Myanmar akon China thil ahung lut jing toh kilhon a Manipur leh...

Myanmar akon China thil ahung lut jing toh kilhon a Manipur leh Nagaland a coronavirus nat na alhun nathei dinmun um; Paresh Baruah in Centre toh kihouna sem dinga kigotna aneiye, tia ULFA lamkai Pranamoy Rajguru in sei; Forest & Environment Minister Shyamkumar douna a ‘disqualification case’ a hearing chelha; thutanna umlou lai; Themjil na mun koiman business bol nan manda hen: KNF-N’ NNPG le ULFA in kihou khomna ananei; North East a thingnoi ho boina kisulham ahitan chamna umtei ding ahi tai, tia PM Modi in sei; Kangpokpi district noi Phailengkot a police hon kani lei lentah vat; CM Biren in Motbung a Elmun General Conference masapen hondohna nei; Ipu ipa jana pe nam ho vannoiyin angaisang ahi, tia sei

739
0
SHARE

Myanmar akon China thil ahung lut jing toh kilhon a Manipur leh Nagaland a coronavirus nat na alhun nathei dinmun um

Kohima, Feb 4 (UNI): Manipur gamsung Moreh town a kon China thil hung kipolut jing nalai ahi’in, sorkar in hiche thil ho khana (ban) ima aneilou jeh a Manipur leh Nagaland gam a Coronavirus natna ahung lhun nathei dinmun sang ahi.

Thulhut dungjuiya, China thil, adeh a blanket, pon chule von adang dang hohi boi louva Manipur gam a Myanmar gam a kon hung kipolut jing nalai ahi’in, hiche hohi North East gam dang dang a kipo ahi. Sumkol vei hon coronavirus nat gelpha louva amaho sum mu nading bou agel u ahi’in chule state sorkar injong China thil kha nadinga pan ima alahlou ahi, tin thulhut chun aseiyin ahi.

Alangkhat a Manipur leh Nagaland gam a coronavirus case aumpoi, tin official hon asei uvin ahi. Gamsung teni a mopohna nei official hon asei dungjuiya administration hon union government thuhilna dungjuiya kivenna jouse anei ahi, ati. Tu naicha coronavirus nat kiseina gam a kon Nagaland gam a mi 33 ahung uvin, ahivanga abon uva natna symptoms nei aumpoi, tia Dr Vizolie Z Suokhrie, principal director, Health and Family Welfare Department, Nagaland in Monday nikho a thuso anei ahi.

Mipi akichat lou dinga Dr Suokhrie in temna aneiyin chule China gam a kon hung ho Centre sorkar thupeh banga ‘quarantined’ kibol ahi, ati. Nagaland Health and Family Welfare Minister S Pangnyu Phom injong department kigot dan velvet nadinga review meeting abol ahi, tin Soukhrie in aseibe in ahi.

Manipur Health Minister L Jayantakumar injong Manipur gam a dinmun kichat aumpoi, tin aseiyin, hijong leh sorkar in gamgi mun jouse a kivenna dinga pan alah ahi, ati. Lainingthou Sanamahi Temple complex, Haying Khongbal, Imphal West a kin amanna pam a Minister pa in thuso miho akimupi na’a, department in dinmun aphat tin a avet jing’a, airport chule Moreh, Jiribam, Mao, Beihang leh gamgi mun dang dang a ‘fever screening’ abol jing ahi, ati.

“Health and Family Welfare Ministry, National Centre for Disease Control (NCDC) leh World Health Organisation toh pan kilakhom’a, niseh a report kithot ahi”, ati. Gamsunga nat kholdoh nading machine aumlou vanga quarantine leh isolation room ho RIMS leh JNIMS mun a kisem ahi. Dammo dinga ginmo mikhat chu ni 14 jouva ima ati louva ahileh coronavirus natna neilou tina ahi. Hijong leh thisan sample gamdang a kithot a result hi nidan 24 sunga kimuding ahi”, tin aseibe in ahi.

