Nagaland CM anahi SC Jamir in Naga khonung ding thu sei

Nagaland CM anahi SC Jamir in Naga khonung ding thu sei

552
0
SHARE

Nagaland CM anahi SC Jamir in Naga khonung ding thu sei

Dimapur, August 11: Odisha Governor anahi Dr SC Jamir in Nagaland gam mihon ‘political future’ ahet phat u ahitai, ajeh chu amaho hetlou leh phatsahna louva organization adang khatcha in ikhonung ding aseithei louding ahi, tin aseiyin ahi.

Jamir in asei dungjuiya, Naga political group leh India sorkar in kihouna asem suhlhap ding gelkhohna aneiye tihi tahsan umtah thulhut in asei ahi, ati. “Kum sottah Naga politics thu kiseina a Nagaland gammi hon Naga politic adetna ding amu pan ahitai”, tin Nagaland CM anahi Jamir in ‘The Dilemma of Nagaland: Politically, Economically, Socially and Culturally’ kiti article a aseiyin ahi.

“Thutah a konin kisel pou hite. Nagaland gammi ho henga lungtheng tah a ipi um em chule Naga politics a lungtup molso nadinga dinmun ho seipeh ngai ahi”, ati. Naga hohi tuchan a muthim noiya um ahi’in, Naga political agenda ho coffin a akisinkhum nunga Naga hon ipi kinepna aneiding ham”, tin aseibe in ahi. Chule August nisim 3, 2015 ni a Framework Agreement a kisei ho seidoh phat ahitan, accord a ipi thu umham tihi mipi ho hetsah phat ahi, ajeh chu akisei thil hohi mipi dinga dih hinam hilou ham tihi amahon alhen thei ding ahi, tin aseibe in ahi.

“Hiche thu a India sorkar chule Naga political demand dinmun hetthei nadinga mipin chihna anei ahi’in, phat vaigei louva India sorkar leh Naga ho phatchomna dinga thulhuhna nei phat ahi. Kihouna a pang lamkai hon mipi chule gamsung dinga apha abol diu hi tahsanna um ahi, tin jong aseibe in ahi.