Northeast in CAB douna a ‘bandh’ kou jing; Sorkar in Monday nikho...

Northeast in CAB douna a ‘bandh’ kou jing; Sorkar in Monday nikho teng Lok Sabha a CAB thu podoh ding

292
0
SHARE

Northeast in CAB douna a ‘bandh’ kou jing; Sorkar in Monday nikho teng Lok Sabha a CAB thu podoh ding

New Delhi, Dec 7: Northeast gamkai mihon nasatah a adoudal Citizenship (Amendment) Bill (CAB) thu Monday nikho teng Lok Sabha phatsah dinga apohdoh diu ahi’in, athu aseikhom jouvu Tuesday nikho teng phatsahna aneidiu tahsan ahi.

Afghanistan, Bangladesh ahilouleh Pakistan gam a kon Hindu, Sikh, Buddhist, Jain, Parsi leh Christian nam ho Indian citizenship peh nading ahi. North East Students Union (NESU) in Tuesday nikho a Centre tohgon douna a nidan 11 Northeast Bandh akou uvin ahi. CAB hi gamkai mi dihtah ho deilou ahi, tia simlai kiloikhom hon pan alah ahi.

MP holah a kihom Bill dungjuiya dan thah hi Inner Line Permit (ILP) umna chule Indian Constitution Sixth Schedule umna ho Bill in atohkhah louding ahi. “Citizenship Act Section 2, sub-section (i) clause (b) a hi December nisim 31, 2014 nikho ahilouleh amasanga India gam a hunglut Afghanistan, Bangladesh ahilouleh Pakistan gam a kon Hindu, Sikh, Buddhist, Jain, Parsi ahilouleh Christian ho chule Centre sorkar in clause (c), sub-section (2), section 3, Passport (Entry into India) Act, 1920 noiya ‘exempt’ abol ho, ahilouleh Foreigners Act 1946 provision in ahop hohi dan dihlouva hunglut (illegal immigrant) tia kisei louding ahi”, ati.

Hitobang refugee hohi India gam a kum 6 (CAB 2016) achen jouteng Indian citizenship kipe ding ahi, tia Bill a kisei ahi’in, hiche masanga hi kum 11 achen u ngaiya ana kisei ahi. “Third Schedule, Principal Act, clause (d) a kum 11 noilang hilouva kum 5 noilang hilou dinga kisei ahi.

“Citizenship (Amendment) Act, 2019 akichepi a kon hitobang mi hon ‘citizenship’ ahilouleh ‘illegal migration’ thu a boina ato ho kisumang ding, citizenship kipe ding ahi”, tia kisei ahi. “Hiche section noiya citizenship apply bol ho amaho ‘rights’ peh louva koilou ding ahi’ tia jong kisei ahi.

Legislation akigong dungjuiya amendment hi Assam, Meghalaya, Mizoram ahilouleh Tripura a tribal chenna ho a kichepi louding ahi’in, Bengal Eastern Frontier Regulation, 1873 noiya Sixth Schedule leh Inner Line in ahop gamkai ho a kichepi louding ahi. ILP hi Arunachal Pradesh, Nagaland leh Mizoram gam a um ahi.

Bill hi Union Cabinet in Wednesday nikho a ‘Clearance’ apeh ahitan chule sub-section (d), Section 7 koibe a, Overseas Citizen of India (OCI) registration suhmang dinga jong aseiyu ahi. Ahivanga ‘cancellation order’ hi OCI card holder ho santhei dinmun akipeh masanga kikah louding ahi.

CAB hi BJP in 2014 leh 2019 Lok Sabha election a phatsah dinga kitepna ananei khat ahi. Northeast gamkai mi tamtah leh kiloikhomna hon Assam Accord, 1985 kisuhmangna ahi tia nasatah a adoudal u ahi. Assam Accord dungjuiya March 24, 1971 hi hou thu khenna umlouva dan dihlouva gamsung hunglut ho agam a nungsol nadinga ‘cut-off date’ a kisem ahi.

BJP lamkaina NDA sorkar in phat masa a jong Bill ana pohdoh u ahi’in, Lok Sabha in phatsahna anei vanga Northeast a kiphinna sangtah aumjeh a Rajya Sabha a kipodoh lou ahi. Bill kipohdoh nading phat kichaiya, hiche jouva Lok Sabha masa kisumang ahitai.

