NE gam ‘special status’ kipehna Article 371 kisumang louding ahi: Amit Shah

NE gam ‘special status’ kipehna Article 371 kisumang louding ahi: Amit Shah

192
0
SHARE

NE gam ‘special status’ kipehna Article 371 kisumang louding ahi: Amit Shah

Guwahati, Sept 8:  Union Home Minister Amit Shah in Sunday nikhon North East gam ho special status akipeh na Indian Constitution Article 371 lahdoh nading Centre in tohgon aneipoi, tin aseiyin ahi.

Guwahati khopi a North Eastern Council (NEC) 68th Plenary kin Home Minister in ahondohna a asei ahi’in, Union sgovernment in Article 370 hi ‘temporary provision’ ahijeh a alahdoh ahi, ati. NEC in Northeast a alhasam miho a dinga fund 30 percent peh ding akhohsah ding ahi, tin aseiyin chule Regional Planning body in 2022 kah a Northeast machal nading ‘roadmap’ agon diuvin temna jong aneiyin ahi.

Northeast gam a chonna leh pao ho dopsang nadinga NEC in na atohding ahi, tin aseiyin chule khantouna dinga Northeast gam hon pan alah diuvin temna aneiyin ahi. Lamlen, lenna lampi, twi lam ho NDA sorkar in akhohsat dan thu aseiyin, Northeast gam abon a railway leh airways a 2022 kah a kijon theiding ahi, ati. NE gam hohi agam toh tekah dinga acheng lhom ahi’in, hiche jeh a khantou sah ding hi nasatah a khohsahna kinei ahi, ati.

Gamkaiya dan dihlouva hunglut koima achen ding kiphal louding chule thingnoi douna umjom ding ahi, ati. Plenary session a Chief Minister Sarbananda Sonowal in houlimna aneiyin, NEC in Act East policy kichepina a pan lentah alahdiu chule trade, investment, tourism, connectivity leh Southeast Asia gam hotoh kiloikhomna semding akhohsah diuvin temna aneiyin ahi. NEC in Northeast gam ho kithopina achombeh a agonpeh diuvin ngehna aneiyin, chule aumsa North East Industrial Development Scheme 2017 hi phatchompi dinga aseiyin ahi.

NEC chule DoNER in gamkaiya Kendriya Vidyalayas leh Navodaya Vidyalaya asemdoh tilouva medical college jong asem be diuvin temna aneibe in ahi.

Rape case a ngohna kinei khat melhetlou hon kaplih

Imphal, Sept 8(ET): Melhetlou meipum choi phabep in Thanga Heisnam Leikai, Bishnupur distrist a mikhat ana kapuvin ahi.

Thilsoh hi tuni nilhah lam nidan 3:30 vel hidin akiseijin ahi.

Akikap pa chu Heisnam Lanboy S/o Heisnam Budhi le Heisnam Binarani ahi akiti. Akikap kha pa hi ningkum a rape case khat a ngoh na kinei ahi.

Melhetlou ho in Lanboy aluchang, angong, a-oi, amal, akhut le a op ana kap peh u ahin hospital ana kilhut vangin ana mollem tan ahi.

YPA in police ho chaval na demna nei

Ccpur, Sept 8(ET): Young Paite Association General Headquarters achesa September nisim 5 ni jaan nidan 10 akon jaankim nidan 1 channa police inmuntin bulu na ana nei utoh lhona YPA member 3 ana voh na chung uva demna sangtah ana nei uvin ahi.

YPA member ana ki bulu ho chu T. Thangkhanthum akum 20 a upa, apa min T. Ginzalal, Pearsonmun akon, Pauthianmung, akum 37 a upa, apa min T. Thawngzatuan, Elim Veng akon le Paumuanthang, akum 37 a upa, apa min T. Thangzatuan, Peaarsonmun akon ahiu vin ahi.

Kiloikhomna in demna thuso ahin nein a uva khopi sung a chamna le lungmonna um na dinga kikoi police in hitabang a milham ho chunga cha val na anei na chunga demna sangtah ahin nei uvin ahi.  Kiloikhomna in hiche ho thum vo a pang police ho atoh na akon uva kah lhah a aum na ding uvin hetsah na ahin nei uvin ahi.

Fund lhahsam vanga Ukhrul government school a jilkung hon simlai ho dinga kiphalna lentah neiyu

Ukhrul, Sept 8(ET): Themjil hina a apam a jong amopohnau aboljing jeh uva Ukhrul government school a jilkung hohi simlai chule nu le pate ho dinga kitilkhouna sangtah a aum uvin ahi.

