Northeast a dinga COVID-19 case masapen Manipur gam a kimudoh; adamlou nu...

Northeast a dinga COVID-19 case masapen Manipur gam a kimudoh; adamlou nu toh kitohkha jousen Health Director henga report abol diuva thuhilna um

226
0
SHARE

Northeast a dinga COVID-19 case masapen Manipur gam a kimudoh; adamlou nu toh kitohkha jousen Health Director henga report abol diuva thuhilna um

Imphal, Mar 24(ET): Manipur gam a Tuesday nikhon COVID-19 case masapen report akibol tan, kum 23 a upa numei khat coronavirus test akibol na a ‘positive’ ahi toh kilhon a, Manipur gam a bou hilouva Northeast India a dinga hiche case kisei masapen jong ahi.

Thulhut dungjuiya, numeinu hi Imphal West district noiya um Thangmeiband Lourung Purel Leikai a cheng ahi’in, March nisim 19 nikho a Air India lenna a London a kon New Delhi hung lhung a chule Manipur gam March nisim 21 nikho a hunglhung ahi.

“UK (England) gam a kon hung kile a Meilhei numei kum 23 a upa khat tuni (March 24) nikhon COVID-19 positive ahitai”, tin state Health Director K Rajo Singh in aseiyin ahi. Numeinu hi tua Jawaharlal Nehru Institute of Medical Sciences (JNIMS) Isolation ward, Porompat, Imphal East a kijen ahi.

JNIMS a ‘serological test’ abol nauva ‘positive’ hi ahi’in, ahivanga thulhut dungjuiya thisan (sample) hi ‘nucleic acid test’ bol dinga National Institute of Virology (NIV) Pune a athot tauvin ahi. Numeinu hi Bristol University, United Kingdom a simlai ahi’in, March nisim 19 nikho a Delhi le Kolkata khopi lhung ahi.

Numeinu sopipa hi Atlanta, United States gam a kon hung kile a March nisim 21 nikho a numeinu (sopinu) toh Manipur ahin jot masanga hotel a umlhon ahi. Thulhut dungjuiya asopipa hi virus test abol nauva ‘negative’ hi ahi. Numeinu hi tisat (temperature asan) jeh a March 23 nikho a JNIMS a apohlut u ahi.

JNIMS medical record dungjuiya, numeinu hin Sunday nikho a institute a adamlou thu asei ahi’in, Monday jingkah nidan 11.10 a sample alah uva, ‘minute 20’ jouva VRDL a apehlut u ahi. Anatna photchen ahi jou jouva numeinu insung mite jong achom a (isolation) akoi tauvin ahi. Amani hi Kolkata a kon Imphal (via Agartala) Air Asia lenna a hunglhon ahi.

Numei nu toh kimuto/kitong kha ho hetdoh ding athupi dan Director of Health Services, Manipur in aseiyin chule koi tobang akisei numei nu toh kitoh kha a (contact) hon 9402880191, 2411668, 18003453818 a hetsahna anei diuvin thuhilna anei uvin ahi. Chule numei toh kitoh kha ho acham uva ‘isolation’ (midang toh kinai louva achombeh a) aum uva chule thuhilna anga diuvin jong hilna aneibe uvin ahi.

Alangkhat a COVID-19 natna chungchanga gamsung dinmun akikhel tah toh kilhon a JNIMS in tua kon order asodoh kit kahse a dinga OPD akhah tai, tin Prof. T Rajen, Medical Superintendent, JNIMS Hospital, Porompat in aseiyin ahi.

Manipur gamsung hi March nisim 23 nikho a kon kikhah soh (total lockdown) a um ahitan, natna a kon kivenna dinga March nisim 31 chan kikhah ding ahi. Hiche tilou sorkar in nat douna dinga tohgon chom chom jong achepi ahi.

Hetthei khat chu COVID-19 case hi India gam a agom a 519 lhing a chule natna jeh a thi 9 lhing ahitai. Ministry of Health and Family Welfare in damlou mi 37 akijen dam in, hospital a kon discharged ahitai, tia photchenna anei ahi. Indian Council of Medical Research, ICMR in India gam a tuchan geiya sample 19,817 test kibol ahitai.

Air Asia Flight No. i5-501 a tou hon Home Department akijahmat pi loi diuva thuhilna um; thuhilna juilou ho dan dungjuiya got peh dinga seiyu

Imphal, Mar 24(UNA): Achesa March nisim 21 nikho a Air Asia Flight No i5-501 a hung passenger khat COVID-19 test akibolna a ‘positive’ ahi jouva State Home Department in hiche lenna a tou passenger jousen apet pet a Phone no. 0385-2411668 a state health directorate akijahto pi diuvin thuhilna aneiyin ahi.

