Ngoh di leh themmo chandi kiholna um (SoO group ho themmo kichansah)

Ngoh di leh themmo chandi kiholna um (SoO group ho themmo kichansah)

1616
0
SHARE
PLA and UNLF cadre, including women, undergoing training in an undisclosed location in south east asia. We can say that the two groups [UNLF and the PLA] run their own training camps across and around our extended neighbourhood eventually lending out seasoned insurgency hands [instructors] on demand - like to the Naxal rebels.

Ngoh di leh themmo chandi kiholna um
(SoO group ho themmo kichansah)
   Kuki Inpi Manipur (KIM) jaona’a Kuki Inpi Kumpi hon Anglo Kuki War Centenary Commemoration Committee (AKWCCC) ho ‘suspend’ abol uva AKWCCC holeh Manipur govt kinop tona ho thulahlouvin akikoitai ti thuphon ahinbol u chu nam sung’a lamkai chuomchuom ho kah a kihoutohna lhahsam jeh hipendi ahi. Kumpi in AKWCCC ho themmo achanlona jeh chu AKWCCC hon achung uva um thuneina nei (authority) ho thudohna leh phatsahna umlouvin Centenary thu to kisai ah Manipur govt toh pom theilou kinoptona anei uve ti ahi. Centenary committee hole govt kinop tona ahi tia kisei chu ahileh Centenary lumsong chung’a thu kijih (ancestral land) chu lahdoh di, hicheto kilhon’a Anglo-Kuki War hetjingna dia October 17 hi Restricted Holiday hidi, British te ana kisatpi Kuki gal hang ho geldohna a Imphal khopi mun khatna “Memorial Park” khat sah di ti ahi. Kumpi in hiche kinop tona hi akipompoi atikeu hilouva KIM lamkai ho gei ahaisah (suspend/dissolve) ahi. Hichu ahileh iti kihoumat tona na umtheilou ham ti hi datmo umtah ahi. Ajeh chu thucheng kijih thua kiboina chu phulou helouva nikhat sung’a hung umdoh anahipoi. AKWCCC hoto Manipur govt adeh a chief minister kihouna avelvel’a anei uva kihou lhahna ana umtheilou phatna chu Kumpi lang’a hoto kihoutohna ana um’a hiche hi nanop diu, nanoplou diu ti ana umthei mama ahi. Tulai Mobile phone khang’a kijahmat tona baitah a umthei chu ipi atileh tua Centenary committee hon achung’a ho (authority) phatsah louvin govt toh kinop tona anei uve hung kitia ‘action’ hung umjeng thei ham ti hi ahi. Kumpi lang hon AKWCCC ho thilbol (govt toh kinop tona anei) akipompoi atitheileh centenary committee kisem jong panna bei tithei ahi. Achutileh kihoulhahna ahung umtheilou phatna chu Kumpi lang joh chun govt toh kihouna ananei thei u hilou ham? Tua hiche thua State govt nin SoO a um Kuki thingnoi group ho themmo ahinchansah a Centre govt nin SoO group ho chung’a action alah dia thu thot dia kilolna ahinnei kit u ahi.
Centenary Committee hotoh govt kinop tona chelha thei ponte ti Kumpi ho ahileh itidan’a SoO group ho themmo kichansah a Kumpi ho kiminphahlou ham ti thei ahi. SoO group ho themmo hung kichanlona chu Centenary Committee hon govt toh hitobang kinop tona nabol uve tia lunglhai lou jeh a gihna anei u dan’a govt nin asei ahi. SoO group ho ki-ngohna hi “kinop tona kapom pouve” tia meithal kikapna video Social media a kithejal jeh chu hidia kisei ahi. Kinop tona khat kapom pouve tia onghom’a meithal kikap kiti chu SoO ground rule suhkeh le suhkehlou thuto akisamkaina umlou ahi. Centenary committee hon SoO party hon gihna einei uve atiu ham, telephone call ham, whatsap ham’a gihna anei uve ti ahilevang thuchuom ahi. Kumpi hon KIM jaona Centenary committee ho asuhbei (dissolve) a govt to committee ho kinop tona to kikal’a thil abol u ahileh govt nin Kumpi lang ho joh themmo chanle kilomjo ahi. Ahin Kumpi hon govt le centenary committee ho kikah a kihouna kahepha pouvin kei ho deidandan’a thil kabol u ahi atithei ule thukhat hikitdi ahi.