Alangkhat a Tuesday nikho a Hong Kong a coronavirus jeh a mikhat athi in, nat kipatna Wuhan, China gam pam a natna jeh a thina toh akiseina gam anichanna ahitai.

Paresh Baruah  in Centre toh kihouna sem dinga kigotna aneiye, tia ULFA lamkai Pranamoy Rajguru in sei

Guwahati, Feb 4: Sorkar toh kihouna toson a United Liberation Front of Asom lamkai Pranamoy Rajguru in kiloikhomna lamkai Paresh Baruah hi ‘peace talk’ a pang dinga kigo ahi, tin aseiyin ahi. Rajguru hi kum masa May lha a Guwahati a bomb kisuhpohna tohgon sem a kingoh ahi’in chule Paresh Baruah jong tua hi gamsunga umlou ahi.

NIA Court pam a Rajguru in thuso miho akihoupi na’a, ULFA chungchang a sorkar thusei a lungkham angaipoi, ajeh chu lamkai hon Accord hi mipi san thei ahi louleh soi akai louding ahi, ati. “ULFA leh India sorkar in kihouna asem thu a mipi alungkham angaipoi. Mipi phatsah ahileh bou ULFA in Accord soi akai ding ahi”, ati.

“Mipin asan a, mipin atosot le bou ULFA in Accord a soi akai ding ahi. Mipi phatsah agel lou uve demna kaneidiu ahi”, tin lamkai pa in aseiyin chule gamsung mihon aphatsah lebou Arabinda Rajkhowa panna a ULFA lamkai hon soi akaidiu bou ahi, tin aseibe in ahi.

Centre toh thugil ho sei dinga Paresh Baruah injong kigotna anei ahi, tin Rajguru in aseiyin ahi. “Paresh Baruah in kihouna sem dinga kigotna anei ahi’in, sorkar injong kigotna anei ding ahi. Peace Talk adoudal khapoi. Paresh Baruah hin kitahna anei ahi’in, keihon tahsanna kaneiyu ahi. India sorkar injong thukhoh ho akisei teng hitobang tahsanna aneiyu ngai ahi”, tin aseibe in ahi.

Forest & Environment Minister Shyamkumar douna a ‘disqualification case’ a hearing chelha; thutanna umlou lai

Imphal, Feb 4(ET): Manipur Legislative Assembly Speaker’s Tribunal in Tuesday nikhon Forest & Environment Minister Thounaojam Shyamkumar douna a disqualification case kisem na a ‘hearing’ anei uvin, thulhuhna anei nai pouvin ahi.

Thulhuhna dinga Speakers Tribunal in aphat tepna jong aneipon, ahivanga February nisim 12 masanga party alangni in nelkalna (additional argument) jihtho a apehlut diuvin thuhilna aneiyin ahi. Disqualification case a hearing hi jingkah nidan 11 vel a kipan a, ‘minute 45’ tobang achelha in ahi. Supreme court advocate SG Hasnain, Advocate N Ibotombi Singh hi HS Paona thalheng a pang ahi.

Hearing aum sunga respondent counsel in athu hi February nisim 11 jouteng sei dinga ‘adjournment application’ ape in, ahivanga Speaker’s Tribunal in ngehna asan pen pon, athu hi seilhah louva phat sottah um ahitai, tin asei uvin ahi. Chule February nisim 14 nikho a budget session kipan ding ahi jeh a jong ngehna asan pehlou ahi.

Disqualification case no 2 leh 3 a petitioner hon hearing a (additional) affidavit apelut uvin ahi. Ahin, Tribunal in party hon February nisim 3 masanga additional document pehlut dinga party ani a thuhilna kipe ahitai, tin ngehna asan peh pouvin ahi.

