Naga ho galbol dinga kigosa ahi: NSCN-IM

Naga ho galbol dinga kigosa ahi: NSCN-IM

720
0
SHARE

Naga ho galbol dinga kigosa ahi: NSCN-IM

Kohima, Sept 3: The National Socialist Council of Nagalim (Isak-Muivah) in Naga mipi ho hi Centre sorkar leh interlocuter in lhep chatvai naleh lungtho nei a Naga te thil ngeh na chunga sei leh sah deibanga ahin boldoh lou leh  “athahbeh a galsat dinga mansa/kigosa ahi” tin aphongdoh uvin ahi.

Naga gamvah miho thusuo Nagalim voice a editorial khat a Government of India in Naga peace talk aki hetmosah dan thu kisun in asei na ah achesa kum 1997 Centre sorkar leh NSCN (I-M) kikah a hemkham ana umjingsa banga kinoptuo nathu group chuom a kuon a deidan thah a umtoh kilhon in tuni chan in akhumkha na kichehtah aum theilou dan atah langin ahi.

NSCN (I-M) thuso a kimu in aseibe na ah Naga nam mite atum a kivaipoh na, atumbeh a flag leh atum a kivaipohna (constitution) itih lai hijong leh kidinpi jinga lhahdaina neilouva kichepi jingding ahi ati.

Nagalim voice ditorial in aseibe na ah achesa centre sorkar toh 2015 Framework Agreement apat a chamna leh kithulhuh na dihtah ana umdoh theilou dan leh interlocutor R.N. Ravi in deidan chom ana pohdoh dan ho jong atahlangin ahi.

Editorial thubul langa ah 1932 kum a British te amasa pen dinga Naga te chenna huopsunga ahung lut nau leh Naga ten itih hijong leh Naga nam miten atoupha nau mun jouse Sapkangte hihen koi hijong leh minoiya a-itih a kikun lou ahi atin ahi.

Interlocutor Ravi demna sangtah aneina ban ah tuni chan a Naga mipi te deisahna banga kihoulhah na kichehtah aum thei lou hi deidan chom chom leh ahilou langtah a thu apei chatvai jeh a tuni chan a Naga mipite tup le doi boijing ahi in, avel vel in mipite lheplhah in akoi jinge ati. Chuleh centre sorkar in naga galguh bol ho thiltup ho kicheh tah in amupha pon Ravi makaina in puichatvai na anei jinge ati.

Naga nam miten phat sottah chamlhat galsat ana kinei jing in lhepchatvai a umtheina ding lungthim phalou ijat hamkhat ana kipal galkai jing ahitai. Tu maban ajong sorkar in lungtho neiya Naga mite abol jing uleh avella thal kidom kit a galsat kit dinga mansa jing akihi ati.

Alangkhat ah India sorkar in jana neitah a Framework Agreement hi lungthim thuo umlou hel leh Naga mipite kikah a khentum na leh deisah chuom neilouva, guhthima galguh bol kiloikhom ho huitupna neilouva tahsanna neitah a akihoupi ding ahi tinjong atahlange.

Editorial in thuchaina lang ah India sorkar in Naga mipite dinmun leh thusim ahetpeh s, Naga mipite thaneina jana neitah a abolpeh poupou leh Naga mipi injong ahatsom a Sorkar chunga tahsanna lentah kinei ding ahi ati.

Hiche lhaseh a nivei kisodoh jing thuso ‘Nagalim Voice’ hi Naga sunga kiloikhomna jat chom chom hon akinthei lampen a Naga galguhbol ho lungtup molso ahithei nadinga hung kiso jing khat ahina ban a Interlocutor jong lheh ding adeipon ahi.

Nagaland Gaonburah Federation kiti Naga kho umho lah a khosung headmen hon memorandum khat Prime Minister Narendra Modi anapeh nauva chun September lhasung ngeiya Naga te thilngeh ho kichehtah a suhbulhit ahina ding leh interlocutor Ravi kikhel lou ding in ngehna ana nei un ahi.

Working Committee of the Naga National Political Groups (NNPGs) kiti kiloikhomna leh chamna thua kigol hon jong Ravi kikhel ding adeilou dan’u aphongdoh un ahi ajeh chu athah hung kikhel leh kihouna hin abul a kipankit banga phat saotah ahin lahkit ding ahi atiuvin chuleh Framework Agreement hi avel in kithah vet kit hen ajeh chu Kumsottah Naga mipite ana kiphin jingna tamtah suhmangin aum in chuleh ‘Nagalim’ kiti thucheng sangin ‘Nagaland’ joh kiti hen ajeh chu ‘Nagaland’ kiti hin ahuop lenjo in ahi tin aphongdoh un ahi.

Peace talks observers hon angaidan asei nauvah hiche kithuhlhahna dihtah aum theilou na hi mi phabep huitumna aum jeh a ahina ding bangtah a machal theilou ahi in, bolkhel na ho avel a aum kit leh Naga te chamlhatna hin phat saotah ahin lahkit a kinopto na dihtah umdoh thei louding ahi atiuvin ahi.

Xxxxxxx

Manipur a Covid-19 natna a mi 3 thibe; MLA Ranjit security mi 4 positive hi, Nidan 24 sunga mi 167 discharge kibol

Imphal, Sept 3(ET): Nikho phabep a Opposition leader Okram Ibobi COVID-19 positive ana hitoh kilhon in athah beh in Sugnu MLA Kangujam Ranjit security escort personnel mi 4 hochu Covid-19 positive ahi hetdoh ahikit in, hinla MLA pa leh a insung mite vang test akibol nauvah negative ahi sohkeiyun ahi tin thulhut chun aseiye.

Thulhut kimun asei na ah hiche thilsoh hi Okram Ibobi leh MLA K Ranjit security escort personnel ho hung kipolkhom jeh a natna hung kipe son hiding in ginmo ahi in ahi.

Hiche thilsoh toh kilhon in MLA Ranjit umna quarter khah tup ahitoh kilhon in pamlang mi lut phal ahi tapon ahi.

Langkhat ah, nidan 24 sung chun Shija Hospital mun ah Covid-19 positive mi 3 in thina anatoh kit un hitoh kilhon chun natna jeh a thina toh agomin mihem 32 apha tan ahi.

Athahbeh a thina toh ho hi kum 35, 61 leh 63 mi ahiuvin, amaho cheng hi Bishnupur District, Thoubal district leh Imphal east district a kon cheh ahivin ahi tin COVID-19 Common Control Room thuso chun aseiyin ahi.

