Naga Peace Talk a boina suhlhap nading lampi kisem hin Manipur integrity...

Naga Peace Talk a boina suhlhap nading lampi kisem hin Manipur integrity atohkhah louding’a Nagaland le Manipur Governor in kilolna nei

66
0
SHARE

Naga Peace Talk a boina suhlhap nading lampi kisem hin Manipur integrity atohkhah louding’a Nagaland le Manipur Governor in kilolna nei

Imphal July 1(ET): Naga Peace Talk a boina suhlhap nading lampi kisem hin Manipur integrity atohkhah louding ahi, tin tunin Nagaland le Manipur Governor in meeting aneina a kilolna aneiyin ahi.

Alangkhat a, Naga political issue chungchang a United Naga Council (UNC) in kihouna a pang ho lah a Pathen chihna apanna dinga Naga jousen taona anei diuvin asei uvin ahi. Houbung, khosung, town hon athu phatah a akisei lhah thei nadinga taokhomna (prayer programme) agon diuvin UNC in temna aneiyin ahi.

UNC in asei dungjuiya, Naga ho kiphinna hi kum 70 val ahitan, tu dinmun hi akhoh pet tah ahi. Pathen in pan alah louva ahile Naga hon khovah amu loudiu ahi, tin UNC in aseiyin, “Hiche jeh a Naga hon kihouna a pang lamkai ho taona a akithopi jom diu ahi”, ati. Naga thu kisei lhah hin South East Asia region a jong chamna ahin pohlut ding ahi, tin aseibe uvin ahi.

Council of Nagalim Churches (CNC) injong Naga jousen Naga Nation a dinga an-ngol taona anei diuvin kouna anei uvin ahi. “Tua dinmun ito hou ivet diu, gamsung thusim, Pathen in eipeh u ikihet nau, asung le apolang a kon eisuboi thei hou ivet uva houbung jouse chule Pathen mi jousen tang louva Pathen henga taona aneiding hi imopoh nau ahi, tihi CNC in atahsan ahi”, ati.

Hiche jeh a Council of Nagalim Churches in gamsung a dinga an ngol taona neikhom dinga kouna anei ahi in, NSCN brigade, battalion le unit jouse chule houbung le Nagalim a changval jousen nikhat an ngol taona a anei dinga CNC in temna anei ahi, tin aseibe uvin ahi. Pathen in Naga ho identity, history le political rights avenbit nadinga taona neiding ahi, ati.

Jesu min a gamsung akisem theina dinga Pathen phatsah banga Naga ho akipehlut thei nading chule India lamkai hon Pathen in eipeh u Nagalim flag le constitution jana le hetpehna anei nading uva taona nei dinga jong asei uvin ahi. Kihouna lamkaiya pang Th Muivah chule kihouna a pang ho dinga CNC in taona nei dinga aseibe uvin ahi.

Manipur a Inter-district bus service akihon pan vanga, mi lhomcha bou hinalai

Imphal, July 1(ET): Government in Wednesday nikho a kon Manipur a inter-district bus service le mini bus service kihong pan dinga thuso anei vanga district bus terminal atamjo a mi aumpon ahi.

Tuesday nikho a government in order asodoh na a, home department in akha tilou interstate bus service adang jouse kihong pan ta dinga asei ahi in, auto rickshaw le taxi ho kikhah jom dinga asei ahi. State sorkar in thuso anei jou, Wednesday nikho a Imphal-Churachandpur district bus service kihon pan a, nikhat a dinga bus 9 lhai ahi. Ahivanga, district bus terminal adang ho a koima umlou ahi.

Imphal le Churachandpur kah a lhai bus hi nidang laiya 60 vel hi ahi. Bus driver khat in thuso miho akihoupi na a, passenger alhom in, chule angaiya sanga gari bahara man ajat ni a kakal sah u ahi, ati. Bus Owner Association in Wednesday nilhah teng le meeting bol dinga tohgon anei ahi.

Sorkar in Tuesday nikho a containment zone jouse a lockdown le curfew bulhing set a chepi dinga thuphon anei ahi in, July 15 chan chepi dinga ama ama deputy commissioner in thuso anei ahi. Hiche hi gamsunga covid 19 positive case atam cheh cheh jeh chule nat atamna khopi dang dang a kon lenna a hung kile atam jing jeh ahi.

