MPSC themmo jeh’a pachanna nei candidate hon vangsetna ato thu’a state sorkar...

MPSC themmo jeh’a pachanna nei candidate hon vangsetna ato thu’a state sorkar thipbeh a aum ATSUM in demna nei

357
0
SHARE

MPSC themmo jeh’a pachanna nei candidate hon vangsetna ato thu’a state sorkar thipbeh a aum ATSUM in demna nei

IMPHAL, DEC 8(UNA): All Tribal Student Union, Manipur (ATSUM) in Sunday nikhon achesa October nisim 18 nikho a High Court in Manipur Civil Service combined competitive examination asuhmang hi gamsung mihon kidang asasoh e, tin aseiyin ahi.

Tribal simlai kiloikhomna hon asei dungjuiya, hiche chungchang a state sorkar thipbeh a aumhi lungdon umcheh ahi, tin asei uvin ahi. “State sorkar officer ho kithopi louva ima thilsoh umlou tobanga imu u ahi. State sorkar natong hon hitobang dinmun ato a ahileh MPSC mitmo jeh leh suhkhel jeh a vangsetna toh a suhkhel neilouva candidate 81 ho lungthim ichan hiding ham”, tin ATSUM in thuso anei nauva asei uvin ahi.

“Vangsetna toh hohi koi hiuvem? Gamsung chanu chapa hilou uham? Ahiuleh ipijeh a sorkar hiche thu a thipbeh a umham? Agammi huh ding lunggel neilou ho state sorkar tia akisim thei nading umlou ahi. Na kitoh nunga jong hitobang thu aumleh koiyin sorkar natoh ho atahsan ding ham. Muhtui khat a suhmang jeng thei, minsetna sangtah pum a anatoh a kiladoh ahi. MPSC in MCSSCE 2016 masang leh hiche jouva abol exam jousen jong hitobang dinmun ato ding ham? Ahilouleh ipijeh a MCSSCE 2016 bou in ibol a ato ham”, tin ATSUM in thudoh aneiyin ahi.

State sorkar kimupi dinga acheuva akimupi louvu hi pohnat umtah ahi, tin jong aseibe uvin ahi. ATSUM in asei dungjuiya anatoh kisumang a official hon panmun alha ong jeh a aboina hi ol a hung kihe ding ahi.

Kum ni leh keh nailam amaho hin tomngai tah a gamsung na atoh u ahi’in, phabep hi anatoh phat jeh a ‘award’ jong kipe ahi. Thil umchan hi vangset umtah ahi, tin ATSUM in aseiyin chule gamsunga tohmun la a pang MPSC hi avel vel a thunoh baotam chule dei umlou thil bol a kimandoh jing ahi, ati. Officer ho terminate akibolna chunga MPSC themmo chan ding chule dan dungjuiya gotna pehding ahi, tin aseibe uvin ahi.

“MPSC semphat a nehguh bol officer leh natong ho lahdoh phat ahitai”, tin asei uvin ahi. “Mark kipehna, marks total kibol na a suhkhel, supervisor ho signature umlou, invigilator leh examiner soi umlou chule gangtah a result akiphon kahe uve”, tin tribal simlai kiloikhom hon asei uvin, candidate phabep in result akhel jeh a ahi in, lolhinna neiya candidate 81 in abon uva sumguh apeh u tina ahipoi”, ati.  Themmona neiya candidate ho kholdoh a gotna peh dinga thumna anei uvin chule themmona neilou ho suhkhel umlou ahijeh a vangsetna chan sah louding ahi, ati.

Themmona neiya hi achaina a MPSC hi ahi, tin asei uvin chule dihtah a exam a pachang a candidate ho dinga state sorkar in pan alah dinga ATSUM in temna anei uvin, thengtah a pachang candidate ho tosot dinga aseibe uvin ahi.

CAB in gamsung atohkhah louna dinga ILP chepi ahikit ding hibou state sorkar kinepna hi

Imphal, Dec 8(ET): Union Cabinet in CAB pohdoh dinga phatsahna anei jouva MANPAC in kiphinna akehlen in, dinmun vettup nadinga state sorkar dinmun jong akhoh laitah ahi.

