Non-SoO Group UKNA in SoO noiya um KNA suhmang ding’a gihna nei

Non-SoO Group UKNA in SoO noiya um KNA suhmang ding’a gihna nei

245
0
SHARE

Non-SoO Group UKNA in SoO noiya um KNA suhmang ding’a gihna nei

 Imphal. Sept 7 (ET):  Non SoO Group United Kuki National Army(UKNA) Secretary Home Department in thuphon aneina’a Kuki nam sung’a ding’a tu le tu’a Suspension of Operation nei Kuki National Army (KNA) in nam sepai hinan namsung mite aphatseh’a asuhgenthei jing’u hi Kuki nam mite ading’a vangset umtah ahi. Ajeh chu KNA hi nampi ading’a kinep pi um tah nam sepai leh monpi tah’a Kuki ten akinei toh lhon in kai / sum la pai jong asei jouseu nampi ading ahile tin anakipe jing in ahi. Chuleh MLA election jong amaho dei dei akison in  ahin MLA ho athu thu’u ahi phat in MLA ho mangchan Manipur Govt. mai ve in nampi ding gel talou in Kuki Movement hin Manipur gamsung atoh khah lou ding ahi tin Manipur Chief Minister O. lbobi heng’a sum tampi kilah in anop na soi jong anakai in ahi. KNA in Moreh mipi jouse heng’a jatdang kom’a koiman inn mun / gambeh ajoh thei lou ding uvin apang uvin ahin Meeitei tamtah achen lut sah kit uvin ahi. Hiche nachung chon’a Chandel gamsung’a KNA in haosa gamnei ho le mipi doh na ima umlou in eimi chen na gam jouse’a Meeitei gamvah (UNLF) ho heng’a ana kijoh doh uvin ahi tin ngoh najong anei in ahi.

Hiche toh lhon’a Moreh kom’a eimi gam Haolenphai jong smart city sah nading tin Meeitei sum le pai nei mi phabep toh CM O.Ibobi heng’a sum anakilah uvin nam mite dei loubeh le phatsah lou beh in Kuki gam Meeitei ho heng’a anapehdoh go in hiche achun nasatah in MLA ho phabep mangchan haosa pu kisan anajol uvin anop peh lou phat in KNA President PS. Haokip in Lalkholun haosa pu chu thina chan ding in gihna jong ananei in ahi ati. Hitobang’a phatchesa ho’a Kuki nam mite le Kuki gam jatdang kom’a ajoh jing uva lamkai (KNA) cheng in sum holna’a aman uva nei le gou inchen lhingset’a aneiphat uva nam mipi te ding ima gelkhoh na anei tapouvin ahi. Tun Manipur gamsung’a ding’a nam lah’a nam genthei pen leh nam vaicha pen’a hinkho kimang jong muna sasa in mu lou kisa in aum uvin chuleh ngailutna bei hel’a sum le pai adon jing naban uva mipite chan ding Govt. akon thil neo cha cha gei’a anehpeh uvin ahi. Alangkhat’a tulai tah’a mipi ten kihinso na ding’a Kaani lei abol kisan kha ding tia gah tah’a thupeh anei’a chuleh State force toh kitho’a thil bol ding ati’u hi ivet leh KNA hi nam sepai ahipon nam mipite sumang ding leh Meeitei gang group ahi jeh in UKNA in akipona lheh jeng in ahi tinjong aseibei. Hichi Kaani lei kha na ding’a KNA in State Govt. kom’a sum ijat akilah kit diu tam tijong gellou thei ahipon ahi ati.

Hetthei khat chu Kuki gam hi ipu ipa gam koima thanei nalou gam khat ahitoh lhon’a gamsung’a State Govt. leh Meeitei hon tha ahin nei nao hi KNA in tha apeh jeh ahi ti hi nampi mipi ahelou koima jong umlou ding ahi. Tun Churachandpur gamsung’a Kaani lei suhmang nading in Manipur State Govt. toh kithokhom nanoi’a nasatah kham ding agot nao leh tuni chan’a nampi ajoh mang got uhi UKNA kinom lou hel ding ahi ati. Hitobang lunggel nei nampi sugenthei KNA dirty politics hi kidou dal ding chuleh Kaani lei jeh’a Churachandpur mipi KNA leh State force in ahin suhgenthei le gamsung mipi le UKNA in pan kilakhom’a Lamka (Churachandpur) sunga KNA kiti um sahlou va kisubei ding chuleh KNA support mi jong gamsung’a kichen sahlou ding ahi tin gihna anei in ahi. Kuki haosa, upa, social orgnisation lamkai ho jouse heng’a (UKNA) hetsah chu Kuki te sugenthei Kuki gam joh mang gunset’a pang KNA Organisation hi mipi toh kitho’a gamsung’a kisumang ding ahi tinjong thuphon chun atahlang in ahi.