Petitioner counsel a pang Advocate SG Hasnain in hearing kichaiya Speaker’s Tribunal court a kon ahungdoh jouva thuso miho akimupi na’a, Minister Shyamkumar douna a hehna akisem thu a Tribunal in thulhuhna anei hih laiyin, chule party alangni in jihtho a February 12 masanga argument apehlut diuva thuhilna aneiye, tin aseiyin ahi.

Hetthei khat chu Minister Th Shyamkumar hin Andro Assembly constituency a kon 2017 assembly election a Congress ticket a goljona aneiya, MLA hina a kihahselna anei masanga BJP a lut ahi. Chomkhat jouva Biren CM hina a Minister panmun apeh paiyu ahi. Hiche jouva Congress MLA 15 in achom chom a Minister pa douna a Speakers’ Tribunal a disqualification petition apeh uva, Minister pa hin Constitution a kipe 10th Schedule kiti Anti-Defection Law tia jong kihe dan apalkeh ahi, tia ngohna aneiyu ahi.

Speakers Tribunal in athu aseilhah vahlou jeh a petition pe hon Manipur High Court a athu apohdoh a, ahivanga court in July 24, 2019 nikho a case hi 10th Schedule noiya jurisdiction noi ahipoi, tia asuhmang u ahi. Hiche jouva Congress MLA ni- K Meghachandra leh Md Fajur Rahim in Supreme Court a hehna asem kit ahi’in, Supreme Court in tukum January nisim 21 nikho a Manipur Legislative Assembly Speaker in athu hi kal li sunga aseilhah dinga thupeh/thutanna anei ahi.

Hetthei khat chu Speaker’s Tribunal in February nisim 11 jingkah nidan 10.30 teng hitobang case ma ma kisem khum a Congress MLA sagi – Oinam Lukhoi, Wangoi AC, P Brojen, Wangjing Tentha AC, Ngamthang Haokip, Saitu AC, Ksh Biren, Lamlai AC, Y Surchandra, Kakching AC, S Bira, Kumbi AC chule Ginsuanhau Zou, Singhat AC ho hearing umdinga phat atep ahitai. Congress MLA 7 ho jong BJP a lut ahi. Assembly Secretary in tu masanga notice asodoh na’a February nisim 7 kah a thonlouva document (additional) apehlut diuva thuhilna anei ahi.

Themjil na mun koiman business bol nan manda hen: KNF-N

Imphal, Feb. 4 (ET): KNF-N in tukum (2020) sung’a gamsung’a thilpha ahung lhun thei nading’a chepi/jui ding’a Gou@ Kuki, Information& Publicity KNF(N) Govt of Kukiland in thuso aneina’a Kukiland hopsung’a Private School ho’a KNF-N ahung kiphudoh nikho apat in kai-le-don ana kibol khapon chuleh khonung’a nampi khompi’a hungpang ding simlai ho ngailutna jal in akibol pon ahi. Private School bol jousen simlai chapang ho ahi ding bang tah’a themjil nalam’a akhantou thei nading uva akhou khah ding chuleh School ho business bolna’a aman lou ding uvin temna nale hetsahna anei in ahi. Chuleh koitabang simlai ho ngailutna nei louva business a School bol hetdoh aum leh Organisation (KNF-N) in achan ding’a lom gotna kipe ding ahi. Hiche naban’a kho sung’a Govt.UJB School,Primary School chuleh Junior High School um ho jouse jong Khotol Haosapun phatah’a avet sui ding, ijem tia ahi ding dol ahi khah leh Khotol Haosaho chunga thutan na kinei ding ahi ati.