Chief Minister N Biren Singh in gamsung mihon centre a lamkai ho kitepna tahsanna lhingset anei diuva temna anei hi totna tobang a aumtan ahi, ajeh chu Centre in gamsunga Inner Permit System apeh ding hi sorkar kinepna bou ahi’in, hiche hi MANPAC chule gamsung mihon atahsan jou tahlou ahi. CM Biren lamkaina state sorkar in gamsunga ILPS chepi kit dinga Center in phatthei aboh diu kinepna aneiyu tilou lampi dang anei louvu ahi.

Gamsung mihon BJP lamkaina state sorkar ahuhdoh nadinga MP Dr Ranjan hibou akinep nau ahi. Thuso mihon Civil society lamkai leh legislator phabep akimupi nauva chun atamjo in Northeast gam a um civil society organization dang dang hotoh kithuto a kiphinna sangtah neiding hibou lampi anei uva asei uvin ahi. Ahivanga politician Okram Joy in lunggel chom aneiyin ahi. Inner Manipur Parliamentary constituency MP RK Ranjan in CAB doudal nadinga tha anei ahi, ati.

Civil society organization MANPAC henga Union Home Minister in kitepna anei hohi revised CAB, 2019 a umlou ahijeh a tuni a kon kiphinna agon kit u ahi. Centre a lamkai hon Inner Line permit system athah a chepi kit dinga kitepna anei hibou state sorkar in gamsung miho ajol lungmong nathei lampi a um ahi. Ahivanga tuchan a Manipur gam panna a Northeast gam ho huhna dinga ‘clause’ akikoiye ti kihelou ahi.

Union Cabinet in CAB 2019 pohdoh dinga phatsahna aneiya Parliament member jouse Bill ahop jouva gamsung huhna ding ‘clause’ aumpoi, tihi kicheh ahitai. Amendment hi Inner Line Permit leh Sixth Scheduled akichepi na gam ho a kichepi lou ding ahi, tia Bill a kisei ahi’in, hiche hin Arunachal Pradesh, Mizoram gam pumpi, Nagaland, Meghalaya leh Tripura gam atamjo chule Assam mun phabep ahop ahi.

Bill in lha ong dinga asei gam ho lah a hi Manipur gam panglou ahi.

Dangka Crore a sim CGST Scam a Minister Hangkhalian chanu in abol agency kimin phah

Imphal, Dec 8(ET): Crore a sim CGST ‘fraud scam’ khat kholna aumin, hiche kikhol hi state Veterinary and Animal Husbandry Department a sum lampanga adih louva thil kibol hetdohna a pang thei ahi.

Veterinary and Animal Husbandry Minister V Hangkhanlian chanu Carolyn Lammuanching in abol agency chunga ngohna kisem ahi. Akisei sum tamtah Minister pa chanu in amu hi itidan a BJP lamkaina sorkar in ahet louham ti thudoh um ahi. Deputy Commissioner (Special Intelligence Unit), CGST Division, Imphal in Revenue Department, Ministry of Finance noiya October nisim 29 nikho a M/s Muanching Agency notice apeh ahi’in, hiche a hi Carolyn Lammuanching min pang ahi.

“GSTR-7 akikhol na a nang agency in Directorate of Veterinary and Animal Husbandry Services, Imphal (Tax Deductor 4SHLD01893D1DE) a kon February 2019 lha a dangka 12,96,83,125 namu e, tihi hetdoh ahi. Ahivanga agency GSTR-3B scrutiny akibol be na a chun nangin ‘outward taxable supply’ (zero rated, nil rated leh exempted tilou) hi dangka 55,66,795 ahi tia nasei ahi’in, TDS leh GSTR a dangka 12,41,46,330 bou kikhe ahi”, tin notice a chun asei uvin ahi.

November nisim 8 kah a agency in adihlou ho hilchenna anei diuva thuhilna aneiyu ahi’in, achuti louleh legal proceeding’ che dinga aseiyu ahi. GSTIN/UIN: 14AFPL8833K1Z4 hi business min a Carolyn Lammuanching kipe a trade name a hi M/S Muanching Agency, Centre Jurisdiction Churachandpur Range leh State Jurisdiction Zone 10, Churachandpur leh Pherzawl District (Jurisdiction Office) a kijih ahi.

