National Education Policy 2020 thua Video Conference um; New Education Policy-2020 hin...

National Education Policy 2020 thua Video Conference um; New Education Policy-2020 hin India themjil na lama thilphachom tah leh kikhelna lentah ahin lhut ding ahi tia Manipur Governor in s

154
0
SHARE

National Education Policy 2020 thua Video Conference um; New Education Policy-2020 hin India themjil na lama thilphachom tah leh kikhelna lentah ahin lhut ding ahi tia Manipur Governor in sei

Imphal, Sept 7(ET): Department of Higher Education, Ministry of Education, Government of India saina noiyin Governor holeh Lieutenant Governors ho dingin New Delhi ah Video Conference chu ‘Role of National Education Policy (NEP) 2020 in Transforming Higher Education’ kiti thupi mangcha in ana neiyun ahi.

Phat kiman na sunga chun phatbih chom chom in ana kikhen in, phat hondohna, Governor leh Lieutenant Governor hotoh kihoulim khomna, Education Minister of States and Union Territories hotoh kihoukhom na, atumbeh a NEP-2020 thua kihoukhom naleh Technical Session leh lunggel seikhomna phat ana um in ahi.

Governor leh Lieutenant Governor hotoh kiloulim na phat sungah Governor of Manipur, Dr. Najma Heptulla in houlimna phat aneina achun New Education Policy-2020 hin India themjil na lama thilphachom tah leh kikhelna lentah ahin lhut ding dan ana phongdoh in, hiche tohgon hi hop lentah, thengtah leh khonung changei musaona aneitoh kilhonna gamsung a dinga khonung khantouna ahin lhut tei ding ahi ati.

Hiche Policy hi kum 30 masang peh a kon a thulhuna ana kineisa ahitan, amasapen in kum 1986 kum a ana kisem a, 1992 kum a suh lamdang leh semhoijep in ana um in ahi. Hiche phat lai chun socio-economic lampang ah kikhelna lentah ana lhut tan ahi. Hijeh chun education lampanga 21st century ahitoh kilhon na gamsung mite dinga suhhat be ding ahi. Quality education chuleh chihgil na mangcha a thilthah thah semdoh leh boldoh na lampang leh kholgilna lampang jong India in hetna chihna lampanga super power ahi nadia khompi khat hung hiding ahi. Hiche toh kilhon a Education lampanga policy thah a kingaicha lheh e tinjong Heptulla in aseiyin ahi.

Dr. Najma Heptulla in aseibe na ah India government in jong New Education Policy hi ahina ding bangtah in achepi jing in, hiche nading ah kidoh tuona, aching athem ho lunggel alah jing dan, field experiences akon, chuleh akisaipi leh aboipi dinga lom ho akon leh jildohna chum chom ho toh chepi jing ahi dan aseiyin ahi. New Education Policy 2020 hi India education thusim adia suhmil theilou hinpolut khat ahiding akinep dan jong aseiyin, huop lentah nei, thengsel leh musaona neitah a hung kigong ahina banah India gamsung ading a khonung chan a khantouna ahinlhut ding dan aseiyin ahi.

Hiche policy hi gamsunga koi jousen lemna anei cheh toh kilhon a India hi hetna lama gam khangtou khat a kikhelna ahin peh ding ahi. India dinga kiletsapi tah leh leiset chunga chihna leh thepna ngaisang ahi na phochen khat hung hiding ahi. Chuleh school tamtah a konna hetna lhahsam jeh a simlai lekha sim jou lou leh kipaidoh tamtah ahin suhnem ding ahi. Chukit jong leh simlai ho dinga syllabus ahin suhnem jep ding, phat ong sunga ama ama thepna akon a abolthei ho hil na leh environment toh kisai jil theina simmun ho jong hiche NEP in ahuop tha in ahi. Simlai hon ama kingapchat na cheh a subject aki lhen thei dingu ahi.

NEP in Medical leh Law College tu tadi a ahuop lou thu ah Dr. Najma Heptulla in aseina ah NEP in ahithei channa educational  institution jouse huop thei dinga tohgon anei jing in chuleh NEP in Science leh Arts stream jong achekhom thei nading lampi aguong jinge. Chuleh mihem hin dan leh chondan ho leh danbu kisem ho manlut dan het a kon a gamsung mi khat hina dol a chamdel a umdan leh chamna dei nam hung kondohna bulphuna a hung pang ding ahi. Governor chun hiche policy hin masanga lekhasim kipat dan le kichepi kum 6 leh kum 14 kikah hilouva kum 3 apat kum 18 sung school kaina phat a khel ding adeisah dan aphongdoh in ahi. Hiche hin chapang  kum 3 apat kum 6 sung kikah ho lekha simdan lhangpi ahin kikhelsah a kituptah a hetna lamma lungthim ahin suh bulhing jep ding ahi. National Mission on Foundational Literacy and Numeracy hi angaikhoh khat leh simlai kipatil hoding a boldoh dinga phatah khat ahi. NEP in chapang neh le don kitup tah a peh hiding, hiche toh kilhon chun aphat cha a breakfast holeh mid day meal kigonpeh hin simlai chapang ho neh leh don leh tahsa kitup tah leh lekha simna ahin hatsah be ding ahi.

Gah hetthei khat chu Prime Minister of India Shri Narendra Modi, President of India Shri Ram Nath Kovind injong conference a uop lhonin ahi. Minister of Education, Government of India Shri Ramesh Pokhriyal ‘Nishank’ jong apangin ahi. Langkhat ah, Education Minister Dr. Thokchom Radheshyam, Vice Chancellor of Dhanamanjuri University (DMU) Shri M. Harekrishna leh Registrar DMU, Dr. Nivedita Lairenlakpam hojong Governors leh Lieutenant Governors hon ‘Role of National Education Policy (NEP) 2020 in Transforming Higher Education’ kiti thupi mangcha a video conference anei nauvah Education Minister’s office chamber, New Secretariat akon in panlahna aneiyun ahi.

Xxxxxxxx

India a nikho 2 kijom ding’a Covid-19 case thah 90000 kimudoh; Agom a case lakh 42 lhing ta

New Delhi, Sept 7: Vannoiya Covid-19 natna nei anina a pang Brazil chu Monday nichun India in akhokhel toh kilhon in natna nei tamlah a India hi vannoiya a ni na in apang tan ahi. Hiche hi India in nikho anivei nadinga Covid-19 case thah 90,000 amube toh kilhon a agoma lakh 42 ahinpha akon ahi. Hiche natna nei hung hakalbe na hi khopi chom chom adeh a Delhi leh Bengaluru a metre services hung kihondoh akon ahi.