Hiche toh lhon’a Kukiland hopsung’a tulai tah hin Khamnathei lou le ai gamsung ah ani ni in ahung machal jing toh lhon’a daan toh kitoh ou khamnathei bol khangthah ho ngailutna jal’a khopi hihen hoilai mun hijong leh Kuki chate chenna mun jouse’a suh thang tah lou ding in hetsah na anei ahi. Chuleh Kukiland gamsung’a daan in aphal lou bol’a hin polut akimat doh leh KNF-N Dept. of Anti-drugs Cell in achan ding’a lom gotna apeh pan ding ahitai tinjong aseibei. Aman aseibe na’a Kuki UG Organisation hihen changval (private) a hijong leh KNF (N) min’a sum le pai dong, thil dang dang’a KNF(N) minset nathei koiman abol lou ding abol aum khah’amatdoh ahi leh achan ding’a lom gotna kipe ding koiman themmo achan thei lou ding ahi tinjong aseibei.

Alangkhat’a KNF-N in Kum thah ahitoh lhon’a athah beh’a kivaihopna hoi joh cheh nading’a mopo ding lamkai lhendoh na ananei uvin ahi. Lamkai lhendoh’a um hochu GHQ.CO : Sgt Amos Kuki;  Finance Department :Josh Kuki Secy Finances; GHQ(Island Block/Saikul Area) Finances : Kennedy Kuki; Koubru Laikha to Taphou Kuki : Nielson Kuki; Saparmeina to Gamgiphai : Rick’s Kuki chuleh  FCS (Food&Civil supply) : Sgt. Figo  Kuki ahi.

MSPDCL leh MSPCL in Dk 13,82,848 compensation a peding

Imphal, Feb 3(ET): Achesa 22 Oct 2013 nikho a Polo ground kom a transformer in Naoremthong Takhellambam leikai a cheng Konsam Ningol Khangembam (O) Rebina Devi pasal Khangembam Shashikanta amat jeh in Civil Judge (senior division), Imphal west in tuni chun managing directors of Manipur State Power Company Limited (MSPCL) and Manipur State Power Distribution Company Limited (MSPDCL) and deputy general of MSPDCL in Rebina devi heng a compensation a dangka 13,82,848 apeh diuvin thuphon anei khum in hiche sum hi lhathum kah a apeh lhin diu ahi in apeh lhin lou ule kum khat a 6% interest apeh be ding uh ahi thu jong asei in ahi.

Shashikanta hi a insung uva nehhol a pang ama bou ahi in 22 Oct. 2013 nikho a chun Paona bazar ah aluminium chennel choding in ache in a dukan kom a transformer khat aum in hiche chu fencing jong akibol khum pon chule danger sign jong akikoi deh pon, athil choh chun atohkhah jeh chun amun ah amuollem den in ahi.

City police in 174 CrPc noiya case ajihlut uvin ahi. Rabina in MSPDCL elh MSPCL ho heng a compensation peding in lekha aseplut in ahin don adonpeh pouvin hiche phat chun High court of Manipur masang ah lekha aseplut kit in ahi. HC in ex-gratia a dk lakh 1 peding in asei in chule compensation dihtah amutheina ding a Civil court lhut ding in aseipeh uvin ahi.

NNPG le ULFA in kihou khomna ananei

Guwahati, Feb 4(ET): Tunin Guwahati a Working Committee, Naga National Political Group (NNPG) le United Liberation Front of Asom (ULFA) in kihou khomna ana nei uvin ahi. Kiloikhomna tenin tu le tua chelha jing govt toh kihou na ho le thil umdan jat chom chom ho chung a kihoulimna ana nei uvin ahi.

NNPG in ULFA le government kikah a kihou na agan na thei pen a kihou lhah na aum thei na ding in temna ana nei uvin, ULFA in jong NNPG le Indian government in phat sotpi ahin boipi u kihou na le Nagland sung a chamna umnading tohgon ho akin thei pen a achai khom ding uvin temna ana nei uvin ahi.

Kiloikhomna tenin amiteu kitoh le lungmon a aum khom uva akikah ho u asuh hoi be jing na ding uvin kinoptona ana nei lhon in ahi. Kiloikhomna teni in khonung chan gei a akikah lhon a kihou matna aum jing a natoh na ho a kithokhomna anei jing nalhon ding in jong kinoptona ana nei uvin ahi.