Sorkar a kon government school kitup tah a chepi nadinga fund alhahsam vanga jilkung hon simlai ho themjilna pha pehna dinga lung lhahdah na neilouva, lekha, uniform ahilouleh mid-day meal chohna dinga amaho sum pohdoh ding chan a kiphalna aneiyu ahi. Independence Day nikho a simlai hon go noiya parade abol thei nading uva jilkung hon kengkoh (gumboot) chohna dinga sum ana podoh uvin, School principal panna a jilkung 12 in hiche a dinga dangka 300 cheh apohdoh u ahi.

“Gumboot beiya simlai ho bonlhoh lah a kijot theilou diu ahi”, tin Theresa Chiphang, primary teacher in aseiyin ahi. Ukhrul hi Imphal khopi a kon km 81 a gamlha ahi’in, Tangkhul Naga ho chenna town thiptah chule vetnom umtah ahi. Ahivanga gamkaiya themjilna mun hoa ngaichat khoh tamtah um nalai ahi. Simlai ho nu le pate atamjo hi loubol mi, insung hahsa ahiuvin, uniform, school lekha leh pen pencil ho cho jou behseh umlou ahi.

“Chapang kum thum noilang kengchot neilouva school kai jong um ahi. Kengkoh amantam jeh a nu le pa tehon achoh joulou ahi”, tin Theresa in aseiyin ahi. Education Department in kum seh’a Ngachonmi Fund Primary School a dinga simlai khat a dangka 400 kum khat a apeh ahi. “Dangka 400 a hi sangkhol leh toka ahilouleh skirt bou kicho jou ahi. Ukhrul a phalbi lai dam khoh ahi’in, simlai ho sweater beiya school ache diu hahsa ahi”, tin jilkung Wungchuiwon HA in aseiyin ahi. Simlai sangkhol, toka ahilouleh skirt nei ho dinga sweater kipe ahi, ati.

March 2019 a jilkung hon simlai ho gojuh laiya manding thil boldinga kigotna aneiyu ahi. School a kon metre 300 a gamlha mun a Savio School kiti Catholic Church in abol um ahi’in, hiche a hi aneijou insung hon achate asol ahi. Tukum hiche school principal in simlai ho dinga uniform thah man dinga aphondoh ahi’in, hiche hi phat gomkom a government school a jilkung hon alah uva, Savio School uniform lui ho chomkhom dinga thu ahil u ahi. Nu le pa chule simlai tamtah in amaho uniform lui apeh uva, lha kichaiya sangkhol lum asan, toka leh skirt 60 val achomdoh u ahi.

“Sweater khat, nih khat, ribbon, notebook ni, pencil, gumboot chule kengmoja jong ka jilkung in eipe e”, tin class 4 simlai Leishichon Hongray (10) in Independence Day parade a aseiyin ahi. Sorkar in midday meal leh lekha chohna dinga fund agon hi aphat seh a kimulou ahi. School Principal S Tammila in, September lha ahitan, kum akichai gotan ahivanga 2018-19 a dinga government fund kamu loulaiyu ahi. Simlai hon lekha asimthei nadinga keihon keiho sum a textbook kachoh u ahi. Class sangjep hon aneojep ho lekha apehson diuva kasei nau jong um ahi. Midday meal a nehding hohi ken keima sum a kachohna phat atam’e”, tin aseibe in ahi.

Fund kamu teng ule jilkung ho sum kasah jiu ahi, ati. Sorkar in Mathematics, English leh Tangkhul (Ukhrul gam pao) subject a lekhabu hibou (primary school syllabus) bou apeh ahi. English Grammar, GK leh Moral Science ho apeh louvu ahi. “Umchan pha atho diu deina a hiche hojong kahil u ahi’in, sorkar in apehlou textbook ho akichoh jou aumvanga akichoh joulou um ahi’in, amaho dinga keihon kachoh peh u ahi”, tin jong aseiyin ahi.

Hahsatna tamtah aumvanga school a regular tam cheh ahitai. Jilkung ho panlahna nu le pa tehon akipapi jeh uva chate ho themjilna angaisang cheh cheh uva, school a achate hin thahlut a jong umpan ahitai. Hiche hi tu masanga anaum khalou ahi. Jilkung hon kipehna sangtah neijong leh sorkar in panmun lentah anei atohdiu ahi, tin Masoyo Hunphun Awungashi, Charkha Development Communication Network article a kisei ahi.

Sangakpham vengsung mihon NH 2 lamlen khah u, Sept 12 teng kiphinna pat kit dinga gihna neiyu

Imphal, Sep 8(ET): Sangakpham, Imphal a cheng hon lamlen akha jeh uvin Sunday nikhon NH2 a gari lhai aboiyin ahi.