Chief Secretary J Suresh Babu in thuso aneina a, Manipur gamsung pumpi a July nisim 15 chan ahiloule order aumkit kahse a jan nidan 6 a kon jingkah nidan 5 chan curfew um dinga thuphon anei ahi.

Home Ministry in Nagaland gam pumpi a ‘disturbed area’ lha 6 chepi jom dinga thuphon nei; Nagaland a ‘law and order’ dinmun aboiye, tia seiyu

Imphal, July 1: Union Home Ministry in Wednesday nikhon Nagaland gam pumpi ‘disturbed area’ kiti hi lha gup chejom pi nahlai dinga thuphon anei uvin, tukum December lha kichai chan ‘disturbed area’ tag umjom ding ahi.

Ministry in notification asodoh na a, gamsunga ‘law and order’ dinmun boiya chule kichat um ahi, tin asei uvin, hiche jeh a armed force tha man ngai ahi, ati. “Section 3, Armed Forces (Special Powers) Act, 1958, (No 28 of 1958) noiya thaneina kipe kimang a Centre sorkar in Nagaland gamsung pumpi hi June 30 a kon December chan, lha gup sung ‘disturbed area’ period asuhsaobe ahi”, tin Home Ministry in thuso aneina a aseiyin ahi.

Hetthei khat chu, Nagaland gam a Act akisemdoh a kon Armed Forces Special Powers Act, 1958 hi kichepi pan ahitai. Nagaland Governor le Indo-Naga Peace Talk a Interlocutor RN Ravi in phengmai li lhing lekhathot Chief Minister Neiphiu Rio lamkaina sorkar henga apeh a, gamsunga thal choi gang hon boina asem a chule sum adon u ipijeh a sorkar in amoh vet ham, tia demna sangtah thu asei jou ahi.

Chief Minister henga achesa June 25 ni a lekhathot apehna a Governor Ravi in, Article 371 (1)(b), Indian Constitution thu jong aseiya, state sorkar in thal choi kiloikhom hon dan dihlouva na atoh avetup joupoi, tia asei ahi. Niseh a thal choi kiloikhom hon anatoh nauva mipin alhendoh state sorkar chouna ding abol jing ahi, tia Ravi in state sorkar chunga alunglhai louna thu jong asei ahi.

Kiloikhomna thum in Zoar Veng a police hon meithal akap na thilsoh demna neiyu

Imphal, July 1(ET): Achesa Tuesday jan nidan 8.30 don a Zoar Veng, Bungmual kho a civil von a kivon police hon meithal akap nau thilsoh Bungmual Village Authority, Young Paite Association, Bungmual Unit chule Bungmual Youth Club in demna thuso anei uvin ahi.

Haosapu/Chairman, Bungmual Village Authority, President, Young Paite Association, BUngmual Unit le President, BUngmual Youth Club in soi akai nau thuso a, police hohi car ni (number plate umlou) a hung uva, Zoar Veng a cheng V Chinzason in aum uva, amat uva, hunam a car a hetlut ding agot u ahi, ati.

Police hon lunggel toh louva meithal akap nauva Nokbiakmang in bang a meichang lenna nung hom a,  Sangnem gate post jong akap lhah uva, TS Minthang inn tin jong vang ahi.

Meichang akap houhin Nunnun Variety Store bang jong akhah a, dukan bol ho akap khah dehchet ahi, tin asei, thilsoh demna sangtah anei uvin ahi.

Civil von a kivon police ho ma ma hin lamlen a vah le Paukhanlal (26), Dorcas Veng a cheng asuh nauva, aha lhong ahi. Zoar Veng, Bungmual a boina asem jou uva, D Phailian kho a V Chinzason alhadoh u ahi. Police ho chonchan kiloikhomna thum in demna sangtah anei uvin chule meithal pan a group hohi sorkar in atosot hihen lang hihih jong le Village Authority le Bungmual CSO ho hetsahna masat neilouva khosung miho thu akhut a achoi lou diuvin temna jong anei uvin ahi.

Achesa September 22, 2013 kum a Bungmual khosung mihon Assam Rifles ho Maruti gypsy meiya ahal lhah uva, AK-47 rifle khat alahpeh nau thilsoh tobang hi, kibolthei sah tah a thuneina choi hon ato thei ahi, tin aseibe uvin ahi.

