Naga ho gam kichua kiboi (Sumi hon Zeliangrong kho hal)

Naga ho gam kichua kiboi (Sumi hon Zeliangrong kho hal)

2844
0
SHARE

Naga ho gam kichua kiboi
(Sumi hon Zeliangrong kho hal)
Zeliangrong holeh Sema/Sumi ho kikah a gam kichuna jeh a kiboina athah beh a ahung umdoh hin Naga Peace Accord thu gei ahintoh khah dia seiloi um ahi. Zeliangrong holeh Sumi ho kiboina mun hi Nagaland a Peren district leh Dimapur district gamgi chin’a gammang lah khat ahi. Hiche gambeh hi Assam leh Nagaland gamgi chin jong hikit, Intangki Forest Reserve in themkhat ahuop phah nahlai di ahi. Zeliangrong holeh Sema ho kiboina hi sotna pat them khat khat ana umpeh ahin kiboina mun’a Zelaingrong hon ‘Lamhainamdi’ kiti kho thah khat ahintundoh uleh Sema (hitei dia ginchat) hon hapta/kal masa’a chu automatic meithal mangcha’a kho chu ana bulu uva inn ho anaban hallhah u ahi. Hiche kho buluna a koima athi akitongkha umlou chu akhoa cheng ho meithal gin ajah jah uva gamlah a ajam/akisel jeh u hidi ahi. Hiche kho kibulu chu automatic meithal kiman jeh a thingnoimi ho natoh ahidi jong hetsa ahi. Tua hi Assam, Nagaland leh Manipur a Zeliangrong Civil kiloikhomna holeh Zelaingrong thingnoi (ZUF) ho geijin Lamhainamdi kho kihal thua demna thu keu asei u hitalouva agam u huhna’a nasatah a pan kiladi ahi ti ho ahinsei u ahi. Ahung kiha boi cheh cheh uleh abanban’a Naga jat/Tribe dang hojong ahintoh khah theidi ahi. Ajeh chu Intangki Reserve forest hi Nagaland Naga hon bou avetlel u hilou, Manipur a kon Naga thingnoimi Cadre hojong Naga Peace thua kihoulhahna aumjou teng hiche gam’a hi chenlut thei ham ti angka akhot jing uva kisei ahi. Lamhainamdi kho jong hi Manipur a kon Rongmei ho kichenlutsah ahi tia kisei ahi. Tua hilai gam thua Zeliangrong holeh Sumi ho akiboipan uleh Naga Tribe dang, adeh a Manipur a kon koima ahung kichensah di hi hung hahsa di tina ahi. Nagaland Naga ho kikah a kidouna leh kho kibulu tona hi tukhang’a umkha beh talou ahi. Achesa 1990 kum’a Tuensang le Mon district gamgi chin’a Konyak holeh Chang ho ana kiboi uva lu kilahna gei ana um chu Tribe khat le Tribe khat kikah a kidouna gimneidom anukhahpen hitadi ahi. Zeliangrong holeh Sumi hohi iti kiboi jong uleh lulah khang banglom loudi, ahia alang lang’a thingnoi ho automatic meithal’a kikap tonal eh kho kibulutona ho vang umdi ahi.
Vannoi leiset thusim hi gam kichuna jeh a gal le tol ngen ahijeh in tukhang’a jong umjing ahi. Gam beh khat jeh a kiboina loi um, gamgi thua kiboina jeh a kinah kidouna jong umjing ahi. Naga ho kikah a jong Nagland leh Manipur gamgi chin’a cheng ho gamgi thuleh gambeh kichuna thua kiboina umjing ahi. Nagaland leh Manipur gamgi’a cheng Chakhesang (Nagaland) holeh Paomei (Manipur) ho jong  gamgi jeh a kiboina jeh a kijep tona umjing, Chakhesang holeh Tangkhul ho jong Jessami lang’a phailei jao kichuna jeh a kijeptona umjing ahi. Mao holeh Angami ho jong gamgi thua kiboina jeh a kivetda tona umjing, hiche jeh a Mao lang’a hon Kohima a anche louhing le theiga ho agajoh diu jong phalpeh ahilou jeh uva Imphal a Mao Market gei hung kihongdoh ahi. Mijousen ama ama nam/Tribe gam kihuhbit dileh kehletbe di ahinti cheh chehnalai di, gam kichuna a kiboina jong hung tam cheh chehnalai di ahi.