March nisim 25 jingkah nidan 8 masanga report abol diuva sorkar in thupeh anei ahi’in, ngaichat ahile medical examination bol ding chule ‘quarantined’ bol dinga tohgon aseiyu ahi. Special Secretary (Home), Manipur Government H Gyanprakash in Tuesday nikho a order asodoh na a, passenger koitobang amacham a kiphong lou chule ‘medical examined’ kibol louva aumle Indian Penal Code section 269 leh 270 noiya action kilah khum ding ahi, ati.

Chassad khopi thuleh COVID-19 thu’a KIM in nam mite hetdia thuphon nei

Imphal, Mar 24(ET): Tuni Kuki Inpi Manipur General Secretary, Shokholun Mate min a kimu thuphon in aseina ah achesa 16th March 2020 nikho a Kuki Inpi Manipur Emergency meetinga Chassad khopi thah sahdoh kit nadinga thulhuhna ana kisem dung jui in Kuki Inpi Manipur leh abahkai hon lung le tha thon pan akila jingin chule emergency meeting thulhuhna dungjui in Chassad kho mite kithopi nadinga thilpe ho (relief materials) jouse vetup dingin  KKL leh KSO mopohna akipen ahi ati.

Thuphon in aseibe na ah district le Block Kuki Inpi lamkai ho khutna sum’a  hihen thil le lo hijong leh kithopina pe jousen Inpi ho khutna receipt akilah cheh ding in aseiyin sum hihenlang thil le lo hijong leh district Inpi leh block inpi hon amaho gamkai cheh a donation abol uva hiche hochu abona relief centre a ahin thah lut cheh diuvin jong thuphon chun aseiyin chuleh Relief centre tu leh tuchanin KSO Imphal ho mopohna a KBC office Deulahlane a akihongin, KKL ho mopohna in Ccpur KIC complex ah akihongin leh EKCA ho mopohnan Chassad village toh akihonge ati.

Kuki Inpi leh CSOs  hon state govt toh Chassad khopi thah tundoh kit nadinga tohvai kihopna ho akigontup jing laitah ahin gangtah a natoh patdingin kigonna achelha jing in Chassad thah sahdoh kit nadinga koitobang kithopina penom jousen chang valla hihen kiloi khomna mina hijongleh KKL, Block Inpi, District Inpi ahilou leh relief centre kihonna mun ho a pehlut thei hiding ahi. Chule munchom, gamchom’a pat sum le paiya kithopina penom hon KKL account (Kuki Khanglai lawmpi (GHQ) A/c No. 35122102631, IFSC Code : SBIN0015027, MICR : 79500250) mangcha a ahinthot thei ahi jong ahi.

Chassad kho a themjilna umsun Lhingkim Memorial Academy School thah semphat ding leh simlai hon aphatcha themjilna apat kitthei nadiu leh Govt. side akon ijakai hinboipi din KSO GHQ ngense na akipeh dungjuija angaicha jouse KSO hon agangthei channa ahin suhbulhit uva school ahin semphat kit ding uvin  Jong ngenna akineiye ati.

Kiloikhomna hihen changval hijong leh thilpeh neiho jouse khonung leh vet thei dinga record hoitah maintain akibol in ahi. Muntin’a um Nam mite jousen lungkhat tha khatna pan ilah khom uva Chassad Khopi ithah tundoh kit thei nading uvin ijothei lam cheh uva pan lakhom’a ilamkai hou kithopi cheh  dingin Kuki Inpi Manipur in temna ahung kineiye tin aseiben ahi.

Ichen nao gamsung le vannoi hotling kichat umtah Coronavirus ilah u ahunglhun toh kilhon in Kuki Inpi Manipur in bolding tohding gontohsa (scheduled program) jouse March 31st, 2020 chan a din vohhai ahi tai ati. Hijeh chun nam mipite jousen Govt thupeh nitcheh a eima cheh kivengtup din temna ahung kineijin chule insung, khosung ahilou le gamkai levella koiman meeting le kikhopna neilouding insungmi, heng le kom koitobang corona natna veidia ginmo jouse CSOs hole govt toh kihetto a jentup loina neidin jong ikihetsah uve ati. Hijeh chun, mipi moh lungling lao louvin kiventup na phatah ineijuva chule neh le chah, dammo, hahsatna neijousen khosung lamkai le gamkai lamkai hotoh kitho khom dingin Kuki Inpi in thulhang sapna ahung kineije ati.