Dr Shasheekumar Manganga, Additional Director Health Department leh Spokesperson Covid Common Control Room min a thu hungkiso chun aseina ah,  tu le a cases thah 102 kimudoh lah a hin milhan 75 leh CAPF personnel mi 27 chu test akibol a kon a nidan 24 sunga positive thah kimube ahiuvin hitoh kilhon in state sunga COVID-19 natna nei mihem 6609 alhing tan ahi.

Hiche natna nei ho kimandoh hi Viral Research & Diagnostic Laboratory of RIMS mun a (24), VRDL JNIMS a (27), RIMS RAT a (2), JNIMS TrueNat a (1), Tengnoupal (1), Jeevan Hospital (1), Raj Medicity (6), Thoubal (15), Babina Diagnostic (5), Kakching (1), Churachandpur (6), Bishnupur (3) leh Imphal east RAT (11) ahi.

Agoma 75 ho hi local transmitted ahiuvin ahi.  Ahung kondoh nau hi Imphal West district (14), Imphal east district (11), Chandel district (1), Thoubal district (20), Bishnupur district (3),  Churachandpur district (6), Kakching  district(2) leh Tengnoupal (17) ahi.  Natna nei a kimadoh ho jouse hi  COVID care facilities a kikoi ding chuleh aum nau mun holeh aki suhkhahpi ho jouse vetsuina phatah kibol ding ahi tin CCR thuso chun atahlange.

Alangkhat ah, nidan 24 sung chun Covid natna nei mihem 167 discharged ahiuvin ahi. CAPF akon (88), CCC Lamboikhongnangkhong (32), CCC UNACCO Meitram (18), RIMS (5), RD Wing (14), CCC JNV Chandel (6) leh CCC Jiribam akon (4) ho chu RT PCR a test akibol jou uva negative ahiutoh kilhon a lhadoh ahi tauvin ahi.

Hitoh kilhon chun agom a 4774 Covid-19 a damdoh leh kisoldoh alhing tan, chuleh state sunga active Covid-19 cases hi 1803 apha tan ahi. Recovery rate hi Thursday nikho chun 72.23 percent apha tai tin Health Department in ana phongdoh in ahi.

Thuso in aseibe na ah mun chom chom ah mike mangcha in kiven ding dan ho hilthem na akinei jing in, adeh in Uchiwa Leirak Achouba, Masajid road, Paona Bazar, La,shang Thong Maning, Lamshang Bazar, Laingamkhul, Taothong Khunou, Lamdeng Khunou, Phayeng Sabal, Sekmai New market, Wangoi, Nongthongband, Kanglatongbi, Samurou, Hiyangthang etc ho area lah a ana kinei in ahi ati.

xxxxxxx

India a nikhat sung’a atamna pen ding’a Covid-19 case thah 83,883 kimube

New Delhi, Sept 3: Athah beh a coronavirus natna nei mi 83,883 nidan 24 sunga mudohbe ahi toh kilhon in India sunga Coronavirus vei mihem 3,853,406 alhing tan chuleh natna jeh a thina toh mihem 67,376 leh natna chomtoh kithoa thi mihem 1,043 aphatan ahi, tin Health Ministry in thuphon in aseiyin ahi.

Natna nei kimudoh ho lah a Tule tua active cases hi mihem 8,15,538 apha tan, chuleh adamdoh mihem 2,970,492 apha tan ahi. Niseh a damdoh mihem 68,584 aphah toh kilhon in recovery rate 77.09 per cent apha tan ahi.

Natna nei a damdoh jat aniseh a atam jing toh kilhon in niseh a damdoh jat mihem 60,000 hi ni 7 sung in ahung kijom toupeh thei in ahi. Ministry chun states 12 leh union territories- Andaman and Diu, Delhi, Bihar, Tamil Nadu, Andaman and Nicobar, West Bengal, etc., hon adamdoh jat hi India sung pumpi average sangin anei tamjo tai ati.

State ni teni – Maharashtra leh Tamil Nadu in India sunga damdoh jat kisim natoh te dingin 30 per cent alhit jouvin ahi. Maharashtra hi Covid-19 in asuhkhah lah a anasa loi ahi toh kilhon in tu le tua active cases mihem 8,08,306 leh tina toh mihem 24,903 apha tan, aban ah Andhra Pradesh in mihem natna nei 4,45,139 leh thina toh mihem 4,053 apha tan ahi. Tamil Nadu, Karnataka, Uttar Pradesh, Delhi, West Bengal, leh Bihar ho aba in apang un ahi.

Council of Medical Research (ICMR) in data thah asodoh na achun India in nikhat sungin mihem 11,72,179 tests aboldoh jou vin, tuchan a agom a test kiboldoh hi mihem 4,55,09,380 apha tai ati.

Leiset pumpi a Covid-19 natna neimi tamna langin India hi a thum channa a aha suhkhah pen khat ahitan, US leh Brazil asang pen ahitoh kilhon in mihem 6,113,160 leh 3,997,865 natna nei anei cheh lhonin ahi.

Xxxxxxxx

Government in pon khong ho tosot; Khamgahna phatsung a Handloom le Handicraft noi a ponkhon chaisa ho choh nading sum Minister Biswajit in homdoh

Imphal, Sept 3(ET): Gamsung a khamgahna chelhah sung a ponkhon chaisa ho phonkhong ho tosotna a government achohpeh tolhon in Textiles, Commerce and Industry Minister Shri Thongam Biswajit Singh in tunichun New Secretariat ama office mun ah pon choh man sum ahomdoh tan ahi.

Biswajit in asei na ah Handloom le Handicraft hi kihinsona lampi chomkhat ahitolhon a gamsung khamgahna chelhah sung a pon khong ho hahsatna hetpeh ahitolhon a phonkhon chaisa ho department in chohpeh dia gellhahna kinei ahi in, koi hijongle ponkhong hahsatna toh hon toll free no. 18005720906 a ahahsat nao ahinlhut thei ahi, ati.

Hitobang a government in tohgon ahin nei jong hi pon khong hon akipapi cheh angai e tin Biswajit chun aseiben ahi.

Handlooms & Textiles Director Shri K Lamlee Kamei in lemna thu asei tolhon in pon khoi chai sa ho ponkhong ho kithopina a chohpeh ding hi Minister khohsah a pat hung kigongdoh ahiban a hiche tohgon akisem lai a jong central ministry a hitobang tohgon chepi dia hetsahna jong kimupai ahi, ati.