Nidan 24 sunga India sunga natna health ministry in atahdoh na ah India sunga natna nei jouse lah tam pen leh ja lah a 60 per cent tobang hi Maharashtra akon ahi in niseh a 21.6 per cent tobang anei jouvin, aban ah Andhra Pradesh in 11.8 percent, Tamil Nadu in 11 per cent, Karnataka in 9.5 per cent leh Uttar Pradesh in 6.3 per cent cheh anei uvin ahi. Maharashtra in natna nei mong mong 26.76 per cent tobang hi India pumpi a natna nei ho lah ah aneiyin, Andhra Pradesh 11.30 per cent, Karnataka 11.25 per cent, Uttar Pradesh 6.98 per cent leh Tamil Nadu 5.83 per cent ahiuve.

Hiche state 5 ho hin agom in India sunga natna nei lah a 62 per cent tobang hi hiche state 5 akon ahiuve. Ministry in aseina ah adamdoh jat hi 32.5 lakh tuni chun apha tan, nidan 24 sung chun mihem adamdoh 69,564 lhakang ahi tauve. Hiche toh kilhon chun adamdoh mong mong 77.31 per cent alhing tan ahi tin thuphon chun aseiyin ahi.

Adamdoh jat 77.31 per cent a ahung kal toh kilhon in nidan 24 sunga mihem 69,564 ho anat nauva konna hung phatdom utoh kilhon in adamdoh kisim mihem 32.5 lakh apha tan ahi tin Monday nikho chun health ministry in aphongdoh in ahi. Natna chom chom toh kitho a thina toh jong alhom jeo tan,  1.7 per cent in akhesuh tan ahi.

Nidan 24 sung chun, Andhra Pradesh adamdoh atampen in, mihem 11,915 apha in ahi. Karnataka leh Maharashtra ah 9,575 leh 7,826 apha cheh in ahi. Tamil Nadu in adamdoh 5,820 aneiyin, Uttar Pradesh in 4,779 aneyin ahi. Hiche state 5 akon in nidan 24 sunga damdoh agomin 57 percent alhing in ahi.

Ministry thuphon in aseibe na ah ‘test, track and treat’ kiti tohgon mangcha a akinthei lampen a ginmo ho holdoh leh test bolna akinei na ban ah Ambulance leh amun mun a panmun hoitah kisem a vetkol nading mun ho kituptah a semtup ahitoh kilhon in natna a kon a hung damdoh hung kibelap jing ahidan aphonhdoh in ahi.

Monday ni chun India a COVID-19 kisimna ah mihem 42 lakh ana lhing in chuleh nikhat sungin mihem 90,802 ana kimudoh in ahi tin Union health ministry data chun ana tahlange. Tu le tu in mihem agoma natna nei 42,04,613 apha tan chuleh athi 71,642 aphatan chuleh natna chi chom chom toh kithokhom a thi 1,016 aphatan ahi.

Xxxxxxxx

NGO 15 hon draft proposal pehlutna nei

Imphal, Sept. 7(ET): Civil society organizations chom chom 15 hon Principal Secretary Social Welfare, Government of Manipur hengah Manipur State Policy on Substance use 2019 ading in draft proposal pehlutna ana neiyun ahi.

Hiche draft proposal pehlut na nei CSO 15  ho – All Manipur Bar Association (AMBA), All Manipur Students’ Union (AMSU), Apunba Manipur Kanba Ima Lup (AMKIL), Apunba Iramdam Maheiroi Sinpanglup (AIMS), Coalition Against Drugs and Alcohol (CADA) ,Community Network for Empowerment (CONE), Democratic Students’ Alliance of Manipur (DESAM) ,Eramdam Kanba Abunba Lup (EKAL), Extra-judicial Execution Victim Families Association, Manipur (EEVFAM), Human Rights Alert (HRA) ,League of Indigenous People’s Up-Liftment (LIPUL) , Loumi Sinmi Apun Lup (LOUSAL), Manipur Students’ Union of Kangleipak (SUK), Users’ Society for Effective Response (USER), Manipur Women Association for Socio-Economic Development (WASEDEV) in ana pehlut ho’u ahileh:

Manipur Government in Narcotic Drug and Psychotropic Substance Act (NDPS), 1985 noiya Manipur Narcotic Drug and Psychotropic Substance Rules phatah a asem ding.

Manipur hi India sunga drugs lampanga asuhkhah pen khat ahi. Hinla Manipur Government in NDPS noiyah hiche drugs a sumkolveina thuh nadin rule phatah leh kitup tah asem naipon ahi. NDPS Act noiya enforcement agency hon ajui diu leh achepi diu dan phatah nei angaikhoh pen ahi.   Hiche drugs a kiveina in aha suhkhah behseh lou state/union territory gah hetthei Sikkim, Chandigarh etc hon ama manchah ding kilomtah Act leh Rules phatah tah akisemdoh tauvin ahi. SOPs jat jat kichehlou mangcha a hitobang drugs a kivei ho doudal jing sanga dan kiuhtah neidoh a enforcement agencies honjong bailam tah a doudal na aneithei nadiuvs lunggel sepkhom thei police officer, dan het gilna neiho, NGO ho leh CBO hotoh kitho a boldoh loi ding ahi.

Drugs mangcha a sumkolvei na len tah tah leh kailhanga crore val kimandoh ho chungchang thu kikholna leh migun ja um tah tah kigol khah na ho a tahsan umtah NCB, CBI ahi lou leh NIS ho pehdoh a High Court of Manipur in jong giltah a akithopi a avetsui jing ding.

Migun ja umtah tah leh millitary a natong len tahtah ho drugs a sumkolvei na thua kigol na nei ho chungchsng thu tini chan in kicheh tah in kholdoh aum naipon ahi. Tulai tah a chejing Lhukhosei Zou chungchang leh gamgi chin a hem le thal thua a kholchilna asuhsah umlouvin a kiting den in, kholchilna neiho chungah tahsan na alhom tan ahi. Hiche jeh chun mipi in Dan le thupeh ho tahsanna anei kit thei nading hi apoimo in, kintah leh thengthou tah a suhchen hi apoimo in ahi.

 Home Department, NCB, NGO, CSO leh hetgilna neiho panna a article 2.8 dungjuiya Commission committe semdoh a thil phalou hung kipolut(supply) kibol ho vetsui a suhlhom ding.

Supply ahung lhomjep a ahung nemjep thei nadia Law enforcement agency hibou

nganse lou ding ahi. Kigolna neiho matdoh nading ahi teng le bou civil society ho ngeh ahiji in, kholchilna akipat teng leh civil body ho notthap in koi ahijiuvin, hetphah ahiji tapouve.

