MPSC exam 2016 thu kholna ding’a CBI in FIR jihlut ta

MPSC exam 2016 thu kholna ding’a CBI in FIR jihlut ta

221
0
SHARE

MPSC exam 2016 thu kholna ding’a CBI in FIR jihlut ta

Imphal, Feb 3(ET): MPSC in abol Civil Services Mains examination, 2016 a adihlou aum’e tia ngohna ho thukholna dinga CBI hon FIR ajihlut tauve, tin official hon Monday nikhon asei uvin ahi.

Agency in case hi Manipur Public Service Commission (MPSC) a natong official akihelou phabep chunga asem ahi’in, Manipur High Court thupeh dungjui ahi. Manipur Civil Services Combined Competitive Examination (CSCCE) 2016 hi Manipur Civil Service, Manipur Police Service leh adang dang post 62 kilahna dinga ana kibol ahi’in, civil service tup a candidate phabep in hehna asem jou kum masa October lha a High Court in exam kibol san peh louna a asuhmang ahi.

Chule Court in athu hi Central Bureau of Investigation in akhol dinga jong thupeh anei ahi. High Court thutanna hi kum masa November lha a Supreme Court injong atosot ahi’in chule agency in aphat kipe sunga thukholna anei dunga thupeh anei ahi. MPSC Exam, 2016 thu khol a committee hon examiner ho signature umlouna, marks kipe kikhelna, chule adihlouva thil kibol adang tamtah amudoh u ahi, tin official hon aseibe uvin ahi.

Coronavirus case thum channa Kerala a kimudoh kit

Kasargod, Feb 3: China gamsung a um Wuhan khopi akon Coronavirus nat ahung kipatdoh akon in India gamsung ajong avei aum tauvin tuni chun hiche natna vei mong mong ahi tia phohchetna kinei athumna ding in Kerala agamsung Kasaragod akon khat amudoh be uvin ahi. Ama hi medical simlai ahi in Wuhan akon ahung kinungle na a hiche natna hi ahin vei ahitai. State health Minister KK Shailaja in aseina achun natna vei mithum ho phatecha in akivekol in chule amau ho jong alel deh pouvin adamthei nau akivetup jing e ati.

Second case chu Kerala Alappuzha akon kimandoh ahi in chule amasapen chu Thrissur akon kimandoh ahi. Kerala gamsung a hiche natvei mithum hetdoh ahitoh lhon in Health department in pan nasatah in ala uvin agamsung uva mipi ho kichihthei ding in awareness ape jing uvin chule hiche natna veithei ding dan ahilou le avei hiding ginmo umho iti umjiu ha ti hilna anei uvin nasatah a kiveng ding in gamsung mipite athuhil uvin ahi. Agamsung govt. in control room jong district 14 ah aboldoh tauvin ahi.

Kerala gamsung ah hiche natvei hiding a ginmo mi 198 test abol nauva 195 hochu negative ahiuvin chule China akon Kerala gamsung hunglut ho dehset kholchilna aha bol uvin ahi. Hiche natna hi gam chom chom a thethang louding deina jeh in Indian govt. in jong China gamsung lutthei nading e-visa phat chomkhat ading in akhah tauvin ahi.

 

January lha a gamsung in ILP revenue a Dk. crore 1 amu e: CM

Imphal, Feb 3(IFP): January nisim 1 nikho a kon gamsunga Inner Line Permit System (ILPS) akichepi pan toh kilhon a January lha sunga bou inner line permit 33,995 akipedoh in ahi.

Official report dungjuiya permit kipeh atamna pen hi Imphal West district ahi’in chule temporary permit kipehna atamna pen hi Jiribam district a ahi. Chief Minister N Biren Singh in Facebook post a gamsung in January lha a bou inner line permit a revenue dangka crore 1 vel amu ahi, tin aseiyin ahi.

“State sorkar in lhakhat sunga bou permit 34,000 vel apehdoh ahi’in, January lha sunga revenue a dangka crore khat vel kimu ahi. Hiche hi thusim a seithei ahi’in, gamsung mi dihtah holeh gamsung kivengtup ahi”, ati. “Igam uva hung hohi ilamto diu hi eiho mopohna ahi. Vigilante group ho gamsung a hung kholjin ho chunga adei deiya achon diu hi sorkar in aphal louding ahi”, tin jong aseiyin ahi.