Tuni kingon a chu Imphal East a pat pon khon chai sa government in choh dia agon mi 70 lah a mi 11 hon sum akisan u ahi. Hitobang a hi phat hahsat sung a district 16 a pat pon khon chai sa choh nadia government in Rs.1.17 crore gonsa akoi ahi.

Hetding chu khamgahna kipat March 23, 2020 a pat July 15, 2020 sung a johlhah thei lou a um den pon khon chai sa ho Manipur Handloom & Handicrafts Development Corporation Ltd, MHHDC toh kithokhom a Department of Textiles, Commerce and Industry, Government of Manipur in choh dia ahin gondoh ahi. Tuni kingon a chun Joint Director, Handlooms & Textiles, Manipur Shri E.Jiten jong apang in ahi.

=============

Themjil na mun ho hon kit ding thu a Education Minister makaina kihouna chelha

Imphal, Sept 3(ET): Gamsung themjilmun ho hon kit ding le Covid-19 toh kimat a panlah ding chung chang simlai kiloikhom thalheng ho le Education Minister Dr. Thokchom Radheshyam in tunichun seikhomna anei un ahi.

Manipur Samagra Siksha  Conference Hall a chelha kihou na a chu Commissioner, Education (S) Shri T. Ranjit Singh; Commissioner, Higher & Technical Education, Shri M. Harekrishna; Director Education (S) Shri L. Nandakumar Singh; Director, University & Higher Education, Smt. Kh. Diana abanle Education Department official ho jong pang ahi.

Minister in thuso miho kom a asei na ah September 2020 kah a bachelor degree themvetna chai tei ngai ahitolhon a themjil mun ho hon kit ding le boina umlou hel a chelhah nading lampi kihoukhomna kinei ahi, ati.

Dr. Th. Radheshyam in aseikit na ah March a pat lha 5 sung tobang themjilmun ho hung kikhah ahitolhon a lungngam tah a masang bang a themjilna achethei nading lampi jong principal le jilkung ho tojong seikhom ding abanle simlai ho scholarship chungchang jong seikhom ahi, ati.

Simlai kiloikhom thalheng hon apohdoh thu ho akipapi ban a themjil mun ho a SOP chesah ding dan apohdoh ho ahithei chan a chepi ding in Minister chun aphongdoh in ahi.

==============

Right to Food chungchang a awareness kibol

Imphal, Sept 3(ET): Human Rights Alert (HRA) le COVID 19 Task  Force, Lamlai (CTFL) gonna noi a Right to Food chungchang a nikhat sung kihilna mi 100 vel panna in jannichun Ibudhou Pureilomba Complex, Lamlai ah achelha e. Jin-Gun in Thokchom Saimond Singh, Judicial Member, Manipur Food Commission apang in chule Thokchom Nabakumar, Chairman, CTFL le Shri. Babloo Loitongbam, Executive Director, HRA chu presidium ahilhon in ahi.

  1. Dayananda, Co-convenor of CTFL in lemna thu asei ban in National Food Security Act, 2013 noi a mipi in hahsatna ato ho jong tahlahna anei e. Chule mihil a pang Advocate. Okram Kiranjit in Priority House Hold (PHH) card le AAY card noi a mipi chanvou um ho asei ban in hahsat le lunglhai lou naho District Redressal Officer le Manipur Food Commission kom a lhutding dan jong mipi ahilchen in ahi.

Chule mihil a pang Advocate N. Subhaschandra in HRA in PIL abol a pat Manipur High Court in thulhuh 17 aphatsah ho jong mipi ang ah aluidoh e. Chule Advocate Ch. Korouhanba in Lamlai mipi ho dia anchang chanvou amuding jat ho ahilchen in, Food Commission a pat Thokchom Saimond Singh in phat hahsat sung a neh le chah tollut hahsat chung chang asei ban in, chanvou ho phatah a muthei nadia Task Force neilou apoimo dan thu le Legal Aids Clinic manchah jing ding in mipi tilkhouna anei in, hitolhon a Legal Aids Clinic hondoh nadia government akimupi cheh diuvin jong mipi temna aneiye.

Kin-Nei a pang Babloo Loitongbam in thaneina kihet a pan la jing Lamlai mipi ho pachatna apeh ban a Manipur High Court in Right to Food thu a thulhuh asem het them a lunglhai lou naho Manipur Food Security Rules noi a hehna bolthei ahidan jong atahlang in ahi.

Achekhom mipi hon dohna anei ho jong phatah a donbutna peh ahicheh un chule Thokchom Nabakumar, Chairman, CTFL in Right to Food Sub-Committee semdoh ahidol phondohna anei in CTFL Treasurer T Gobin in vailhahna thu aseiye.

============

Vannoi thusim hi imachom hilou in jalenna lungput khantousahna ahi: MSAD

Imphal, Sept 3(ET): Manipur government in mihem thaneina asuhset jing adeimo dan Manipur Students’ Association Delhi in aphongdoh in ahi.

Chule lomlou tah a suhgenthei na tohjing ho thaneina dinpi ding hi mipi ho mopohna ahi e tia asei ban in MSAD chun India in agam toupha sung kehlet agot jing nalam in nu nao chapang tamtah in dihlou tah a hinkho achan jing jong hetna nei khangthah hon adoudal jing jong Kashmir nitin thilsoh a pat het thei ahi in hinla apupa lunghol a natong Manipur government in hichu hedoh thei lou in mipi pao thei lou in alha jing e tin MSAD chun aseiye.

Government tohgon chung chang a jilkung ho thuso ho a lunggel le amudan seilou dia Directorate of University and Higher education, Government of Manipur in August 10, 2020 nia khamgahna asodoh chun apupa dei bou a Manipur government in na atohdan ahilchet hi jachat umtah ahi, ati.

Chule pupa lunghol a natoh in Manipur khonung asuhbing thei ding tohgon ho doudal cheh ding in WESEA mipi ho kigingsa umding in MSAD chun temna aneiye.

===============

Suhset a um nu damdoh jou talou; CM to kihou jouva JAC in kiphinna neiding ati nung lahdoh

Imphal, Sept 3(ET): Mayang Imphal Police Station hopsung Yandou mun a suhset ahijou a khohelou a um mudoh a um nu RIMS a kijenlai chu damdoh joutalou in tunilhah nidan 2 chun amollem tan ahi.

