Northeast a amasapen dinga Assam a kum 65 a upa khat in...

Northeast a amasapen dinga Assam a kum 65 a upa khat in Covid-19 natna a thina toh

92
0
SHARE

Northeast a amasapen dinga Assam a kum 65 a upa khat in Covid-19 natna a thina toh

Guwahati, April 10: COVID-19 natna jeh a Hailakandi gam mi kum 65 a upa khat Silchar Medical College & Hospital, Assam gam a athi in, Northeast India a dinga coronavirus jeh a athi masapen ahi.

Athi Faijul Haque Barbhyan hi Saudi Arabia gam a ana kholjin ahi. Thursday nikho a atahsa alel cheh cheh jeh a SMC hospital ICU a achon u ahi’in, April 7 ni a COVID-19 positive ahi kihedoh ahi. Assam Health Minister Himanta Biswa Sarma in Friday jingkah a Twitter a athu phondohna aneiyin ahi.

“SMCH a COVID-19 natna jeh a kijen Hailakandi district a kon Faijul Haque Barbhyan athitai, tihi pona tah a kaphon doh ahi. Insung mite kalunghempi e”, tin aseiyin ahi. Ama athi masang Thursday nilhah a Assam gam a Covid-19 case 29 lhing ahitan, Northeast a photchenna kinei case agom a 34 lhing ahitai. “Markaz a pang natna neipa toh kimuto a Dhubri a kon mikhat Covid 19 positive ahi photchen ahitan, Assam gam a Covid 19 case 29 alhingtai, tia Minister Sarma in asei ahi.

Assam gam tilouva Manipur le Tripura gam a Covid 19 case ni um’a chule Arunachal Pradesh le Mizoram gam a case khat cheh um ahi. Manipur a kum 23 a upa Covid 19 positive numei nu hi Northeast India a natna a kon adamdoh masapen hi ahitai. Amanu hi UK gam a ana kholjin ahi’in, virus a kon atheng tai, tia Health Minister L Jayantakumar in achesa Monday nikho a test report negative ahi jouva aphondoh ahi. Numeinu hi March 23 ni a JNIMS hospital, isolation ward a admit abol u ahitai.

Covid-19 positive pa toh kimuto mi 34 ho abon uva ‘negative’ hitau

Imphal, April 10(ET): Gamsunga Covid-19 case kisei anichanna pa toh kimuto a taxi driver ni panna a mi 34 abon uva Covid-19 test abol nauva negative ahi tauvin ahi.

COVID-19 Common Control Room, Manipur government report dungjuiya, mi 34 hohi Friday ni a CDRLs, JNIMS le RIMS a test abol u ahi’in, test result abon a ‘negative’ hi ahi. Ahivanga amaho hi ‘quarantine’ a umjom diu ahi. State Surveillance Officer, IDSP, Manipur in Friday nilhah nidan 5.35 a report apeh dungjuiya, Friday ni a sample 22 hi RIMS a test abol uva chule 12 hi JNIMS a test abol u ahi.

Tuchan geiya Manipur a sample 231 hi RIMS, JNIMS le NIV, Pune a test kibol ahitai. Gamsunga Covid-19 positive ni tilouva tuchan a hi positive case athah adang umlou ahi. Sample 231 test kibol holah a 98 hi RIMS a, 118 hi JNIMS chule 15 hi NIV, Pune a test kibol ahi.

Home Quarantine le Government Quarantine a um jat jong lhomsuh ahitan, mi 797 lah a mi 623 hi ‘quarantine period’ a aum phat kichai ahitai. Tua hi mi 174 bou Home Quarantine le Government Quarantine facility a um ahi. Friday ni a, Mao gate a kon hung mi 167, Jiribam gate a mi 127 screened abol uvin, Moreh, Behiang, Sinzawl, Tusom le Kamjong a kon hunglut tuni a umlou ahi.

Tuchan geiya gamsunga hunglut agom a mi 1,89,185 hi screened kibol ahitai. Hetthei khat chu gamsunga Covid-19 case ni um ahi’in, JNIMS isolation ward a kijen numeinu hi athumvei channa dinga test abol u negative hi ahitai. Covid-19 case ani channa Lilong mipa hi RIMS isolation ward a um nalai ahi.

Covid-19 douna a ‘front-line’ a pang ho le a insung mite chunga Governor in kipathu sei

Imphal, Apr 10(ET): Manipur Governor Najma Heptulla in Covid-19 natna akisei sunga natna douna dinga pan thupi tah la a chule ‘frontline’ a pang ho le a insung mite ho chunga kipathu sangtah aseiyin ahi.

Governor’s Office in Friday nikho a video message asodoh nauva Najma in, “Gamsunga natna achal louna dinga pan la a doctor, nurse, paramedical staff, police le government staff ho chunga kipathu isei phat u ahi”, tin aseiyin ahi.

