Nagaland State keh 2 ahung kisodem ti

Nagaland State keh 2 ahung kisodem ti

673
0
SHARE

Nagaland State keh 2 ahung kisodem ti 
Centre govt nin “Eastern Nagaland State” ‘demand’ bol Eastern Nagaland Peoples’ Organistaion (ENPO) ho kihoupi din kouna aneije tia thuso um hi Nagaland mipi te sou thamna (lung vetna) jong hithei, boltah tah diham ti tohgon umjong hithei ahi. State khatna kon State dang ham, Union Territory ham semdoh di ti hi ahahsa tah dan’a aum vang’a imacha hilouhel thetna jong Parliament nin abol jeng thei ahi. Hiche hi tuchung Jamu & Kashmir (J&K) UT 2 a kikehsoa kon muthei ahikitne. Kashmir kibolna bang hin State dang gamgi jong asuh atung’in ahung kiboldem ti State phabep kigingmo (kihuol lel) paijeng’u ahi. India Constitution dungjuja Parliament nin ‘Two-third Majority’ (MP hop thum’a hop ni) phatsahna’a State hohi ahoptel thei, agamgi ho akhel lele thei ahi. State gamgi kisuh keh, kikhel, ahilouleh State khatna kon Satate dang khat semdoh kiti hi India Independent hijouva pat tugeija hung kiboljingpeh a tunichan’a Jamu & Kashmir jaolouva State 28 hung umdoh ahi. Kiphinna sangtah leh thisan (hinkho) tamtah lutna a State kisemdoh loi aum vang’a atamjo hi baithetna kisemdoh ahi. North East a Nagaland leh Mizoram hi thingnoi galguhbolna leh mihem tamtah hinkho chanlona jouva State hung kipe ahivang’a Meghalaya, Arunachal Pradesh leh Sikkim hi baithetna kiboldoh ti thei ahi. Itobang dinmun’a kon State khat kisemdoh hijongleh akisemdohna State hin noplouna (oppose) aneiteiji ahi. Assam a kon Nagaland leh Meghalaya semdi ti ana um’a jong chu Assam govt nin tin le ha thoa jahdana (oppose) anabol ahi. Bihar a kon Jharkhand State kisemdoh dijong chu Bihar in nasatah a anatin’a chupet laija Bihar a aboltheipen Laloo Prasad Yadav chun “kathilong chung’a bou Bihar gam kikehso di ahi” anati ahi. State thahpen Telengana, Andhra Pradesh a kon ana kisemdoh jong chu Andhra Pradesh govt anada konbeh ahi. Union Territory a kon State kisemdoh hi bai ahi, ajeh chu koima State atohkhahlou ahi. Uttar Pradesh (UP) a kon Uttarakhand State kibol chu UP in jahdana nei malah anavahjo e ti bangjeng anahi.
State hung kikehsobe thei hohi aboidi ngen tobang ahi. Manipur a kon State dang boldi hi Manipur phaicham mi hon adat theilou ahi. West Bengal a kon Darjeeling State boldoh di ti hi J&K hung kikehso a pat akiseijap khat ahijeh a West Bengal a atamjopen te Bengali ho nomlouhel u ahi. Ahileh Nagaland State hi keh 2 a sodi ti hung hitah bah taleh Nagaland mi atamjon ajahda diuvem ti hi ahi. Nagaland State a district 4 – Tuensang, Mon, Longleng leh Kiphire hi State khat a semdohdi hi District dang’a Naga mipi ho tugeija jahdana thu sei umloulai ahi. Eastern Nagaland State demand bol ho hin kiphinna khucheng aneijeh uva Centre in kihoupi dia akou ujong hilouhel ahi. Eastern Nagaland leh Darjeeling hi UT hung kimoh sodoh diham seithei hilou ahi. Nagaland keh ni ahung kisoleh Nagalim politics akhup athal’a kiso hidi tina ahijeh in ajahda di jong hetsa ahi. Centre hin India a kon kijat chomsah State ho sitel’a jangpetna ithunoija koidi ati hile kilom thimgo ahi. Tua govt hin India hatna leh kipumkhatna agel thupipen ahi. Central India a Maoist thingnoi hon boina sangtah abol vang uva India akon potdi atiu ahilou jeh a Centre jong ha lunghan lou tobang ahi. Ahin India mi kahipon, kagam le ka thusim jong achombeh ahi tiho vang jatchoma boldi ti hile kilou thim ahi.