Northeast a ni 4 sunga Covid-19 case 100 a kal; case 200...

Northeast a ni 4 sunga Covid-19 case 100 a kal; case 200 val ta

95
0
SHARE

Northeast a ni 4 sunga Covid-19 case 100 a kal; case 200 val ta

Guwahati, May 10: Tripura gam a coronavirus Covid-19 case hetman louva akal in chule Assam gam a natna neiya ol ol a akal cheh cheh jeh a Saturday nikhon North East a covid-19 case 200 aval tan ahi.

Covid-19 case hi 100 a kon 200 aphah nadinga ni li (4) bou lut ahi. Northeast a Covid 19 case masapen hi Manipur gam a achesa March nisim 24 nikho a kisei ahi’in, hiche a kon ni 24 jouva natna neiya gamkaiya 50 lhing a chule ni 18 jou, May nisim 18 ni a natna nei 100 lhing ahi. Sunday jingkah chan a gamkaiya um state 7 a case 212 lhing ahitai.

Tripura gam a natna nei 132 hi a, sangpena hi’in, aban a Assam gam pang a, natna nei 63 um ahi. Hiche a hi Nagaland gam mi khat jong pang ahi’in, Guwahati a test kibol a kijen ahi. Chule Meghalaya gam a case 13 um ahi. Manipur a case ni um a chule Mizoram le Arunachal Pradesh a case khat cheh um ahi. Hiche gam thum a natna neiho abon uva damdoh ahitan chule lhakhat val case athah kisei lou ahi. Nagaland gam a case khatcha kisei loulai ahi.

Tripura gam a achesa April 24 nikho a adamlou mi 2 test abol kit nauva ‘negative’ ahi jouva ‘Covid-19 free status phondohna aneiyu ahitan, ahivanga agam sunga gangtah a natna kal ahi. May nisim 2 nikho a Ambassa a um Border Security Force (BSF) 138th battalion a sepai 2 positive ahi kihedoh a, amani natna akihetdoh nikhat jouva amaho battalion ma ma a mi 12 positive ahi kihetdoh be ahi.

Ni phabep sunga natna nei kal be jing a, BSF personnel chule 138th le 86th battalion a um (ani a Ambassa, Dhalai district a um) personnel le a insung mite natna nei kihetdoh be jing ahi. “Tuni a 86th Battalion, BSF, Ambassa a Covid-19 positive 17 akihedoh kit in, milham (civilian) apang poi, tin Biplab Kumar Deb, Tripura Chief Minister in Saturday jan a aseiyin ahi.

Covid-19 case akal jing chule natna akonna akihetlou jeh a Tripura sorkar in BSF vaipo hon athu akhol diuva asei ahi. Delhi khopi a um National Centre for Disease Control (NCDC) injong case khol ding chule natna thejal ho man dinga team asol peh diuva ngehna jong aneiyu ahi.

Alangkhat a, Assam gam a jong gamdang dang tangden agam mi ho akile nading uva gamgi ahon utoh kilhon a covid-19 case akal cheh cheh in ahi. Mumbai a kon ambulance a hung kile a Jorhat a cheng numei ni chule gari driver khat Sars-Cov-2 natna nei ahi akihedoh in, hiche toh kilhon a Saturday chan a agamsung a natna neiya case 63 lhing ahitai.

Assam Health Minister Himanta Biswa Sarma in, numei teni hin cancer natna nei khat ahin puile ahi, ati. Ambulance driver pa ipijeh a gamsung adalhah ding kiphal ham, ti thudohna hi tua kisei ahi. “Driver pa Mumbai jon a kile ahitan, symptom aneilou jeh a akile ding kiphal ahi. Ngehna akinei toh kilhon a Bihar a alamtin/akham u ahi”, tin Sarma in Sunday jingkah a aseiyin ahi. Sunday jingkah chan a Assam gam a natna jeh a mi 2 thi a chule mi 34 damdoh ahitai. Covid-19 natna neiya mi 27 hi hospital chom chom a kijen nalai ahi.