“Amaho kiven ding gelkhoh louva mipi dinga na atoh u ahi. Hijong le a insung mite ho tosotna beiya mipi dinga na atoh uhi bulhing joulou ding ahi. Hiche jeh a front line a natong jouse chule amaho insung mite jouse chunga kakipana thu sangtah kasei nom ahi”, tin Governor nu in aseibe in ahi.

Aphatcha anchang kihop lou na chunga  DESAM in MHRC henga hehna nei

Imphal, April 10(ET):  Manipur Human Rights Commission  in Commissioner/Principal Secretary, CAF & PD, Government of Manipur ang a state gov tin anchang aphat cha a ahop nalou chung a suh theng nah in nei ding uvin hetsah na ana nei uvin ahi. Hiche hetsahna chu Leishangthem Lamyanba Meetei, General secretary, DESAM in anchang kihop lou na hetdoh jing ana hii oth lhon a petition commission ang a file ana boltoh lhon a ana kibol ahi. Comission in petition toh kisai in Commissioner/Principal Secretary, CAF & PD, Government of Manipur anga report agan na thei pen a ahin peh ding in hetsah na ana nei uvin ahi. Leishangthem Lamyanba Meetei, General secretary, DESAM in a complaint achun lockdown toh kisai in mipi in boina ato jing lai a  Chief Minister pa in insung khat a kg 20 cheh anchang hopding a phondoh na ana nei hi, achang lou atam toh lhon a phate cha a gov tin vetsui na avel vet ding a ngehna aneidan hetsah na ana nei ahi. Anchang chang lou ho hi politics toh kisai a anchang kihop jeh ahi tin jong general secretary pa chun hetsah na ana nei in ahi.

Oil tanker a thaotui guh a kijoh kimandoh

Ccpur, April 10: Churachandpur district police akon thulhut kimu bang in tuni chun Grace Nursing Home, Ngathal kom a Oil tanker akon melhet lou hon thao tui akaidoh uve ti thulhut ajah jeh un Addl. SP (Ops) Ccpur leh OC Ccpur in amun adellut uvin hiche achun Ngathal a cheng (L) S Vunglam chanu Suanching (32) chule Imphal East a cheng Jatra Meetei chapa Moirangthem Tonjao Meetie (24) chu amandoh uvin ahi. Chi teni chung ahin Suo motto FIR No 30 (4) 2020 Ccpur PS u/s 3 Essential Commodities act, 53 Disaster Management Act, chule 285, 34 IPC noiya case akijih khum tan ahi.

 

Manipur police hon COVID-19 nat douna ding manchah alhahsam jeh a duty abol nauva hahsatna toh u

Imphal, Apr 10(IFP): Manipur gamsunga coronavirus nat achal louna dinga state sorkar tohgon noiya police personnel hon pan lentah alah u ahi’in, ahivanga police hon lockdown sunga anatoh nauva Personal Protection Equipment (PPE) alhahsam jeh a duty abol nauva hahsatna tamtah ato u ahi.

Thuso mihon Imphal khopi le akimvel inspection abol nauva police personnel hon mask beiya duty abol u amu uvin, phabep in duty a quality hoilou mask akibol u ahi. Ipijeh a certifief kibol N-95 kiti mask ho mang louva quality hoilou mask aman uham, tia thuso mihon thudoh anei uchun police honjong ‘mask’ lhahsam jeh ahi, ati.

“Hitobang quality um mask hohi kachoh nom vang uva kailhang a kimu lou ahi”, ati. Mask hi police department hon personnel ho ahop peh ahi’in, ahivanga atamjo hi surgical mask ahi’in, N-95 mask sanga quality hoimo jo ahi. Mask ahoilou vanga police hon lung lhadeh louva mipi huhna dinga duty aboljom jing u ahi.

“Coronavirus natna nei ding kakicha uvin, ahivanga mipi huhding ding katohdiu ahi. Gam mihon athu hetthemna anei ngai ahi. Mipi ho insunga aumtup uva ahile police personnel hon lockdown sunga inmun a aum diuva thuhilna apeh jing ngailou ahi”, tin sub-inspector Soraisam Surjakanta Singh in aseiyin ahi. “Mi phabep pharmacy a lou cho ding kahi tin akilep uvin, ahungdoh uvin, phabep in in a kaum khop jeh a kihuilha dinga ahungdoh u aseidoh u ahi. Hijongle lockdown alolhin nadinga pan kalah jing u ahi”, ati.

Department a kon supply alhahsam jeh a mask, hand sanitizer, glove hohi amaho sum a akichoh thu u Surjakanta in aseiyin ahi. Gamgi a posting hi a police khat thuso mihon akimupi uchun, lockdown sunga duty bolna a hahsatna ato thu aseiyin, “Gamgi a posting hi a personnel ho khohsahna peh angaiye”, ati.