Certification hi State Veterinary and Animal Husbandry Directorate in November nisim 6 ni a asodoh ahi’in, Joint Director (Planning) Ch Nandakishore Singh in soi akaina a hi dangka 12,96,83,125 hi M/S Muanching Agency, Churachandpur heng a Department of Veterinary and Animal Husbandry, Manipur in February 2019 a transfer abol ahitai, tia kisei ahi.

February lha a Joint Director ma ma in Deputy Commissioner (Special Intelligence Unit), Central Division, Imphal henga lekhathot apehna a office letter (dated 13/11/2019) refer abol ahi’in, hiche thu ma ma ahi’in, Centre tohgon ‘Good Governance, Hyderabad on NEC Scheme, NERSDS leh NER Vision 2020’ a dinga officer ho abon a kisalel ahijeh DC office in December nisim 10 chan phat apeh diuva temna anei ahi. Ahivanga lekhathot a hi Department in ipijeh a DC Office in athum document hohi phat tamtah sunga apehthei louham ti asei louvu ahi.

Lok Sabha a CAB thu akipohdoh teng Dr. Ranjan in ‘amendment motion’ apohdoh thei ahi: O Joy

Imphal, Dec 8(ET): Manipur Legislative Assembly a 6 vei member dinga kilhengdoh veteran politician Okram Joy in Parliament member hina a Dr Ranjan in Parliament a Citizenship (Amendment) Bill, 2019 akipohdoh teng leh Bill kiphatsahna stage athum a ‘amendment motion’ apeh thei ahi, tin aseiyin ahi.

Inner Manipur Parliamentary constituency MP Dr Ranjan in achesa November nisim 28 nikho a ‘zero hour’ a Citizenship Amendment Bill in Manipur gam atohkhah louna dinga ‘special provision’ koi dinga Lok Sabha a ngehna anei ahi. Ahivanga Union Cabinet in CAB 2019 pohdoh dinga phatsahna anei jouva gamsung huhna ding clause achombeh bill a aumpoi, tihi kicheh ahi.

O Joy in tuni jingkah a thuso miho akihoupi na’a, Parliamentary affairs legislative hi function thupi tah khat ahi. Tua Bill hi Lok Sabha a kipodoh ding, hiche jouteng Rajya Sabha a apohdoh diu ahi, ati. Parliament member hina a Dr Ranjan in abolthei ho thu aseiyin ahi. “Bill doudal nading ahilouleh Bill semphat (amendment) nadinga House member jousen tha (right) anei ahi”, ati.

“Dr Ranjan injong House member hina a akipohdoh til (stage) a hi Bill adoudal nading tha anei ahi. Bill hin North East India atohkhah ding ahi tia adoudal nathei tha lhingset anei ahi. Bill in gamsung atohkhah louna ding, ahilouleh ‘Northeast’ ahilou jong leh Manipur gam tailou mundang a bou achepi nading uva semphat sah nading thu aseithei ahi”, tin aseiyin ahi. “Amendment bol nading thu asei (move) hi aphatchom aphatchom louding House chunga kingam ahi. Hijongleh mopohna nei member hina khat a Bill adoudal thei ahi”, tin aseibe in ahi.

Bill phatsahna dinga stage 3 – 1st reading, 2nd reading leh Third reading ahi. First Reading hi akipohdoh (introduction) na ahi’in, second reading hi athu akiseikhomna ahi’in chule third reading hi Bill a clause ho aban ban a akigel khom na ahi. Member jousen ipi stage hijong leh adoudal nading tha anei ahi, tin O Joy in aseibe in ahi.

LLINs tia kihe kangkal gamsunga Malaria nat douna dinga akithopi lentah a pang

Imphal, Dec 8(ET): World Health Organization (WHO) in promote abol Long Lasting Insecticidal Nets (LLINs) tia kihe a ‘chemical’ a kisem kangkal hi malaria nat douna dinga state sorkar dinga akithopi lentah ahi, tin official hon Saturday nikhon asei uvin ahi.