MANPAC in  state sung pumpi a CAB doudal na a kiphinna nei ding; Dec 9 jingkah nidan 1 akon bandh umding

Imphal, Dec 7(ET): Centre Government in parliament a CAB pass bol ding a tohgon ahin nei utoh lhon in Manipur Peoples Against CAB (MANPAC) in adoudal na ding in ahunglhungding December nisim 8 akon  state sung pumpi a kiphinna nei ding in phondoh na anei uvin ahi.

MANPAC Convener Yumnamcha Dilipkumar in thuso ahin neina a mipin December nisim 8 nikho le lampi a hung pot a CAB deilou na toh kisai a kholhang asap ding uvin temna ahin nei in ahi. MANPAC in ahung lhungding December nisim 9 jingkah lam nidan 1:00 akon December nisim 11 jingkah lam nidan 3:00 chan bandh kou dingin jong hetsah na ahin nei uvin ahi. MANPAC makai na noi a kihoukhomna ana um na achun political party lamkai, civil society lamkai le meira paibi ho in panlah na ana nei uvin ahi. Kihou khomna achun panla jouse in MANPAC in ahin phondoh kiphinna ding ho a mijouse in panlah na nei cheh ding in kihou lhah na le kinoptona ana nei uvin ahi. Kihoukhomna achun CPI Manipur, CPI (M), RSP, MPDF, Forward Block, Trinamul Congress ho in panlah na ana nei uvin hinlah BJP le Congress akon in koima ahung poi akiti. Mipi kiloikhomna lah a HERICOUN, KASAL, AMNM, NEFIP, MANPAC, IKAL, DNYO Thoubal, STDM, CCSK ho in kihoukhomna achun panlah na an anei uvin ahi.  MANPAC lamkai Yumnamcha Dilipkumar in ahou limna a Union Home Minister toh kihou jou in  MANPAC in mipi toh kihou khomna nei ding a tohgon an akinei peh ahin, tu chan na Northeast lhang sung a CAB chesah tei ding tohgon akinei toh lhon a kiphinna nei ding a phondoh na hung kinei ahi ati.

KNO/KRA-U in thingnoi ho kikah a kithato na aum na louding a temna nei; Kuki thingnoi jouse Christmas chibai boh

Kangpokpi, Dec 7(UNA): Kuki National Organisation (KNO) noiya um Kuki Revolutionary Army-Unification (KRA-U) in Kuki galguh bol kiloikhomna jouse ang a kitha tona angah tah ding uvin temna ahin nei uvin ahi. Hiche thu chu kiloikhomna Chairman lui aumtalou Paokhothang Chongloi thi kal kum 5 lhinna nikho nitna toh kisai a aphondoh u ahi.

Kiloikhomna Information and Publicity Secretary, Samu Doungel akon thuso kimu chun asei na a aumtalou Chairman lui  Paokhothang Chongloi chu kiloikhomna ho kikah a kithana tona akon ana bei ahi ati. Aumtalou Paokhothang in koima khentum le vetda nei lou a Kuki galguh bol jouse ana ngai lut danthu jong tahlang na ahin nei in ahi.

Chairman luipa kitha na chung ahin kiloikhomna in lungnop mo na ana kinei in hinlah phulah na chung a sopi mama in thina ato dng deilou na jeh a ana kibol lou ahi dan kiloikhomna in tahlang na ahin nei uvin ahi. Chairman luipa thi nikho a hitabang thuso hung kinei hi mijouse in KNO/KRA-U  in kitha tona adeipoi ti ahet cheh na ding uva kibol ahi dan hetsah na ahin nei uvin ahi. Chairman luipa thinikho feldoh na an akinei toh lhon in kiloikhomna in Kuki galguh bol jouse ang a Christmas chibai jong ahin boh uvin ahi. Chairman luipa geldoh na in phatchom khat thipbeh in ana um uvin ahi.

Imphal-Dimapur huikong kipan tading; Japan PM kholjin ding kigotna CM in vetlhahna nei

Imphal, Dec 7(ET): Chief Minister N. Biren Singh in Imphal-Dimapur kah a jangkei a leng ding huikong chu Bir Tikendrajit International Airport ah tunichun athenso tan ahi.

Jin-Gun a pang Chief Minister in Alliance Air kiti private airline company in man gang a Imphal-Dimapur kah kichot mat to nading hitobang a dia pan ahin lah hi kipa umtah le state teni kah kingailutna hin semhoi be ding ahi e, ati.