 

Bungmual, Zoar Veng thilsoh thu’a Police le mipi thusei kibang lou

B.Lalboi Gangte

CCpur. July 1 (ET): Civil dress a kivon CCpur District Police team khat in jani (June 30) nilhah nidan 8:15 vel chun Churachandpur District hopsung Zoar Veng, Bungmual mun’a mi khat khongai ding’a anakou’u anakhongai lou jeh in meichang ijat ham khat ana lhakhum uvin ahi.

Hiche thilsoh chung thu’a CCpur Police akon thulhut kimu dungjui’a Bungmual kho kimvel lah’a Sachung kap hi ding’a ginmo thu akijah jeh in CCpur District Police team ho kholchilna nei ding in nilhah nidan 7:00 vel in ana kondoh uvin hiche phatsung chun SoO noiya um gamvah thingnoi hi ding’a ginmo mi 2 khongai ding in akou uvin ahin mi 2 teni chun thal (meithal) analha lhon jeh chun Police hon jong anale thuh uvin ahin muthim noi anahi jeh chun akisel mang lhon tan ahi ati. Chuleh hiche thilsoh toh kisai’a Police in Arms Act noiya FIR No. 51 (lha 6) 2020 Churachandpur Police Station Under Section 400/307/186/34 IPC leh 25 (Clause 1-C) noiya thilsoh lhung melchit’a um ahi dan District Police in atahlang in ahi.

Alangkhat’a hich thilsoh na mun kimvel’a umho seidan in jani nilhah nidan 8:15 vel in District Police apat Sub Inspector 2 lamkai nan Police honkhat civil dress a maitom kitom in Registration No. um lou car 2 (a san khat leh vut rong khat) mangcha in Zoar Veng, Bungmual mun’a inn khat a inn neipa agahol uvin ahin inn neipa ana umlou jeh chun inn neipi toh akihou lai tah in inn neipa ahung lhung in hiche phatsung’a sah lam apat pasal thum hung suh ho imacha lolou in achesah uvin ahin amaho nung’a hung pasal khat vang chu Police hon kholchil ding atiu leh pasal pa anajam jeh chun Police hon meithal ah anakap pai uvin ahi ati.

Hiche toh kilhon’a Police hon inn neipa apohdoh jeh uchun inn neipi in adel phei pai in D. Phailen Bazaar mun’a adelpha in hiche achun Police hon kholai lah vah leh ho jouse jong lei lah’a abokhup sah uvin ahi tin jong akimvel’a um hon aseiyin ahi. Hiche naban’a Police hon inn neipi heng’a Police Station joh’a achesuh ding in thupeh anei in phat chom khat jou in inn neipan Police hon alhadoh’u ahi dan aloinu ana hetsah in ahi. Hiche thilsoh phatsung in Paukhanlal (26) S/o Langsuanthang of Dorcas Veng, New Lamka jong apu Mungboi Neihguk te inn ajot lai’a Police hon anavo uvin ahatu (tooth) khat jong ana suhlhah peh uvin ahi. Thilsoh jou nung nidan 10:00 vel in Assam Rifle hon thilsoh na mun apha uvin athi leh akisukha aumlou jeh in anadalha pai uvin ahi. Ahin jan nidan 11:00 vel in Police team ho amun aga lhung kit vang uvin imacha sei le-sah umlou in adalha pai kit uvin ahi. Thilsoh kichai jou nung in akimvel’a um hon  9 mm chang 3 (kachaisa) amudoh uvin ahi. Chuleh jingkah in Khamdou gate bul’a 9mm chang khat jong anamudoh kit uvin ahi.

 

Imphal khopi sung’a kailhang kihonna ding’a nupi hon Government heng a ni 5 teppeh

Imphal, July 1(ET): Covid-19 jeh a lockdown ahitoh lhon a phat sottah Ima Keithel akikha toh lhon in tuni chun kailhang a tou nupi kiloikhom hon government heng ah ni 5 sung kah a honna ding order sodoh ding in phat ateppeh uvin iham tia donbutna akimu loule July 6 akon kitou thou thou ding ahi tin thuphon abol uvin ahi. Imphal khopi sung a numei ho kailhang athum a ahi Covid-19 jeh in March 21 chun ana kikhah pantan ahi. Mundang a kailhang ho aphat teppeh in akihong thei in hinlah Imphal khopi sung a numei ho touna kailhang thum ho kihong theilou hi adihthei pon July 5 masang a government in donbutna apeh tei ding in asei uvin ahi.