Xxxxxxxxx

Manipur a covid-19  case thah  84 kimube; Mi 194 damdohbe

Imphal, Sept 7(ET); Manipur a COVID-19 natna nei positive mi 84 akimube toh kilhon in tule tu a active cases hi 1710 alhingtan ahi.

Tuni  State Health Department apat thulhut kimu dungjui in mi 84 aveithah kimudoh ho lah a mi 64 (48 Pasal, 16 Numei)  hohi  milham ahiuvin, Mi 20 hohi Central Armed Police Forced(CAPF) akon ahiuve.

Tuni Manipur a positive case kimudoh namun holeh amijat ho VRDL JNIMS -20; Thoubal – 13; Kangpokpi – 1; Shija Hospital – 2; Imphal West RAT – 5; Imphal East – 4; Senapati TreuNat – 1; Advance Hospital – 1; Jiribam – 7;  CMC -1 ; RIMS RAT – 5; Bishnupur -1; Kakching – 1; Samaritan Hospital -2; Babina Diagnostics – 10; Raj Medicity- 4; Churachandpur -3;

A distirct dungjui a seidin tuni a veithah  ho Imphal West-14, Imphal West -16, Kangpokpi – 2, Chandel – 3, Noney – 3, Thoubal – 8, Jiribam – 7, Kakching – 1, Chuachandpur -5,  Bishnupur –7.  Hicheng holah a Mi  13 hohi  (Bishnupur – 4, Imphal West – 5, Churachandpur -3, Chandel – 1 ) state dang apat Manipur hunglhung ahiuvin adang  51 hohi ahileh local mi state danga kholjin na neikhalou ahiuvin ahi.

Test kibol jou a positive a kimandoh jouse tuni ma ma in Covid Care Facilities mun ho ah poh lut in aum uvin, Chukit le vangphat umtah in tuni Covid-19 jeh a thina toh koima aum pon , mi  194 jong  Covid Care Facilities mun apat damsel in ahung kilha doh in ahi.

Manipur a Covid-19  jeh a thina toh agom in mi 38 alhingtan ahi.

Tuni a Covid Care Facilities apat hung kilha doh namun holeh mijat; CAPF(32), CCC Lamboikhongnangkhong(31), Senapati(1), Jiribam(16), Kangpokpi(2), UNACCO(64), Noney(1), CCC Thoubal(28), JNIMS (3), JNV Chandel(4), chule  PR Kakching(12) . Amaho cheng hi RT PCR test kibol jouvin Covid-19 apat damtheng na anei u hetdoh jou a hung kilhadoh ahiuve.

Tuni chan a State sunga agoma avei, positive hi mi 7,106( Milham – 5,395 , Central Security Personal – 1,711) Chule Covid-19 apat milham damdoh jat (Milham – 5358, Central Security Personal -1183) chuleh akijen jinglai agom a 1710 ( Milham -1184, Central Security Personal -526) ahi. Recovery rate jong 75.5% alhing tan ahi tin Manipur State Health Department hon mipi ho hetsahna aneiyun ahi.

Xxxxxxx

ZYO in emna nei

Ccpur, Sept 9(ET): Zou Youth Organization, General Headquarter in sunchang lai tah a melhetlou hon SBI Teddim Road main Branch, Churachandpur a ATM a CRA staff Arambam Ranjan kithana leh hunam a SBI sum phabep kiguhdoh na thu ah demna sangtah aneiyun, chule vangsetna toh Arambam Ranjan insungmite lunghempina jong aneiyun ahi.

ZYO in hitobang dei umlou tah igamsunga thilsoh hohi alunggel thei jousen jong demna neicheh ding injong temna aneiyun ahi.

Xxxxxxx

MGNREGS a adihlou umkit: GRS khat suspend kibol, Pradhan le member khat show cause Notice kipe

IMPHAL,  Sept 7(UNA): Mahatma Gandhi National Rural Employment Guarantee Scheme (MGNREGS) noi a dihlou tah a thil kibol hetdoh be ahitolhon in Konthoujam Gram Panchayat a pat Gram Rozgar Sahayak (GRS) mopo Loitam Erani Devi chu atohmun a pat suspend ahi lo tai.

P Gojendro Singh, Director RD & PR department in Loitam Erani Devi chu Central Civil services (Classification, Control and Appeal) rules 1965 GRS dan Rule 10 noi a suspend abol ahi. Chubanle Konthoujam GP noi a Pradhan le member ho show cause peh ding le FIR bolkhum a thonlou hel a ni 4 sung a thulhut hin pelut dia Under Secretary, RD & PR department in District Programme Coordinator (MGNREGS), Imphal West thupeh abolkhum kit ahi.

Hetding chu September 1 nia Konthoujam GP ward no 5 vil a achepet a jong RD & PR Minister Th Bishwajit in Pradhan le member kom a um muster roll a signature dihlou amudohsa DC amatah in vetlhahna anei dia thupeh ana umsa ahi.

Geldoh ding chu social media a numei khat achangseh a ni 4 na kitohsahna video tahdoh ahi a pat RD & PR Minister Thongam Bishwajit in Konthoujam GP vilna ana nei chu amun a numei nu’n achangseh a na atoh aga mudoh ahi. Numei nu’n ni 20 natoh ding phat ni 16 bou tohdia suhlhom ahi chu insung hahsa sum mu na neilou ahitolhon a na toh lou dia kisei ni 4 sung toh tei dia aseiphat a achangseh a na tohsah ahidan chu minister pa aseipeh ahi

Hitia adihlou kibol amudoh phat a Minister chun suhkhel nei ho gotna pehdia thulhuh asem pai ahi.

Hetding chu Ministry of Rural Development  in 2020-21 a ni 50 sung natoh phat agon lah a ni 22 bou natohna chelha ahi e. Hitlhon a natoh phat avatse October 2020 kah a tohchai dia minister in amopo District Programme Coordinators thupeh aneipai ahi. March 2021 chan a ni 80/90 chan natoh thei dia um hi job card noi a tohman peh nading sum kivatlou hel a um ahi e tin thulhut chun aseiye.

Xxxxxxxxx

NAB in Police constable khat kani kg 10 toh mat tha

Imphal, Sept 7(ET): Narcotic and Affairs of Border (NAB) team khat in police constable khat kani kg  10 toh anamat tha uvin ahi.

Akimandoh pa chu Torbung kailahng akon a jani a nilhah lam nidan 2 vel a ana kiman doh ahi. Kani toh kimat tha police pa chu David Onkholam  Haokip ahin, tu le tua Phougakchoa Ikhai Police Station a posting hi ahi akiti. Akimandoh pa chu Bishnupur district Superintendent of Police in suspend ding in phondoh na ana nei tan ahi.  AKimandoh pa hi Teijang, Churachandpur district akon ahi akiti.