 

India gamsung a Covid-19 natna nei mi 556 leh thina toh mi 10 phata

New Delhi, Mar 24: Ministry of Health and Family welfare thuso in aseina achun tuni chan in India gamsung a Covid-19 neikha mi 556 aphatan thinatoh mi 10 chule mi 37 in damna akimu tauve ati. Indian Council of Medical Research, ICMR in thuso abolna achun ginmo kai mi singni val sample test akibol doh tai ati. ICMR in aseibena achun natna vei apunbe louna ding a kivenna phapen chu aveilou ho vahle louva insung a um het het ding, chule ginmo kaiho munchom a kituptah akoidoh ding gampang akon hunglut ho phatecha a screening bol a quarintined bolding ahi ati.

PM Modi in Covid-19 douna ding a ni 21 sung India gamsung total Lockdown ding a phongdoh

New Delhi, Mar 24: Tujan a PM Modi in gamsung mipi ho hetding a thuphon abolna achun tulai tah a kisei gimnei Covid-19 douna ding leh chain suhtan nading a tujan apat ni 21 sung India gamsung pumpi Total Shutdown ding in aphong in aseina achun koima chan inmai potding jong ngaito louva insung a kikhum chah kheh a hiche natna hi i umna cheh uva idou ding uh ahi ati. NI 21 hi sottah ahi vang a damna ding ahipoule pan ilah cheh diu ahi ati.

India gamsung ahi hiche natna vei mi 490 aval tan chule leiset chung ah avei mi 3,34,000 avalkit tai ati. Mikhat mitmo jeh a mitampin aveithei natna ahijeh in akoi mama kichih thei a aching athem hon kiven ding dan aseiho juisoh kei ding in temna anei in ahi.

Lockdown phondoh ahitoh lhon in Ministry of Home Affairs in thuphon abolna achun Defence, Central Amred police force, Treasury, Public in amanchah Petroleum, CNG, LPG, PNG, Disaster Management, Power generation, post offices, National Informatics centre ho kikhah louding chule lou le ai toh kisai ho jong angei bang a kihong ding ahi ati.

Gamsung mun chom chom lock down kibol mipi ten phatah’a nit; Vengsung mun chom chom’a vengpam mi koima lut thei nalou ding’a lamlen ting

B.Lalboi Gangte

CCpur, March 24 (ET): India gamsung’a CoronaVirus (COVID-19) natna hit hin mihem khat-le-khat kilason thei natna ahitoh lhon’a Manipur gamsung’a COVID -19 natna nei mi aum’e tia social media dung’a hetna kichet tah um louva athen thang jeh hin District chom chom akon mipite anasu linglao lheh jeng in ahi tin thulhut chun seiyin ahi. Chuleh COVID-19 natna chung”a thu jat chom chom tahdoh leh phongjel ahi jing toh lhon in March nisim 22 nikho’a “Janta  Curfew” gamsung pumpi ah phondoh ahi nachung’a Churachandpur khopi sung leh akimvel’a mipite hiche nat akon akidalse thei nading uvin District Administration thupeh dungjui in ahung lhung ding March nisim 31, 2020 nikho chan CCpur District Magistrate in  IPC Section 144 Cr.PC. aphongdoh tan ahi. Tuni jingkah nidan 8:00 akipat chun CCpur District Police hon che leh vah le mipi gari tol’a kin le-dong’a cheho jouse ama ama inn cheh’a umsah cheh nading in pan nasatah anala uvin ahi. Chuleh jingkah nidan 7:00 vel chun ATM booth akon sum ladoh ding ho jong feet 5 ah kigamlha in akigol sah uvin ahi.

Hiche toh lhon’a Coronavirus natna hi kilason thei ahi jeh in hiche akon kivendoh thei nading in CCpur District sung Bijang kho leh Sielmat kho miten akhosung cheh lutna lamlen ana khah tan uvin ahi. Hiche lamlhah na akikha lona ajeh hi Teddim Road akipat gari len thingpo leh thil chom chom hin po Forest Tax pe ding hon Tuibong Forest Check Post ah Tax peh nom lou jeh’a Forest Check Post peldoh nading’a Bijang khosung lamlhah na’a aman jeh leh khosung miho CoronaVirus natna hit akon kivendoh thei nading’a gampam miho alutsah nom lou ahi. CCpur District sung’a Corona virus natna hit doudal nading’a District Administration in asemdoh CCpur District Surveillance Committee hon Teddim lamsah’a um Bijang area sung’a Quarantine Centre ding in Circuit House manchah ahi naban’a che le-vah le ho ding’a kivendoh thei ding tupna’a lamlen anakha tan’u ahi.

