kon stakeholder ho kouna akipeh louhi Manipur gamsung mi dihtah ho chunga adih a thil kibol louna ahi, tia jong demna sangtah aneiyu ahi.

Gamsung mun chom chom a World AIDS day kimang; AIDS suhbei nadia mipi pankhom tei ngai ahi, tia Health Minister Jayantakumar in sei

Imphal, Dec 1(ET): Manipur gam leiset a HIV/AIDS natna hi mipi in kipumkhat tah a pan lah a suhmang thei ahi e tin Health and Family Welfare Minister L. Jayantakumar Singh in 1st Manipur Rifles, parade ground, Imphal a Observance of World AIDS Day, 2019 kingon Jin-Gun hina tunia houlim aman pet chun aseiye.

Minister Jayantakumar in HIV natna nei khat chu moh chom koi jeng ding ahipon ama ho lung mon nading joh a eiho in bolthei ipi um am iholdoh diu chule pankhomna a kon a hiche hivei hi gamsung a kon a suhmang thei ahi e, ati.

Minister Jayantakumar in India gamsung a HIV/AIDS thu a Manipur dinmun jong hatah in akhesuh in hiche hi NGO ho le volunteer ho jal a bou lolhing ahi in, apan lah dan u pachat aumlheh in, Department of AYUSH noi a HIV/AIDS nat vei ho neh le chah a kithopina peh hiding ahi e, ati.

Kin-Nei a pang Education Minister Th. Radheshyam Singh in AIDS suhmang nadia Manipur State AIDS Control Society, MSACS, NGOS le volunteer ho pan lah na hi poimo tah ahi in, state lhohsatna khat a um jing HIV insung miho hahsatna suhlhap nading a mitin ban a NGO le MACS pankhom phat tah ahi e, ati. Kingon kipat masang chun Kangla lhumlam kotbul a pat Royal Riders Manipur ho Motorcycle le By-Cycle lhei ding tohgon chu Health and Family Welfare minister L. Jayantakumar Singh in alhadoh in chujou chun Imphal West Singjamei Urban Health Centre a kon kijot ding a hungkhom mipi 2500 vel jong Minister pu chun alhadoh kit.

Alangkhat ah Moreh khopi a jong World AIDS Day akimang’in ahi. Kingon kimantoh kilhon chun Organization for salvation of men, OSOM, DPU-B, leh New generation, OSD hon Manipur State AIDS Control Society toh kithon “Communities make the difference” kiti thupi noiyin khopi sung lamlen ho’ah kijotna jong aneiyuve. Kijotna chu SDPO, Moreh Police, Meghabarna in OSOM Office mai a ahondoh ahin Indo-Myanmar Friendship Gate No. 2 chan akijot uvin, red ribbon campaign jong abol uvin ahi.

Leima Chanu Nawa Tengbang Lup injong Dr S Bhagyabati toh kithon Singjamei Chingamathak Dr. S Bhagyabati chenna inn ah World AIDS Day amang’in ahi. Kingon kimantoh kilhon chun lou le ai manbei in ahomdoh uve. Lou lei ai hohi HIV natna neiho gelkhoh pum’a manbei a kihoppeh ahi tin Dr S Bhagyabati in thuso miho heng’ah aseiye.

Child Welfare Ashram (CWA) & Tipaimuk Tribal Environmental Development Services (TIPTEEDS) injong tuni chun Samupunbi(Gularthol) Community Hall, Jiribam ah World AIDS Day amang’in ahi. Kingon kimantoh kilhon chun Jiribam Higher Secondary School a kipat Samupunbi Community hall chan cycle rally abol uve. Kingon a chun MLA Md Ashab Uddin leh akisaipi official hojong apang uvin ahi.

Kiyamba Ningshing Shanglen Bishnupur ah jong District Aids Prevention Control Committee Bishnupur vaisaina noiyin World AIDS Day akimang’in ahi. Kingon kimantoh kilhon chun Jawahar Navodaya Bidyalaya School chapang hon kijotna aneiyuvin hiche a chun Chief Medical Officer Bishnupur Dr T Manihar Singh leh akisaipi official dang dang hojong apang uve. CMO Dr T Manihar Singh in ahoulimna ah HIV/AIDS suhbeina ding’in NGO hon mopohna lentah aneiyuvin, chuleh natoh jong hatah in abol uve tin apachatna thu aseiye. Mopohna hohi gelkhoh chieh leuhen AIDS hi suhbei a umthei ding ahi tin aseikit’e.