Xxxxxxxxxxxxxxxxxxxx

Mayang Imphal Rape Case chung chang a MPCC in mona nei ho gotna lentah pehding a temna nei

Imphal, Sept 7(ET): Manipur Pradesh Congress Committee (MPCC) in state government ang a Mayang Imphal a numei suse a pang ho phate a gotna akipeh na ding in temna ahin nei uvin ahi. Hitabang thilsoh ho a mona nei ho hi ahiding bangtah le nasatah a gotna akipeh lou le maban a hung um jing ding ahi tin jong MPCC in hetsah na ahin nei uvin ahi.

MPCC vice-president Kh Ratankumar in thuso miho toh akihou limna a hitabang thilsoh  a mona nei ho hi ahiding bangtah le mipi hetding dol a gotna akipeh lou le maban a jong hung umjing ding ahi tin ana sei in ahi. Ratankumar in asei na a JAC in hitabang tohgon ho a panlah na anei na uva kipa thu ahin sei toh lhon in, insung miho ngehna jong gov tin ngailhah na anei na ding uvin temna ahin nei uvin ahi. Hetthei khat chu thilong hi RIMS morgue a kikoi nalai ahin, kihou lhah na um thei lou jeh a lahdoh lou a kikoi nalai ahi.

Hetthei khat chu kum 14 a upa numei chapang nu chu mi phabep in ana suhset uva lampi pam a ana dalhah utoh lhon a damdoh jou lou a athi ha lon jeh a ahinkho ana bei ahi. Police in thilsoh toh kisai in mi 6 lam matdoh na anei taovin ahi akiti.

Xxxxxxxxxxxxxxxxxxxxxxxxxx

Khangthah ho dia Vocational Training Program CM in hongdoh

Imphal, Sept 7(ET): Chief Minister Secretariat a pat video conference mang a Chief Minister Shri N. Biren Singh in tunia khangthah ho dia Vocational Training Program hondohna anei tolhon in boltheina thupitah nei khangthah ho gam le nam machal nadia aphachom bolding thada lou ding in temna anei in ahi.

Chief Minister in themjil banjom talou simlai le vengsung khangthah hon natoh amuthei nadia hitobang training program hin gongdoh National Highways and Infrastructure Development Corporation (NHIDCL) ho pachatna apehban in Kakching le Tamenglong a hitobang training program lolhing tah a NHIDCL in ana bol a kon khangthah hon phatchomna amu thudol jong atahlang ahi. Tu training program a pang khangthah ho hin insah, thingthembol chule bar bender ho a kichuhna aneidiu ahi e tin CM Biren chun aseiye.

Chule Chief Minister in Prime Minister Narendra Modi musaona a kon kipandoh hitobang tohgon a khangthah atamthei pen in athanop pi teng le lolhinna hung um a achamlou a India hat jeng ding ahi tia aseitolhon in kichuhna pang jouse’n khonung hoijo ahin nei cheh diu adeisahna jong aphongdoh in ahi.

Kingon a chun Chief Secretary Dr. Rajesh Kumar, Secretary to Chief Minister Shri Ningthoujam Geoffrey, NHIDCL official ho le adang dang jong apang un ahi.

Xxxxxxxx

Nupi khat ki khailihsa’a kimudoh; Police hon kholchilna panta insungmi phabep man

Bishnupur, Sept. 7 (ET) : Bishnupur District hopsung Bishnupur ward No. 8 akon Laishram (O) Banita Devi (26) chu ajipa L. Bishorjit inn mun Bishnupur Thiyam Leikai mun’a tuni jingkah nidan 6:10 vel in veranda mai’a anakhai chu mipi hon anamudoh uvin apet pet in CHC Nambol a anapui uvin ahin athisa’a anapolut ahidan thulhut chun aseiyin ahi. Chuleh hiche thilsoh jeh chun OC Nambol makai nanoi in SDPO/BPR leh Nambol Police Station akon team khat in amun anadellut pai uvin hiche gamkai/vengsung chu Containment Zone in phondoh na anei uvin ahi.

Hiche toh lhon’a Police hon jong thilsoh na mun alhun achung hiche nupi tahsa CHC Nambol a akipohdoh tah jeh chun Hospital lam joh adel uvin ahileh Hospital mun’a thina toh insung mi leh mipi tamtah in anakisukhom jeh uchun thilsoh chungthu kholchilna anei jou uvin mipi ho ananocheh uvin ahi. Chule Mobile forensic Unit Imphal West ho jong hiche thilsoh namun kholchilna nei ding anakhondoh pai in ahi. Thilsoh chung thu hi Police hon FIR No.53(9)2020 NBL-PS U/s 304B/306/498A/34 IPC noi’a jihlut na anei uvin ahi.

Alangkhat’a case tuh IO in Banita longdamsa chu RIMS mortuary a kholchilbe nading in akoitan ahi. Chuleh post mortem hi DC/BPR phalpeh na’a EM leh insung miho panna’a video coverage jong akibol in ahi. Hiche na chung chon’a Police hon ajipa, atehpi leh anaonu (pasal pa sopi nu) anaman tauvin ahi.

Xxxxxxxx

25 AR hon gaal manchah’a kivei khat anamandoh

B.Lalboi Gangte

CCpur. Sept. 7(ET) : 25 Assam riffle hon gaal manchah  joh’a sumkol vei pasal khat anamandoh uvin CCpur Police khut’a anapelut tauvin ahi tin thulhut chun aseiyin ahi. 25 Assam Riffle in National Highway jotpa Khengjang kho kom’a um Mobile check post mun’a kholchilna anei phatsung uvin gaal manchah joh’a sumkol vei hi ding’a ginmo na anei jeh uvin anamandoh uvin ahi. Mat’a um pahi Seingam Kipgen (54) S/o Tongneh of Boljol, CCpur ahin ama akon in Dk. Lakh 17 leh Vivo Mobile Phone khat, sim card 2, sum tamtah kipehto natoh jao in sum lang toh kisai melchit na register book leh amanchah lai Aprillia SR 125 Scooty registration number MN 02-4233 toh anamat tha’u ahi.

Hiche toh lhon’a 25 Assam riffle in Seingam Kipgen leh athil keu amatdoh ho jouse achesa Sept. nisim 5 nikho chun CCpur Police khut’a anapelut uvin ahi. CCpur Police injong hiche chung thu’a FIR registration number 68(09)2020 CCP-PS U/s 120(B) IPC, 7(10) Arm act. a case melchit na  ajih khum uvin ahi.

Xxxxxxx

Ranjan case thu’a kihoukhomna ana um

CCpur. Sept. 7 (ET) : Ranjan kitha nachung thu’a Senior Officers ho thupeh dungjui in tunin SP CCP office chamber mun’a JAC member hotoh thilsoh nachung’a case challhah dan kihoukhomna ananei uvin ahi. Chuleh SBI Main branch, CCpur mai’a Ranjan ngailu cheng jouse in candel light ananei uvin ahi.

