Myanmar a ‘jade mine’ a munchim jeh a mi 125 thi, 200...

Myanmar a ‘jade mine’ a munchim jeh a mi 125 thi, 200 vel oh den

78
0
SHARE

Myanmar a ‘jade mine’ a munchim jeh a mi 125 thi, 200 vel oh den

Myanmar, July 2: Myanmar gam a um ‘jade mine’ khat a munchim jeh a mi 125 athi in chule midang 200 vel jong mun in achim khum den in ahi. Thursday nikho a Hpakant mun a um jade mine achimlhah jeh ahi, tin thuson aseiyin ahi.

Thursday jingkah nidan 6.30 don thilsoh ahi in, ‘jade’ kiti songmantam (green color) akhot nau Hpakant area, Kachin state a natong hon songmantam alo pet uva bonnang chimlha in achim khum den u ahi in, go hattah a ajuh jou ahi, tin fire service department in Facebook post a asei uvin ahi. Rescue worker hon thilong 113 akaidoh ahitai, tin department in aseiyin, ahivanga, tamtah kiholmo nalai ahi.

“Thilong adang bon nang lah a um ahi”, tin Tar Lin Maung, local official in thuso miho henga aseiyin chule vangsetna toh jat kal be dinga aseibe in ahi. Phatah a vetkolna umlou Hpakant mines a munchim chule accident thilsoh adang dang hi umjing ahi in, ahivanga, tuchung thilsoh hi achesa kum 5 val sunga dinga agimnei pen ahitai.

Achesa 2015 kum a jong hiche mun achimlhah jeh a mi 100 vel thi a, hiche jouva industry regulate bol dinga kouna um ahi. Aveng mi/agam mi atamjo hin gamkaiya songmantam (jade) akhot/ahol uva kivah u ahi in, munchim adam jo hi thil kikhol ho achimlhah jeh ahi. Achesa kum phabep sunga mi phabep thi ahitan, atamjo hi acham a songmantam hol dinga kon ho ahiuve, tia media thulhut in aseiyin ahi.

Social media a kimu video footage a ‘miner’ ho kino tah a thil kipaina mun a akal uva akitet thon au mutheiya aumin chule thilong tamtah kigol jong kimuthei ahi. Thilsoh umchan mu a kum 38 a upa Maung Khaing in, akipai thil ho kikholna sangtah a kise achimlha kigo tobang hi lim kalah got le mihon ‘jam uvin, jam uvin’ tia ahin sap pan u ahi, ati.

“Hetman lou minute khat sunga mol noiya um ho kiholmo soh ahitai. Leiset in achimkhum mi phabep in akithopi ding akou uva ahivanga koiman akithopi theilou ahi”, tin aseibe in ahi.  Lhang a um CSO thilsoh a kithopina natong a pang Than Hlaing in Thursday nikho a thi hohi mining company len len in adalhah moh songmantam hol ding ache (freelancer) ho ahiuve, tin aseiyin chule mi 30 hospital a kipolut a, mi 100 vel kiholmo nalai ahi, ati.

Nobel laureate le gamsung lamkai Aung San Suu Kyi in 2016 kum a vaipohna atuh a hi industry suhtheng dinga kitepna anei ahi in, hijongle activist hon kikhelna aumpoi, tia aseiyu ahi. Myanmar gam a hiche ‘jade’ (songmantam) hi 671 million euros ($750 million) a achesa 2016-17 kum a kijoh ahi, tia sorkar in Extractive Industries Transparency Initiative noiya data apeh nauva asei ahi.

Hijongleh, expert hon asei dungjuiya, industry in atamjo China gam a apoh/ajoh songmantam man hi hiche sanga tamjo dinga atahsan u ahi. Official hon kho aphat loujeh a Thursday nikho a ‘mine’ a hi koima ache loudinga thuhilna aneiyu ahi, tin Than Hlaing in aseiyin ahi.

“Amaho hi freelance miner ahijeh uva insung miten compensation amu nadiu kinepna umlou ahi. Mihon ichan a boithei ham ti ahet vang uva lampi dang aneilou jeh uva landfill a lut jiu ahi”, tin aseibe in ahi.