Chief Minister in huikong hi akipat til a hapta khat a thumvei leng ahinla lha 2-3 jou le Imphal-Dimapur kah a niseh a  leng pan ding in Alliance Air in asei e, ati.

Hiche kingon a chun Minister for PHED Losii Dikho, Minister for Fisheries N. Kayasii, Chairman of Tourism Corporation of Manipur Limited Dr. Sapam Ranjan, Chief Secretary Dr. J. Suresh Babu, Commissioner Transport M. Harekrishna, Director Transport Mercina Panmei, Alliance Air CEO CS Subbiah ho apang un ahi. Huikong thensona kin kichai chun Chief Minister le Cabinet Minister hon Japan Prime Minister Shinzo Abe le Prime Minister Narendra Modi in December 17 nia Red Hill tia jong kihe Bishnupur district hopsung Maibam Lotpa Ching avil nading mun kigot tup dan vetlhahna anei un ahi.

Hiche mun a Gallen Nina phatlai a Manipur a ana mollem Japan sepai ho Japanese Prime Minister Shinzo Abe in jana pehna aneiding ahi.

Chief Minister le cabinet minister ho chu Chief Secretary, Addl. Chief Secretary ho, Commissioner ho, Imphal West le Bishnupur Deputy Commissioner ban a police officer hon akilhonpi un ahi.

AMSU in NESO tosotna a Dec 10 teng nidan 15 bandh bol ding

Imphal, Dec 7(ET): North East Student’s Organisation (NESO) tosotna All Manipur Students Union (AMSU) in December 10 le nidan 15 sung NESO bandh achelhahpi ding ahi e tin AMSU Head Quarter ah tunilhah chun AMSU President -in-charge Laishram Athouba Meitei in phondohna aneitai. Bandh hi nohphahna hijongle khonung ding gelkhohna jal a pan phatah a lading in mipi tepna anei in ahin International Human Rights Day kingon a pang ding, media chule thil ngaichat po ho bandh in ahet them ding in ahilchen in ahi. Chule Manipur University le Dhanamanjuri University vaipo hon jong bandh nikho exam jong nikho dang a achon ding in jong AMSU in ngehna aneiye.

Athouba in citizenship amendment bill doudal na a pan hatah a lacheh ding in mipi tepna anei ban a NESO in thulhuh alah jouse chu AMSU dinpi ahijeng e, ati.

Union Home Minister in CAB in Manipur avenbit ding in sei jong le six scheduled le ILP dan tilou CAB noi a Manipur bitna ding aumpoi tin Athouba chun ahilchen in ahi.

Centre in hunam a CAB achepi leh Supreme Court a athu kipodoh ding ahi: CoMSO

Shillong, Dec 7:  Confederation of Meghalaya Social Organisations (CoMSO) in BJP lamkaina sorkar in Citizenship (Amendment) Bill (CAB) hunam a achepi a ahileh Supreme Court a kipodoh ding ahi, tin asei uvin ahi.

Organization in Saturday nikhon Shillong a meeting anei uvin, Meghalaya gam pumpi ki lha ong lou ahijeh a Bill hi 100 percent ahipoi, tin asei uvin ahi. “CAB douna a Supreme Court a case kisem ding ahi”, tin CoMSO lamkai Robertjune Kharjahrin in thuso miho henga aseiyin ahi.

Court sangpen in ‘tribal’ ho rights avettup peh ding akinepna thu aseiyin ahi. “Supreme Court hi thudih a ding ahi’in, alangkhat a political party hohin vote bank politics abol uva, politics a amaho phatchomna ding aboipi jeh uva minority ho deisah hi khatvei vei asuhmil jiu ahi”, ati.

Gamsunga Cantonment Board, European ward, Revenue land leh RR Colony chule adang dang Sixth Schedule noiya umlou um ahi, tin Kharjahrin in aseiyin, gamsung boina sangtah soh ding ahi, ati. “Centre in Meghalaya gam lha ong dinga asei hi alhem ahi’in, phabep bou ki lha ong hi kisang louhel ding ahi”, tin aseibe in ahi.

Organisation in CAB 2019 hi CAB 2016 tobanga asan lou ahi’in, CAB lunggel hi abon a apomlou ahi, ati. Political party, NGO chule mipi in CAB douna a pan alahkhom dinga temna aneiyin chule gamsunga Inner Line Permit chepi nadinga thumna aneijom ding ahi, ati.