Communities made the Difference’ kiti thupi noiyin Churachandpur District, Hiangtam Lamka YPA General Headquarter Hall ah World AIDS Day akimang’in ahi. Kingon a chun HIV (PLHIV) natna neiya ART lahon ahinkho thusim’u aseiyuvin, Happiness Home simlai honjong thilkeu ho apeuvin ahi. Kingon chu District Aids Prevention leh Control Unit (DAPCU) Ccpur tenin agon lhon ahin hiche a chun CMO Churachandpur Dr. VC Pau Tonsing, Bethesda Collage of Nursing leh Tunnu School of Nursing simlai holeh milen milal dang dang hojong apang uve. DAPCU a DIS T Benjamin in tunikho hi HIV/AID natna neiho tosot nikho ahin, amaho hi kidah, vetset tiho bol louding ahi ati. Kingon kimantoh kilhon chun Churachandpur District Hospital a Medical Superintendent  Dr. Juii  in HIV/AID natna nei mi 160 ID Card apen, hiche ID card jal’a HIV natna neihon private hospital ho’a aga kivetsah teng’u leh phatchomna amutheidiu ahi.

Tamenglong Indoor Stadium ah jong ‘ Communities made the Difference’ kiti thupi mangchan World AIDS Day akimang’in ahi. Kingon chu District AIDS Prevention and Control Committee Tamenglong in Ahana project NCPI+ Tamenglong toh kitho’a agon ahin Manipur State AIDS control society in sponsor abol ahi. Kingon a chun Deputy Commissioner Tamenglong Armstrong Pame, District Forest Officer Tamenglong Arun RS leh Chief Medical Officer Tamenglong Dr Chambo hochu sahlut tah’a kou ahiuvin, 23 Assam Rifles a kon Dr. Sunil jong apang’in ahi. HIV natna nei ahing cheng leh amollemsa ho ngailut vetsahnan candle jong ahal uve. Deputy Commissioner Tamenglong Armstrong Pame in ahoulimna ah HIV a kon kivendoh dingdan aseiyin, HIV natna neisa hojong moh lungneo louding’in athuhil in ahi. Tamenglong district ah HIV natna vei mi akibe jing’in, hijeh a district mipiten aphatcha a thisan test akibolsah diuvin District AIDS control Officer Tamenglong Dr G. Majachunglu in mipite temna leh kouna aneiyin ahi.

CM Biren in MANPAC toh kihouna nei; Union Home Ministry in meeting agon ding tahsan um

Imphal, Dec 1(ET): Union Home Minister Amit Shah in Manipur dalha a North East gam dang dang a um ‘stakeholder’ hotoh CAB thu a kihouna asem jou, tunin Chief Minister N Biren in Manipur Peoples Against CAB (MANPAC) hotoh kihouna sem dinga kouna aneiyin ahi.

Chief Minister office chamber mun a tuni nilhah nidan 4 don a kihouna apat u ahi’in, CMO thulhut in kihouna a MANPAC Convenor S Dilip, Co-convenor L Jadumani, President, NEFIP, Ningthouja Lancha jong apang uve, ati. Saturday nikho a NESO president Sinam Prakash in thuso miho akihoupina a Manipur gam a um NGO ho Home Minister in kihouna a akoupoi, tia asei ahi.

Alangkhat a Chief Minister in thuso miho akimupi na’a, Union Home Minister injong CAB a clause thah koibe ding thu Parliament a pohdoh ding agel ahi, ati. November nisim 25 nikho a New Delhi office mun a COCOMI member 18 hotoh kihouna anei jouva Union Home Minister in CAB akipohdoh a ahileh gamsung dinmun itobang ham tia eidoh ahi, ati. Home Minister in CAB a kon gamsung akiven thei nadinga clause koibe ding ahilouleh thil khat gon dinga ngehna sangtah kanei ahi, tin CM in aseiyin ahi.