Manipur a Covid-19 case thah 19 kimu be, mi 37 damdoh be

Imphal, July 2(ET): Achesa nidan 24 sung, Thursday nikho jan nidan 7 chan a Covid Care Centre chom chom a kon covid 19 positive hi a mi 37 RT PCR Test abol uva, negative ahi jou uva discharged abol tauvin, alangkhat a, nikhat sunga Covid 19 case athah 19 akihetdoh be e, tin COVID 19 Common Control Room in aseiyin ahi.

Natna akimu be toh kilhon a Manipur a natna nei agom a 1279 lhing ahitan, hiche lah a active case 663 um a chule natna a kon mi 616 kijen dam ahitai. Recovery rate 48.16 percent lhing ahitai.

Positive ahi athah a kihedoh mi 19 holah a pasal 14 le numei 5 pang ahi. Mi 10 hi Churachandpur district mi, mi 2 cheh hi Ukhrul, Kakching le Kamjong district mi chule mikhat cheh hi Imphal West, Kangpokpi le Thoubal district mi hi ahi. Abon uva Covid Care Facility a achon diu chule angaicha ‘containment’ le ‘contact tracing’ hojong abol pan u ahitai. Health Department in COVID-19 Pandemic toh kisaiya thukhoh ho mipi het dinga aseiya chule media le mipi ho henga ima im aneilou ahi, tin Health Department thuso chun aseibe in ahi.

Ukhrul a police khat jaona a mi 6 covid-19 case thah kimudoh

Imphal, July 2(ET): Jani chun Ukhrul akon police khat jaona in mi 6 covid-19 case thah amudoh uvin ahi. Manipur a security force lah a hiche natna vei ama hi ani channa ahi tan masang achun assistant sub-inspector khat Jiribam train station a duty a pang khat jong hiche natna hi ana veitan amahin Assam sung a Silchar jong ana phah khah ahidan jong asei in ahi. Ukhrul district chief medical officer Dr Kapangring AS in aseina achun police pa hi Ukhrul Hr Secondary School quarantine centre a duty ahi in June 29 nichun sample akila in hiche QC hi thumvei jen containment zone a kiphongdoh ahi ati.

Health Official sei dungjui in tuhin police pa hi district hospital a isolation ward a aum in chule ama duty bolkhom pi mi 2 jong kivenna ding in isolation ward a akoi uvin ahi. Ama teni sample jong Imphal a tuni chun ahin thot uvin jing a result amu ding uh ahi. Tuhin Manipur a Covid-19 natna veikha mi 1,279 aphatan hiche lah ahin active case 663 aum in chule mi 616 ho adamdoh tauvin chule recovery rate jong 48.16 apha in ahi.

AR hon Ukhrul a galmanchah phabep mudoh

Ukhrul, July 2(ET): AR thuso khat in aseina achun NSCN(IM) ho manchah hiding a ginmo phabep ana mudoh uvin ahi. Tukum March lha a thuguh anamu dungjui utoh lhon in hiche manchah po le a pang pa chu avelhih uvin janhi chun Lunguira Tang, Ukhrul akon (L) Jhon Shaiza chapa Lightson @ Likeson inmun a 9 mm pistol khat, point 22 rifle khat chule manchah siemchai loulai phabep ana mudoh uvin ama vang ana mandoh pouvin hinlah ajinu in achun aum in hiche operation bolna achu AR numei hojong ajao uvin ahi. Hiche mun a hi thingnoi hon thal siemna a amanchah u ahi in alangkhat ah AR hon mipi ho bittheina ding a pan nasatah in ala jing uvin ahi.

MSPCL Asst. Manager post kilahna a OBC hobou lolhing

Imphal, July 2: Manipur State Power Company Limited in (MSPCL) in tuni Assistant Manager (Electrical) post 5 kilhenna a appointment notice asohdoh na a chun post abon in OBC in ana mun ahi. Chule Alangkhat a Deputy Manager (Electrical) post 30 kilhenna a chun UR 21, OBC 6, ST 2 leh SC 1 lhendoh in aum in ahi.

Akilhengdoh ho hin ahunglhung ding July 8, 2020 masang’a office mun’a appointment letter leh angaikhoh documents ho akilah ngai diu ahi.