Ni 19 jou, Saturday nikhon Meghalaya gam a jong positive case khat hetdoh be ahi’in, hiche toh kilhon a agamsunga natna neiya case 13 lhing ahitai. Natna jeh a Meghalaya gam a mikhat thi a chule midang 10 damdoh ahitan chule mi 2 hi kijen jing nalai ahi. Case ho jouse hi agamsunga case kisei masapen Shillong a kon doctor khat toh kisai soh kei ahi. Doctor pa hi achesa April nisim 15 nikho a thi ahitai.

“Vangset umtah in Shillong a positive case khat aumbe e. Amahi natna nei masapen pa insung a natong ahi”, tin Conrad Sangma, Meghalaya Chief Minister in Saturday nikhon aseiyin ahi. “Kivenna dinga Health department in anat kihedoh masapen pa toh kimuto jouse avel a test abol kit ahi’in, hiche a hi case athah kihetdoh be ahi. Covid-19 case thah pen anei kihedoh mikhat hi ‘symptoms’ umlou ahi”, tin aseibe in ahi.

Northeast state 5 a Covid-19 natna nei aumlou, sorkar in gamkai miho umchan phat jeh ahi tia pachatna nei

Guwahati, May 10: Gamsung pumpi coronavirus natna gangtah a achal jeh a aboi den tan, natna jeh a mi 2,000 val thi a chule mi 62,000 val dammo ahitai.

Ahivanga Northeast gam 5 a Covid-19 natna neiya khatcha umlou ahi’in, natna aumlou na gam hohi Manipur, Sikkim, Nagaland, Arunachal Pradesh le Mizoram gam ahi. Mizoram gam a Covid-19 natna abei hi mipi in umchan pha/dan ajui jeh ahi, tin Chief Minister Zoramthanga in Sunday nikhon aseiyin ahi.

“Mizoram hi disciplined juitah gam ahi. Houbung, NGO le administration kithopina a tuchan geiya natna a kon kisohcha ahi’in, maban a jong hitia hi kibol jom ding ahi”, ati. Ahivanga gamsung a corona natna polut thei atam thu hetpehna jong aneiyin, Myanmar le agamsung gamgi 510 km kikop a chule Bangladesh toh gamgi 318 km kikop ahi, ati.

“Hiche hi eiho dinga boina lentah ahi, ajeh chu Myanmar le Bangladesh gam a kon gamgi akihon jeh a mi hunglut thei ahi”, ati. Bangladesh gam a coronavirus case 13,134 kiseiya chule Myanmar gam a case 177 um ahi. Union Minister Jitendra Singh in Saturday nikho a Northeast gam pumpi hi coronavirus natna chungchang a vetjui thei (model) ahi’in, gamdang hon athilbol ajui thei ahi, tia asei ahi.

Sikkim, Arunachal Pradesh, Mizoram, Manipur, Meghalaya, Nagaland, Tripura le Assam gam in Lockdown guideline ho phatah a ajuiyu ahi, ati. “Chondan le hindan a Northeast gamkai hi khangtou chule ‘discipline’ neitah ahi. Hiche jeh a guidelines hi hahsa louva ajui theiyu ahi’in, Lockdown kichepina a aboina umlou ahi”, tin Singh in aseibe in ahi.

Northeast a gam state 8 lah a 5 a hi natna bei ahitan chule Sikkim gam a hi tuchan a covid-19 case khatcha kisei loulai ahi. India gam a Covid 19 case Sunday nikho chan a 62,939 lhing ahitai, tin Union Health Ministry in aseiyin ahi.

Home Dept  in train a state sung hung lhung hochung a SOP sona nei; gamsung hunglhung ho district quarantine centre ho akon ni 14 sunga pohdoh phal hilouding

Imphal, May 10(ET): State Home Department in gampam akon train a state sung hung lhung ho ading in Standard Operating Procedure (SOP) sodoh na ana nei uvin ahi. Hiche sodoh na chu che le vale chuleh vetlhah naho phate a chelhah na ding a ana bol u ahi.  SOP dungjui a ahung lut jouse in Manipur government portal www.tengbang.in a amin u register akibol soh kei ding u, chuleh tu le tua aum na mun ho u jong akijih lut soh kei ding u ahi akiti.

