Nel pohding kikha jeh a boina aumthu a CM in meeting kou;...

Nel pohding kikha jeh a boina aumthu a CM in meeting kou; natong hon kiphinna bol jom

238
0
SHARE

Nel pohding kikha jeh a boina aumthu a CM in meeting kou; natong hon kiphinna bol jom

Imphal, July 31(ET): Vadung a kon nel leh song loh a sum hol kikha jeh a achom chom in kiphinna anei thu a Chief Minister N Biren Singh in Regulation of Illegal Mining Activities thu a meeting akouvin ahi.

Chief Minister in Facebook post a “Gamsung a Illegal Mining thu a meeting tunin aumin, Minister holeh MLA ho, mopohna neiya Forest and Environment, Commerce & Industries, Pollution Control Board official ho chule DC leh SP jouse apang uve”, tin aseiyin ahi. Amu dinga lom ho ama ama gamkaiya DC chule government official hon ‘Mining licence’ apeh a chule anatoh jom ding aphal diuva kilolna aumin chule gamsung a nel leh song kikhotna ho a um dan ho mipin ahetna dinga Awareness Campaign bol dinga jong kihoulhahna akineiye”, ati.

Water Resources Department in twi lon dan ho avet a song le nel lah nathei ding mun alhen ding, hiche jouteng Public Works Department in ‘Mining plan’ agon ding ahi, tin Dr Suhel in aseiyin chule akilhen namun ho a lha ni permit kipe ding, manchah len kiman ho kiphal louding ahi, ati. Chule vadung twi alonna akisuset na sa mun ho a hitobang kiphal louhel ding ahi, tin jong aseiyin ahi. Deputy Commissioner hon District Environment Impact Assessment Authority apet pet a aman diuva thuhilna kipe ahi, ati.

Changval, company, society chule adang dang in ‘Mining plan’ (qualified mine planner in asem) apehlut a patta land (private) gam leiset hectare 5 noilang a Lease na ding Directorate of Trade, Commerce and Industries henga apply abol thei ahi. Proposal hi District Authority in Environment Clearance apeh nadinga kithot son ding ahi’in, State Level Expert Committee hon Environment Clearance apehna dinga Director (Environment) heng a kithot ding ahi, ati. Clearance dungjuiya Directorate of Trade, Commerce & Industries in permit apeh ding ahi.

Nel loh a kivah a natong chule truck tol a association hon kiphinna abol jing laiya meeting aneiyu ahi’in, All Manipur Excavator, Local Truck, Tipper Owners and Workers Association kiti kiloikhomna in hiche thu a August nisim 1 niteng nidan 14 bandh bol dinga jong thuphon anei ahi. Association in bandh alahdoh ding ham ti thu kihe loulai ahi’in, ahivang a tuchan geiya kiloikhomna in tuni a meeting um thu a thuso anei loulai ahi.

Alangkhat a Apunba Sinmi Lup, Awang Sekmai leh Kanglatongbi lamkaina a mi tamtah in Manipur High Court a kiphinna bol dinga Court lang ajon uvin, ahin, Koirengei mun a police team hon analamtin uvin ahi. Hiche masang a Bishnupur district a jong Thongjaorok munvel a nel loh a natong hon kiphinna vetsahna a kijotna aneiyu ahi’in, truck tol hojong kijotna a pang ahi. Natong khat in thuso miho akimupi na’a nel leh song kilai akikha hi thina twikul a eikilehlut tobang ahi, tin aseiyin ahi.

“Toh ding neilou jeh a kel kathoh sang uva eitha diu apha jo e”, tin kiphinna bol khat in aseiyin chule judge henga eithat tauvin, ti dinga kache diu ahi, ati. Kiphinna bol mikhat in nel kilo akikha hi imadang ahipon, khantouna lampi kiting ahi, tin aseiyin, nel leh song beiya khantouna iti umding ham, ati. Nel leh song kilo akikha masang a Public Works Department tobang government department ho kha ding ahi, ajeh chu song le nel beiya thil kisa theilou ahi, tin aseibe in ahi.