India a Covid-19 case lakh 6 val ta; Delhi a natna nei 90,000 nailam chule natna jeh a thi 2,800 val ta

New Delhi, July 2: India gam a coronavirus case Thursday nikhon lakh 6 aval tan ahi. Thursday nikho a Ministry of Health in Covid 19 tally update abolna a natna nei agom a 604,641 lhing ahitai.

Recovery rate hi 60% nailam ahitan, natna a kon tuchan geiya akijen dam/adam doh a 359,850 lhing a chule natna jeh a thi mi 17,834 lhing ahitai. New Delhi le Tamil Nadu gam teni a coronavirus case hatah a kal a, lakh khat anai cheh ahitan, chule Maharashtra gam a case 180,298 um a, India gam natna nei atamna pen state hijing nalai ahi.

Gujarat, Uttar Pradesh, West Bengal, Rajasthan, Telangana, Karnataka gam a kon Covid 19 case hatah a kal jing ahi. Maharashtra gam a Thursday nikho chan a Covid 19 case 180,298 lhing a, chule natna a kon mi 93,154 damdoh a, mi 8,053 thi ahitai.

Tamil Nadu gam a covid 19 case 94,049 alhingtan, natna akisei khoh na pen state holah a anichanna a apang in, natna jeh a thi jong mi 1,264 lhing ahitai. Natna a kon kijen dam mi 52,926 lhing ahi. Delhi khopi hi athum channa a pang a, Thursday nikho a natna nei 89,802 lhing ahitai. Natna a kon mi 59,992 damdoh a chule natna jeh a thi mi 2,803 lhing ahitai.

Gujarat gam a Covid 19 positive case 33,232 um a, natna a kon mi 24,030 kijen dam a chule mi 1,867 thi ahitai. Uttar Pradesh gam a Covid 19 positive case 24,056 lhing a, akijen dam mi 16,629 hi a chule natna a mi 718 thi ahi. Rajasthan gam a case 19,170 lhing ahitan, natna a mi 413 thi a chule mi 14,220 kijen dam ahitai.

West Bengal gam a natna nei 18,559 lhing a, natna a kon mi 12,528 damdoh a chule mi 683 thi ahitai. Telangana gam a covid 19 case 17,357 um a, mi 8,082 damdoh a chule natna a mi 267 thi ahi. Karnataka a case 16,514 alhingtan, natna jeh a mi 253 thi a chule mi 8,063 nailam thi ahitai. Haryana gam a natna nei 14,941 lhing a, natna jeh a mi 240 thi a chule mi 10,000 val kijen dam ahitai.

Madhya Pradesh gam a mi 13,800 positive ahitan, Andhra Pradesh a 15,252 dammo a chule Bihar le Jammu and Kashmir a natna nei 10,000 val le 7,695 lhing ahitai. Odisha gam a jong covid 19 positive case 7,316 a kal a, Assam gam a 8,528 lhing a, Punjab leh Kerala gam a case 5,668 le 4,593 lhing ahitai.

Uttarakhand, Ladakh, Jharkhand, Tripura, Manipur, Goa, Himachal Pradesh, Puducherry gam a Covid 19 case 500 val ahivanga 3000 noilang hi ahi. Mizoram, Dadra and Nagar Haveli, Daman and Diu, Chandigarh, Nagaland, Sikkim leh Arunachal Pradesh gam a case 500 noilang um a chule Meghalaya, Andaman and Nicobar Island a Covid 19 case 100 noilang um ahi.

 

Centre sorkar in Nagaland pumpi ‘disturbed area’ tia aphondoh Naga Hoho in demna thuso nei

Dimapur, July 2: Naga Hoho hon Thursday nikho a Nagaland pumpi a ‘disturbed area’ phat akisuh saobe thu a Centre sorkar demna anei uvin ahi.

Achesa June nisim 30 nikho a Centre in Nagaland pumpi a lha gup ‘disturbed area’ chepi jom dinga thuphon anei ahi in, December lha kichai chan kichepi be ding ahi. Hiche thu Naga Hohi in demna thuso anei uvin, sorkar in hiche thuphon anei toh kilhon a Armed Forces (Special Powers) Act 1958 hi Nagaland gam a kichepi jom kit ahi, ati.