Lamlen phatlou jeh a gamkai mihon hahsatna ato ho thu jeh a avengmi hon lamlen akha u ahi. Lamlen kikha jeh a inter-state bus panna a gari lhai nasatah in aboiyin, jingkah a kon lamlen akhau ahi. Police hon pan alah uva,numei atamjo panna a kiphinna bol ho ano jouva lamlen akihong kit tan ahi. Ahin, September nisim 10 chan phat atep uvin, kiphinna sangtah boldinga gihna anei uvin ahi.

“State sorkar noiya um mopohna nei hon phat kitep sunga lamlen semphatna natoh apat louleh September nisim 12 nikho a kon lamlen kikhah ding ahi”, tin Chingmeirong mamang Leikai Meira Paibi Lup member W Usha Leima in aseiyin ahi. Highway a hiche lamlen kah hi Public Works Department in avettup ahi’in, lamlen aphatlou na asot tah vanga asemphat nadinga natoh umlou ahi, tin kiphinna bol hon asei uvin ahi. Lamlen akhut hin tahsa damtheina jong atohkhah ahi, tin Usha in aseibe in ahi.

Sagolmang a District Hospital sah dinga PDCC in ngehna nei

Imphal, Sept 8(ET): Peace and Development Coordinating Committee (PDCC) in Sagolmang a District hospital sah ding thu a thunoh suhchen ahitoh kilhon a Sagolmang a hospital sorkar in asem dinga ngehna anei uvin ahi.

Manipur Press Club mun a Secretary, PDCC Th Hemjit in thuso miho akimupi na’a, 2011 kum a Sagolmang a Hospital sahna ding Foundation stone tundohna um ahi’in, natoh akipat loujeh a kiphinna chom chom ana um ahi, ati. Patta nei phabep in soi akailou jeh a natoh khongai ahi tihi hetdoh ahi’in, sorkar in patta neiho soi alah a chule aganna thei pen a hospital asah jou diuva PDCC in ngehna anei ahi, ati.

District hospital hi Patta neihon soi akaisoh loujeh a Kiyamgei a kichon ahi, tin Hemjit in aseiyin ahi. Hiche phat sunga MLA Lokeshwor leh atohkhompi hon PDCC agih uva chule PDCC in District hospital hi Kiyamgei a achon ahi tia jouthu athe u ahi, tin aseiyin ahi.Vigilance Department in phatah a kholna anei jouva MLA pa insung miten gam hi mipi dinga apeh u hilouva tho akaiyu ahi, ati. Boina thu suhchen ahitoh kilhon a Sagolmang a District Hospital chon kit dinga ngehna kinei ahi, tin Hemjit in aseibe in ahi.

KNO/KRA Works and Projects Director thi tamtah in lunghempi

Kangpokpi, Sep 8(UNA): Sunday nikhon Kangpokpi district a N Lunkhomang Hangshing @ LH Figo, Works and Projects Director, Kuki Revolutionary Army (KRA) thi vuina kin anei uvin, kin gon a Rev. Lamkeng Lhouvum, Pastor, KBC Centre Church Kangpokpi in Alexander the Great in ‘wish’ thum aneiho thu aseiyin ahi.

District Hospital Kangpokpi a jan nidan 11 don a hetman louva Cardiac Arrest jeh a thi ahi. Pastor pa in thi vuina kin a doctor thempen honjong mihem dam sah nadinga tha aneilou ahi’in, leiset a sagoh keuva ipen bang uva ima choi louva ikile diu ahi, tin aseiyin ahi.

N Lunkhomang Hangshing hi September 27, 1964 kum a Hengbung kho, Kangpokpi district a peng ahi’in, Singkhokam Hangshing leh ajinu (L) Lamminnei Hangshing chapa tahpen ahi. Thi lhahna kin a ahop u lekha a kisei dungjuiya Lunkhomang hin cha gup anei ahi’in chule mi ngailutna nei, gam ngailutna nei mi anahi, ati. Hengbung Youth Club a kum phabep President panmun atuh a chule KBC Centre Church Kangpokpi a 2005-6 kum a Mission Secretary anahi ahi. Gam leh nam ngailutna sangtah aneijeh a state chule centre sorkar toh kihouna sem a Kuki Revolutionary Army a lut a chule athi chan geiya Works and Projects Director panmun atuh ahi. FC Khanglai Football Club a jong trustee manager ahi’in, la ngailutna nei mi jong ahijeh a Kamgunsang Sound System asemdoh ahi.