Kum 14 numei chapang nu chu adongma pa’n asuhset jou a Yandou Palli lampam a athi ding a adalhah namun a pat khohelou a um chu jannia lampi a chele hon amudoh chu ahai nah lai jeh a  gangtah a amu hon RIMS apohlut ahi. Ahai pet a numei chapang nu chun Heibong Makhong Mathak Leikai a cheng Shikandar chapa kum 19 mi Usam Maja Khan in asuhset ahi chu ana seidoh man a chutolhon a police hon Khan chu amatdoh a September 9 chan police khut a umding ahi.

Numei nu chu RIMS morgue a koilut ahi in, thilsoh tolhon a kiphinna bol dia phudoh a ana um JAC chun chief minister N Biren Singh toh kinoptona aneitolhon a kiphinna chelhahpi dia agon chu ngah ding in aphondoh in ahi.

Kinoptona ho chu; Themmo chang pa matdoh ahi in police khut ah aumtai, Themmo changpa kithokhom pi jouse jong agangthei pen a police in amatdoh ding, State government in thilsoh chungchang phatah a kholchilna achelhahsah ding, POCSO Act noi a thilsoh thu State government in achesah ding, State government in thina toh insung kithopina lakh 5 apehding, Police kholchilna phatah a kithopi ding le kiphinna chelhahpi tahlou ding a JAC chun aphatsah ahi.

Xxxxxxxx

DMO/NVBDCP team in Malaria doudal na ding’a Sagang PHC leh Henglep PHC vilna nei

B.Lalboi Gangte

CCpur. September 3 (ET) : District Malaria Officer DMO/NVBDCP team, CCpur in Malaria jaona’a natna chom chom doudal na ding toh kisai’a PHC 2 tichu Sagang PHC leh Henglep PHC vilna ananei uvin ahi. Hiche PHC vil ding’a kondoh ding DMO/NVBDCP team ho chu tuni (Sept. 3) jinglam nidan 10:00 in Dr. T.Nengkhanmang DMO lamkai nan Lianbiakthang Songput, DEO, Lalzarlian, MHS, Seitinpao Peon leh Lalramhlun driver ho DMO Office akon in akipandoh uvin ahi.

Hiche toh lhon’a DMO/NVBDCP team kondoh hon tunin Sagang PHC a Supervising and Monitoring visit anei uvin hiche phatsung in Sagang PHC noi’a Doctor leh Medical staff chule ASHA hotoh phat anamangkhom uvin ahi. Dr. T.Nengkhanmang, DMO in NVBDCP kimanchah dan leh natoh doh ho vetchil na anei in chuleh Sagang PHC a achesa kum 3 sung’a akon tuni chan in positive mudoh in um hih lai jong leh maban’a Malaria positive Case um thei ding din ginmo jeh’a Malaria staff hon hoitah’a na atoh uva kiging jing’a aum ding uvin hetsahna aneiyin ahi.

DMO/NVBDCP team hon Khononphai ASHA ho kom’a Malaria natna doudal natoh kisai’a panlah ding dan jaonan Malaria Blood Collection/ Rapid Diagnostic Test (RDT) lah ding dan ASHA hokom’a kichuhna anape uvin ahi. Covid-19 natna toh kisai’a Government in jui ding’a thuphon anei ho Standard Operating Procedure (SOP) ho phate cha’a ajui ding uvin temna anei in ahi. Chuleh Sept. nisim 4 nikho leh Henglep PHC noi’a um Tuikot kho vilna anei ding hiche phatsung’a Malaria, Japanese Encephalitis (JE), Dengue toh kisai’a Community Awareness chuleh Anti-Malaria Day jong aman ding’u ahi.

xxxxxxxxxxxxxxxxxxxx

Covid-19 test kibol nom hon Dk. 750 a registration akibol uva akilah thei ding; CCpur District a sample 226 test kiboldoh 

B.Lalboi Gangte

CCpur. September 3 (ET) : Chief Medical Officer (CMO) noi’a Sample Collection Team in tunin (Sept 3) Public Ground, Hiangtam Lamka mun’a Covid-19 test ding sample analakhom uvin ahi. Chule  RAGT mangchan in Test jong abol uvin chule sample kilakhom ho chu Contact Tracing, Emergency a report dei ho Injecting Drug Users community akon agom in sample 48 leh test abol uvin ahi. Hiche mun’a Covid-19 positive amudoh lou vang uvin mun dang’a test abol nao akon in Positive 10 anamudoh uvin ahi.

Hiche toh lhon’a sample lah leh test bol theina ding’a Sample Collection Team Centre, Churachandpur Government High School a registration bol ding chuleh registration kibol chai ho Public Ground ah sample lah leh test kibol thei ding ahi. Result muvah nom hon minute15-20 kikah anga ding thei ding’u ahi. Ahin result deivah lou hon Registration abol nao mun’a result akilah thei ding ahi.

Sample test kibol thei ding ho chu kholjin doh ding ho, themjill naleh natoh na join ding leh mimal’a result dei hon Dk. 750/- a registration akibol ding ahi. Ahin Covid-19 positive hisa toh kinai’a umkhom kha Contact Tracing bol ding’a kikou hovang manbei’a test kibol ding ahi. Tunin Contact Tracing chungchon’a test kibol mi 11, adang 122, Emergency akibol 32 leh  Bijang Circuit house ah returnees 61 abon uvin RAT chungchon’a mi 226 test akiboldoh in ahi.

xxxxxxxxxxxxxxxx

CCpur District ding’a “Rashtriya Poshan Maah” hondoh hita  

B.Lalboi Gangte

CCpur. September 3 (ET) : Department of Social Welfare, Manipur tohgon na in tunin DC Conference Hall, DC Office mun’a CCpur District ding’a National Nutrition Month tia kimang Rashtriya Poshan Maah hondohna ana um in ahi. Kingon achun Thangboi Gangte Addl. DC/CCpur in “Poshan Maah” hondohna aneiyin chuleh CCpur District sung’a District Level Officer hon pan anala uvin ahi. Kingon phatsung’a Dr. Paulunmang DFWO/CCpur in “Poshan Maah” toh kisai’a “Importance of Convergence Approach on Scheme” kiti chung chang thu’a houlimna aneiyin ahi.