Alangkhat’a Sielmat Kho miten Bijang kho akipat Sielmat Kho jotlut nalamlen akha nao ajeh hi CCpur District Magistrate in IPC Section 144 Cr.PC. aphondoh naban’a CCpur District sung Lock Down kibol jeh’a NH-150 Teddim Road a cheleh vah le ho kham ahi. Chuleh gari lhai ho jouse District Police in akham nachung’a NH-150 lamle peldoh’a Bijang akipat Sielmat hinjot pa’a Khopi sung lhai lut gari leh mipi ho kham na ding’a gate asem uvin ahin thukhoh leh dammo veiset na jeh’a Hospital jon ding ho lut nathei ding gate anasem uvin ahi.

Ccpur District sung’a emergency call jouse Sangremsiama, BO Hq DC office; Jangminlien Lupho, SDC SDO Ccpur leh Sarath Chandra, SDC SDO Tuibong in recieve abol ding hiche na ding’a Mobile no. 9366-536-861/9774-689-840 ahilou leh 9862-166-421 ho’a akithu jah matpi thei ding ahi. Pherzawl District  ding’a emergency call jouse S. Thienlaljoy Gangte ADC/Pherzawl; Dr. Phirthanglien Buhril, CMO/Pherzawl leh Dr. Ramneithieng, MO/CMO Pool, Pherzawl & Nodal Officer hon a recieve ding ahi. Hiche nading’a Mobile no. 8732-066-037/9862-102-529, 9402-285-026 ho ah kithu jah matpi thei ahi.

 

DSC, CCpur in COVID-19 toh kisai’a mipi hetding’a thuphon nei

B.Lalboi Gangte

Ccpur, March 24 (ET): District Surveillance Committee (DSC) Churachandpur in tuni nilhah lang nidan 3:30 in CMO Office Chamber mun’a CCpur District sung’a COVID-19 natna toh kisai in CCpur District mipi het ding’a poimo ho thuso miho heng’a tahlang na ananei in ahi.

Hiche achun Dr. Vumchinpau Tonsing, CMO, Member Secretary lamkai nan Committee a member jouse in Coronavirus thutoh kimat in thusei na phat ape in chuleh dotnom neiho ding in jong phat anape in ahi. Dr. Ngahneikim Haokip, District Surveillance Officer, IDSP in houlimna aneina’a tule tu’a CCpur District sung’a Coronavirus natna ginmo jeh’a vetkol’a um Home Quarantine ah mi 35 aum in ahi. Amaho hi ni 14 sung room a atum ma um ding nikho 14 sung’a COVID-19 symptom kilang aum lou leh natna veilou’a kikoi ding ahi. Churachandpur District sung’a Quarantine Centre ding’a kilhengdoh Circuit House, Bijang mun’a tuhin mi 2 akikoi in, Isolation Centre Second Floor ah mi 1 ahi ati. Chuleh social media dung’a hetchet na ima umlouva thukisei ho tahsan lou ding chuleh State Health apat thu kichet aum masang se’a koiman thulamleng atahsan lou ding in aseiyin ahi.

Hiche toh lhon’a Thangboi Gangte in houlimna aneina’a CCpur District sung Shutdown phon ahitoh lhon’a niseh’a nehding kihol thu ho District Administration in akihet peh jeh in NFSA ann chang April lha quota ding jong akinthei lang’a hopdoh ding in District Administration in pan kila ding ahi ati. CCpur District Administration lam apat panlah na umho mipi te jong nasatah’a atosot cheh ding uvin ngehna jong aneiyin ahi.

Coronavirus nat douna dinga sorkar toh pan lahkhom dinga ZRO in thuso nei

Imphal, Mar 24(ET): Coronavirus natna akhohset toh kilhon a Zoland in apet pet a ngaicha thil ho bol ding chule mipin curfew kikoi ajui dinga thuso anei uvin ahi.

TK Mang, Joint Secretary, I&PR, ZRO in thuso aneina a, India pumpi a Janata Curfew kikoi ahi’in, mipi hon amaho damthei ding gelna a curfew ajui cheh diuvin thuhilna anei uvin ahi. Corona Virus nat douna chule kivenna dinga Zomi Re-unification Organisation (ZRO) in sorkar toh pan alahkhom ding ahi, ati.