 

Babysana long lhahna kin neitau; asang a sim in lunghempi

Imphal July 31(ET): Aumtalou Babysana thilong Wednesday nikhon Haraorou mun a chondan toh kitoh in meiya agou tauvin, hostel a athi dan kihelou simlai ni mihem asang a sim in aka pi in ahi.

Insung mite chule Babysana thi thu a kisemdoh JAC in phat sottah kiphinna anei jouva insung miten thilong lhahna kin bolpeh dinga long alahdoh u ahitan, tuni chan gei Babysana long hi JNIMS morgue a kikoi ahi. JNIMS a kon Ayangpali, Kongba, Canchipur lamlen chule athisa akimudo namun Standard Robarth School chan kijotna anei uvin, jana vetsahna a pahcha akoi uvin ahi.

School mun ajot uva Babysana apa kitim joulouva akap in, ahin, hunam a hostel gate lut ding ago in, police hon mipi suhthip ding nasatah a agot vang uva lunghang tah a um mipi hon school lang song a asep uvin, hiche jouva hostel nokhum ding ago uvin, ahin, police hon alamtin uvin ahi. Police holeh mipi ho phat phabep akinoto jou uva Babysana insung mite bou Babysana jana pe dinga hostel campus sunga alut ding police hon aphal peh uvin ahi.

Hiche jouva school mun a konin Babysana achenna Thangmeiband lang a akijot kit uvin, Thangmeiband THAU Ground a jana pehna kin anei uvin, hiche jouva Haraorou mun a apo uvin, thi lhahna kin amang uvin ahi. ‘Babysana chunga thudih a thu tan uvin’, ‘tolthat ho gotna peuvin’, tin phaicham a asam uvin ahi. Babysana thu a kijotna neihon ajot pa pa nau lamlen a simlai leh midang dang in Babysana jana pehna a ‘human chain’ asem uvin ahi. Thilse aso louna dinga police hon lamlen mun chom chom khoutah in angah uvin ahi.

Babysana hi Standard Robarth Higher Secondary School a kai simlai ahi’in, achesa July 18 ni a hostel sunga akikhailih na a kimudoh ahi. Athidan hi tolthana thilsoh hidinga ginmona aumjeh a mipin kiphinna sangtah aneiya, case CBI in atuh nading chule post-mortem bol kit nading a JAC in gamsung pumpi a nikhat bandh jong abol u ahi. Achesa ni phabep sunga Babysana thi thu a kiphinna chom chom umjing ahi. Thilong lhahna kin kibol jong leh athi dan thutah akikhol doh kahse a kiphinna kibol jom ding ahi, tin JAC in aseiyin ahi.

IDSP Office mun’a “Sample Collection Centre for Rapid Dengue Test leh JE Test” chelha jing; CCpur Dist. sung’a JE Case 22 leh Dengue 4 kimudoh

B.Lalboi Gangte

CCpur. July 31(ET) : Churachandpur District hopsung’a Dengue leh JE (Japanese Encephalitis) natna vei mudoh jing ahi toh lhon in achesa July nisim 22 nikhon IDSP Office, CMO Complex mun’a Sample Collection Centre for Rapid Dengue Test leh JE Test bol thei na ding hondoh ahi jou nung in tuni chan in hiche centre ahin khosih natna nei damlou mi 105 thisan test jong akibol doh tan ahi. Chuleh Sample Collection Centre ah tahsa damlou tam tah thisan kholchil na aneisah jou nung in JE vei natna nei apung jing ahi. July nisim 31 chan in JE natna nei mi 22 alhing tan chuleh Dengue vei mi 4 alhing tan ahi. Hetthei khat chu Sample Collection Centre for Rapid Dengue Test leh JE Test hi IDSP program noi’a hondoh ahi toh lhon’a tahsa damlou Dengue leh JE natna vei hi ding’a ginmo um ho test abol uvin chuleh Krisnaa Diagnostic Centre in District Hospital ah rapid test anei nao’a positive mudoh ho IDSP in District Hospital ah confirmation test abol kit ji uvin ahi.

