Neh le chah ho sang’a Gari thao khohjo ta (Aug 31, 2016)

Neh le chah ho sang’a Gari thao khohjo ta (Aug 31, 2016)

212
0
SHARE

 Thaopo gari tol (driver) hon tua pat ‘security escort’ pum’a chedi (gari toldi) hijongleh katol lou diu ahitai atiu hi bandh le Blockade aumteng suongchang leh gophel chang ne’a apan-gun set jiuva akitongkha atam ji jeh’u ahi. Tuchung police recruitment thua Bandh le Blockade kibolna’a jong hi police ventupna nuoiya neh-le-chah po leh Thaopo gari ho govt in alhaisah vang’a bandh/blockade bol hon suong’a thilpo/thaopo gari ho aseji teng’u leh akitongkha chu Driver ho mama ahijeh-a Driver hon kiphinna ahinnei kit u ahitai. Economic Blockade akitileh thil-le-lo sum’a kicho jouse kipohle khatan tina ahin hiche’a hi mihem’a dia thilkhohpen lah-a neh-le-chah, don ding ho jouse jong jao ahi. Ahin Manipur’a economic blockade akibolteng leh neh-le-chah po Truck leh gari dang-dang ho sang’in thaopo gari hi govt nin akhohsahpen leh Blockade bol hon atuppen ahikit’e. Hiche hi gari thao – petrol leh diesel umlouva tulai nitin kimanchah ahahsat maimai hilouva ahitheilou tobang ahitah jeh ahi. Petrol leh Diesel thao hi gari lhainadi bou hilouva machine tamjo lhaina ahijeh jong ahi. Tulai office kiti phot leh thilsemna (workshop) holeh thil kijuohna dukan hojeng’a jong Electric mei kimang ahikitne. Imajousea Electric mei kimang hi petrol leh diesel aumlouleh hithei kitlou ahi. Khantouna leh inchen-louchen lang’a machalna jeh’in jong tulaijin gari nei jong atam lheh tan, lamlen dung’a gari lhaile jong kipel metmut jengta, phaitol (Imphal khopi) deh-deh gari tambeh set jeh-a gari ngahnadi (parking) leh lamlen hoa gari kipelnadi mun umtheilou leuva tam ahitai. Hiche jeh a hi mipi’n petrol le diesel a-ngaichatna hi anchang le daal ho ki ngaichat sang’a khohjo bang ahitai. Manipur keu hilouva tulai gam khangtou jep hoa hi petrol bou thupipen hidoh ahitah jeh-a vannoi muntin’a America-ten gal abolnau jeh thupipen jong hi thao (petrol) putna (tamna) gam vaipo ho athunuoi uva koidi adeijeh u ahi.

 Lha khat lang Blockade aumtengleh anchang le thildang dang man akalji vang’in sum umlaisea chohding thil ho um ahi. Ahin Blockade ahungsot thimleh mipi gah mutheipen hahsatna chu gari thao lhom jeh-a Petrol Pump hoa thao themkhat chodia gari le mi tamtah tah akiguolji hi ahi. Bandh, Blockade ahung umteng thaopo gari ho atumbeh-a security escort kikoitambe ahi. Ahin security ijat in Truck le thaopo gari ho jui jongleh bandh, blockade bolhon gari suong’a aseu ham, gophel a akap ham teng uleh khohelou Driver leh Handyman ho akitongkha leh molthoh-a panlo jiu ahi. Soung le gophel mang’a gari sep, gari kap ji hohin Driver leh Handyman ho atup u hilou, atup uchu ima alophahlou u govt a thunei vaihom hojoh ahi. Driver hohi Jong thohdi Ngaovin athoh athojiu ahijeh in bandh le blockade tengleh aloutheilouva thilpo gari lhai Driver hohi akisuhkhah’u ham athilo’u ham jongleh govt in avetjep divang ngai ahi.