CAB douna a North East Students’ Organisation (NESO) in kiphinna anei tosot dinga CoMSO in aseibe in ahi. Alangkhat a Governor in Meghalaya Residents Safety and Security (Amendment) Ordinance, 2019 phatsahna anei lou lai jeh a Monday nikho a kon kiphinna bol dinga organization in kihoulhahna jong anei uvin ahi. “Governor in ordinance akive e, tia asei hi kilepna a asei ahi. Phengmai khat bou hi a ordinance ahi’in, akihen den hi san thei ahipoi. Gamsung miho pohnatna ho jana apeh ding ahi”, tin Kharjahrin in aseibe in ahi.

Unnao rape case: Suhset a um nu meiya kihalna maha akon damdoh jou talou

Unnao (UP), Dec 7: Tukum March lha a MLA khat in eisuse e tia ngohna sem kum 23 a upa Unnao nungah nu chu janhi nikho a local court a hearing dinga ache na a thaotui kithekhum a anahal jeh un atahsa 90 percent meiyin akah jeh in Delhi khopi a um Safdarjung hospital a kijen dinga lenna a apo uvin ahi. Safdarjung hospital a doctor hon aseina achun, jan nidan 11:10 don chun lungchang nat ahin neipan in 11:40 don chun mollem ahi akiphoh chet e tin Safdarjung Hospital HOD (Burns and Plastic) Dr. Shalabh Kumar in asei in chule ama hi ‘cardiac arrest’ a thi ahi tin asei in ahi.  Samajwadi party lamkai leh Uttar Pradesh chief minister anahi Akhilesh Yadav in hiche chungthu douna in Vidhan Sabha pam ah toumun kiphinna abol un ahi. Akhilesh hi Samajwadi Party a senior minister Naresh Uttam Patel leh Rajendra Chaudhary toh pang ahi.

“Thilsoh hi dem dinga lomtah ahi. Tuni hi ‘black day’ ahi. BJP lamkaina sorkar noiya hitobang thilsoh alhunna amasapen ahipoi. CM Yogi Adityanath in hiche assembly tah a hi thilse bol ho kisumang ding ahi, tia asei ahi’in, ahivanga a chanu hinkho jong ahuhdoh jou pouve”, tin Akhilesh in thuso miho henga aseiyin ahi.

Uttar Pradesh Chief Minister Yogi Adityanath, Home Secretary leh DGP in apanmun a kon haina anei dinga Samajwadi Party chief in thumna aneiyin ahi’in, “Amahon haina anei louvu leh Unnao rape case chungchang a thudih a thutanna lhinglou ding ahi”, ati. Party in Sunday nikho teng Unnao thilsoh chungchang a Uttar Pradesh gamsunga um district jouse a ‘Shokh Sabha’ abol ding ahi, tin jong aseiyin ahi.

Congress lamkai Priyanka Gandhi injong tuni chun Lucknow a konin Unnao ajon in, vangsetna toh nu insung mite alunghempi in ahi. UP sorkar demna thu aseiyin gamsunga ‘dan leh mol’ lhasam cheh cheh ahi, ati. “Vangsetna toh nu chunga thudih a thutanna ipeh thei louvu hi eiho jouse lolhin lelna ahi. Ithemmo nau ahi’in chule Uttar Pradesh ‘law and order’ umdan avetsah ahi”, ati. Gamsunga ipijeh a numei chunga setna thilsoh hiti tam ham chule vangsetna toh nu ipijeh a protection kipe louham. Chule FIR jih ding nomlouva officer chunga ipi action alah uvem”, tin aseibe in ahi.

A longdamsa chu security khautah toh tuni jan nidan 9 don chun achenna kho Uttar Pradesh state sung a Lucknow division hopsung a um Unnao alhung in Samajwadi Party lamkai leh mipi phabep in ana vailhun uvin ahi. Deilou um thilsoh ima asodoh louna dingin Fire brigade leh senior police officer phabep amun ah camping abol uvin angah den uvin ahi.

Hiche thina toh kisai in Yogi Adityanath Government in compensation dangka lakh 25 pehding in asei in chule a insungmi ho Pradhan Mantri Awas Yojana (PMAY) scheme noiya hamphatna muding a kibolpeh tei tei ding ahi tin aphong doh un ahi. A penna pa in aseina achun, achanu chung a chonset bolho akinthei pen a UP Govt. in Hyderabad case a kibol tobang a abol ding in ngehna anei in ahi.