KRA Home Secretary, Jeremy Khongsai in LH Figo thu aseiyin, society a pan lahing mi ahijeh a kiloikhomna bou hilouva tamtah in angailut ahi, ati. KRA Gamnom camp a jana vetsahna akipe in chule Assam gam panna a kiloikhomna unit jousen thilong nam pon a atom ahi, ati. Kuki Inpi Manipur, Kuki Students’ Organization leh SoO a pang KNO/KNA, UPF/KNF, Kuki politician, bureaucrat, intellectual, GUDUP, loi le gol chule insung mi tamtah kin gon a apang uvin, Kangpokpi lhanmol a avui tauvin ahi. Athi lunghempina a Saturday jan a kon social media a kiloikhomna chom chom in lunghempina thu asei ahi.

Chandrayaan 2: Vikram, contact thei in aumtai tia ISRO chief in sei

New Delhi, Sept 8: Chandrayaan-2 Vikram module ase hidia ginchat um chu nikhat jouvin, contact kit thei ding dinmun in aum tai tia, lander hi lunar surface a pohlhah ding lunggel kinei chu land bolding tia natoh ache lhah petna chu kihata valla ase abal um hinte tia ISRO chief K Sivan in PTI thuso lakhom ho henga sei.

Prime Minister Narendra Modi vanthamjolla lhathah sung lutna tohgon Chandrayaan-2, in japi lungthim atongkha sohkei yin, mission lolhing hen losam jongle jongleh japi lunggel in agel dan achomcheh ahitai tin Haryana gam’a BJP’s ‘Vijay Sankalp’ rally a chun aseiye.

Achesa September nisim7, jan chun, 1.50 am second 100 jouvin mipi te emutna a konnin, ISRO in athoukhang in, gamsunga dia kipana tah apodoh e tin aseibei.

Doordarshan thuso miho th kihoulimna nei Sivan in kal ni sunga hi lander kihol mo pa hi athah a contact ahikit thei na dia lampi kingai to ding, echanna lolhingding ham vang akihepoi hijongleh main spacecraft, Orbiter vang lhathah sunga 100 km channa data lahthei chan ahin lahding kumkhat sunga boilouva leng le thei ding ahi tin asei bei.

ISRO mission hi lolhing hih jongleh National Aeronautics and Space Administration (NASA) ten vang Vanthamjol a natoh ahah dan akihe in pachat na sangtah akineiye tin twitter mangchan pachatna thuthot anei uvin ahi.

Chandrayaan-2, hi Chandrayaan-1 mission tohgon banjop dia kisol ahin, kum 2008 kumma kiphatsah’a dangka 978-crore lutna top scientist hon ahin boipi uva,  orbiter, lander leh rover umkhom ahin, lhathah sunga lunar surface leh exosphere simdia kisol ahi.

IAS officer Kashish Mittal Arunachal’a transfer ahijeha resign kibol

Guwahati, September 8: IAS officer Kashish Mittal, NITI Aayog tohgon noiya lamkai ahinna a konna Arunachal Pradesh a transfer amujeh in atoh na munna konna hai na lekha apetan ahi.

Mittal hi NITI Aayog noiya additional principal secretary ahin,  vice-chairman Rajiv Kumar toh tongkhom lamkai khat ahi. Amahi  AGMU (Arunachal Pradesh-Goa-Mizoram-Union Territory) cadre IAS officer khat ahin,  ThePrint report, thuso miho a konna hetsah dungjuiya Miital hi NITI Aayog tohgon noiya tongnom ahina banna, amahin transfer deilou jeh a sorkar toh kilungnopmo ahi tin jong thulhut akimun ahi.

Achesa kum 2016, a jong chu Mittal hi  Chandigarh aposting kipe ahin aman Central Administrative Tribunal (CAT) henga petition apen ahi.

Tumasan jepchun IAS Officer 2 Kannan Gopinathan leh Sasikanth Senthil in jong ‘denial of freedom of expression’ chuleh ‘democracy’ jong amin in bou akipei tia atohna mun lhon a konna hai ahilhonne,  IAS officer Gopinathan in Jammu and Kashmir sunga Article 370 kilahdoh deilou jeh a hai ahin chuleh

Gopinathan, hi Power department of the Union Territories of Daman and Diu, and Dadra and Nagar Haveli noiya secretary ttoumunna konna hai ahi.

 2009 batch Karnataka cadre IAS officer, S. Sasikanth Senthil, jong deputy commissioner Dakshina Kannada district, toumunna konna hai kit ahi, amahin, India kivai pohdan hi democracy in aki chepoi, dan dih tah in akijui poi tia hai ahi.