Ministry ho railway in thupeh ana nei toh lhon a state govt in mi train a touding jat toh kito na mun ho a mi ho ahin pohdoh masat pen ding u ahi.  Ahung kipat na gam ho uva konna phate a vetlhah na kinei ding dan jong hetsah na ana kinei in ahi. Ahung ding ho hi vetlhah nakinei ding, ginmo ahi lou le dammo nanei ho train a kilutsah louding ahi akiti.

Hiche ahung ding ho list chu tengbang website a hung kiso ding ahidan jong hetsah na ahung kinei ina hi. Govt akon thupeh kimu dungjui in train sung a neh le chah ahi lou le don ding twi ho kipe ding hijongle passenger ho in amaho cham a ahin kipohding u aphat johding dan jong hetsah na ana nei uvin ahi. Hiche train ho chu kikham talou a Jiribam chan a kinga lou a hung lhai ding ahi akiti.

Train akon ahung kum teng ule passenger ho chu token kipe ding bus seat no, cheh toh kipe ding ahiuve akiti. Hiche bus ho achu atou ding ho district dungjui a kipo ding chuleh ama ama district a jang pet a kipolut ding ahi akiti. Hiche ahung kipolut ho chu Jiribam ahi lou le quarantine centre ho a ni 14 sung aum jou tokah a koima in aga pohdoh thei louding, apodoh aum le daan dungjui a gotna kipe ding ahi akiti.

GMC leh Borooah Cancer Institute vil kha hon report abol ngai; Test kibol 231 result negative hi, mi 1134 quarantine a um

Imphal, May 10(UNA): COVID-19 Common Control Room, Government of Manipur in thuso abolna achun Guwahati Medical College leh Dr. Borooah Cancer Institute Guwahati, mun gapha kha jouse Covid-19 Common Control Room a akintheipen a akihetsah diuvin asei in ahi. May 7 nichun Guwahati Medical College a postgraduate medical simlai khat chule Dr. B Borooah Cancer hospital a staff khat inko ho covid-19 vei ahidan amudoh utoh lhon a hiche teni hospital tuni apat sim a ni 21 masang a gaphakha jouse avaimathei pen a control room 1800-345-3818 a kihetsah ding a thuphon abol ahi. Manipur gamsung a covid-19 vei mi 2 akijendam toh lhon in tuni chan in case thah akimudoh naipon hinlah sample 231 chu JNIMS leh RIMS hospital a VRDL laboraties ah kholchilna neiding in apolut uvin ahi.

Thulhut in aseina achun tuni chun mi 231 RIMS a sample 109 chule JNIMS ah sample 122 test akibol in result jouse chu negative ahi in tuni chan in sample 1096 test akibol tan koima RIMS leh JNIMS a isolation ward ah aki koinai pon ahi. Tuni chun Mao leh Jiribam gate a gamdang akon Manipur gamsung hunglut mi 1281 ho screening akibol in ahi. Tuhin manipur gamsung ah government quarantine centre mun chom chom a mi 1134 aum uvin tuni chun mi 525 akikoibe in ahi. Government quarantine a um mi 2018 holah a mi 884 hon aphat achai tauvin Home quarantine bolho lah ah mi 486 hon jong aphat achai tauvin ahi.

Covid-19 control room in tuni chan in call 342 amu tauvin, Manipur gamsung a adammo teni jong adamdoh tah jeh uh tuhin green zone in aum in state government in jong nidang sang in tuhin lockdown jong alha ol dom tan ahi.

Kum 20 jouva Molcham Police station kithah hondoh

Imphal, May 10(ET): Chandel district Myanmar border kom Molcham kho a Police Station tunin athah in hondoh ahikit tan ahi. Hiche Molcham kho a Police Station tuni kihongdoh hi kum 20 jouva athah a kihongdoh kit ahi.

Hiche tohkilhon chun Molcham OC pan khosung mite toh kihoukhomna leh Fair price shop hondohna aneiyin chule mask jong mipi ho ana hoppeh in ahi.