State sorkar in 2021 kum kah a ‘Zero malaria status’ bulhit dinga lungtup anei ahi’in, India gam in 2030 kah a nat suhmang dinga tupna anei sanga kum 9 a masa jo ahi, tin official hon asei uvin ahi. “LLINs hi Geneva khopi a um Global Fight Against AIDS, TB and Malaria (GFATM) in man beiya ahop ahi’in, Malaria nat suhmang nading program a angaicha khoh pen khat ahi”, tin State Malaria Officer, Thangpa Serto in aseiyin ahi.

“Insecticidal Incorporated net’ hi GFATM in ahop ahi’in, kum thum leh kum nga kikah che ahi”, ati. LLINs hi 2016 kum a 3,84,348 kihom doh ahi’in, 2020 kah a 5,64,572 kihomdoh ding ahi. State Malaria office in ‘Malaria Elimination Programme’ abolna a ‘awareness campaign’ jong abol jing u ahi’in, natna akihet doh vah hi natna adouna ding lampi phapen ahi ti thu ahil u ahi.

Koi tobang tisat neiya aumleh thisan test akibol diuva hetsahna aneiyu ahi’in, khosung jouse a ‘testing kits’ um ahi, ati. Tisat hi malarial parasite jeh ham ahilouleh hilou ham ti test a kon hetchen hiding ahi. Malaria nat suhmang nadinga ‘Rapid Diagnostic Test’ hi khoh ahi, tin Etymologist Sujalata Ngangom in aseiyin ahi. State Malaria office in Gambusia leh Guppy kiti nga kivahna ‘hatchery’ anei ahi’in, hiche hi thoukang nou (larvae) ne a nga ahi’in, hiche nga hi twi akivei den ho a thoukang larvae sumang dinga khosung miho man beiya ahop u ahi, tin aseibe in ahi.

Tu naicha Governor Dr Najma Heptulla in Manipur gam hi Northeast gamkai bou hilouva India gam pumpi a ‘zero malaria status’ mu a gam masapen hiding ahi, tia anasei ahi. India in atup 2030 sanga kum 9 masang 2021 kum a hiche hi imu diu ahi, tia asei ahi.

KSA, AIMS le DESAM in MANPAC tosot; kiphinna bolhon CAB draft copy hallha

Imphal, Dec 8 (ET) : Gamsung’a CAB kichesah theilou ding ahi tia MANPAC in kiphinna leh kalsonna jatchom chom aneiho tosot na kinei jing ding ahi tin KSA, AIIMS leh DESAM in aphongdoh toh lhon in jing (Dec. 9) nikho jingkha nidan 3:00 akipat nisim 11 nilhah nidan 3:00 chan gamsung pumpi’a kiphinna bol ding ho jong kitosot ding ahi tin tunin AIMS office mun’a thuso mihotoh kihoukhom nao chun anasei lhon in ahi. DESAM Vice President N Edison in aseina’a simlai kiloikhomna teni hi MANPAC kithopi ding’a kiumsa ahitan, angaichat’a ahile tin le ha tho’a pan kilading ahi. Government in jong mipite lunggel leh kiphinna kibol ho hetpeh hen tinjong temna leh hetsahna anei in ahi.

December 9 nikho a Parliament a Citizenship (Amendment) bill kiphodoh ding ahitoh lhon in tuni chun hiche deilou hon kiphinna anei kit uvin, Draft copy jong ahallha uvin ahi. MANPAC in ana phondohsa bang in Imphal khopi sung leh mun chom chom ah hiche douna in kholang asam uvin, CAB hi North East gamsung a kichesah theilou ding ahi tin kholhang asam uvin ahi.

Khurai ah Local meira paibi ho gonna noiyin lampi ah ahung potdoh uvin hiche CAB adeilou uh vetsah na in kiphinna abol uvin ahi. Singjamei ajong kailhang tou nupi holeh club umho kitho in Singjamei kailhang ah Human chain abol uvin ahi. Nambol ajong Nambol kailhang ah toumun kiphin nupi hon abol uvin, Bishnupur, Oinam chule Moirang ajong toumun kiphin ana bol uvin ahi.

MANPAC in natoh leh kalsonna abol jouse tosotna kinei ding ahi tin Thangmeiband United Club a President Leisangthem Pratap in aphongdoh toh lhon’a Dec. nisim 9 jingkah akipat Dec. nisim 11 jinkah chan gamsung pumpi total shutdown abol jong jochan’a kithopina kipe ding ahi. Tuni thuso mihotoh akihoukhom na’a total shutdown kibol sung’a alou theilouva kin le dong, Hou thu toh kisai chuleh medical emergency ho vang kilha ongpeh ding ahi ati.