CM Biren in politics a lunggutna aneilou ahi: STDCM

Imphal, Sept 7(ET): Schedule Tribe Demand Committee Manipur (STDCM) in Saturday nikhon Chief Minister N Biren demna anei uvin, politics a gotna neilouva CM ahi, tin asei uvin ahi.

STDC office, Thangmeiband mun a STDC Coordinating Body Convenor L Romesh in thuso miho akimupi na’a Meetei/Meitei ho ST list a pansah nadinga recommendation akithot lou hi politics a lunggotna alhahsam jeh ahi, tin asei uvin ahi. Moirangkhom a Railway construction office khah a STDC member ho police hon amat thu Romesh in aseiyin, Chief Minister in kihouna sem dinga akouve, tin aseiyin ahi.

“Meilhei phabep in ST List a Meetei/Meitei ho pansah nading recommendation thot loudinga ngehna aneijeh uva kabol theilou ahi tin CM in eiseipeh uve”, tin Romesh in hiche thu a hahsatna umho aseiyin ahi. CM in agamsung angailut a ahileh atouna sanga gamsung miho lunggel khohsahna pe hen, tin aseibe in ahi. Police hon Moirangkhom a railway office kha jeh a aman STDCM member ho tunin alhadoh tauve, tin jong aseiyin ahi.

Imphal West OC Ingocha in pilhing ho ajalou demna thu Romesh in sangtah in aseiyin, medal ding gelna mai maiya inam miho tha louding ahi, ati. Authority hon thilsoh umchan avet diuvin temna jong aneiyin ahi. Chief Minister toh kihouna asem u machalna aumthei loujeh a kiphinna hi umjom ding chule railway kisahna natoh kikhah jom ding ahi, ati. Kiphinna kikehlen ding, kijotna, Meira rally, public meeting, street corner meeting, kiphinna chom chom umding ahi, tin aseiyin chule Meilhei ho khonung dinga kiphinna kibol gamsung mihon akithopi diuvin temna aneiyin, sorkar in aganna thei pen a recommendation athot dinga jong Romesh in aseibe in ahi.

AMBADA in govt gihna nei

Ccpur, Sept 7(ET): All Manipur Border Area Development Association in state cabinet in BADP works village authority ho pehdoh ding a kilolna ananei u chunga kipa thuseina ahin nei utoh lhon in, BADP noi a khantou machal na natoh achesa 2017-18 akon a pending a um ahi tan ahi.

BADP noi a natoh kipat ding hi achesa August nisim 21 kilolna dungjui a government order ngai ding ahin hinlah tu chan in order akiso hih lai in ahi. Phat sot tah a natoh ana bangkhai jou nung a government in order so ding nahsah a akoi loutoh lhon in kiloikhomna in ahunglhung ding September nisim 15 kah a order akiso lou le kiphinna nei dingin gihna ahin nei uvin ahi.

MP anahi Dr Meinya in MPLADS noiya asah ‘gate’ tuchan a kisa joulou lai; Matai Garden gate kisemna jong scheme noiya pang

Imphal, Sept 7(ET): MPLADS, Rajya Sabha MP K Bhavananda in adih louva na atoh thuso (IT) in asosal jouva thuso mihon Lok Sabha MP anahi Dr Meinya in MPLADS amanchah dan kholna anei kit uvin, MP anahi ama injong mipi sum alamlouva aman, dihlouva aman ahi ti hetdohna anei kit uvin ahi.