Hill Tribal Tenant Committee hon government heng a in bahara ho nungsah ding a ngehna nei

Imphal, May 10(ET): Tuni a Dewlahland a Hill Tribal Tenants’ Committee Imphal (HTTCI) hon meeting anei nauva asei nauva chun Imphal khopi sung a thinglhang mi in bahara a umho lockdown sung a bahara apeh uh state government in anungsah ding in asei uvin chule hiche hi nahsah a anei lou ule Public Interest Litigation (PIL) file kibol ding ahi tin asei un ahi. Lockdown jeh in niseh a kilo kom hom natohna ding amulou jeh un sumle pai jong anei pouvin hinlah inneiten bahara alathou uvin gentheina nasatah atoh jing thu HTTCI convener R Ashing in asei in ahi. April lha achun Committee hon CM heng ah memorandum anape uvin in bahara a umho dinmun gelkhoh peh ding in ana hetsah uvin ahi. Imphal East leh West sung a thinglhang mi 5,552 tobang inbahara umho kithopi ding in ana hetsah un ahi.

Covid-19 douna ding a govt. in pan alahjing lai toh lhon in in bahara umhon sum apeh loule inmun dalha ding in mun konkhat a innei hon aseipeh kit uh meilah a thautui kisunbe tobang ahidan thulhut chun asei in tamtah in hahsatna atoh tauvin state govt. akon panpina tailou kinepna dang neilou jong tamtah aum tauvin ahi. Chule govt. in PDS anachang ahop houjong achanglou tamtah aum in akinthei pen a Imphal East leh West sung a thinglhang mi in bahara a umho gentheina govt. in ngaisah ding in HTTCI in asei in ahi.

Ima Keithel kisemphatna ho CM in vilna nei, Nute nikho toh kilhon a lemna thu sei

Imphal, May 10 (ET): Tuni chun Chief Minister N Biren Singh in Ima Keithel a asie laiho kisemphatna natoh chelha jinglai vilna anei in aseina achun tuni Nuni ahitoh lhon in nute manluldan geldoh thahkit a amauho akon vangbohna kithum a chantei gotding ahi ati.

Yaiskhul AC a MLA Th. Satyabrata, Principal Secretary (MAHUD) Rakesh Ranjan, Municipal Commissioner leh Imphal Municipal Corporation (IMC) a official hon CM pa ajui uvin ahi. Thangal Keithel, Paona Keithel, Khwairamband area chule Keishampat apat Khuyathong chan traffic anoh jingthu a CM in aseina achun lampi pam a dukan bol hon a gari hou lampam a angahden uhi kiphal talouding ahi in a insungmi hon ahun thah tho uva hiche kisei na lampi dung a koiman gari park denlou ding in asei in Thangal leh Paona area a cheng gari park nading mun neilou hon IMC hon agonpeh ding un asei in ahi.

Naga Nullah chung a dan in a phallou dukan leh in neu chacha kisaho jong IMC leh police kitho a asuhset uh ahithu jong asei in ahi chule lockdown phat lemchang a la in IMC in Ima keithel hi April 22 apat chu asetna ho asemphat pat uh ahitai ati.

State Congress in Bihar gam mi ho akile nadiu train gon peh ding nopna nei

Imphal, May 10: Chief minister anahi le Congress lamkai Okram Ibobi Singh in Saturday nikho a gamsung mun chom chom a tangden Bihar gam mi natong a hung (labourer/migrant) ho agam uva akile nadiu gon peh dinga Prime Minister Narendra Modi henga thumna anei uvin ahi.

Covid-19 Lockdown sunga atang den gamdang mi natong dinga hung ho kithopina dinga Congress in pan alahna ahi. Railway Minister Piyush Goyal henga jong hitobang lekhathot anapeh u ahi’in, labourer hon agam u ajot thei nading uva ‘special train’ apeh diuva phatsahna athum u ahi.

Congress Legislature Party (CLP) lamkai in ‘migrant worker’ le labourer, atamjo Bihar gam mi ho Covid-19 Lockdown jeh a gamsung a tang den uva chule agam a akile nom u thu aseiyu ahi, tin aseibe uvin ahi. CLP in Imphal khopi a um Ibobi Singh chenna inmun a meeting abol nauva Jiribam railway station a kon Patna, Bihar gam chan amaho kipui nading ‘special train’ gon peh dinga kilolna aneiyu ahi.