Hiche toh lhon’a gamsung’a CAB kichesah theilou ding ahi tia MANPAC in kiphinna leh kalsonna jatchom chom aneiho tosot vetsahna in tunin Khwairamband kailhang’a thiljoh nupi hon thiljoh louvin kiphinna anabol uvin ahi. Deilou thilsoh ho venna ding in Police hon muntin gahtah in avengbit uvin chuleh CAB chungchang Parliament a akisei ding toh lhon’a tujan kailhang tou nupi ho tou khovah ding’u ahi tinjong thulhut chun aseiyin ahi.

Delhi Anaj Mandi meikah jeh a natong mi 43 in thina toh

New Delhi, Dec 8: Rani Jhansi Road a um Anaj Mandi meikah jeh a thi mi 43 alhingtan ahi. Tuni jingkah a meiyin akahna building a kon mi 62 apuidoh u ahitan, hiche lah a mi 43 hi athi ahitai, tia phondohna aum in, Lok Nayak Hospital in mi 34 athi photchenna anei in chule Lady Hardinge Hospital in mi 9 athi photchenna anei ahi. Deputy Fire Chief Officer Sunil Choudhury in, “600 sq feet plot a meika ahi’in, asunglang hi athim a thim ahi. School bag, bottle leh thil dang dang kikoina factory ahi”, tin aseiyin ahi.

“Tuchan geiya mi 15 hi LNJP hospital a kijen dinga kisol ahitai. Mi phabep akisukha in chule phabep kho helouva thimil ahi. Thilso pet a amun a hi natong mi 20 leh 25 kikah ho asunga imu ahi”, tin Mohammad Asim in aseiyin ahi. Flat hi in bahara a apeh u ahi’in, short circuit jeh a kipan hiding ginchat ahin chule building neipa Rehan leh Manager Furkan jong thudoh neidin police hon aman tauvin ahi.

Congress lamkai Rahul Gandhi in Anaj Mandi mun a um factory a vangsetna toh ho insung mite alunghempi na thu aseiyin ahi. President Ram Nath Kovind injong mi 43 athi alunghempi na thu aseiyin ahi. “Delhi khopi Anaz Mandi thuso kajah hi nommo kasa lheh e. Insung mite kalunghempi in chule akisukha ho adamdoh vah diu hi hi kakinepna ahi. Amun a um authority hon mipi kithopina jo chan a abol uve”, tin Kovind in aseiyin ahi.

Delhi Chief Minister Arvind Kejriwal in thilso namun avil in chule ‘magisterial inquiry’ bol dinga thupeh aneiyin ahi. Chule meikah na a thi ho insung mite dangka lakh 10 compensation peh ding, akisukha ho dangka lakh 1 kithopina peh dinga jong phondohna aneiyin ahi. Delhi BJP chief Manoj Tiwari injong thilso namun avil in, chule alunghempina thu aseiyin ahi. BJP MP in athi ho insung mite dangka lakh 5 peh dinga phondohna anei ahi.

Hiche meikah pet a amun lhung masa loi a pang Delhi Fire Service personnel, Rajesh Shukla in mi 11 hinna ahuhdoh in ama jong alelval jeh in Lok Nayak hospital ah aki admit tan ahi. Aman aseina achun, second floor a mi phabep tangden ahidan eisei peh uvin, keijong kachelut paijeng in ahileh mi 2 chun kho ahe nalai uvin, adang jouse chu kho hetalou ahiuvin, akinthei pen in ahin puidoh in chule adang khohelou mi 12 ho jong chu aloihotoh kitho in atoldoh uvin, lampi neujeh chule lampi jouse Fire Brigade ho adim jeh in Ambulance alutthei tapon, Main road chan ahin podoh uvin ahi. Rajesh Shukla hin hiche meikah akon mi 11 ana huhdoh ahi tin thulhut chun aseiye.