Alangkhat a MANPAC in Union Home Ministry in CAB thu a Northeast gam a ‘divide and rule policy’ abol ahi, tia ngohna anei uva chule CAB douna a kiphinna kibol kinungchon louding ahi, ati. Alangkhat a thulhut chom khat in Union Home Ministry in NEFIP leh MANPAC ho achom a kihouna sempi dinga kouna apeh maithei ahi, tin aseiyin chule Lok Sabha a CAB akipohdoh teng leh Northeast gam ho a kon koiman kiphinna abol loudinga kigotna aneiyu ahi, ati.

CAB thu toh kisaiya kihouna a koi kikou ding ham ti thu a MHA in State Home department akijahmatpi ahi, tin thulhut chun aseibe in ahi.

KCA-M thulhuhna Kuki Chiefs’ Council akipom poi: KCA Tengnoupal

Imphal, Dec. 1 (ET) : Kuki Chiefs’ Association Manipur in  Kuki Chiefs’ Association min khel’a Kuki Chiefs’ Council (KCC) tohgon anei nao chung’a District lamkai leh block lamkai cheng hetpeh na um louva thulhuh na anei jeng’u hi phamo akisa lheh jeng in ahi tin Thongkhothang Haokip Info. & Pub. Secy. KCA Tengnoupal District in aseiyin ahi. Chuleh Chiefs’ Council / Village Council min kiti hi haosa kiloikhom nan akipom pon hiche nachung chon’a tule tua kivaihom na Kuki Chiefs’ Association hi Kuki te boina jouse’a kimang jing leh Govt  in jong eihetpeh’u kiloikhomna ahi jeh in athah hung kigong KCC hi Tengnoupal District leh Block jousen akipom thei pon ahi ati. Hiche nachung chon’a  kailedon jong KCC kipe louding ahi tinjong aseibei.

Hiche toh lhon’a tule tu’a KCA Manipur Executve jouse KCC a merger ahitah jeh uvin  Kuki Chiefs’ Council kivaihomna Imphal khopi’a KCC min phondoh nading’a District lamkai jouse leh Block lamkai jousen pan kila lou ding ahi. Chuleh minthah khel’a khantou nading jong aumpon changval’a khat leh ni lamkai deichat na jeh’a kibol ahi jeh in tule khunung changei’a Kuki chiefs’ Council hi kipomlou hel  ding ahi tinjong Thongkhothang Haokip chun aseibei.

Mainpuri simlai khat thina thu CBI in kholchilna anei ding  Amit Shah in nop peh

Lucknow, Dec 1:  Union home minister Amit Shah in kum 11 a upa  pol 11 sim Anushka Pandey thina toh kisai in CBI kholchil na neiding a anop na phondoh na ana nei in ahi.

Hiche simlai nu chu Jawahar Navodaya Vidyalay, Mainpuri a kai ahi. SP MP Prof Ram Gopal Yadav  in Amit Shah toh akihou jou a thuso miho toh akihou limna a CBI team khat in hiche thu toh kisai a kholchil na nei ding a Mainpuri ahunglhungding ni 7 sung a hung lhungding diu ahi ati. State government in achesa September nisim 26 nikho a CBI in kholchil na nei ding a temna ana nei u ahi.

Congress general secretary Priyanka Gandhi Vadra in Uttar Pradesh chief minister Yogi Adityanath ang a hiche chapang nu thina toh kisai a mona nei ho kholdoh nading a hetsah na an anei ahitan ahi. Priyanka in mona nei a kingoh pa chung a kholchil na le thudoh agan na thei pen a akipat a, chapang nu insung mite in thudih agan na thei pen a ahet doh uva achanu u kitha na chung a thudih ahet doh ding uvin jong temna ana nei in ahi.  Hetthei khat chu kum 17  a upa chapang nu chu a umm na hostel room a a ceiling a aki khai lih sa a ana kimu ahi.

Nam khat hina kihetpeh a jana kipehto ding ahile kihou ding anom sa akihi: HNLC

Shillong, Dec 1: Nam khat hina hetpihna aum a jana pum a kihou ding ahile kihou ding anom sa akihi e tin Hynniewtrep National Liberation Council (HNLC) in tunichun phondoh na aneitan ahi.