RTI a kon Imphal Times in document alahna a Matai Garden, Luwangsangbam gate hi MP anahi Dr Meinya in MPLADS noiya asah ahi. Hetthei khat chu Matai Garden hi Maitai Mayai Leikai, Imphal West a cheng Khoirom Mohendra kiti mikhat gam (private) ahi. MP Local Area Development Fund man nadinga dan phabep um ahi’in, mikhat natohna dinga kimang theilou ding, fund hi mipi (public welfare) program a man dinga dan um jousen asei ahi.

Dr Meinya hin 17th Lok Sabha election atet tahlou ahi’in, ama khel a Dr RK Ranjan in Lok Sabha election atet ahi. Ahivanga 2016-17 a kisa chaiya kisei ama MPLADS fund noiya kisa natoh hi tuchan a kitong jing nalai ahi. Imphal West noi Sagolband Assembly constituency hopsung a um Bijoygovinda Leirak gate thu ahi’in, gate sahna dinga dangka lakh som akipehna document um ahi’in, sum hi April 4, 2017 kum a sanction kibol a chule natoh hi akijoutai, tia document a kisei ahi.

Dangka lakh 10 a kisa jou Bijoygovinda thuso mihon avil uchun, gate kisa chai loulai amu uvin ahi. Document a kisei hi hiche mun ahilouleh Thangapat Mapal kom Bijoygovinda a dangka lakh som a kisa gate dang umlou ahi. Dr Meinya hin 2014 a kon 2019 chan MP panmun atuh ahi’in, natoh chom chom 268 kijouva kisei ahi. 2018-2019 kum a Khumbong Awang Mamang mun a community center khat MPLAD fund noiya dangka lakh 44 lut a sah dinga recommendation um ahi’in, hiche hi akisa joutai kitina thu September 9, 2018 kum a kisodoh ahi.

Hiche kum ma ma a MP anahi pa in civil group khat ‘flower plantation’ (pahcha lei) bilna dinga dangka lakh 3 sanction apeh ahi’in, sum hi anikho ma ma a asodoh u ahi. Civil body ho thuso mihon akimupi a chun MP Dr Meinya in pahcha tu nading thing a kisem box sahna dinga dangka lakh khat leh keh kithopina ape in, lakh thum ahipoi, ati. Dr Meinya hi tua MP ahi tahlou vanga mipi sum tamtah alam louva amanchah thu thuso mihon tua hi atahlang ahi.

NSCN-IM in Framework Agreement thu seidoh

Kohima, Sept 7: NSCN-IM hon 2015 Framework Agreement a pang thu Naga civil society group ho henga aseidoh uvin, aseidoh u amasat pen na ahi.

India sorkar in Naga thusim chombeh (unique) ahina hi asan peh ahitan, chule hiche teni hi lungmong tah a chengkhom theiding a asei ahi, ati. Naga ho thu kisuhlhapna hi Framework Agreement dungjui hiding ahi, tin NSCN-IM lamkai hon asei uvin ahi. Camp Hebron mun a NSCN-IM lamkai hon Naga Civil Society group chom chom toh kihouna (Consultative Meeting) anei nauva aseidoh u ahi. Naga Hoho, Naga Students Federation, Naga Mothers Association, United Naga Council leh Naga Peoples Movement for Human Rights thalheng ho kihouna apang uvin ahi.

Tu naicha NSCN-IM Chairman Q Tuccu leh General Secretary Thuingaleng Muivah in thuso aneina a India sorkar in Framework Agreement, 2015 kum a akisem kum li jouva jong India sorkar in thukhoh tah tah ho thu asei achal poi/agang poi, tia asei ahi. Ponlap (flag) ahilouleh Naga Constitution achom a semding thu a kinoptona ima aumpoi, tin jong asei uvin ahi. Hiche teni thu hi akiseilhah louleh Naga thu hi san thei dinga seilhahna umthei louding ahi, tihi NSCN-IM in atahsan ahi.

Jiri Police leh Assam Rifles hon Dk. Crore 4 val man khamnathei mandoh u

Jiribam, Sept 7(ET): Jiribam district Police hon khamnatheiya kimang lah’a khat, Tramadol Hydrochloride capsules (Rimdol-50) louchang chu, chang  90,990 amandoh uvin ahi. Louchang kimandoh hi agih dan kg 4.549 aphajouvin, crore 2,04,72,750 man dia ginchat ahi.