Naga Hoho in thuso aneina a, AFSPA hi sepai hon hoilai mun hijong le operation abol uva chule hetsah masatna nei louva ginmo mai mai jeh a mi amat thei nadiu tha akipehna ahi. Centre sorkar in Nagaland pumpi hi ‘disturbed area’ ahi in, hiche mun a sepai thahatna man chah ding hi ngaicha ahi, tia asei ahi.

Naga Hoho in asei dungjuiya, thilsoh hi vangset umtah ahi, tin aseiyin chule India sorkar in amun a dinmun vetoh louva Naga hohi mihem ngailutna umlou pen Act amanchah khum ahi, ati. Naga Hoho in asei dungjuiya, hiche hi gamkaiya ‘law and order’ vettup nading ahipon, themmona neilou milham ho suhthip a jo tho nading ahi, tin aseibe uvin ahi.

“Themmona neilou milham ho suhgim a kichat sah nading ahi”, tin asei uvin chule gamsung hi chamna (peaceful) gam ahi, tia itih teng le aphondoh diu ham, tin thudoh jong anei uvin ahi. Act kikoi khum hin India in Naga ho adouna chule hunam thahat a apohna aphotchen ahi, ati. “Hiche dan (law) hin society khangtou lah a dinmun aneilou ahi in, hiche jeh a India sorkar in peace process hi dihtah a jana apeh a ahile law alahdoh a chule Indo-Naga Peace Talk thu suhlhap nading lampi agon ding ahi”, tin Naga Hoho thuso chun aseibe in ahi.

 

Advocate Chongtham Victor kimat toh kisai document jouse DGP in apehlut dinga MHRC in thuhilna nei

Imphal, July 2(ET): Director General of Police (DGP) in mopohna nei Heingang Police Station officer in charge hon achesa June nisim 20 nikho a advocate Chongtham Victor kimat thu toh kisaiya document ho tukum July nisim 10 kah a apeh diuvin, Manipur Human Rights Commission (MHRC) in thuhilna aneiyin ahi.

Chongtham Victor in hehna asem jouva acting Chairperson, MHRC Khaidem Mani in hiche case alah ahi in, akimat dan hi adihlou hidinga ginmona anei ahi. MHRC henga Chongtham Victor in hehna asemna a, Heingang Police station team hon IPC, section 186/465/468/471/120-B le IT Act Section 84 (C) toh kisaiya amat u ahi. Ahivanga, Chief Judicial Magistrate, Imphal East in ama kimat nading evidence (prima facie) aumpoi, tia bail a alhadoh ahi.

Commission in hehna amu jouva, hehna sempa in hehna asem avet peh a, Human Rights Act 1993 section 12 noiya thukhol dinga asei ahi. Hetthei khat chu Advocate Chongtham Victor hin Custom Division Imphal official hon nehguh abol douna a pan alah a, hiche jeh a Custom division official kahi e, tia kisei mikhat in phone abol a, gihna jong anei ahi. Official pa hi achesa June 20 jan nidan 10.30 don a Heingang police team hon amat uva, ahivanga, Chief Judicial Magistrate, Imphal East court in bail a alhadoh ahi.

Chongtham Victor hi Custom Division, Imphal a staff khat in hehna asem khum jeh a Heingang police hon IPC section 186, 465, 471 le 120 B chule IT Act section 84(B) le 84 (C) noiya amat u ahi. IPC le IT Act noi hiche section ma ma noiya advocate Amom Malemsana chunga jong FIR kijihlut a, ahivanga, ama hi amat loulaiyu ahi.

Victor le Malemsana hin Custom Division Office a Custom Division official khat in deposit kibol sum lahdoh nadinga sum guh athumna video alahdoh a, nehguh kibol asosal lhon ahi. Heingang police hon Thursday nikho a CJM Imphal East Ningthoujam Lanleima inmun a advocate Victor apui uva, police hon Victor custody a umsah dinga ngehna anei vang uva CJM Imphal East in Victor kiman nading evidence kamupoi, tia bail a alhadoh ahi.