Xxxxxxxxxxx

Ranjan thina chung’a kisemdoh JAC in CCpur District sung’a Innpi, Philanthropic Org. leh Student Body ho kimupi

B.Lalboi Gangte

CCpur. Sept. 7(ET) : Joint Action Committee (JAC) Against the Brutal killing of (L) Arambam Ranjan a lamkai hon tunin (Sept 7) CCpur District sung’a Innpi, Philanthropic Organization leh Student Body ho anakimupi uvin chule kihoukhom najong ananei uvin ahi. Hiche achun JAC lamkai hon amasapen in Young Paite Association (YPA) GHQ ah lamkai ho akimupi in aban in Kuki Innpi (KIC), Hmar Inpui, Zomi Council, United Zou Organization (UZO), Zou Youth Organization (ZYO) leh Joint Student Body chuleh Mizo Zirlai Pawl (MZP) lamkai ho anakimupi uvin ahi.

Hiche toh lhon’a JAC in kiloikhom na chom chom ho anakimupi phatsung uvin Ranjan thina toh kisai’a ngaidan aneiho leh panlah na chom chom aneidan hou tahlangna anei uvin chuleh tolthat ho matdoh ahi theina ding in kiloikhom nahon anungthop ding uvin jong ngehna anei uvin ahi. Chuleh YPA GHQ in JAC in tolthat ho kimatdoh nading’a kitah tah’a pan alah ding uleh tosot na nei ding’a kigosa’a um ahidan tahlangna anei in ahi. Hiche nading’a SoO ham, Non SoO ham ahilou leh gang group jong kimaitopi angai ding leh kimaito pi ding in jong aseiyin ahi. CCpur khopi sung’a chengkhom nam chom chom hohi cham naleh monna dei ngen ahi na’a hitobang thilsoh hi maban’a jong lhung da leh ti adeisah nathu jong aphongdoh in ahi.

Alangkhat’a CCpur District sung’a Civil Society Organization (CSO) chom chom in tuni JAC akimupi phatsung uvin JAC panlah na nungthop ding’a akitep nao chung’a JAC Convener, Sairam Ibungo in kipanathu aphongdoh in a hi. Government heng’a phat kitep sung’a imacha agasodoh muding aum lou leh CCpur District sung’a CSO chom chom ho nungthop na’a kiphinna chom chom pat hiding ahi dan JAC in aphongdoh in ahi. Chule kiphin na jeh’a dei umlou thilsoh aum leh Government in mo akipoh ding ahi tinjong atahlang in ahi.

“Beti Bachoa Beti Padhao” felicitation leh recognition Award kingon ana um

B.Lalboi Gangte

CCpur. Sept. 7(ET) : Churachandpur  District Administration tohgon nanoi in tunin DTC hall, Tuibong mun’a “Beti Bachoa Beti Padhao” felicitation leh recognition Award kingon ana um in ahi. Kingon achun Jin-gun in Esther Lalthankim, IFS, DFO CCpur anapang in ahi. Kingon phatsung’a chun Covid-19 doudal na ding’a panla frontline worker leh ASHA ho pachatna apeh naoban’a Meritorious Award ho hopdoh na ananei uvin ahi. Chuleh immunization bukim tah’a bolchai numei naosen ho kipapi naleh online competition phatsung’a Award sang ho kipapina ananei uvin ahi.

Hiche toh lhon’a Esther Lalthankim, IFS, in houlimna aneina’a numei ho rights suhat na ding leh tilkhou na ding’a kingon chom chom gon’a aum jing nachung chon’a tuni’a kipaman leh kipapi na hopdoh’a um ho chung’a akipana aphongdoh in ahi. Kum tamtah phatchesa ho’a numei ho jalhang leh insung chanpha’a mun neilou in koi in aum in hitobang’a numei hon hahsatna leh thetbolna ato ngaikhoh’a Government in “Beti Bachoa Beti Padhao” jao na’a kingon chom chom numei ho dopkang nading’a kingon aneiho hi mitakip in anungthop cheh’a kithopina apeh cheh ding uvin ngehna anei in ahi.

xxxxxxxxxxxxx

CCpur Police hon Aug. 3 nikho’a dukan a Dk. Lakh 7 vel man ding thil anagudoh ho mandoh ta

B.Lalboi Gangte

CCpur. Sept. 7(ET): Nehru Marg junction aum Computer leh Mobile phone kijoh na Bits World Computer mun’a achesa Aug. nisim 3 nikho’a gucha honkhat in Dk. Lakh 7 vel man ding thil anaguhdoh nachung’a CCpur Police Station a case jihlut anahi toh lhon’a janni (Sept. 6) nikho chun gucha pasal mi 2 matdoh anahi tan ahi.

Hiche toh lhon’a SP/CCpur vetsui nanoi in janni nilhah lam nidan 3:00 vel in Sub. Inspector Shominthang Kipgen, Investigation Officer; Sub-Insp. Martin Mangjahao Singson (Assisting I.O), Sub-Insp. Chinzasiam chule Police Station akon Police team hon dukan bulu Khuplianmang (27) S/o Lamkhankap of Kanaan Veng, New Lamka leh  Nangkhanpiang (25) S/o Thangkhanmuan of Kanaan Veng, New Lamka anamatdoh ahi. Amani akon chun Police hon mobile phone leh laptop jaonan thil chom chom 23 jong anamudoh uvin ahi. Chuleh Police hon mat’a um teni thudoh anei jing utoh lhon’a thil umdan kholchilna anei jing nalai uvin ahi.

Xxxxxxxxxxxxxx

Nengneimoi Baite in (L) Paokhohang Haokip Memorial Award For Excellence anakisan

CCpur. Sept. 7 (ET) : Achesa Sept. nisim 5 nikho chun (L) Paokhohang Haokip Memorial Award for Excellence chu Thadou-Kuki (MIL) subject Class-XII examination,2020 a topper Nengneimoi Baite D/O Letthang Baite of S. Gelbung, Churachandpur in anakisan tan ahi. Hiche award hi (L) Paokhohang Haokip insung miten donate abol’a Thadou-Kuki Literature Society makai nanoi’a Imphal P.K. House mun’a insung miten ana pehdoh ahi. Hiche Award hi Dk. 20,000/- leh (L) Paokhohangin Haokip in anasut lekhabu chuleh Citation ahi.