Hiche toh lhon’a IDSP in natna vei jeh’a kingaise ho apoimo bang in counseling anei peh naoban’a Dengue leh JE natna hi thoukang akon kila sonthei natna ahi jeh in natna vei hon hoilai mun apat hitobang natna akilah khah’u ham ti kholchil na anei nachung chon’a kivenbit na ding in lampi chom chom panlah naleh kholhang sapna ananei uvin ahi. Chuleh Rapid Action Team in fogging abol nao mun hochu K. Salbung, Hmar Veng, Zoveng, New Zoveng, JNV Tuinom, S. Munnuam, DC Bungalow, Kholmun, Saikot, Hmuntha, Rengkai, Zenhang Lamka, Lower Lamka Cemetry, D. Phailien, UBI bank kimvel leh  Joute Veng, Zomi Colony, Minister V. Hangkhanlian compound, Mannuamching DC/Pherzawl Compound leh Tunnu Nursing School Camp sung ahi. JE akon kivendoh nading in Routine Immunization chapang lha 9 ho lou jong anakap uvin ahi. CCpur Dist. jong JE um theina mun Epidemic District khat ahi jeh in Adult Vaccination jong anei uvin, tuhin IDSP in JE leh Dengue vetsui natoh kisai in District Public Health Laboratory mun’a manbei in Lamka mun ma ma’a test akibol tan ahi.

ZRA faction teni kikah a boina ana soh

Ccpur, July 31(ET): Tuni nilhah lam nidan 10 vel in ZRA sunga Calvin le Thanglianpau group teni kikah a boina ana soh in ahi.

Thuso kimu dungjui in Calvin group in Hebron Veng a Thanglianpau group mikhat ana voh utoh lhon in Thanglienpau tosot ho in calvin inn ana hal lha kigo uvin, police in aga phal na a mipi ho chun police ho gari chu ana suse uvin ahi.

Hiche thilsoh a kitong kha phabep chu Imphal lam a ahin po uvin ahi akiti. District police le Assam Rifles ho in boina chu suh thip dingin panlah na ananei uvin ahi. Thanglienpau tosot na nei ho in Calvin ang a Thanglienpau cadre khat vo ho chu ahin pehlut ding in thupeh ana nei uvin ahi. Tu chan in athi le akitong kha hetchet ahinai pon ahi akiti.

Galguh bol kimat thu’a KNF in hilchet na nei

Kpi, July 31(ET): Achesa July nisim 30 nikho a nitin thuso phabep a galguh bol phabep manchah toh akimat doh na a KNF cadre ahi tia ana kisei na chunga tunin KNF, Information and publicity secy. Lh Stephen in hilchetna ahin nei in ahi.

Kiloikhomna akon thuso kimu chun asei na a akimandoh ho chu KNF cadre ahi pouvin chuleh akimandoh manchah jong KNF ho a ahi pon ahi akiti. Akimandoh ho achesa July nisim 22 nikho a Kangchup Chiru khomun a KNF PRO khat kitha na chunga panlah na anei ding u atahsan loudan ujong kiloikhomna in hetsah na ahin nei uvin ahi.

Akiman Kuki galguh bol ahi lou le KNF tia ana kisei ho chu KNF PRO pa thina case kha thei sah na a kiphondoh na ana kinei sah thu ham tinjong KNF in ginmo na anei dan u tahlang na ahin nei uvin ahi.

Babysana thi thu a themmona neiho gotna peh dinga CM Biren in ‘Passing Out Parade’ a sei

Imphal, July 31(ET): Chief Minister N. Biren Singh in Standard Robarth School a kai simlai Ningthoujam Babysana thi hi sorkar in thupi tah a agel ahi’in chule themmona neiho gotna apeh ding ahi, tin 5th Batch, MR/IRB/CP Followers (Male) Passing Out Parade kibol na Manipur Police Training College, Pangei a aseiyin ahi.

Chief guest a pang CM in ahoulimna a thukholna neiya agency hon thuthah ahetdoh jouse hi niseh a mipi ahetsah thei ahipoi, tin aseiyin chule JAC member hojong avel vel a keima tah in kakimupi ahitai, ati. JAC umna a video coverage bol a Babysana thilong post mortem nivei bol dinga sorkar in phalna anapeh ahi’in chule CBI in case alah nadinga lekhathot jong kapeh ahi, tin CM in aseiyin ahi.