Hiche toh lhon’a Jin-gun apang Thangboi Gangte in houlimna aneina’a European gam chom chom toh tekah ding in ichen nao India hi gam chapang cha hi nalai jong leh  ikhantou na ding leh Malnutrition toh kisai’a India chapang hon aneilou na ding uva pan hoitah’a lah ding ahi. Hitobang neh leh chah hoilou jeh’a severe leh moderate acute malnutrition neiho holdoh’a neh leh chah apoimo ho peh ding chuleh hiche nading’a mitakip in Govt. akon scheme chom chom ho toh molso nading  toh kisai’a officer akipat  aneopen chan in mopoh na lentah anei in ahi ati.

Medani District Programme officer, ICDS CCpur in houlimna aneina’a “Poshan Maah” hi Nutrition um theina ding’a kipandoh ahi. Poshan Maah hi Sept. lhasung’a akiman sung’a Anganwadi, Village leh School jaona’a chapang leh nupi naovop laihon neh leh chah hoi jo anei thei na ding uva Webinar chungchon’a Nutri Gardening kiti ho District level leh Sub Divisional level ah gon hi ding ahi ati. Poshan Maah lolhin thei nading’a CCpur District sung’a Department chom chom in atoh ding natoh ho gonchai in aum tan ahi. Chuleh hiche hi ahung lhung ding Sept. nisim 30 chan chelha ding ahi ati. Dr. Paulunmang, DFWO/CCpur, in ahoulimna’a nupi khat in naosen avop lai akipat nikho 1000 sung hoitah’a neh leh chah apeh lou leh akhan ding bang’a khangthei lou ding ahitodh lhon’a tuchung Poshan Maah hondoh ahitoh lhon’a neh leh chah hoi Nutrition hoitah’a aum theina ding’a mitakip in hoitah’a pan alah ding uvin temna anei in ahi. Hiche tohgon ho toh molso nading in Govt. in jong Poshan Mission ding in road map hoitah jong aboldoh in chule India Govt. in neh le chah hoi angaikhoh jeh in Nutrition toh kisai Anganwadi service, Pradhan Mantri Matru Vandana Yojana, JSY, NHM, Anaemia Mukh Bharat, Indradhanush ho patdoh ahidan atahlang in ahi.

Hetthei khat chu Poshan Maah hi World Bank in Integrated Child Development Services (ICDS) pansa’a kithopi na apeh naban’a 2022 chan’a India gamsung pumpi’a District jouse’a toh molso ding ti ahi. Hiche Poshan Abhiyan hin Antenatal care, Breastfeeding leh neh leh chah toh kisai poimo dan kichuh na peh ding tihi atup le adoi ahi. Sept. lha sung’a NITI Ayog, Ministries of Women and Child Development (WCD), Health and Family Welfare, Panchayati Raj, Rural Development, Drinking Water and Sanitation, Housing and Urban Affairs, Human Resources Development (HRD), Information and Broadcasting, Consumer Affairs, Food and Public Distribution, Tribal Affairs, Minority Affairs and AYUSH tohgon nanoi’a India gamsung pumpi’a man hi ding ahi.

xxxxxxxxxxxxx

ST Morcha, BJP Manipur Pradesh Vice-President J. Khongsai loppeh na kinei

Moreh, Sept. 3 (ET) : Ahung lhung ding MDC Election a Moreh B Constituency a ding’a BJP Party ticket a intending candidate hi ding Jamlet Khongsai chu Schedule Tribe Morcha Manipur Pradesh BJP a Vice President pan mun ahin tuh nachung’a tunin ama kipapi na in Moreh Election office mun’a BJP Member achan khompi hon loppehna kingon ananei uvin ahi.

Hetthei khat chu J Khongsai hi mitom ngai ahi naban’a BJP Manipur Pradesh ding’a thinglhang mi lah’a active pen’a lamkai hon ahet utoh lhon’a achesa August nisim 31 nikho’a  Langjaigai Kamei President ST Morcha Manipur BJP Pradesh in Vice President ding’a phondohna ananei ahi.

Xxxxxxxxxxxxxx

MCPCR in numei chapang kisuse nu insung mite vilna nei

Imphal, Sept 3 : Manipur Commission for Protection of Child Rights (MCPCR) Chairperson Sumatibala Ninghthoujam makai na in tunin achesa nikho phabep sung’a Mayang Imphal, Bengun Mamang Leikai akon numei chapang khat kisuhset nachung leh athisa’a ana kidalhah nachung thu’a office chamber mun’a kihoukhomna ananei uvin ahi.

Hiche toh lhon’a Chairperson lamkai na in MCPCR team hon numei chapang nu insung mite vilna ananei naoban’a CSO leh JAC makai na’a kihoukhom na in jong pan anala uvin hiche achun MCPCR Chairperson in mona neiho POCSO Act, 2012 noi’a gotna peh ding leh numei chapang nu chung’a kithopi nathei chan’a kithopina peh ding phondoh na anei in ahi. Chule thulhut kimu dungjui’a tu hin numei chapang nu hi RIMS Hospital ICU a kijen’a aum jing lai ahi akiti.

Xxxxxxxxx

Peace Talk in Manipur kipumkhat na asuhkeh thei louding ahi: UCM

Imphal, Sep 3(ET): Indo-Naga peace talk in Manipur gamsung kipumkhat na asuhkeh thei louding ahi tin United Committee Manipur in tuni June 18 a thi ho geldohna kingon anei nauva phondoh na anei uvin ahi.

UCM President Sunil Karam in thuso miho toh akihoulimna a September lha a NSCN-IM le Indian govt in kihoulhahna anei ding ahi kiti toh lhon a hitobang thu Prime Minister Office akon hetdoh ahi jeh in mipi in lung ling lao na anei in, kihou lhahna aum jong le state sung tongkhalou kihou lhah na ahi ngai ahi tin aseiyin ahi. Manipur kipumkhat na kena ding tohgon ahung kinei le UCM in thipbeh a avetlou ding hitobang a gamsung kena ding tohgon ahung kinei le Manipur miten kithokhom a tin le ha tho a kiting ding ahi ati.

Achesa 2019 kum a Union Home Minister in gamsung tong kha ding thil aum le chanvou chang ding le atoh khah ding gam mi hotoh kihouna kinei ding ahidan hetsahna ana nei toh lhon a hitobang kitepna le hetsahna ho suhkeh louding anop na jong kiloikhomna in hetsahna anei uvin ahi. Tu lha sunga kihouna seilhahding dinmun ahung hitoh lhon a tuchanna mipi ho hetsahna ding tohgon ima ahung umlou hin ginmo na ahin um sah dan jong UCM lamkai ho chun asei uvin ahi. Hitobanga ginmo na natoh umding tahsan ahi toh lhon a mipi in kiging jing a ngah a, gamsung huhbit na dinga panlah na ding a kigotna anei cheh ding uvin jong temna anei in ahi.