XXXXXXX

Pasal khat akengbong sa’a Jiribam railway track kimudoh

Jiribam, Sept. 7 (ET) : Jiribam District hopsung Dibong bridge noi chet’a nangboh noi’a Jiribam railway track achun pasal khat ajetlam keng ahkhomit tanlha in anakimudoh in ahi tin thulhut chun aseiyin ahi. Chuleh hiche thilsoh hi thilpo train in atah tan khahpeh hi ding ginmo na najong anei uvin ahi.

Hiche thilsoh na mun chu Jiribam PS team khat in anadel lut pai in akisukha pa chu 50 Bedded Hospital, Jiribam mun’a vetkol ding in anapolut uvin ahi. Chuleh hiche pasal pa lungbukimlou leh khojah na lhahsam na nei mi khat ahitoh lhon’a hiche kisuhchan’a asopi koima anailut aum naipon ahi.

XXXXXX

Assam Rifle hon gari toset toh ho kithopina anape

Ukhrul, Sept. 7 (ET) : HQ IGAR (South) vetsui nanoi’a um 10 Sector Assam Rifle, Shangkhak Battalion akon Assam Rifle medical Team hon Covid-19 jeh’a gamsung’a chele vale hahsat nachung’a tuni jingkah’a lam’a Ukhrul akon Phungyar jon Bolero pickup passenger khat in toset anato nachung’a first aid ding lou-le-ai anape uvin ahi. Hetthei khat chu hiche Bolero hi Ukhrul akon Phungyar ajot jing lai’a Shanshak kho akon km 5 vel’a gamlha Shangshak junction kom’a gari brake boi jeh’a toset anato ahi. Gari achun passenger 15 lah’a Ungchipem (8) leh Wunghormi (16) teni nasatah in anakitongkha lhon in ahi. Chule hiche akisukha teni chu Assam Rifles Hospital, Shangshak mun’a first aid anabol pet uvin ahi.

xxxxxxxxxxxx

Scholarship homdoh lou jeh a RNSO in gihna nei

Imphal. Sept 7(UNA): The Rongmei Naga Students’ Organisation(RNSO) in Tribal Affairs & Hills government of Manipur noiya Pre Matric and Post Matric Scholarship 2019 -2020 tuni chan a hopdoh ahilou jeh in alunglhai lou nau ana phongdoh un ahi.

RNSO thusodoh in aseina ah simlai kiloikhom hon kikhopkhom na anei nauvah tuni chan a Schedule tribe simlai ho kithopi na dinga kisem Pre Matric leh Post Matric Scholarship 2019-2020 sunga ding tuni chan a hopdoh ahilou jeh in themjilna leh nitin kimanchah na dinga sum le pai adeh a Covid-19 jeh a hahsatna tamtah atuo jing toh kilhon a, amopo thunei vaihom hon akinthei pen a hopdohna anei ding uvin thulhuhna aneiyun ahi.

Chuleh RNSO thusodoh chun asei na ah, hiche akiseiho hi nasahmo a aum leh simlai kiloikhom hon akisaipi thunei vaihom ho chunga kiphinna khaotah kinei ding ahi ati.

Hichetoh kilhon a amopo vaihom hon simlai ho gelkhona neitah leh atoh ding dol u ahin kitoh uva aphatcha a homdohna anei diuvin jong temna aneiyun, mipi injong hiche chungchang thua tosot cheh dingin jong ngehna aneiyun ahi.

Chukit leh, RNSO in academic thah ahung lhun kah ngeiya hopdoh ahina ding leh ngehna kinei ho aphat cha a suhbulhit ahi lou leh kiphinna khaotah kinei ding, amopo vaihom ho’n mo akipoh diu ahi tinjong thusodoh chun aseiyin ahi.

Xxxxxx

Moreh  ward no. 2  Mission veng Hill Tribal council Unit IV noi a covid test kibol ho negative hi u

Tengnoupal, Sept 7: Achesa nisim 3 nikho a Moreh ward no 2 Mission veng  Hill Tribal council Unit IV a kum 15 a upa khangthah khat Raj Medicity Imphal a kivetsah a achesa na a covid natna ahin kilah toh lhon a UNACCO Quarantine centre a akikoi toh lhon in veng sung a mi phabep sample ana kila a tetst kibol na ana kinei ho chu negative ahisoh kei uvin ahi akiti. Kh. Gojen Singh Chief Medical officer (CMO)Tengnoupal District  vetsui na noi a Dr. Ahongshangba Cecil, District Nodel officer covid 19 Tengnoupal District lamkai na team in Moreh ward no 2 Hill Tribal council Unit IV a um insung mi 6 le akom vel lah a um mi 8 sample anal ah uva tetst ana bol utoh lhon in tuni in result out toh lhon in negative ahi sohkei dan u hetsah na ana kinei in ahi.

xxxxxxxxxxxxxxxx

Covid quarantine centre a volunteer ding ho training kipe

Tengnoupal, Sept 7- Covid 19 Quarantine centre volunteer ho training pehan tuni in BPMU Moreh Tengnoupal District makai na noi in Primary Health centre Complex a ana kibol in ahi. Kingon achun Dr. Adhikarimayum  Arunkumar sharma, Primary Health centre (PHC) Moreh, Dr. Cecil  Ahongshangbam,  Sub–district hospital Covid Care Center Moreh le Dr. Kh. Santikumar Singh, Medical officer in-charge Primary Health centre (PHC) Moreh ho deichom in ana kikou uvin ahi. Kingon achun Moreh khopi sung a nam kiloikhomna lamkai jat chom chom ho in  panlah na ana nei uvin ahi. Moreh sunga Volunteer ho in lamlen a vah le ho vetsui na anei jing uva, kailahng dunga  thil choh na anei teng ule social distance daan ajui uva maitom phate a akitom ding dan ho u hetsah na ana kinei in ahi.

xxxxxxxxxxxxxxxxxxxxxxxxx.