Thulhut dungjuiya regular permit 9,985 leh temporary permit 5,645 panna a agom a permit 15,639 hi Imphal West district in apehdoh ahi’in, hiche lah a temporary permit 5,600 hi airport a ILP counter a kipe ahi. Imphal East district in agom a permit 2,221 ape in, hiche lah a 10 hi temporary hi ahi’in, temporary a kipe 10 hi abon a renew kibol ahi.

Jiribam police in temporary permit 7,118 asodoh in, regular permit panglou ahi. Thoubal district administration in temporary permit  4 panna a agom a permit 405 apeh a chule Kakching district administration in regular permit 328 asodoh ahi. Senapati district a Mao police hon agom a temporary permit 5,808 apehdoh uva, chule Knagpokpi a regular permit 211 kipe ahi.

Chandel district administration in temporary permit 4 panna a permit agom a 342 apehdoh a chule Tengnoupal district a Tengnoupal DC in regular permit 45 apehdoh a, chule temporary permit 124 apeh lah a li hi Moreh police hon renew abol ahi. Tamenglong district administration in temporary permit khat panna a agom a permit 121 apehdoh uva chule Noney district administration in temporary permit khat panna a permit 176 apehdoh ahi.

Churachandpur a agom a permit 42 kipedoh a, Pherzawl district a Sinzawl police hon temporary permit 29 apehdoh ahi. Ukhrul a agom a 632 permit kipedoh a, hiche lah a 599 hi regular hi a, 29 hi temporary hi ahi’in chule 4 renew kibol ahi. Kamjong district injong regular permit 27 apeh a chule Bishnupur district in temporary permit 9 panna a agom a permit 389 apehdoh ahi.

Hiche toh kilhon a agom a regular permit kipedoh hi 14,848 lhinga chule temporary permit kipedoh 18,794 lhing’a, chule renew kibol permit hi 353 lhing ahi.

 

Jilkung hon ‘cease work strike’ abol jeh a school leh college a themjilna sangtah a boi

Imphal, Feb 3(ET): Jilkung hon phat teplou ‘cease work strike’ abol jeh uvin government school leh college ho a themjilna sangtah in asuboi in ahi.

Saturday nikho a school jilkung hon ‘cease work strike’ apat ahitan, chule Monday nikho a kon government college a jilkung hon cease work strike apat kit ahi. Joint Teachers Forum (JTF) noiya government school a jilkung hon phat teplou strike abol u ahi’in, sorkar in Pay (ROP), 2019 a adihlou ho asuhtoh diuva ano u ahi.

Kiphinna bol JTF hon Monday nikhon class X leh Class XII exam boycott bol dinga dinmun alah u avel a suhdetna anei uvin, thumna asanpeh lou uva ahileh tulha a kipan ding exam boycott bol dinga kigotna aneiyu ahi. Exam boycott akibol sunga thilsoh deilou aumle sorkar mopohna hiding ahi, tin thuso chun gihna aneiyin ahi. Primary teacher, graduate teacher leh higher secondary government school a jilkung ho kipunkhom uva Joint Teachers’ Forum (JTF) asem u ahi’in, tu masanga sorkar in ROP 2019 asuhdih louva ahileh February lha a kon strike bol dinga phat atep peh nau thuso jong ananeiyu ahi. ROP asemphat nauva hi jilkung ho pay structure downgrade akibol’e tia ngohna aneiyu ahi.

Kum masa July 11 nikho a Manipur sorkar in Manipur Services (Revision Pay) Rules, 2019 phatsahna anei ahi’in, state sorkar in natong ho dinga 7th pay achepi kon a hiche dungjuiya jilkung ho lo hi 5th pay commission level a kisunem ahi. School session (2020-21) atamjo a class akipat kon a jilkung hon strike abol u ahi’in, class X leh XII exam kipat nading jong gamlha talou ahi. Class X exam hi February nisim 20 a kipan ding chule Class-XII exam hi February nisim 14 a kipan ding ahi.

Federation of Government College Teachers’ Association (FEGOCTA), Manipur in class boycott abol uva kiphinna apat utoh kilhon a government college jouse a Monday nikhon class aum tapon ahi. College jilkung hon FEGOCTA kiloikhomna noiya January nisim 28 nikho a kon thumna aneiyu point 10 ho akichepi loujeh a strike apat u ahitan, thumna anei ho lah a hi 7th UGC Pay and Regulations 2018 chepi ding jong pang ahi.