Hiche meikah thilsoh hi New Delhi khopi sung a ding a akhohsie a kisei ani channa ahi in akhohsie a kisei amasapen chu 13 June, 1997 kum a Posh Green Park a um Uphaar Cinema hall a ‘Border’ film kisodoh masapen nikho a meikah thilsoh ahi in hiche achun mi 59 in thina atoh un, midang 100 val akitongkha uvin ahi.

Phone gu’a kingoh khat athisa kimu

Imphal, Dec. 8 (ET) : Chief Mason Chongtham Tikendrajit in anaopa Nongmaithem Poireinganba leh aloipa Khangembam Henajit chuleh Bishnupur District hopsung Kumbi Awang Kunou a cheng Nongmaithem Pibarel @ Lamyanba (19) chung’a Lamding Educated Welfare Association (LEWA) in ngohna aneikhum nelkal na aneiyin ahi. Hetthei khat chu hiche thilso jouva ngoh’a um LEWA member Nongmeithem Pibarel hi achesa Nov. nisim 23 nikho’a hi mobile phone gu’a kingoh ahi in ahin phat chomkhat jouvin athisa in anakimudoh in ahi. Hiche thilsoh chung thu’a tuni Chongtham Tikendrajit in thuso mihotoh akihoulimna’a mona neilou chuleh thilsoh toh kisamkaina neilou ho kimit mosah hi vangset umtah ahi anati.

Tripura a numei khat kisuhset jouva mei a kihal

Agartala, Dec 8: Hyderabad leh Unnao thilsoh in gamsung aho ling lai in alha lang lut a suhset a um kum 17 Tripura nungah nu chu anu le pasal khat in sum alah jou in ahingchang in ahal lhon e tin police hon tunichun aseiye.

Govind Ballabh Pant Medical College and Hospital a mei a hal a um nungah nu amollem tolhon a police hon anu Anima Rudra Paul kum 59 le Ajoy Rudra Paul kum 25 chu amatdoh pai ahi.  Ajoy in Khowai district Kalaynpur ka in uva kon October 28 nia kachanu apuimang a South Tripura Santir Bazar a in a apuilut ahi e tin numei nu pa chun aseiye.  Police hon asei na ah Ajoy in nungah nu chu avel vel a lhakhat le akeh sung asuhset a chujou a akichenpi nading a dk lakh 5 athum a, sum masa apeh uva December 11 a kichensah dia kinopto chu akinel lhon a kon Ajoy in kerosine achap khum a mei a ahal pai ahi e, ati.

Apona numei nu insung mi le vengsung mi ajapha chan hon Ajoy le anu Anima chu avoh tho jeng ahitai.  Hiche thu hi phatah a kholchilna nei ding in police hon aboipi tan ahi.

Athinu vengsung mi hon asei na ah numei nu chu Ajoy insung mi khat toh kicheng lhon a chu a kon a phone le social media a kon a hung kiheto pan lhon ahi e, ati.

Neldi po truck 19 kiman

Imphal, Dec 8 (ET): High Court of Manipur in vadung’a kon’a song leh neldi  lahlou dia khamgahna anei nung’a neldi lhoh tei tei truct 19 tujingkha chun Thoubal River Conservation Committee (TRCC) hon aman uvin ahi. Truck a kipo neldi hochu Forest Department in ajahda jouva Thoubal Wangmataba a um YASTA Ground ah ana solhah sah uvin ana soldoh tauve. Thoubal Wangmataba a thuso mihotoh akihoulimna ah TRCC a Convener AK Bishorjit in Government in alangkhat a phate’a avettup loutoh tule tua Thoubal vadung hi nephelometric turbidity unit (NTU) 1000 lhing ahitan, hiche hin vadung twi hatah a asuhnen thei ahi ati. Tua mipiten anen pen’a ahet’u Nambol vadung jong hi NTU lhomcha bou hinalai ahi.

Vadung’a kipat neldi leh song kilah khamgahna hi Thoubal vadung kimvel a cheng kiloikhomna 35 ho kigom khom uva asem’u Thoubal River Conservation Committee (TRCC) in High Court a ana heh uva PIL anaselut jeh uva ana kipan ahi tin TRCC Secretary Inaocha in asei in chule khamgahna akikoi vang’in vadung a kon’in song le neldi ho akilhoh lhoh nalai uve tin aseikit in ahi.