Mayang Imphal a Muslim numei khat kisuh set na chunga thudih pohdoh dinga ngehna kinei

IMPHAL,  Sept 7(UNA): Manipur State Commission for Women (MSCW) in achesa September nisim 9 nikho a mi 4 in numei khat ana suhset uva ana dalhah utoh lhon a thina chan gei ana to sah u chung  a demna sangtah ahin nei uvin ahi. Commission in Manipur govt ang a agan nathei pen a thudih ahin pohdoh uva mona nei ho ahiding bangtah a gotna akipeh na ding in hetsah na ahin nei uvin ahi. Hitabang natoh hi state sunga  numei chunga khanset na natoh ho suhmang ding a tohgon kinei hotoh akito loudan le hitabang thilsoh suhmang nading a panlah na kinei ho asuhboh ahi toh lhon a ahiding dol a phate a vetsui ahi na ding in jong hetsah na ahin nei uvin ahi. Mona nei ho gotna gihtah le ahiding dol akipeh a maban a mipi ho in hitabang chon dan akon kikang se na anei na ding uva vetjui thei ding le kihil an ding gotna akipeh na ding in MSCW in hetsah na ahin nei uvin ahi. COmission in thuso ahin nei u chu Chairperson Professor Binota Meinam min a hung kiso ahi. COmission in temna ahin nei be na uva social media dung a vangset na toh nu lim koima in atah lele lou ding in jong temna ahin nei uvin ahi. Hitabang lim tah doh na nei ho hi Juvenile Justice (Care and Protection of Children) Act 2000 noi a gotna pehthei ahidang jong hetsah na ahin nei uvin ahi.

xxxxxxxxxxxxxxxxxx

Russia in India ang a Sputnik V vaccine data pe, phase 3 trial India a boldinga hetsah na nei

New Delhi, Sept 7: Moscow in Sputnik V vaccine asem u data India jong hetsah na ahin nei utoh lhon in, phase 3 trial India  a bolding in hetsah na ahin nei uvin ahi. Hetthei khat chu trail 1 le 2 ana kichai toh lhon a Moscow in jahthei ahitah dan phondoh na ana nei u ahi. Russian research institute in hiche vaccine semna ding data chu India ang a pehlut na ahin nei utoh lhon in trail 3 India a bolding adeisah dan u jong hetsah na ahin nei uvin ahi.

Hetthei khatchu Moscow akon Gamaleya Research Institute of Epidemiology and Microbiology in asem vaccine hi tu le tua Covid vaccine kisem lah a alolhing pen a kihe ahi. Hiche trial chu mi 76 chung a ana kibol ahin, vaccine dang dang sang a nasatah a lolhing ahi. Hiche vaccine semding le data kipe chung chang a Renu Swarup, Secretary, Department of Biotechnology le Russia a Indian Ambassador D B Venkatesh Varma in vetsui na anei lhon in ahi.

Russia in hiche Sputnik V hi trail 3 Saudi Arabia, UAE, Brazil le Philippines ho a bolding a tohgon anei u ahi. Hiche vaccine hi September akon a hopdoh pan ding ana kisei ahin, gam tam tah in adei dan u hetsah na jong ana nei u ahitan ahi. West lam gam ho in Russia sem vaccine hi adei lou utoh lhon a akisem dan chung a athenlou dan thu jong tahlang na ana nei u ahitan ahi.

xxxxxxxxxxxxxxxxxxxx

Bihar a Covid le twilet jeh a election vohchon ding a SC ang a temna kinei

Patna, Sept 7: Bihar a twilet khoh cheh cheh le covid natna leng jing toh lhon in election commission in election umding avohchon na ding uvin tuni in Supreme court ang a temna ana kinei in ahi. Hetthei khatchu Supreme court in achesa August nisim 28 a election umding chung chang a adeilou ho in plea pehlut na ana ei u ana sanpeh lou u ahi, COur tin hiche chungchang thu a elction commission in bolthei chan abol ding le bol le bol lou ding amaho in agel ding uva hetsah na jong ana nei u ahi. Hitabang tah a courtin plea ana pomlou toh lhon a athah beh a tuni a pehlut na Rastravadi Janta Party in ana nei kit u ahi. Hetthei khatchu Bihar election hi ahunglhungding October November lhasung a umding a tohgon kinei ahi. Hetthei khat chu tu le tua hi Bihar sung hi covid bouseh hilou a twilet jeh a boina lentah um a mipi in hahsat na lentah ato u ahi.Plea achun akisei na a India hi COvid natna bulpi khat ahung hi keuseh hilou a Bihar a twilet jeh a mihem a million a sim inn a umthei lou aum toh lhon a hitabang tohgon ho vohchon ding hi tu le tua aphapen ahiding dan hetsah na ana kinei ahi.

xxxxxxxxxxxxxxxxxxxxxxxxxxxxxxxxxxxxxx

AR in thingnou tuna nei

Ccpur, Sept 7: Assam Rifles in Ministry of Home Affairs tohgon noi in tingnou tunakingon muntin a ana nei uvin ahi.  Tuni a thingnou kitudoh jat chu 1645 lam ahin, hiche ho chu Sangaikot, TuitumKhongkhai le Hengkot lhangsung a ana kitu ahi. Hiche thingnou tuna kingon achun alhang sung mipi ho injong panlah na ana nei uvin ahi.

xxxxxxxxxxxxxxXxxxx

Indian Army in NSCN (KYA) cadre 2 man

Itanagar, Sept 7- Indian Army in Miao khopi, Changlang, Arunachal Pradesh akon in NSCN (K-YA) cadre 2 an akimandoh in ahi. AKimandoh teni akon in manchah jat chom chom jong ana kimudoh in ahi akiti. Manchah kimandoh ho chu MK 22 Chinese made automatic rifles ni, achang  138,magazine 5, grenade khat le Baofeng Walkie talkie khat le charger ahi akiti. Akimandoh teni le manchah ho chu Miao police station a pehlut na ana kinei tan ahi.

Xxxxxxxxxxxxxxxxxxxxxxxxxxxxxx

Senapati a johdia ukeng 2000 hin po mi 2 mat kiman

Imphal, Sept. 7(ET): Gamsung mipi dia tahsan umlou thil bang jong le Senapati district a johdia ukeng chomkhom a phatah a kiveina boljong aumdapon ahi. Tuilah a lha ukeng hi Mao nam hon nasatah a angaisang le aholjing ahi e.

Uphoh a kivei chungchang thulhut aumtolhon a ni 2 masang a pat Wildlife and Biodiversity Conservation Committee (WBCC) hon ana vetlhih jing chu Thoubal police SP office toh kinai vel a ginmo umtah a Imphal jon a lhei van chu police toh kitho a Rabi Takhellambam makaina lom chun tuni jingkah a akham uva kholchilna anei uva kon Maruti van MN01W7107 sung ukeng 2000 kipo chu amudoh u ahi. Tentha Khunou mi tu le tu a Mount Everest Senapati a pansa Moirangthem Inao @ Kansingh (39) le Moirang Ashan Devi (40) chun Senapati a johdia ukeng chu apoh le lhon ahi e.

Wild Life Protection Act  schedule 4 dan noi a ukeng hi venbitna kipe a chule ukeng a kivei ho gotna pehthei dia kisei ahi. Hinla Senapati district sung Mao nam hon ukeng hi metui khat a phatsot a pat ahin chepi u ahitolhon a ukeng kg 1 a Rs 200 a pat Rs 300 a achoh jiu ahi in, hotel lah a vang ukeng khatseh jong Rs 100 a achoh jiu ahi e.