FEGOCTA in February nisim 6 nikho teng Imphal khopi a rally bol dinga jong tohgon anei ahi.

Kangpokpi DC kikhel jing KSO-SH in demna nei

Kangpokpi, Feb 3(UNA):  Kuki Students’ Organization Sadar Hills in Kangpokpi deputy commissioner kikhel jing na chung a demna sangtah ahin nei uvin ahi. Kiloikhomna in ahunglhungding kum ni sung a DC akikhel kit le kipom lou ding ahi tin hetsah na ahin nei uvin ahi. Thangminlen Kipgen, President KSO Sadar Hills in thuso ahin neina a Kangpokpi District hung kisem doh akon in  lha 40 sung a DC vel 4 vei akikhel tan, DC khat in lha som ham bou natoh na anei tina hai toh lhon a kiloikhomna in maban kum ni sung a ahung kikhel ding apom tah lou diu dan hetsah na ahin nei uvin ahi. Kangpokpi DC hi promotion hin mu ho kit hep chuh na ahi lou le mi ki eng bol na a hung kikoi na mun ahung kiso doh got toh lhon a hitabang a ahunghlhung kum ni sung a ahung kikhel kit le pom lou ding a thulhut kinei ahi ati. Administrator thah khat in gam khat a ahung umteng gamsung hetna le natoh na ding a phat angai chat ji ahin hinlah hitabang a tat lou a kikhel na ahung umteng natoh machal na aum thei poi tin lamkai pa chun ahin sei in ahi. President pa in asei be na a DC keu hilou a SP, SDO/BDO, Medical officers, le department dang dang a vai po ho ana toh na u gaa district mite in aneh thei na ding a phat chom khat pi  aum na ding phat u lhingset a aki umsah ji na ding in temna jong ahin nei in ahi.

FEGOCTA tosotna a Churachandpur Government College a jong toumun kiphin kibol

B.Lalboi Gangte

CCpur. Feb 3 (ET) : Manipur sung’a Government College Teacher ho kikhaikhom na  Federation of Government College Teachers’ Association (FEGOCTA) in tunin Churachandpur Government College mun’a Government heng’a ngehna anei’u asuhbulhit peh lou jeh uvin toumun kiphinna  ananei uvin ahi. FEGOCTA hin Seventh University Grant Commission (UGC) Pay leh Regulations, 2018  jui ding’a Govt. heng’a ngeh na ananei’u hi achesa Dec. nisim 4, 2018 kum apat anahi tan chuleh  Nov. nisim 29, 2019 nikho in Cease Work Strike ananei uvin Nov. 30, 2019 nikhon Manipur Chief Minister, N. Biren Singh toh kihouna ananei  uvin ahi. Ahin nikho 64 alhing nung ajong athil ngeh’u Govt. in atah asolou jeh in Jan. nisim 27, 2020 nikho in Commissioner leh Director ana kimupi kit uvin ahin  Govt. lam akon ima cha donbut na aum lou jeh in Jan. 28, 2020 akipat in kiphinna ahin bol jom jing uvin ahi.

Hiche toh lhon’a tuni toumun kiphinna phatsung’a Dr. A. Pishak Singh, President FEGOCTA in mipi leh mopoh nanei ho hetding in India gamsung State tamjo’a Government College Teachers ho lha lo leh atoh mun toh kisai in 7th  UGC Pay and Regulations, 2018 akiman lai in North Eastern State gamkai sung Manipur bou’a hi kimang lou ahi ati. Manipur Government noi’a natong hon July 11, 2019 ah hitobang pay leh regulations ahamphat pi lai uva Government College Teachers ho chung’a man ahilou hi pohnat aum jeh’a kiphinna kinei nahi jilkung ho ding’a jachat umtah ahi. 7th  UGC Pay and Regulations, 2018 hi Manipur Government College Teachers ho chung’a man ahi’a State Cabinet in jong kintah’a aphatsah’a ngeh naho suhbulhit ahi tokah’a kiphinna hi kichelhah pi jing ding, kiphinna jeh’a themjil simlai ho ding’a manthah na hung hithei ahi jeh in Govt. in agan nathei pen’a  asuhbulhit ding’u hi jilkung ho kinep ahi tinjong aseibei.

 

Aided College 10 Government College a akikhel phabep dinga phattheina ahivanga phabep dinga kijumso na hi

Imphal, Feb 3(ET): Chief Minister N Biren Singh lamkaina sorkar in aided college 10 government college a akhel pachatna sangtah anei laiya bureaucrat phabep in hiche hohi sum holna mun a amang uvin, sorkar asuminse uvin ahi.