Alangkhat ah Uttar Pradesh DGP OP Singh in thuso miho heng a aseina achun, suhset a um nu’n police venbitna athumpon ahin lhamasa November 30 nia bail a potdoh bep Shivam in chuchan gei abolman ding tahsan aumpoi tia asei vang a state government in aganglam a natong ding in police ho thupeh anei in ahi. Chule suhset a um nu insung mi hon hiche thu boljom lou dia aseipih ban uva dukan le achenna in gei hal lhahpih dia gihna jong anamu uh ahi.

 

Meira Paibi hon MP RK Ranjan inn ana bulu gou

Imphal, Dec 7(ET): Meira paibi ho in tuni in Inner Parliament MP R.K Ranjan inn ana bulu kigo uvin ahi. Hiche kibulu na got jeh chu Naga peace talk noi a Indian government le Naga galguh bol khat in Manipur gam suhkeh na ding a kihou na anei jeh u ahi akiti. Hiche kibulu na chu Coordination Committee for Manipur Integrity (COCOMI) makei na noi a anakibol ahi.

Meira Paibi ho chu MP pa inn bulu ding a ana kon utoh lhon a inn ana phat masang uva Imphal East Police le central security force ho in ana lamtin u ahi. Police hotoh meira paibi ho in phat sotpi kihou na ana nei jou uvin Meira paibi akon mi 6 lhendoh na ana kinei in MP pa inna ana kilut sah in phone a MP pa toh ana kihou uvin ahi akiti. MP pa chu parliament session umlai ahi toh lhon a Delhi a um ahi. MP pa toh phone a kiihou jou a Nupi Samaj a president Thokchom Ramani in akihou na lhon thu thuso miho ang a ana phongdoh in ahi. Ramani in MP pa ang a Manipur ke nading doudal na anei a BJP lamkai ho in achung a lunglhai lou na  anei le ahung ki resign a inn ahung kile nading in hetsah na kanei e ati in chuleh MP pa in jong asei bang a abol ding dan hetsah na ahin nei in ahi ati.

 

Gamsung a Fast track court 1,023 kisemdoh ding ahi: Law Minister

Patna, Dec 7: Union Law Minister Ravi Shankar Prasad in Saturday nikhon numei chunga khansetna thilsoh ho toh kisai case ho gangtah a seilhah nadinga Centre in gamsung mun chom chom a ‘fast track court 1,023 sem doh dinga tohgon anei ahi, tin aseiyin ahi.

Fast track court hohi state sorkar kithopina a kisemdoh ding ahi, ati. “Ichanu hou leh sopi numei ho chunga thilsoh lhung ho jeh a gamsung lunghang ahi. Judicial system hi mipi lunghanna ahetthem peh a athu gangtah a akisei lhah nathei agon ding ahi. India sorkar in state tosotna a ‘rape’ leh ‘POCSO’ thu ho velha ding fast track court 1,023 semdoh dinga asei ahi”, tin Prasad in aseiyin ahi.

Fast Track court 400 semdoh nadinga nopna kisem ahitan chule 160 val kimangcha pan ahitai”, ati. Hiche chungchon a gamsunga fast track court 704 val um ahi, tin Minister pa in aseiyin ahi. Uttar Pradesh gamsung Unnao thilsoh ho jeh a gamsung lunghanna sangtah lhung ahi. Achesa Friday jan a Unnao thilsoh a vangsetna to nu hi asugim ho ma ma in meiya ahal jou uva hospital a akijenna mun a thi ahi. Chule Telangana gam a veterinary doctor khat pasal phabep in asuhset a atha jeh a gamsung miho lunghanna khohse a ahi.

 

Forest & Environment Minister Shyamkumar in Zoological Garden a Sangai lim vetna ding dokhang kisem hongdoh

Imphal, Dec 7 (ET): Forest and Environment Minister Thounaojam Shyamkumar in Manipur Zoological Garden a Sangai lim kisem chu  Principal Chief Conservator of Forests (PCCF), Wildlife DJN Anand, Gaithaolu Thaimei, Director, Manipur Zoological Garden chule Forest Department natong ho um pet in tunichun ahongdoh tan ahi.

Minister Th. Shyamkumar in Government of India Central Zoo Authority gon bang a Compensatory Afforestation Management and Planning Authority (CAMPA) in atohdoh ahi in tunia pat anomchan in Sangai avet thei ahitai, ati.

Shyamkumar in Sangai neh le chah ngaichat choh nading a Manipur Zoological Garden sum le pai a hin kithopi Sangai Express Group of Publication chung a jong akipana aphondoh ban a ama ho kipeh na hi mitamtah a dia kitil khouna ahiding kinepna ahi e, ati.