School Fagathansi mission noiya dangka crore 33.52 lut a first phase a agom a school 25 kisa ding ahi, tin aseiyin chule tukum August nisim 7 teng leh akisei school ho sah pan nadinga Foundation stone kitungdoh ding ahi, ati. Assembly constituency jouse a school 60 kisa ding ahi, tin aseiyin chule sorkar in kitepna anei jouse tuchan a abulhit jing ahi, ati. Churachandpur, Chandel, Tamei, Chingai leh adang dang a go twi khol nading (Rain Water harvesting) project jong kipan ahitai, ati. Tua sorkar in athu a bou hilouva anatoh a pohdoh ding tupna anei ahi, tin CM in aseiyin chule mipi hon police toh kiloikhomna anei apachatna thu aseiyin ahi. Police department achesa kum ni sunga hetthei tah a akikhel e, tin aseiyin chule Thangmeiband munvel a Tuesday nikho thilsoh a bomb kisuhpoh demna aneiyin, themmona neiho got na peh dinga aseibe in ahi.

College a kon tuni a agom a pasal 567 in pachan doh na anei ahi’in, lolhinna neiya personnel jousen vangphatna anei diuvin CM in aseiyin ahi. MPTC Director RK Tutusana in athah a kilalut ho kihahselna aneisah in ahi. Chief Minister Biren amun alhun lhun a ‘guard of honour’ vetlhahna aneiyin chule Parade Commander Tongbram Suresh Singh lamkaina a platoon 14 in march past abol in ahi.

CM in trophy leh certificate jong hopdohna aneiyin ahi. Kh Gobin Singh, 7th IRB, Heirok Part-II in Best in Physical Training, Tongbram Suresh Singh, 6th IRB, Ngaikhong Khunou in Best in Drill, Isak Lianminthang Samte, 1st IRB, Zenhang Lamka, Jiribam in Best in Weapon, Chukeilung Gangmei, 5th MR, Khongjaron Duigailong in Best in Musketry, Meisnam Sanjoy Meetei, MPTC, Pundongbam Awang Leikai in Best in Ondoor chule Suresh Singh, 6th IRB, Ngaikhong Khunou in Best in Over-All trophy asang uvin ahi.

Kin-gon a CAF & PD Minister Karam Shyam, Water Resources Minister Letpao Haokip, PHED Minister Losii Dikho, Tribal Affairs and Hills Minister N Kayasii, Forest Minister Th Shyamkumar, Deputy Speaker K Robindro, Deputy Chairman State Planning Board S Rajen, MLA ho, DGP chule police official luboh ho leh lolhinna neiya personnel ho insung mite jong apang uvin ahi.

Khangabok a twilam le nala ho kisuh theng a konna phaileiya twi alonglut tai ; MLA Surajkumar

Thoubal, lhamul 31 (Et): Sangaiyumpham lhang in ahop, Khangabok part  III le akimvella um gam ho hi phailei bolna kimang ahin, twisam lah na dia hi kinai cha aum Nungphou twikholna um ahi.

Nungphou dam sunga hin wangjing  vadunga twi ho longlut ji ahi, hinla twi lonna dinga kigong  twi lam chuleh nala ho hi anen aboh akikhol jeh a twi long thei talouva phat sottah aum tan, phailei pari 2500 vallin twi mulou va aumjeh a lou bolho lungkham na aum laitah uva, MLA Okram Surjakumar in thil jouse umdan ahethem jeh in,  twilam leh nala suhtheng na natoh ama tah in alamkai in ahi.

Ama pilna le chihna vanga tua hin phailei pari 1000 val in twi aphatchan amu thei taovin ahi. Amahi opposition party Congress sorkar noiya natong hijong le. Tua sorkar mopo ho dem louva, atoh dia lom, achih gilna lhang phong tah le itcha louhella apoh doh jeh in Avella cheng mipi hon pachatna sangtah apeovin ahi. Chuleh ni 10 sunga hi twilamma twi phatea alon jing leh go ju hih jong le phailei sunga hi twi kilhasam talou ding ahi.