Naga ho dinga flag leh constitution achom umlou ding chule meithal vaipohna...

Naga ho dinga flag leh constitution achom umlou ding chule meithal vaipohna noiya kihouna aumsot ding akisang poi, tia Governor RN Ravi in sei

923
0
SHARE

Naga ho dinga flag leh constitution achom umlou ding chule meithal vaipohna noiya kihouna aumsot ding akisang poi, tia Governor RN Ravi in sei

New Delhi, Oct 19: NSCN-IM in thumna anei Naga ho dinga ponlap achom leh Constitution achom san peh lou dinga Centre in aseiyin chule meithal vaihomna noiya thingnoi kiloikhomna toh kihouna kisem hi kisang louding ahi, tin kicheh tah a aseiyin ahi.

Naga Talk a Interlocutor leh Nagaland Governor RN Ravi in phat vaigei sang talouva Naga thu seilhah ding Centre sorkar in asei ahi, ati. Ravi in thuso aneina a alangni in nopna anei ‘draft comprehensive settlement’ kisem ahi’in, ‘final agreement’ soi kaina dinga kigotna um ahi. Ahin vangset umtah a NSCN-IM hon khongai na aneiyu ahi’in, hiche hi vangset umtah ahi. Naga national flag leh constitution thu a athu asuh vaigeiyu ahi’in, India sorkar in hiche chungchang a dinmun anei jong kicheh tah a ahet u ahi”, tin aseiyin ahi.

Achesa August nisim 5 nikho a Centre sorkar in Article 370 noiya Jammu and Kashmir gam Special Status akipehna alahdoh a chule gamsung hi Union Territory ni a hopkhen dinga thuphon anei ahitoh kilhon a Ravi thuso hi thupi ahi. Special Status akilahdoh toh kilhon a Jammu and Kashmir gam ana kipe flag leh constitution chombeh jong kisumang ahitai.

Prime Minister Narendra Modi leh Union Home Minister Amit Shah in avel vel a Framework Agreement a NSCN-IM hon lunggel chom chom akoi uva athu asuh sot sah u ahi tihi kichehtah a asei ahi. Framework Agreement hi August 3, 2015 kum a NSCN-IM general secretary Thuingaleng Muivah leh Interlocutor Ravi in Prime Minister Modi umna a soi akai ahi. NSCN-IM lamkai phabep in thuso chom chom a India sorkar toh kinoptona kisem thu a mipi adihlouva apui ahi, tin Ravi in aseiyin ahi.

Hitobang deilou umtah thilsoh NSCN-IM lamkai phabep in anei jeh a Ravi in October nisim 18 nikho a Kohima khopi a ‘primary stakeholder’ hotoh kihouna anei ahi’in, kihouna a hi Nagaland a um Naga tribe 14, Minority non-Naga tribe, Nagaland, Nagaland Gaon Bura Federation, Nagaland Tribes Council, houbung lamkai chule civil society organization hotoh kihouna anei ahi. NSCN-IM toh Framwork Agreement kisem leh Working Committee, Naga National Political Groups hotoh kinoptona kisemd inmun hi lamkai ho henga kiseiya, kihoukhomna um a chule hetkhelna ho suhthengna um ahi. Lunggel pilhinna neiya Naga lamkai hon vaigei louva athu seilhah ding atosot ahi, ati. “Naga mite dei jana kipe a India sorkar in vaigei louva ‘Peace Talk’ soi kading adei ahi’in, meithal vaihomna noiya akichai theilou kihouna sem ding akinom poi”, tin aseiyin ahi. Mipi deibanga kihouna achelhah a akisei phat sunga hiche thu seilhah ahiding hi India sorkar tahsan ahi, ati.

Achesa kum 18 sunga kihouna 80 vei anei jou uva ‘Framework Agreement’ asem u ahi’in, kihouna asem uhi 1997 kum a machalna masapen um a, hemkham kinoptona kisem ahi. India sorkar in Modi lamkaina noiya Naga Peace process seilhah ding hi sangtah a agelkhoh a khohsahna anei ahi’in, kihouna hi achesa kum 22 val um ahitai. Achesa kum 5 sunga Naga Peace Process hi ahop len a chule ‘draft final settlement sem thei dinga um ahi’in, Nagaland, Manipur, Arunachal Pradesh chule Assam gam a kon tribal chule CSO ho chamna thu kiseina a pang uva, ngaidan mantam tah tah hojong aseiyu ahi, tin RN Ravi in thuso aneina a aseiyin ahi.

Houbung lamkai hon taona aneijing hi pan alahnau lentah ahi. August nisim 3, 2015 ni a NSCN-IM toh kinoptona kisem, November 17, 2017 kum a Working Committee (WC), Naga National Political Groups (NNPGs) noiya Naga thingnoi kiloikhomna sagi in kinoptona asemdoh thei hi lunglhai umtah ahi, tin thuso chun aseibe in ahi.