Xxxxxxx

Kholchilna kichai masang in MPSC in MCSCCE-2016 (Main) exam bolding gotda hen tia Ccpur simlai kiloikhomna hon sei

Ccpur, Sept 3(ET): Churachandpur District sunga um simlai kiloikhomna hon Kuki Students’ Organisation Ccpur, Zomi Students’ Federation GHQ, Mizo Zirlai Pawl (Manipur) leh Hmar Students’ Association Hq. Ccpur hon tunin kithokhom in MPSC in MCSCCE-2016 (Main) themvetna abol kit gotna chunga thuso anei uvin ahi.

Kiloikhomna nahon asei na a MPSC in themvetna abol kit masanga commission sung suhtheng angai dan atahlang uvin ahi. Tulai tah a natna le 2016 case High Court le CBI henga kholchilna kinei ban ahitoh lhon’a tu le tua themvetna bol angai loudan jong hetsahna anei uvin ahi. Hiche themvetna hi kholchil naho kichai masanga bol louding adeidan’u jong asei uvin ahi. MPSC sunga tohkhel le bol khel umtoh lhon a kum ni le akeh lam natoh na hin nei officer ijat ham ana toh na akon kikahlhah toh lhon a commission sung kisuhtheng na lou a iti themvetna kinei kit ding ham tin kiloikhomna ho chun asei uvin ahi.

Hitobanga khangthah ijat ham hinkho kisuhset na chunga MPSC in helou kisa a natoh na anei kigot hi vangset umtah ahin, MPSC in themvetna mai mai in gel jong le simlai le khangthah ijat ham a dinga hinkho a tup le doi lhahmang na khat ahi toh lhon a moh vet a um thei louding ahi tin jong asei uvin ahi. Mipi sum le pai ahi lou le dei le ngai na toh kisai a MPSC sunga suhkhel le tohkhel nei ho gotna peh ding ahidan jong hetsahna anei uvin ahi.

High Court thupeh dungjui a toh khel le suhkhel nei ho commission sunga kholdoh a gotna pehding kiti ahin hinlah tuchan in koima gotna akipe pon chuleh hetdoh le kholdoh jong aumpon, koiman suhkhel chunga mona nei ahetdoh loutoh lhona themvetna nei kit ding kiti hi vangset umtah ahi tin jong asei uvin ahi. MPSC in phat phabep masang a MPSC sung athen tah dan le maban a hitobang suhkhel ho umkit naloudinga hetsahna anei uchu, koi in asuh thenga koi kimandoh ham tin jong kiloikhomanho in dohna anei uvin ahi. MPSC in kigotna le daan jui na alhingsel a nei thei lou a themvetna anei kigot uhi  vangset umtah ahi toh lhon a kholchil na kinei na akichai masang se a hitobang thuso ho nei kit tah louding uvin jong temna anei in ahi.

Hitobang a vangsetumtah le jaachat umtah suhkhel na chung a commission sunga kisuhtheng na le kisem phatna umlou a maban a themvetna nei dinga thuso kinei hi Churachandpur simlai kiloikhomna hon apom theilou hel ding ahi tin jong kiloikhoman ho chun hetsah na anei uvin ahi. Hitobang natoh na ho chunga CBI in phate a kholchilna anei a koima moh vetlou a suhtheng na anei uva, athah beh a commission akisemding adeisah dan jong kiloikhomna hon tahlang asei uvin hiche kholchil na chunga achaina report mipi hetding a tahdoh na ahung kinei ding nga jing ahi ati. Hitobang bol khel na chunga mipin natoh na ana kinei ho selguh umlou a hetnom na anei dan jong hetsah na ahung kinei in hiche natoh na chung changa mona nei ho le aboi na jeh ho phate hetchen ahijou ten athah beh a commission in maban ding tohgon anei ding uvin jong hetsah na anei uvin ahi.

Xxxxxxxxxxx

CCPUR CSC/VLE society in CM Covid relief fund a Dk. 12,250 toh

Ccpur, Sept 3(ET): Churachandpur District sunga Commom Service Centre (CSC) Village Level Entrepreneurs (VLE) kiloi khom (CSC VLE) Society Churachandpur District hon nisim 1st September ni chun CM COVID relief fund ding in Rs.12,250/ contribute ana bol uvin ahi. Hiche Relief fund chu Society President Pu Mangkholen Haokip le Society Jt Secretary Pu Lianzagao Hauzel in DC Churachandpur khut a pehdoh nakin ana nei lhon in ahi.

Hiche CM COVID relief fund chu CSC VLE society Ccpur member hon gelkhoh tah a atokhom u ahi in, tutu hin Churachandpur sung ah CSC VLE active member Mi 80 vel aum uvin ahi.

XXXXXXXXXXXX

Chamna le monna umsah angai e: HSA

IMPHAL, Sept 3(UNA): Tuithapi thilsoh le boina Hmar Inpui le Paite Tribe Council in August 28, 2020 nia alangto a kihethem a khosa dia aseitoh chu Home Minister ZCA in lekha athot a pat suhset ahikit e tin Hmar Students’ Association (HSA) chun asei e.

HSA in hiche thilsoh district vaihom le state government kikum nung a alen jong hilou hitobang thilneo cha thu a Union Home Minister gei thu lhut a aum jeng hi kihouna sa ija selou na ahi e, ati.

Chule cham le monna dia Hmar Inpui le PTC in agon doh sa chu palkeh lou a chelhahsah kit chu damna pen hiding ahi e tin HSA general headquarters information and publicity secretary chun aseiye.

xxxxxxxxxxxx

Loubol ho scheme kipeh na ahi Agri Dept natong ho in jong phate a panlah na anei u ngai ahi: KHUKYO

Imphal Sep 3(ET): India govt in achesa 2018 kum a kon state sunga loubol ho a dinga scheme jat chom chom PM- Kishan, PMKSY le SMAM  ho hopdoh na ahin nei pan utoh lhon a Sub Mission on Agricultural Mechanization (SMAM) chung changa scheme kipe hi central govt in abona apohdoh ahi vang in Dept of Agriculture Office Sanjenthong a Nodal Officer I. Akendro in hetsah na aneina a loubol hon hiche scheme noi a hi amu dingu hi amuding jat uva kon 40% bou ahi tia phondoh na ahin neina chung a Khundrakpam Kendra Youths Organization a Information and Publicity secretary  Tony in demna anei toh lhon in abon a channa dinga department lamkai hon panlah na aneiding u dol hilou ham tin thudoh jong ahin nei in ahi.