Mat a um teni police khut a pehdoh ahi in tuni ma a court a dinsah ahilhon e. ukeng joh dia kip oho chu Forest department mopo ho le Wild life protection volunteer hon alhadoh un ahi.

============

Athahbeh a kisa Thoubal le Kakching Treasury office Deputy CM in hongdoh

Imphal, Sept 7(ET): Athahbeh a kisachai Thoubal le Kakching Sub-Treasury office chu Deputy Chief Minister Yumnam Joykumar Singh in tunichun ahongdoh tan ahi. Kingon chelhah sung chun Covid-19 noi a juiding government dan sem Standard Operating Procedures (SOP) jong gahtah a jui ahi e.

Deputy Chief Minister in Thoubal Treasury ahondoh chun in kisah thudol a alunglhai na aphondoh ban a tu a pat officer le official hon nomtah a na atoh thei ding ahitai, ati. Thoubal Treasury office hondohna kingon a chun Thoubal Deputy Commissioner N. Bandana Devi, Director of Treasuries and Accounts Chanam Ajit Singh le SP Thoubal Dr. S. Ibomcha Singh jong apang un ahi.

Kin kichai chun Kakching Sub-Treasury office hongdoh in Deputy Chief Minister chu Kakching ajonpai e. Kakching Sub-Treasury office hondohna kingon a chun Kakching Deputy Commissioner Valentina Arambam, Director of Treasuries and Accounts Chanam Ajit Singh le SP Kakching Victoria Yengkhom ho jong apang un ahi.

Office teni hi Rs 1.5 crore lut cheh a financial year 2017-18 a kisapan chu 2018-19 a chai hibep ahi in, ahoi thei pen a kisa ahi.

Manipur Badminton Association (MBA) president jong hi Yumnam Joykumar Singh chun Kakching District Badminton Association sem hoi thei nading mun jong vetlhahna anei pai in ahi.

============

Lhohlam boina nei ho dia kithopi nadia 24×7 toll-free helpline government in hongdoh

New Delhi, Sept 7: Union Social Justice and Empowerment Minister Thaawarchand Gehlot in lhohlam boina nei ho kithopi thei nading in 24×7 Toll-Free Mental Health Rehabilitation Helpline KIRAN, 1800-500-0019 chu Delhi a pat Webcast mang in tunichun hondohna aneitan ahi.

Gehlot in hiche helpline a pat lhohlam boina nei ho agangthei pen a kithopina peh hiding chule gamsung pumpi a kithopina ngaicha hon aphatchompi dia hiche thudol hi pao 13 tah a thejah hiding lhohlam boina nei hon aphatchompi cheh ding ahi, ati.

Hiche tohgon noi a hi Clinical / Rehabilitation Psychologist 660 le Psychiatrist 668 manchah hiding chule Hindi, Assamese, Tamil, Marathi, Odia, Telugu, Malayalam, Gujarati, Punjabi, Kannada, Bengali, Urdu le English pao a thejah hiding ahi.

Mobile ahiloule landline a pat Toll- Free number 1800-599-0019 panpi ngaichan in ahoupi thei ding ahi.  Welcome message jou le pao idei chu mehkit ding ahi. Pao idei meh jou le State/UT lhen kit ding chujoule helpline idei na mun a pat Mental health expert hotoh kihoumatna um pai ding ahitai.

Hiche helpline chun lhohlam boina nei ho maban panlah ding dan komu peh ding chu atup pi pen jong ahi e. Chule helpline hi National Institute for the Empowerment of Persons with Multiple Disabilities (NIEPMD), Chennai le National Institute of Mental Health Rehabilitation (NIMHR), Sehore toh kithokhom a chelha ding ahi e tin ministry chun asei e. Chule Indian Association of Clinical Psychologists (IACP), Indian Psychiatrists Association (IPA) le Indian Psychiatric Social Workers Association (IPSWA) hon jong angaina chan a kithopina apeh diu ahi.

NIMHR, Sehore; PDU-NIPPD, Delhi; NIEPMD, Chennai; NIUEPID, Secunderabad; NIEPVD, Dehradun; AYJ-NISHD, Mumbai; SV-NIRTAR, Cuttack le NILD, Kolkata ho chu national helpline hidiu abanle NIEPID, RC- Noida, NIEPID, RC- Navi Mumbai NIEPID; le RC- Kolkata hochu regional helpline hidiu ahi.

CRC- Ahmedabad; CRC-Sundernagar; CRC-Guwahati; CRC-Davanagere; CRC-Nellore; CRC-Rajnandgaon; CRC-Srinagar; CRC-Kozhikode; CRC-A&N Islands; CRC-Bhopal; CRC-Tripura; CRC-Nagpur; CRC-Gorakhpur le CRC-Lucknow ho chu Composite Regional Centres (CRC) helpline hidiu ahi.

Xxxxxxxxxx

China PLA in amat khangthah mi 5 ho umna het hilou lai: Arunachal Police

Itanagar, Sept 7: Sino-India gamgi Upper Subansiri district a pat China PLA in ana matdoh khangthah mi 5 ho umna tugei a het hilou lai ahi e tin Arunachal Pradesh police in tunichun asei e. Hiche mi 5 ho Nacho lhang a sa kap a che chu PLA hon apuimang ahi.

Khangthah mi 5 ho in kilelou a aumthu u a-insung mi hon achesa Friday nia social media a ahin tahdoh ahi. Amaho toh kilhon khom in kile mi 2 chun aloi mi 5 ho Chinese sepai hon Sera-7 a pat apuimang ahi e tia asei u ahi. Nacho hi McMohan line a dia administrative circle achaina district headquarters Daporijo a pat km 120 a gamla ahi e. Arunachal East Parliamentary constituency MP le Union Minister for Youth Affairs and Sports Kiren Rijiju in puimang a um khangthah mi 5 ho chungchang hi Indian Army le China PLA chu ‘hotline message’ in akihoumat in army hon donbutna anga jinglai ahi, ati.

Tezpur a pansa Defence spokesman Lt Col Harshvarshan Pande in army ho kigingsa um jing ahiban a civil administration toh kijamat jing ahidan aseikit e. Langkhat a Upper Subansiri SP in Tagin nam khangthah mi 5 puimang a umthu akija in hinla koiman police ahiloule army kom a thulhut apepoi, tia aseikit ahi

Puimang a um ho chu TochSingkam, Prasat Ringling, Dongtu Ebiya, Tanu Baker le Ngaru Diri ahiuvin damsel a puidoh ding in All Arunachal Pradesh Students Union (AAPSU) in central le state government ngehna anei in ahi.

Geldoh ding chu achesa March a jong McMohan line kom Asapila sector a pat kum 21 mikhat PLA hon ana puimang chu ni 19 jou a ahin lhadoh u ahi.