Dan dihlouva gamsung hunglut aumlou nadinga gamgi a um gate ho khoutah a kanga uva, lut ding kigo ho kalam tin u ahi’in, police hon kivenna ding manchah pha anei ngai ahi, ajeh chu hich ho beiya che le vahle ho kilamtin hi police ho dinga boina sangtah to nathei ahi, ati. Hetthei khat chu Centre in angaicha PPE, hand sanitizer, mask le adang dang ho apeh ahi.

Chief Minister Biren in Centre sorkar chunga hiche jeh a kipathu jong asei ahi. Sorkar in angaicha medical equipment supply alhinga akila e, tia asei vanga natna kimaitopi a police hon hiche manchah ho alhahsam jeh a duty abol nauva hahsatna ato u ahi. “Police khat in virus aneiya ahile adang jousen jong bailam tah a akilahson thei ahi”, ati.

Alangkhat a, Thoubal district a Superintendent of Police S Ibomcha in, “Ka insung mite lhakhat nailam kakimupi tahlou ahi. Kivenna dinga kimupi ding jong kagot lou ahi. Lockdown kiphon a kon district sunga coronavirus achal louna dinga kanga jing u ahi’in, duty kabol na a natna kakilah khah a ahile ka insung mite aboi ding kadeilou ahi”, tin thudoh donbutna aneiyin ahi.

“Duty a kon kahung kile teng ule mask kasop jingu chule alcohol based solution a sanitize kakibol jing uva chule ajing nikho teng kaman kit u ngai ahi”, ati. Police hon Home delivery service a dinga public grievance cell (COVID-19) ahondoh ahitai, tin aseiyin chule district mihon angaicha khoh ho chohna dinga 7629009761/7629008981 contact abol theiyu ahi.

Police hon angaicha thil ho inmun chan apoh peh diu chule sum alah hou dukan bol ho apeh diu ahi. Coronavirus natna toh kimaito a hi police ho ahiuvin, frontline a pang ahiuvin, mipin tosotna anei loule police chule mipin boina ato ding ahi, ati.

Additional Director General of Police (ADGP) (L/O) L Kailun in, “Mask leh angaicha thil dang dang ho ‘frontline’ a duty bol a police ho issue kibol peh ahi. Ahahsatna umthei ahi, hijong le angaicha manchah ho peh doh nadinga department in abolthei chan abol ahi”, tin aseiyin ahi.

Lockdown palkeh ho akon fine dangka 3.84 lakh lam ana kiladoh

Imphal, Apr 10(IFP): Manipur police in lockdown sung a che le vahle ho akon in fine in dangka 3,84,290 lam ana mudoh uvin ahi. Hiche fine chu mi 6,648 lam akon ana kidongdoh ahi akiti. COVID-19 akon kivenna ding a Prime Minister Narendra Modi in March nisim 24 jaan kim akon loackdown phondoh na an anei ahin, hiche sung a che le vah le ho chu thupe kinei nitlou a ana kila a ana kileusah u ahi. Gamsung a hiche natna apun jing jeng toh lhon a gamsung khaa na hi kibol jom jing nalai ahi.

Hetthei khat chu India sung a hiche natna akon thina toh hi mi 169 lam ahi tan ahi.  Manipur jeng a jong mi 2 in hiche natna ana nei lhon ahin hinlah ahung damdoh lhon tan ahi. Disaster Management (DM) Act, 2005 (COVID-19 Pandemic) noi a case ana ki jih lut hi achesaMarch nisim 25 akon Imphal West a 4; Imphal East ah 6; Thoubal  district ah khat; Bishnupur district ah ni chuleh Churachandpur district ah khat ahi. Imphal West district sung a thupeh nitlou jeh a ana kiman hi mi 2,079 lam ahi akiti. Imphal East district sung a mi 562 lam ana kiman in, chuleh gari 300 lam ana kimat toh lhon in dangka 36,100 lam jong ana kidong doh in ahi. Churachandpur district sung  a curfew daaan palkeh jeh a kiman mi  746 lam ahin, gari 526 lam ana kiman in chuleh sum in leuna akon in dangka 31,500 lam ana kimudoh in ahi. Chandel district sung a curfew dan palkeh mi 47 lam ana kiman in gari 17 lam ana kimandoh in chuleh fine in dangka 4500 lam ana kimu in ahi. Tengnoupal district sung a curfew daan palkeh mi 36 lam ana kiman doh in hinlah tu chan in gari chuleh fine ho akibol kha hih lai in ahi. Kangpokpi district sung a curfew palkeh mi 66 lam ana kimandoh in gari 80 lam ana kihen toh lhon in fine in dangka 8600 lam ana kimu doh in ahi.