Loubol ho in genthei na ato ho uhi akisaipi dept in hetpehna anei a, hitabang boina le genthei naho akon kikang se na ding a natong u hilou ham tin jong kiloikhomna akon thuso kimu chun asei in ahi. Hetthei khatchu achesa August nisim 8 nikho a centre govt in state tin a Crore 553 lam hopdoh na ana nei u ahin, hitabang h phate  a hopdoh na le natoh naho a department antong ho le loubol hon panlah khom na anei na ding uvin jong kiloikhomna in hetsah na ahin nei uvin ahi. Centre in state tin a pehdoh ding le hopdoh ding a pehdoh na ahin nei u sum hi state phabep sung a election kibol ding jeh a ol a pehding a tohgon kinei jong le state sung a loubol ho ding gel khoh na a Manipur sung a agan na thei pen a peh ahi na ding in kiloikhomna in hetsah na ahin nei uvin ahi. Hiche scheme hopdoh na hi tu lha sung mama a hopdoh ahi na ding in kiloikhomna in temna ahin nei utoh lhon in, scheme hung kisol ho ahiding bangtah a pehdoh na akinei lou le Ministry of Agriculture Farmer Welfare Govt of India le Prime Minister Office (PMO) ang a kiloikhomna in hehna lekha apeh ding dan jong tahlang na ahin nei uvin ahi.

xxxxxxxxxxxxxxxxxx

Manipur legislative Assembly a party dungjui member jat hetsah na kinei

Imphal, Sept 3: Secretary, Manipur Legislative Assembly, M Ramani Devi in tuni in Yaiskul A/C MLA, Th Satyabrata in state assembly a party dungjui a thanei na ahet nom na hetsah na ana nei toh lhon in state assembly a party dungjui a MLA jat phondoh na ana nei in ahi. Party dung jui a member jat chu BJP in MLA 18, INC in 17, NPP in  4, NPF in 4, LJP in 1  chuleh  AITC in 1 ahi akiti.Independent member khat aum in chuleh koima party a jao lou khat toh aum in ahi akiti.

Xxxxxxxxxxxxxxxxxxxxxxxxxxxxxxxxxxxx

DM Community College a nodal officer khat agan natheipena koi ahi na dinga simlai hon ngehna nei

Imphal, Sept 3: Dhanamanjuri Community College a nodal officer khat agan na thei pen a koiding hi ngaichat na sangpen ahi toh lhon in college smlai ho in tuni in college mai a toumun kiphinna ana nei uvin ahi. Thuso miho toh kihou limna a Dhanamanjuri Community College Students Representative  Somi Takhelambam in college a nodal officer um na lou hi sot thim ta jong le gov tin panmun tuh ding koima ahin solpon, nodal officer umlou jeh a natoh naho abang khai a aum jing vang in gov tin nahsah in akoi pon ahi tin hetsah na ana nei in ahi. Nodal officer umlou toh lhon a semester exam, online class ahi lou le admission thah ho khatcha kibol loud an jong tahlang na ana nei in ahi.  Hitabang a tohmun a on jing vanga  gov tin vetsui na le natoh anei lou hi vangset umtah ahi tin simlai ho chun ahin sei uvin ahi. Simlai ho ding gelkhoh na agan na thei pen a nodal officer solpeh na ahung kinei na ding in jong simlai ho in govt  ang a temna ahin nei uvin ahi.

Hetthei khat chu jani a Democratic Students Alliance of Manipur (DESAM) in DM College of Teacher Education (DMCTE) a principal in charge ahi ding dol hung kisol lou jeh a Teaachers education administrative block le principal office chabi an akam u ahitan ahi. DESAM akon thuso kimu chun asei na a achesa kum 15 sung a DMCTE ahi regular principal umlou ahi tin hetsah na ahin nei uvin ahi. Achesa kum 15 sung a UGC daan toh kitoh lou a in charge ngen in vaipoh na ahin nei jing dan  ujong hetsah na ana kinei in ahi. Principal in charge kituh sah ho UGC le NCTE daan noi a lhing lou le unqualified ngen ahi dan u jong tahlang na ana kinei in ahi. Hiche panmun tuhding a kinganse ho amin mei mei a kituh sha ngen ahi jing dan u hetsah na jong ahung kinei in ahi. DESAM in hitabang doudal na ahin nei jing utoh lhon a qualified lou khat principal ding a hung kikoi hin thumna kinei lou nahsah lou a kikoi vetsah na anei tina ahi tin kiloikhomna chun phondoh na ahin nei uvin ahi. DESAM in kiphinan ahiding dol vai kipoh sah tokah a anei jing dingdan u jong tahlang na ahin nei uvin ahi. Regular jilkung umlou jeh a NCTE in BeD simna ding college akon alahdoh dan jong tahlang na ahung kinei in ahi. Hitabang college semphat na ding a govt in jilkung lhingsel a ahin koi uva ahi ding dol khat principal a ahin tun an ding uvin jong temna ahin nei uvin ahi.

Xxxxxxxxxxxxxxxxxxxxxxxx

Nagaland a Covid case 49 mudoh beh hi

Kohima, Sept 3: Nagaland sung a COVID-19 case tuni a 49 a ana punbe toh lhon in state sung a positive case agom in 4,066 alhin tan ahi. Tuni a case thah ho lah achu Dimapur le Kohima akon 24 cheh chuleh Mon akon khat ahi akiti. Nagaland health minister S Pangnyu Phom akon thuso kimu chun asei na a case thah ho chu sample 708 test kibol na a ana kimudoh ahi akiti. Case thah ho lah achun mi 18 chun sepai ahin, amaho lah a chu 15 chu Dimapur akon ahi akiti. Tu chan a armed force sung akon positive case hi state sung a 1726 alhing tan, gampam akon hung kile positive case hi 1278 ahin, mi akon kilah doh hi mi  765 lam ahin chuleh frontline worker positive jat hi 297 ahi akiti. Tu chan na covid akon thina toh hi state sung a mi 8 ahin, abon uva Dimapur akon ahiuvin ahi akiti.

xxxxxxxxx

India-China gamgi boina toh kisai a RKS Bhadauria in eastern air base ho vilna nei, Gen Naravane in Ladakh vil