Kiloikhomna a lamkai khat Pishakmacha in aseina achun State government in hiche kailhang thum ho kihonkit theina ding in tuni chan in imacha tohgon aneipon keiho ading a phat sottah thil kijoh theilou hi ka gentheilo pi tauvin inchen jong atongkha tai ati. Aseibena achun Centre leh State government in sumkolvei adang ho kithopina ding agonpeh uvin hinlah hiche kailhang thum a tou nupi ho ding in imacha aki gongpoi ati.

Manipur a covid-19 case thah 26 kimudoh be toh lhon a agom a case 1,260 phata

Imphal, July 1(ET): Tuni chun masang a Tamenglong district akon test kibol mi 2 toh kop in agom in mi 26 covid-19 veithah mudoh ahi utoh lhon in tuhin Manipur a hiche natna veikha mi 1260 aphatan ahi.

Tuni acase thah kihedoh jouse chu gampam akon hung lut ho ahiuvin pasal 15 leh numei 11 ahiuve. Case 1260 lah ahin active case 681 aum in adamdoh jat chu mi 579 ahi tai tin Dr. K. Sasheekumar Mangang, Additional Health Director in asei in ahi. Alangkhat ah tuni mama chun Hiche natna akon damdoh mi 26 hon hospital ana dalha tauvin ahi.

Tuni a case kimudoh lah achun Senapati akon mi 11, Ukhrul akon mi 6, Kamjong akon mi 3, Thoubal leh Tamenglong akon mi 2 cheh chule Imphal East leh Jiribam akon mi 1 cheh ahiuve. Tuni pungkah 24 sung in sample 612 test akibol in sample 238 chu RIMS a akibol in hiche achun mi 15 aki hedoh in chule sample 370 chu JNIMS a akibol in hiche achun mi 11 avei ahidan aki hedoh in ahi. Tuni chan in sample 51,606 tobang test akibol tan ahi.

Assam Rifle leh Ccpur District Police team in manchah toh mi 3 anamandoh

B.Lalboi Gangte

CCpur, July 1 (ET): 25 Assam Rifle, 33 Assam Rifle leh District Police kitho in janni (June 30) jaan nidan 11:45 vel in S. Kotlian kho’a inn khat kholchilna anei nao’a ginmo mi khat leh galvon chuleh sum phabep anamandoh uvin ahi tin Churachandpur Police akon thulhut kimu chun atahlang in ahi. Chuleh ginmo jeh’a kiman pahi Henkhogin@Kaiku Vaiphei (65) S/o (L) Lamgou of S. Ginkam Veng, S. Kotlian ahi ati.

Ama akon chun Pistol semthu 9mm pistol khat, 9 mm magazine khat, single barrel rifle khat, meithal License semthu khat, meichang thum, mobile handset khat leh Dk.1,04,000 anamudoh uvin ahi. Hiche toh lhon’a Police hon thudoh anei nao’a Nehkholal Vaiphei (42) S/o Soikhogen of S. Kotlian khut akon semchai lou lai semthu 9 mm pistol khat leh Ginlalmuon (45) s/o Lemboo of Lailokphai akon mobile phone 2 ana mandohbe kit in ahi.

Police in amatdoh mi thum ho chung’a Arms Act noi’a FIR No. 51 (Lha 7) 2020 Churachandpur Police Station Under Section 400/399/34 IPC leh 25 (Clause 1-C) melchit na ajih khum uvin ahi.

Tribal Market angai a kihongkit ta ding

Imphal, July 1(ET): State executive committee, State Disaster Management Authority thupeh dungjuiya Lockdown guidelines date 15.7.2020 changei suhsaobe ahito lhon in guidelines themkhat ahung kikhel tan hitoh kilhon a tumasanga Tribal Market nikah hal’a hon ding a ana kisei chu angai a bang’a niseh a honthei hiding ahi tai.

Ijem tia July 15, 2020 sung’a govt in guidelines thah ahin sodoh khah uva ahile Welfare Commitee, TYC chule Women Union New Lambulane in kailhang kiman chah ding dan athah beh a hung kihet sah kit ding ahi tin jong thulhut in aseiben ahi.