 

North East a thingnoi ho boina kisulham ahitan chamna umtei ding ahi tai: PM Modi

New Delhi, Feb 4: Prime Minister in tuni chun BJP Parliamentary party member ho heng ah Northeast gamsung a thingnoi ho boina atamjo kisulham ahitan chamna aumtei ding thu asei in chule hiche pachanna thu hi a party hon jong athu sei nauva ajaosah diuvin asei in chule Bru refugee leh Bodo peace accord chungthu jong seilhap ahi jeh a BJP in apanlah dan leh Northeast gamsung mite a ding agelkhoh dan hi India gamsung a cheng jousen ahettei ding uh ahi ati.

Aseibena achun Central government in northeast gamsung a thingnoi ho boina akhoh dungjui a seilhahna kicheh khat neiding ti hi atup jing ahi in hichetoh lhon chun Bru mipi ho kiphinna leh Bodo gam chungthu a seichetna khat akibol tan chule ULFA leh Naga thingnoi ho jong aboina thuu seikhom a kichamna khat semdoh ding a jong koina aneisa ahitai. Jammu and Kashmir gamsung a article 370 kilahdoh jong chu melchih theikhat BJP panlahna a lolhingkhat ahi in tuchung a NE gamsung a jong akhoh deh ni kiseicham ahitan agam sung a chamna umding ahithu jong asei in ahi.

Union Health Minister Dr Harsh Vardhan leh External affairs Minister S Jaishankar in jong MPs hon coronavirus douna a panlah dan hou chung ah kipathu aphong uvin chule hiche natna vendohna ding a panla jouse chung ajong kipathu aphong uvin ahi.

Kangpokpi district noi Phailengkot a police hon kani lei lentah vat

Imphal, Feb 4(ET): Kangpokpi district noiya um Phailengkot kho thinglhang gam a kani lei kibol ho NAB, Special CDO team, Forest Department, 7th MR Bn, Imphal West district Police, Imphal East district police, Home Guard leh Kangpokpi District police hon avat uvin ahi.

SP/NAB Watham Basu leh ASP/NAB Saklemba RK, DSP/CDO Imphal East Herojit, AC Subhas leh OC/NAB Sh Chandrakumar lamkai chule ADGP (Int) Ashutosh Kumar Sinha, IPS vetkolna noiya Tuesday nikho a dan dihlouva gam leiset acre 135 vel len a kibol kani lei avat uva asuhmang u ahi. NAB Police station a FIR ajihlut tauvin ahi.

Kani lei hi Phailengkot kho a mol acre phabep len a alei abol u ahi. NAB department in Chandel, Kangpokpi leh Churachandpur district panna a thinglhang district ho a kani lei kibol ho asuhmang jing ahi.

Hiche masanga lab phabep jong phaicham leh thinglhang district mun chom chom a amatdoh u ahi’in, hiche lab ho a hi dan in aphal lou thil a kivei hon ‘brown sugar’ asem jiu ahi.

 

CM Biren in Motbung a Elmun General Conference masapen hondohna nei; Ipu ipa jana pe nam ho vannoiyin angaisang ahi, tia sei

Imphal, Feb 4(ET): Chief Minister N Biren Singh in Tuesday nikhon Elmun General Conference masapen hondohna aneiyin, mipi lah a kipunkhomna semdoh nathei conference gong ho akipapina thu aseiyin ahi.

LS lentol, Motbung kho, Kangpokpi district a Chief Minister in Conference hondohna anei na’a, ‘Brotherhood Monolith’ (janglum song) hondohna jong aneiyin ahi. Hiche jouva dah akhen in Elmun ponlap akhaidoh in conference hondohna aneiyin ahi.