Hetding chu hampa tamna square metre 4800 a len Manipur Zoological Garden hi Sangai lhat na mun, gancha vet nading dokhang le gancha jan kichol namun jong um, apang se chu gancha gal vet nathei a kisem ahi.

Manipur Zoological Garden le Government of India Wildlife Institute of India (WII) natong ho panlah jal a Sangai kop ni jong lolhingtah a Langol Sangai Conservation Centre a kon a Manipur Zoological Garden a pohlut a ana um ahi.

Sangai umna chondoh masang a chu Manipur Zoological Garden le WII hetgilna nei hon March 2019 a pat October 2019 sung a niseh tobang a amun kholtohna anei a October 17-18 ni 2 sung lut a ana kipolut a hapta thum sung lut a vetlhahna anei uva hetkhen nading a kholchilna bolsa Sangai ho chu abil a-atpih u ahi. Chule achesa November 6 a Sangai nou peng chu Manipur Zoological Garden dia lolhinna khat ahi in, tuhin Sangai nou peng chu alip in ahatlheh tan ahi.

Thudih a thutanna hi phulahna hilou ding ahi, tia CJI Bobde in ‘Hyderabad encounter’ thu a sei

New Delhi, Dec 7: Telangana Police hon achesa November nisim 27 nikho a veterinary doctor numei khat suse a tha jeh a kiman mi 4 ho kikaptona a akaplih nikhat jouva Chief Justice of India Sharad Arvind Bobde in ‘thudih a thutanna hi phulah a bol louding ahi’, tin aseiyin ahi.

“Gamsunga tu naicha thilsoh hohin malai a kon kinelna ho athah a asodoh sah kit ahi”, tin CJI Bobde in Rajasthan gamsung Jodhpur a ahoulimna a aseiyin ahi. “Ahivanga thudih a thutanna hi phulah a bol louding ahi. Phulahna aum a ahileh thudih a thu kitanna ajeh hi mangding ahi tihi keima tahsan ahi”, ati.

Achesa Friday nikho a Telangana Police hon numei suse a that a kingoh mi 4 ho Chattapally mun a ‘thilso dan’ velvet dinga apui nauva, mi 4 hohin police ho abulu a jamdoh kigo u ahi. Themmona neiya kingoh mi 4 ho police mi 10 in akaplih ahi. Themmona neiya kingoh mi li lah a mi ni in police ho pistol alahpeh a ajamdoh got nau ahi, tia Cyberabad Police Commissioner VC Sajjanar in asei ahi.

Thilsoh nidan phabep jouva state sorkar in thilong hohi December nisim 9 jan nidan 8 chan akoi dinga Telangana High Court in thuhilna anei ahi. Chief Justice office in thilsoh hi ‘extrajudicial killing’ hidinga ngohna umho avettup diuva ngehna akipeh lut jouva High Court in hiche thuhilna anei ahi. Mi 4 hohi veterinary doctor numei khat suse leh that a ngohna kinei ahi’in, numeinu atha jou uva thilong meiya ahal u ahi. Achesa November nisim 29 nikho a police hon mi 4 ho amat ahitai.

 

CAB leh Naga Peace Talk douna a CPI in kiphinna bol

Imphal, Dec 7(ET): Citizenship Amendment Bill (CAB) leh Naga Peace Process in gamsung atohkhah louding ahi, tin CPI Bishnupur District Council member hon Bishnupur Ward no 7 Market Shed a Saturday nikhon toumun kiphinna abol uvin ahi.

Kiphinna a pang hon hiche thu a lekha peh (leaflet) jong Tiddim lamlen juiya vah le ho ahom uvin ahi. Secretary, CPI Bishnupur District Council K Bimol in thuso miho akimupi na’a, North East India gammi, adeh a Manipur gamsung hi Union Hoem Minister in kamcheng a kitepna anei atahsan loudiu ahi, ati.

Centre in gamsung miho hi angol a agel ham, tin K Bimol in thudoh aneiyin chule Bill phatsah ahilou nadinga Left party jousen kipunkhomna aneiya bill adoudal ding ahi, ati. Kiphinna bol hon gamsung, gamgi chule kipunkhomna akisuhboi louna dinga awging a thu asam uvin chule Union Home Minister a dinga mopohna nei DC henga memorandum jong apelut uvin ahi.