Louchang hi Yairipok Toupokpi Sabal Leikai, Imphal a kon kum 19 a upa Nongsaibarn Raees @ Yaima a konna kimandoh ahin, louchang a kivei, anei mong mongpa vang hi matdoh in aum hih laiyin ahi.

Thuchen kholchil ahi jouvin, thulhut kimu dung jui in , louchang ho hi Byrnihat, Meghalaya a konna hung kipolut na  moreh lam ma konna Myanmar a pohlut ding lunggel ahi.  Louchang hi moreh a changkhat na dangka 225 aman jouvin ahi. Police team hon Ashok Leyland truck, registration No. AS 01JC- 2823 a konna amatdoh u ahi.

 Assam Rifles hon Machi Sub division, Tengnoupal district a September nisim 6 nikhon dangka crore 2.2 lhing khamnathei aman uvin ahi.

Jingkah matah a Machi-Chelep lamlen a lhai bike ginmo umkhat Assam Rifles team hon akham ule ginmo mipa hin kinotah a sakhao ni adalhah a jam ahi. Sakhao akhol nauva police hon asunga packet 85 a kichun 1.85 kg khamnathei amudoh u ahi. Akiman dan in aphal lou khamnathei hi dangka crore 2.2 vel man hidinga tahsan ahi. Akiman khamnathei Tengnoupal police khut a apedoh tauvin ahi.

TA&Hills department a ‘Inter-Seniority Officer’ List kijui lou TYA-GHQ in demna sangtah nei

Imphal, Sept 7(ET): TA& Hills Department a state sorkar in dan dihlouva ‘inters-seniority officer’ palkehna aneiyu Thadou Youth Association General Headquarter in demna sangtah anei uvin ahi.

Government order no.1/12/2011 nikho a Joint Director, TA & Hills in DDO leh HoO natoh atuh kit dinga kisei ahi’in, Joint Director hi department a officer holah a senior pen hiding ahi, ati.  Lungin Elmun, General Secretary, TYA GHQ in thuso apehna a nisim 16.04.2015 kum a vide No 1/5/2015-TAH&SC a Final Inters-Seneiority List of Deputy Directors, Directorate for Tribal Affairs Hills and Scheduled Caste Development a N Kaikho Mao hi mithum lah a senior pen ahi, ati. M Pheijao Singh min Sl no 2 a um a chule Sl no 3 a L Rajendro Singh min pang ahi.

Sl No 1 a government service entry nikho hi 27.09.1989 hi a, Sl No 2 a 27.08.1994 chule Sl.No 3 hi 02.05.1998 hi ahi’in, N Kaikho Mao hi L Rajendro Singh sanga kum 9 a senior jo ahi. Ahivanga HoO leh DDO natoh hi mithum lah a aneopen (junior pen) hi a L Rajendro Singh apeh u ahi. Nisim 24.12.2011 kum vide no 1/12/2011-TA & H order a Joint Director, TA & Hills, Head of Office (HOO) leh Drawing & Disbursing Officer (DDO) kichehtah a kisei ahi’in, sorkar in dan ama dan apalkeh a chule Manipur Service and Reservation Act for ST & SC 1977 jong apalkeh ahi, ati.

Mopohna nei Minister chule state sorkar in angaicha abol diu atahsanna thu TYA in aseiyin, chule senior khat chopkhup hi dihlou ahi, ati. Sorkar in dan akal a ahileh kidoudal ding chule nam thu a vetsahna umthei louding ahi, ati. Chule All Tribal Rights Protection Forum Manipur ATRPFM in hiche thu a pan alah jouse tosotna kinei ding ahi, ati.

Hetthei khat chu nisim 24.07.2019 ni a order hi High Court in nisim 29.07.2019 ni a asuhmang (cancel) abol ahi’in, ahivanga HoO leh DDO natoh hi N Kaikho Mao sanga kum 9 a junior jo khat ape uve, tihi hetdohna um ahi. Minister hetlouna a thil kibol hi dan dihlou, kibungkhenna leh kithetna ahi, tin TYA in aseiyin chule Rajendro in kivetda nathei na atoh angah a, ama phat lhin phat joh anga dinga aseibe uvin ahi. Additional Chief Secretary in court order (29.07.2019) ajuiya chule Final Inters-Seniority List thengtah a akoi dinga temna anei uvin, ahilouleh gamsunga um tribal ho thilbeh a umlou ding, thilsoh sorkar in mo apoh ding ahi, tin thuso chun aseibe in ahi.