 

Minister Awangbow Newmai in ‘Save Nambul River’ media campaign hondohna nei

Imphal, July 2(ET): Forest, Environment, Climate Change Minister Awangbow Newmai in Thursday nikhon Thong Nambonbi, Imphal West mun a ‘Save Nambul River’ media campaign hondohna anei uvin, kin gon hi All Manipur Working Journalist’s Union (AMWJU) in Directorate of Environment and Climate Change toh kitho a agon ahi.

Minister Awnagbow Newmai in ahoulimna a, Nambul vadung hi achesa kum 40-50 sunga sangtah a kisuboh ahitai, tin aseiyin chule kum masa March lha a Chief Minister N Biren Singh in National River Conservation Plan noiya ‘Rejuvenation and Conservation of Nambul River’ hondohna anei ahi, ati. Project hi mipi tosotna a lolhing ding ahi, tin aseiyin chule sorkar in apohdoh project jouse mipin atosot a chule athungai dinga temna aneibe in ahi.

‘Save Nambul River’ media campaign a pang hon kong a Loktak chan avil diu ahet kidang asahna thu aseiyin, Nambul vadung ventup nadinga mipi athu hill hang nadinga tohgon phatah ahi, ati. Local club chule vadung pam a cheng hon government official ho sei angai thu ajah akipana thu aseiyin ahi. Aumsa leiset thil ho ventup le huhtup angaidan thu aseiyin, media hon ‘environment’ venbit nadinga mipi thuhilna aneiyu apachatna thu jong aseiyin ahi. Gam le go ventup ding hi mijouse mopohna ahi, ati.

Covid 19 pandemic chungchang a, gamdang a kon gamsung mi hung kile a quarantine centre chom chom a umho kithopina neiya gamsung mi jouse le stakeholder ho jouse pachatna thu aseiyin ahi. Gamdang a tang den registered kibol mi 80,000 lah a mi 50,000 vel gamsung kile ahitai, tin aseiyin chule thilse soh aumlou nadinga mipin atosot jom diuvin temna aneiyin ahi.

Chief Minister N Biren Singh lamkaina noiya sorkar in phat chesa ho a hahsatna umho lolhingtah a akimaitopi ahi, tin aseiyin chule sorkar in gamsung khantouna dinga na atohna a mipin tosotna lhingset apeh dinga temna aneiyin ahi. M Joy, Commissioner, Information and Public Relations (IPR) in environment huhna dinga society section jousen pan alah ngai ahi, tin aseiyin, ‘Save Nambul River’ media campaign alolhin a ahile Nabul vadung semphat na chule phatkhat laiya waterway a ana kimang semdoh kitna lampi hiding ahi, ati.

Dr T. Brajakumar, Deputy Director, Directorate, Environment and Climate Change in achesa 1960 kum a Nambul vadung hi commercial a kimang waterway lentah ahi in, ahivanga, achesa kum 10-20 sunga vadung hi kemsuh cheh cheh ahi, tia aseiyin ahi. Kangchup Hills a kon twilong thum- 47km, 27km le 18 km cheh Iroishemba a kisuto a, Nambul vadung kisem ahi, ati. Iroishemba a kon Heirangoithong chan 9.14km lhing hi aboh napen ahi in, Heirangoithong a kon Loktak Lake, Yangoi Karong a longlut ahi, ati.

Media campaign kibol hi ‘trial method’ ahi in, campaign alolhinna ahile mission dinga thahat kibe na hiding ahi, ati. Hetthei khat chu ‘Rejuvenation and Conservation of Nambul River’ project hi National River Conservation Plan, Ministry of Environment, Forest and Climate Change noiya um ahi in, phase wise a thumvei chelha a, dangka crore 97.72 lut a kum thum sunga kisem ding ahi.

Directorate, Environment and Climate Change in Water Resources, Public Health Engineering, MAHUD (IMC) le Manipur State Pollution Control Board department toh kitoh a project kichepi ding ahi. Flag-off ceremony a Dr Y Nabachandra, Director, Directorate, Environment and Climate Change, Khogendra Khomdram, President, Editors Guild Manipur, Bijoy Kakchingtabam, President, AMWJU leh adang dang jong apang uvin ahi.