Gamsung mun chom chom a um gamdang mi natong ho ding gelkhohna ahi, tin Ibobi Singh in aseiyin chule PM Modi in amaho dinga aganna thei pen a ‘special train’ gonpeh dinga phalna athum u asan peh diu CLP in aginchat na thu jong asei uvin ahi. Hiche dungjuiya, atangden gamdang miho agam uva kipui theiding ahi, ati.

Chief Minister Biren Singh injong train aphal peh diuva thumna anei chungchang u atosot ding Ibobi in akinepna thu aseiyin ahi. Tu masanga Opposition party hon Lockdown sunga train a in kile gamsung miho ticket man (kholjinna man) pohdoh dinga thuphon aneiyu ahi. Alangkhat a, state sorkar in Sunday nikho a Chennai a tangden gamsung mi 1,200 train a ahin puiyu ahitan, gamdang dang a agam mi tangden ho train a nungpuiya Northeast gam masapen jong hi ahi.

 

Jiribam a hunglhung ding gamdang a tangden gamsung mi 1,200 ho hunglhun masanga police hon kivenna natoh umho vetlhahna neiyu

Imphal, May 10: Jiribam police team hon Chennai chule India mun dang dang a kon Manipur gam mi ahung kile ho ahung lhun masang uva kigotna umho velvetna anei uvin ahi.

Train lam a gamsung mi 1,000 val in gamsung ahin jot ahi’in, May 12 teng Jiribam ahung lhun diu tahsan ahi. Amaho hi Jiribam a kon Imphal chan hin poh nadinga Monday nikho teng bus 50 asol doh diu ahi, tin official thulhut in aseiyin ahi. PHD, PHED, Healthcare department, electricity department le adang dang a official hon kigotna aneiyu police team hon vetlhahna aneiyu ahi.

Superintendent of Police, Jiribam, M Mubi lamkaina police inspection team hon Jiribam Higher Secondary lentol panna a mun dang dang jong vetlhahna anei uvin ahi. “Chennai le Bengaluru a tangden gamsung mi 1,200 railway station hung lhung diu ahi. Amaho lah a hi simlai, mi gam a natong chule dammo jeh a kijen a che hojong pang ahi”, tin Mubi in thuso miho henga aseiyin ahi.

Ahung kalsong doh hon station alhun teng akhut asop uva chule hand sanitizer aman diuvin SP in temna aneiyin chule akikoi dustbin a aphalou chule neh kichunna ho apai uva, mipi umna a chil aset lou diuvin jong temna aneiyin ahi. Kholjin hon government guidelines ajui diuvin thuhilna aneibe in ahi.

Alangkhat a, Transporters and Drivers’ Council (TDC) in Monday nikho teng Chennai a kon ahin puilhung diu gamsung miho Jiribam a kon Imphal khopi chan apoh nadinga bus 50 asoldoh diu ahi, tin TDC president H Ranjit in aseiyin ahi. Phase 1 noiya Chief minister phatsahna a bus 50 kitol ding ahi’in, Jiribam a kon Imphal chan gari bahara hi sorkar in agot jat (rate) dungjuiya kila ding ahi, tin Ranjit in aseiyin ahi.

Driver chule assistant hon sorkar in Covid-19 nat venna dinga asodoh guidelines ho ajui diuvin temna aneiyin chule Chennai a kon gamsung hin jon ho Jiribam alhun teng ule driver le assistang ho mangcha a TDC in don ding twi le nehthei apeh ding ahi, ati.

Atangden gamsung miho puidoh nadinga train ni jong kigon be ahi. Achesa Friday nikho a CM Biren in gamsung mi atangden 1,200 puidoh dinga asei ahi’in, Chief Minister in ‘audio statement’ apehna a hetman louva Lockdown kikoi jeh a tangden ho puidoh nadinga sorkar in Jiribam hi ‘train lhunna ding mun a khohsahna anei ahi.

Atangden gamsung miho puidoh nadinga train ni jong kigon be ding ahi, tia Biren in anasei ahi. Khat hi May nisim 12 nikho teng Punjab a kon hung kipan doh ding chule khat hi May nisim 14 teng Bengaluru a kon hung kipan doh ahi. Saturday nikho a jong Chief Minister in gamsung hung kile ding hon www.tengbang.in a register abol diuva avel a temna anei kit ahi.