MHJU kiphudoh kum 36 lhinna kimang

Imphal, Sept. 7 (ET): Tunin Manipur Press Club mun’a Manipur Hills Journalist Union (MHJU) kiphudoh kal kum 36 lhinna nikho anamang uvin ahi. Kingon achun Outer Parliamentary Constituency MP Dr. Lorho Pfoze, DIPR a APO (Press) T. Sangeeta leh Union President Ramkung Pamei ho cheng sahlut tah in kou anahi uvin ahi. Kingon phatsung in achesa 1984 kum’a ana kiphutdoh Union a dia office sah ding chungchang leh thinglhang District Headquarters jouse’a press club khat cheh sahdoh nading toh kisai in MP pa heng’a memorandum khat anapelut uvin ahi. Hiche achun MP pan jong Union ngehna ho akisaipi leh amopo ho heng’a alhut ding in anasei in ahi.

Hiche toh lhon’a MP Dr. Pfoze in houlimna aneina’a thinglhang leh phaicham kilungkhat na ding, kichamna ding leh kingailutna ding’a journalist ho panmun letdan aseiyin ahi. Thu khat jihkhel / seikhel jeh’a mijouse lungboi thei leh kinah kibou sohthei ahi jeh in thuso mihon thuso ho abol teng lunggil tah’a avettoh uva aphon ji ding uvin temna anei in ahi. Alangkaht’a Union President Ramkung Pamei in aseina’a Hill Journalist hohi mun gamla tah’a um cheh ahi jeh uvin kisuhkhomna phat hohi akihanei theipon hijeh chun hiche chung chang’a kithulhuh na khat sem angai in ahi. Tulai mobile leh technology khang atah toh lhon’a amitakip hi journalist ahi lou leh photographer asohgam tan ahin thudih kiti hi journalist tahbeh ho tailou koiman amohso thei kitlou ahi ati. Journalist hon atohna lam lam uva tom ngai leh pontho tah’a pan alah jing ding uvin temna jong anei in ahi.

Transport department in helmet thu’a hetsahna nei

Imphal, Sept 7(ET): Transport Department, Government of Manipur in state sunga gari neo tol ho in helmet Bureau of Indian Standard khat aki khuh uva, helmet a chu boina akon huidoh na thei ding ahi dan sticker kitah angai dan hetsah na ahin nei uvin ahi. Achesa 2016 kum a helmet kikhuh lou ho thao sun sahlou dinga thupeh ana kinei ahin hinlah ana lolhing lou ahi. Helmet kikhuh dinga dan kisem alolhin loutoh lhon a lampi toset akon thina toh pung jing ahi. Ahunglhungding September nisim 25 akon a helmet khuh lou jeh a kiman ho dangka 1000 kileu sah ding ahi tah dan jong department in hetsah na ahin nei uvin ahi.

JAC in Achou Singh that Surjit insung mite vengsung’a akon nodoh

Imphal, Sept. 7 (ET): Achesa Aug. nisim 6 nikho’a Kumbi Setupur Mayai Leikai Ward No. 2 a gam kichu jeh’a Khangembam Achou Singh (42) that’a pang Nongmaithem Surjit @ Athebi leh a-insung mite tule tua midang inn khat’a khosa chu JAC in vengsung’a chengthei talou ding in ananodoh tan ahi tin thulhut chun aseiye. Thuso miho heng’a Surjit sopi N Inaocha leh N Birjit in daan dungjui in mona neipa themmo leh gotna chang hen lang ahin kho helou insung mite vang kilimsah dahen tin anasei lhon in chuleh JAC in vengsung’a kon nodoh ding ti’a thulhuhna anei uhi nung lah doh ding in temna anei lhon in ahi.

Hetthei khat chu hiche kitha natoh kisai in numei pasal agom in mi 5 akiman in ahi. Amaho chu mithat’a pang N Surjit @ Athebi Singh (37), Surjit penna pa N Chingkhu Singh (78), Surjit upa N Naobi Singh (42), Surjit loinu Chingkheinganbi Leima (35) leh Surjit penna nu Sanahanbi Devi ahi.