Chief Guest a pang N Biren Singh in ahoulimna’a conference hi sopi hina leh kipunkhomna semdoh a pang ding ahi, tin aseiyin chule ikonna hetthemna neiya, ipi ipa jana peh a nam hi vannoiyin angaisang ahi, ati. Gamsung mihon chamna leh kipunkhomna a khantouna lampi ajot diuvin temna aneiyin, kikhenjal na hin thilpha ima aboldoh lou, machalna bou asuhboi ahi, ati. Hiche jeh a tua sorkar in kihetthem to ding, kijato ding hi sorkar asem ni masapen ni a kon agelkhoh ahi, tin aseiyin ahi.

‘Go to Village’ leh ‘Go to Hills’ mission in gamsunga aphalam a kikhelna tamtah asemdoh a, hetphah a umlou chule khohsahna kipe lou mun tamtah lhung a, angaicha hon aphatchompi ahi. Hiche jeh a ‘Go to Village’ mission Phase II kipan vahding ahitai, tin CM in phondohna aneiyin ahi. Thingphung kiphuh jing agelkhohna thu CM in aseiyin, thinglhang mihon gam mei hal angah dinga temna aneiyin ahi. Vadung atamjo gam got laiteng kang ahitai, tin aseiyin chule hiche chena aumjom a ahileh khonung teng don ding twi umlou ding ahi, tin alungkhamna thu jong aseiyin ahi.

Gammang venbit angaidan thu aseiyin chule state sorkar in thingphung phuh a gam mei hal khel a kihinso nathei lampi adang gon dinga state sorkar kigosa um ahi, ati. State sorkar in khantou machalna dinga tohgon chom chom achepi ho thu aseiyin, block chom chom 90 a doctor leh jilkung ho umna ding ‘transit accomodation’ kisa ho kisa chai vahding ahitai, tin aseibe in ahi.

Kin gon a Agriculture Minister V Hangkhanlian leh Saitu Assembly constituency MLA Ngamthang Haokip jong apang in ahi.

 

BJP Mandal Khundrakpam in Yumnam Patlou lei kisahna natoh sorkar in avetsui dinga temna nei

Imphal, Feb 4: Peace and Development Coordinating Committee (PDCC) in nidan 24 bandh abol nithum jouva BJP Khundrakpham Mandal in Khundrakpam Assembly constituency a Yumnam Patlou lei akisah na a adih louva thil bol a pang ho avetsui louvu leh BJP lamkaina sorkar minsetna hiding ahi, tin asei uvin ahi.

President, Khundrakpam BJP Mandal M Debaratan in Manipur Press Club mun a thuso miho akihoupi na’a, lei sahna dinga work program akichepi na a adihlou aum’e ti kimudoh ahi’in, PWD engineer holeh sub contractor in pan alahkhom thu mipin ahetchen ahijeh a athu kisel theilou ahi, ati. Chief Minister chule Work Minister in athu agelkhoh a BJP minsetna asuhtheng dinga temna aneibe uvin ahi.

Mel hetlou pasal khat in numei khat chem a ana bulu

Imphal, Feb 4: Thulhut khat in aseina achun melhetlou pasal khat in Charangpat Mamang leikai a cheng Mohanmacha jinu Thingujam Somola (46) chu chemcha in amai leh alu asatpeh in amun akon chun ajammang pai in ahi.

Somola chu apet in Shija hospital lhut ahi in adinmun hahthim ahidan doctor hon asei uvin ahi. Hiche thilsoh chu janhi nilhah nidan 2:30 don a chu Charangpat Mayai Leikai a Selom Loukol a soh ahi in thoubal district hospital lhut ahi jouvin Shija a ding in ahin chonsuh uvin ahi. Somola hin chapa graduate bollai khat le chanu MA chai khat anei in ahi.

Thilsoh namun dellut police hon koi khutnung ahi ahetdoh lou vang uvin hiche thilbol na a kimang chemcha, towel kang chule t-shirt vom khat amudoh uvin ahi. Somolo leikai a cheng mipi hon hiche tobang thilsoh hi sangtah a demna anei utoh lhon in akintheipen a kholdoh ahina ding in jong asei uvin ahi.