Hetthei khat chu natna hin koima akhen lou ahi’in, chule natna jeh a koima themmo chan thei ahipoi. Ibon uva ‘victim’ ihiuvin, ibon uva natna leiset a kon suhmang nadinga pan lahkhom ding ahi, ati. Camp chom chom a um ZRA thingnoi ho camp a aum tup diu chule thuso aumkit kahse a pamlang mi hihen lang ZRO toson hijong le koima camp a che theilou dinga jong thuso anei uvin ahi.

ZRA thingnoi hon aum nau chan a ‘mask’ akibol uva chule pamlang mi toh alhat khom lou diuvin jong thuhilna aneibe uvin ahi. India sorkar in natna venna dinga pan alahna jong ZRO in akipapi na thu asei uvin ahi.

Chassad a LM school sah phat nadinga TSA in mopohna la

Imphal, Mar 24(ET): Achesa March nisim 16 nikho a Kamjong le Sampui kho mi hon ahal lhah Chassad khosung TSA hon kithopina anei uvin, school thahsem nadinga kithopina anei uvin ahi.

Paogunlun Chongloi, Deputy Secretary, Thadou Students’ Association (TSA) in thuso anei dungjuiya, achesa March nisim 17 nikho a kon TSA team ho Chassad kho a um uva chule dinmun vettohna aneiyu ahi. Chassad Village Authority, Managing Board, LM Academy, Chassad chule Eastern Kuki Chief Association (EKCA) in Chassad kho a private school- LM Academy sah phat nadinga TSA ho mopohna apeh ahi.

Authority hon angaichat banga TSA in ngehna asan peh a chule Chassad kho a um school khatseh – Lhingkim Memorial (LM) Academy sah phat kit nadinga mopohna kipe ho alah u ahitai. LM Academy school meiya akihal pet a hi simlai 350 tobang um ahi. School hi Chassad kho a cheng nu le pa tamtah dinga kinepna ahi’in, Kamjong district a school holah a kineppi um khat ahi.

Mopohna akilah utoh kilhon a Chassad kho, Kamjong district a simlai ho ding gelna a LM Academy sah phat kit nadinga mipin sum hihen lang thil hijongle kithopina peh thei chan a apeh diuvin TSA in temna le ngehna anei uvin chule kithopina pe nom hon mobile no. 7005443525 a akijahmat pi theiyu ahi, tin hetsahna jong aneibe uvin ahi.

 

Kangpokpi police hon Kpi district a CrPC 144 khoutah a chepi

Kangpokpi, Mar 24(UNA): Kangpokpi DHQ a Kangpokpi police hon CrPC 144 akoi uvin, chule ‘lockdown’ phondohna anei tauvin ahi.

Government in order asodoh jui louva mi 12 lamlen a kon police hon aman uvin, police station a apui uvin, chomkhat jouva PR Bond soi akai uva, gihna khoutah anei jou uva alhadoh tauvin ahi. OC Kangpokpi, Kangpokpi police in asei dungjuiya ‘lockdown’ hi khoutah a kijui ding chule SP Kangpokpi lamkaina le Addl. SP Kangpokpi tosotna a CrPC 144 khoutah a jui dinga asei ahi.

Jing nikho a kon Highway a gari neo chule gari len hijong le gari khatcha alha lou nadinga pan kila ding chule dan khoutah a kichepi ding ahi, ati. Dan palkeh ho gotna khoutah kipe ding ahi, tin aseibe uvin ahi.

Alangkhat a, Deputy Commissioner Kangpokpi jong hi a District Magistrate Kangpokpi, Lalithambigai Kalidas, IAS in Section 144, CrPC 1973 noiya tha kipe amanchah a, Kangpokpi district pumpi a inmun pam a mi vale/che doh ding hi order umkit kahse a dinga akha ahitai. Dan palkeh ho IPC Section 188 noiya gotna peh dinga aseibe uvin ahi.

Hijongle order hi ‘law and order’ chule service khoh khoh a um government agency ho chunga kichepi louding ahi. Alangkhat a Manipur gam a COVID-19 positive case a kisei masapen nu toh kholjin khom a mi 2 hi Kangpokpi district ho ahi hetdoh ahitai. District Administration in jong apet pet a action alah a, mi 2 teni akholdoh a chule District Medical personnel hon bol dinga ngaicha ho abol uva, thuhilna khoutah anei uva, ‘home quarantine’ abol u ahitai.

Thulhut dungjuiya, mi 2 teni hi khat Nungka kho a kon ahi’in chule khat hi Sadu Koireng kho a ahi’in, ani lhon a Saikul Sub Division noiya um ahi.