New Delhi, Sept 3: Chian toh gamgi thu a kiboina um jing toh lhon in Indian Air Force (IAF) Chief RKS Bhadauria in tuni in eastern sector a air base ho vilna ana nei in chuleh Army Chief General Manoj Mukund Naravane in Leh vilna ana nei in ahi. Hetthei khat chu gamgi a Indi ale CHian in achesa lha thum sung a kidin tena ananei toh lhon a boina ana um jing ahi. Air Force chief pa chun eastern sector a air base ho vilna ana nei toh lhon in ki gin jing a aum an ding uvin temna le hetsah na jong ana nei in ahi. Alangkhat a General Naravane in Leh vilna anei na a security toh kisai in amun a pansa ho kihou pi na anei in ahi. Hetthei khat chu India le China hin achesa April lah akon a kidin tena ana nei utoh lhon a China in gamsung mun ijat ham ahin lo lut u ahitan ahi. Hetthei khatchu boina hi China sepai ho in India sepai 20 ahin tha uva kon hung khohse ahi.

Xxxxxxxxx

Amasa pen a ding a Riflewoman Battlefield nursing assistant course hondoh na kinei

Imphal, Sept 3: Amasa pen ading in Riflewomen Battle Field Nursing Assistant (BFNA) course chu Assam Rifles sung a hondoh na ana kinei in ahi. Hiche course chu Assam Rifles Multispecialty Hospital, Mantripukhri  a HQ IGAR (South) makai na noi a hondoh na ana kinei ahi. Hetthei khat chu Mahila Training Battalion chu achesa 2015 kum a ana kiphut doh ahin, Riflewomen batch masapen chu combat unit ading a achesa 2016 kum a ana kipandoh ahi. Numei ho unit semdoh ana hitoh lhon a BFNA semdoh poimo ahi akon hitabang tohgon hi hung kinei ahi.

Xxxxxxxxxxxxxxxxxxxxxxxxxxxxxxxx

BJP Sadar Hills in lamkai thah lhendoh na nei

Kangpokpi, Sept 3: Bharatiya Janata Party, Sadar Hills in tuni in district sung ading in lamkai thah le executive member lhendoh na ana nei uvin ahi. Lhendoh na kinei ho chu vice president ding a NS Phungshim, Thangminlen Kipgen, Man Bahadur Thapa, Dinglar CHiru, General Secretary ding a Chongneilam Kipgen le Nohkholun Haokip, Treasurer ding a Sagar Gewali,  Secretary ding a Tholung Mangboi, Wungreithei Siro, Albert Zamkholal Manlun, Thangpimang Kipgen, Thanggoumang Kilong chuleh executive member ding a Paojalet Touthang, Milan Pradhan, Lunginmang Kipgen, Seikholal Haokip, Rocky Rangtaina, Lunkhohen Haokip, Thangkam Lupheng, Johny Gangmei, Willing Lungbou, Veikhohat Kipgen, S. Dama Vaiphei, Themyui Siro, Mangin Vaiphei, Andrew Sareo, D. Hentinthang Khongsai, Khuthingam Hungyo,  KS Abraham, Tilminlen Khongsai,  Seilen Lhoujem,  Bishnu Maya Rai,  Lalneipao Papao Vaiphei,  Esther Vaiphei,  Joseph Vaiphei, Sophei Keishing,  Tinkhonei Kipgen,  Shinla Luikham, Honpam Jajo,  Robin Jajo, Thangkholien Gangte, Seilenmang Khongsai, Zingthan CHithung, Thangpilen Kipgen, Poolam Khwash, India Bhujel, Chandra Maya Tamang, Lapao Touthang le Thangneo Touthang ahiuvin ahi.

Xxxxx

Indian Army in LAC a panmun khel

New Delhi, Sept 3: The Indian Army hon athahbeh in Chinese PLA hon hunam a nailut ding agot jing jeh in 1597 km a sao Actual Control, Ladakh mun ah panmun akhel un ahi. Hiche kikhel na hi People’s Liberation Army’s (PLA) in Chushul sector mun a hunam a hung lut ding leh galvon leh galkap ding ahatsahbe jing jeh ahi.

PLA Air Force chaloh jing toh lhon in Aksai Chin area lah a panmun suhdet ahi jing in ahi. Indian Army hojong Ladakh gamgi chin jouse ah Chinese PLA ho chaloh velhi jing pumin panmun akisem tauvin ahi.

Senior officer akon thulhut kimu dungjui in Indian Army in panmun thah kisem hi Chinese ho panmun jouse leh chaloh na jouse kimaito pithei dinga panmun thabeh a kisem ahi tin aseiyin ahi.

The Indian Army in PLA in galkap sepoy asuhpilhing jing banga lethuh jou nadinga India Army injong achesa 1962 gal laiya ana kisemdoh Special Frontier Force ho aki koi tan, achesa ni 5 masang injong Pangong Tso mun ah Chibese PKA ana kimaito pitan tuhin Southern bank gei toupha ahitan ahi.

Chuleh Indian Army in atumbeh a combat group ho(a mix of armoured and mechanised elements) Depsang Plains mun a PLA mechanised brigade leh combat group ho kimaitopi ding koi ahivin, India gam inch khat jong koima kilah sah lou ding ahi tin thulhut chun aseiye.

India in atoupha Demchok leh Chumar area hi galkap sepoy ho ding in mun kilem leh Lhasa-Kashgar (219) highway ho kichehtah a muphahna jong ahi in, PLA ho supply na mun khat jong ahi. India galkap sepoy hon Chushul panmun kikhel ho hi atotoh a lethuhna aum jeng tgei nadinga panmun kisem hoibe ahi tin military commander in aseiyin ahi.

Alangkhat ah PLA vaihom khum General Secretary Xi Jinping chun Indian Army ho themmi chan na leh gamgi dinmun hi asuboi jing uve tin ngohna jong aneiyin, alangkhat kit ah, Chinese in gamgi chung changa kihetthem tona ding leh seichamna ding lunggel aneipon 3488 km a sao gamgi hi gam teni in galkap sepoy akoi jing hi chamna hilouva hitia a kum le lha lhunga chejom jing ding dan a umdoh ahitai tin senior official in aseiye.

Hitia gam teni kikah a pamlang in thu ijat sei in umjong leh Indian Army in amun leh amuol a thusoh dungjuiya panmun hihen, kigellhahna hijong leh alahjing khat in aum tan ahi.