 

Ccpur District a amasapen ding’a Covid-19 Care Centre hondoh hita

B.Lalboi Gangte

CCpur. July 2 (ET): Churachandpur District sung’a amasapen ding in tunin Covid-19 positive ho vetkol na ding mun Covid-19 Care Centre hondoh naleh lhandoh na anakinei tan ahi. Kingon achun Pawan Yadav, IAS DC/CCpur, S. Khaikhopau Ngaihte, MCS AC to DC, S. Ginmuan Ngaihte, MCS SDO CCpur, Amrita Sinha, IPS SP/CCpur, Dr. VC Pau Tonsing, CMO/CCpur, Dr. Vanlalkungi, MS District hospital, Dr. V. Jamthianlal, Deputy MS District Hospital, District Administration leh Medical Department akon staffs ho pan anala uvin ahi.

Hiche kingon chu Dr. Donna, In-charge, Institutional Quarantine Centre in alamkai in chuleh Pawan Yadav, IAS in Covid-19 Care Centre hondoh na anei naban’a Dr. VC Pau Tonsing, CMO in Centre ah lut ding hon von kikhel (changing room) na’a amanchah ding room hongdoh na anei chuleh Pastor. Ngulzathang, CFC Tuibong in hondoh’a um jouse Pathen heng’a lhandoh na aneiyin ahi. Hondoh’a um Covid-19 Care Centre hi Covid-19 positive ho jouse koi na ding’a manchah hi ding ahin symptom nei ahi vang’a test bol lou lai ho District Hospital ah Isolation Ward ah koi hi ding chuleh positive ban’a symptom kilang jouse Imphal khopi’a vetkol hi ding ahi.

Hiche toh lhon’a Deputy Commission Pawan Yadav IAS in houlimna aneina’a NEILIT hi Quarantine Centre ding’a manchah ding ahi toh lhon in protocol jui’a sanitized leh SOP dungjui’a nidan 48 sung akisuh ong jouva Covid-19 Care Centre ding’a hondoh na kinei ahi. Chuleh achesa May nisim 10 nikho akon tuni chan’a mun dang’a kon Ccpur. hung lhung mi 4,524 val Peace Ground, Tuibong mun’a screening bol in aum tan ahi. Hiche naban’a CCpur District sung pumpi’a sample 6,800 aladoh tauvin chuleh test result ho jong gangtah’a sohdoh ahi nachung’a Medical Team chung’a akipa nathu jong aphongdoh in ahi. Aman aseibe na’a hondoh’a um Covid-19 Care Centre ahin lupna 50 akikoi in ahi. District sung’a tuni chan in Covid-19 positive case 129 akimudoh tan hiche lah’a mi 75 adamdoh tan ahi ati.

Superintendent of Police Amrita in hondoh aum Covid-19 Care Centre ahin lupna 50 aum in chuleh hiche ahi numei leh pasal um na ding jong achom cheh’a kikhen ahi ati. Chule hiche mun’a um ding ho jouse leh Quarantine Centre aum jinglai hon ajui ding uva kisem daan ho hoitah’a ajui cheh ding uvin temna aneiyin ahi. Alangkhat’a Chief Medical Officer Dr. Tonsing in houlimna aneina’a Testing Centre, JNIMS mun’a tu masang chun sample tamtah result sodoh pai theilou in um jong leh tun vang sample kikhol aum tah lou dungjui in CCpur akipat sample kithot ho jouse nikho 2 jou leh a result mupai thei ding in aum tan ahi ati.

Alangkhat’a testing machine TRUENAT hi apoimo behset na ding aumpon ahi ajeh chu TRUENAT in negative hoitah in mandoh thei jong leh positive amatdoh ho tu’a test kibol Polymerize Chain Reaction (PCR) dan bang’a confirm bolthah kit ngaiding ahi dan aphongdoh in ahi. Natna hit doudal na’a District Administration, District Police leh Line Department hon nasatah’a pan alah nao chung leh Covid-19 Care Centre hondoh thei nading’a  NEILIT Director in phalna apeh na chung’a akipana jong aphongdoh in ahi.

Sachung that khat kiman

Ccpur, July 2(ET):  Assam Police in tuni in Churachandpur police toh kitho in Assam a Sachung that a pang jing khat madoh na ana nei uvina hi. AKimandoh pa chu Chinzason VAlte, akum 41 a upa, apa min Nengzathang Valte, Bungmual Zoar Veng akon ahi akiti.