HNLC general secretary Sainkupar Nongtraw in achesa 2004 a pat government toh kihouna neiding nopna ana kiphong jing chu vangset umtah in donbutna akimupon ahi, ati.

Hetding chu Unlawful Activities (Prevention) Act dan noi a Ministry of Home Affairs in November 18 nia chu HNLC chung a khamgahna ana phonkhum ahi.

Nongtraw in avel vel a kihouna neiding a electronic media mang a nopna ana kisodoh jing chu donbutna akimupon government in gamsung cham le monna umding adeisah lou hetchenna ahi e, ati.

Nongtraw in asei na ah India in parliament anei bang a Hynniewtrep gam leiset in jong ama parliament, Inpi, danbu chule Supreme Court anei angai in, tunia HNLC in athil ngeh hi amuding a lom ahi e, ati.

Nongtraw in akithum hi kinah kibao umlou a chamdel a muthei ahi in, hiche hi centre le Meghalaya government in jong agelkhoh angai e, ati. Chule achesa kum 30 sung galsatna hi toukhom a kihou toh a boina suhlhap thei ahi e tin Nongtraw in aseiye.

Nongtraw in aseikit na ah  kei hon katahsan chu keima ho kipehlut masat ding hi gollel bang a kigel kahiu tolhon a kihouna aum le bou galmanchah koilhah ding katiu ahi in hiche hi centre le Meghalaya government khut a kingam ahitan amavang government in kihou ding agel thei lou jong le sum le pai le galmanchah lhasam kahi pouvin galsat chejom pi ding jong kigongsa kahiuve, ati.

HNLC lamkai Nongtraw in tukhang hi galmanchah hoi nei ho khang ahitan kihou le kihou lou ding hi government khut a um ahitai, ati.

Ministerial Committee hon Manipur-Nagaland gamgi Senapati a um thunoh baotamna kho vil u

Senapati, Dec 1(ET): PHED, Printing & Stationary Minister Losii Dikho lamkaina team hon Sunday nikhon thunoh baotam aumna Mai Hills, Tungjoy kho, Senapati district avil uvin ahi.

Amun hi Nagaland state gamgi a um ahi. CAF & PD, Revenue Minister Karam Shyam leh Tribal Affairs & Hills Minister N Kayisii jong ache holah a apang in ahi. Kinel baotamna mun hi Tungjoy kho, Manipur leh Khezhakeno kho, Phek district, Nagaland gam kikah ahi’in, gam nei kichuna a boina hi masanga kon ana umjing ahi.

Tungjoy kho mihon ache a Ministerial team ho henga kinep baotamna mun a Hornbill Festival man dinga tohgon um ahi, ati. Ache hon Tungjoy kho miho chule Nagaland gam a kon official hotoh kihouna anei uvin, boina thu seilhah nading lampi aseikhom uvin ahi. Kikhopna a Minister Losii Dikho in, khosung miho hahsatna sorkar in avetlhah peh ding chule gamsung teni lungmong tah a achenkhom nadinga pan lah dinga kitepna aneiyin ahi.

Minister Karam Shyam in thuso miho akihoupi na’a, achesa 1872 kum a kon state teni kah a gamgi kikhenna thu a boina anaum jing ahi’in, survey phatah a bol ngai ahi, ati. Losii Dikho Chairman hina a Nagaland leh Manipur gam teni kah a boina thu suhlhap ndinga Committee meeting um vahding ahi, ati.

1991 kum a khosunga Manipur Rifles outpost kitungdoh ahi, tin Minister Kayisii in aseiyin chule Chief Minister toh kihouna kineiya Committee recommendation dungjuiya athu kiseilha vahding ahi, ati. Khosung jotna lamlen semphat dinga jong khosung mihon temna anei uvin ahi. Kihouna a ADGP (AP/Ops) L Kailun, IPS, DC Senapati Somorjit Salam, SP M Pradip Singh, Nagaland official, khosung miho chule Tungjoy khangthah hojong apang uvin ahi.

Nagaland in 57th Statehood Day mang; Thusim isemdoh kon u ahitai, tia CM Rio in ‘Naga Peace Talk’ thu a sei

Kohima, Dec 1: Naga politics thu seilhahna ding natoh tuni chan a chelha jing ahi, tin Nagaland Chief Minister Neiphiu Rio in 57th Statehood Day aman nau Khouchiezie Kohima Local ground mun a ahoulimna a aseiyin ahi.

“Naga political group chom chom leh India sorkar in kihouna anei jou ahitan, thusim kisem kon, thulhuhna akisem nadinga kon naicha a ium u ahi”, tin Rio in aseiyin, kum 22 lhing Naga peace talk seilhah nadinga pan la a party jouse ahetpehna thu aseiyin ahi. Tukum August 15 Independence Day nikho a CM houlimna ‘sign language’ a ale ujong hi gamsunga dinga amasapen ahi.

“Hiche lentol a hi Prime minister anahi Dr S Radhakrishnan in 1963 kum a Nagaland gam hi Union of India state 16 channa dinga hondohna anei ahi. Tuni a nikho hi kipani ahi”, tin Rio in aseiyin chule Joint Legislators’ Forum (JLF) in November nisim 13 nikho a Naga politics thu a meeting abolna a gam kinaipi jousen Peace Talk lolhingtah a achelhah nading a tosotna apeh diuva ngehna anei ahi, ati.

“Phat sottah ana kingah jing Naga politics thu hi tham phah a um ahitan, kipana sangtah um ahi. Ahivanga mopohna lentah ichung uva akingam e, tihi igeldoh diu ahi”, ati. Kin gon a 15 (IR) Women battalion in ‘drill display’ chombeh abol uvin, Special Task Force (STF) in bus hijack demonstration abol uvin, Band 8, contingent 8 in march past abol uvin chule Kohima mun chom chom a um school 12 a kon simlai 1060 in ‘God Bless Nagaland’ la asah nauva pan ala uvin ahi.

Prime Minister Narendra Modi in Twitter a gamsung akipapina thu aseiyin ahi. “Statehood Day nikho a Nagaland gam a um sopi numei leh pasal jouse kakipapina thu kathot e. Nagaland hi gam hangsan ahi’in, lolhinna sangtah neiyu hen”, ati.

CM Rio in PM-KISAN noiya loubol mi 1,42,603 val registered kibol ahi’in, loubol miho kithopina dinga dangka crore 54.60 hi ama ama account a kithot ahi, tin aseiyin chule loubol miho gelkhohna jal a NE Agri-Expo, Dimapur a organic AC market akiboipi lai ahi, ati. Chief Minister in Police Uniform Code hondohna aneiyin, Nagaland Police (NP) jousen ajui cheh diuvin aseiyin ahi.

Battle of Kohima kum 75 alhin toh kilhon a ‘Winning the Lost Battle: Assam Rifles in the battle of Kohima’ kiti research phatah a kibol a kijih lekhabu CM in IGAR (North) Maj Gen PC Nair toh hondohna aneiyin ahi. Phengmai 180 lhing lekhabu a hi Assam Rifles hon gal a pan alah nau aseiyu ahi’in chule gal he a mi phabep lunggel jong kijih ahi.

Gordon Graham Prize for Naga Literature, 2019 second edition Dr Neikehienuo Mepfhu-o in asang in, ‘My Mothers’ Daughter’ lekhabu a ‘fiction category’ a award asan ahi. Dr Abraham Lotha in ‘The Hornbill Spirit: Nagas Living Their Nationalism’ kiti lekhabu ajihna a non-fiction category a award asang in ahi.

Manipur Assembly winter session Dec 18 teng kipan ding

Imphal, Dec 1(ET):  A 11  vei channa Manipur Legislative Assembly winter session chu ahung lhungding December nisim 18 akon kipan ding ahi. State education minister Thokchom Radheshyam in asei na a state sung a boina ho session 9 vei channa ahi kiseikhom ding ahi ati. Minister pa in asei be na a cabinet in Dzuko Valleyu le Tungjoy kikah a gam thu a boina toh kisai a committe khat public health engineering department minister L Dikho makei na a kisem ding ahidan tahlang na ana nei toh lhon in Manipur police ho ration sum dangka 1000 akon 2000 a kikal sah ding ahi tah dan jong ana sei in ahi.