Government college a kikhel aided college a jilkung tamtah Assistant Professor a umho lecturer status a kisunem a chule ‘eligibility criteria’ kibang neiya jilkung phabep Assistant Professor a kikoi ahi. Hiche hi ama ama college a governing body ho bol ham ahilouleh government policy chepi a bureaucrat officer ho bol ahidem, ti thudoh phabep hi college a jilkung phabep in agel ahi, ajeh chu achung uva thil lhung hohi thudih a na kitohna ahipoi, tia agel u ahi.

Higher education khantou nadinga N Biren Singh lamkaina sorkar in aided college 10 hi government college a akhel ahi. Amasapen a college 6 government college a akhel masat uva, hiche jou September 21 ni a college 4 government college a akhel be kit u ahi. College li hohi Moreh College (MC) Moreh, S Kula Women’s College (SKWC), Nambol, South East Manipur College (SEMC) Komla Thabi leh Waikhom Mani Girl’s College ahi.

Tamtah in sorkar tohgon apachatna thu asei ahi’in, alangkhat a college hi sumkol veina mun a kisem ahi, tia kimkhat in agel ahi. January nisim 29, 2020 ni a government order kisodoh dungjuiya akisei college 4 ho a post-sanction hi teaching staff a 327 chule category chom chom a non teaching staff 157 ahi.

Thuso mihon S Kula Women’s College a thil umchan akhol nauva jilkung phabep grade Lecturer status a akikhel a chule amaho tobang thepna leh hetna nei ma ma jilkung phabep assistant professor a akipansah thu a hi adih louva na kitohna um hidinga ginmona aneiyu ahi.

Achesa August nisim 21, 2019 kum a Cabinet in thulhuhna anei dungjuiya athah a government college a dinga kilalut college li ho a UGC regulation dungjuiya qualified hilou Lecturer jouse hi Lecturer a kila ding chule scal PB-2- Rs 9,300-34,300 plus GP 4,400 hi qualified ahi kah uva lha a peh dinga kisei ahi. Chule order kisodoh ni a kon amaho hin educational ualification aban jom thei nadiu NET/M Phil/Ph D ho abol thei nading uva kum nga phat peh dinga jong kisei ahi.

S Kula Women’s College, Nambol, Bishnupur district hi government college a kikhel Ph.D jilkung tu masanga Assistant Professor a anapang 6 apanmun akisuhnem peh na college adang holah a pang ahi’in, apanmun kisuhnem peh jilkung hotoh qualification leh experience kibang chet neiya jilkung phabep hi Assistant Professor panmun kipe kit ahi.

S Kula Women’s College hi Government College a akikhel a kon adih louva thil kibolna aum’e tihi mijousen ahet thuguh a kikoi ahi’in, ahivanga state government authority hon gelkhohna anei loujeh a apanmun kisuhnem peh jilkung 6 ho dinga lunglhai umlou tah hi ahi.

 

Coronavirus akon kiven na ding a government in kigot na lhing sel neita

Imphal, Feb 3(ET): China a coronavirus jeh a athi pum be jing le leiset chung mun chom chom a hiche natna nei akibe jing toh lhon in  Health Minister L Jayantakumar in coronavirus akon kiven na ding a state sung kigo sa dem a aum tah dan phondoh na ana nei in ahi.

Government in gamsung gamgi jouse a kiven na ding in ahung lut jouse vetlhah na anei jing uvin ahi tin Lainingthou Sanamahi Temple complex, Haying Khongbal, Imphal West a kingon khat a minister pa in ahou limna a ana sei in ahi.

Health minister pa in airport le gamgi Moreh, Jiribam, Mao, Beihang le adang dang ho a ki ven na ding a natoh na um jing dna tahlang na ana nei toh lhon in ministry of health and family welfare, National Centre for Disease Control (NCDC) le World Health Organisation toh niseh a kihou mat na anei jing dan u hetsah na an anei in ahi. Hiche natna hetdoh na ding machine akinei loutoh lhon in RIMS le JNIMS a isolation ward akisem in ahi tin Jayentakumar in phondoh na ana nei in ahi.

Ginmo na kinei ho ni 14 hilai mun ahi kikoi ding hiche sung a akikoi ho ima ati lou le lha doh thei hiding ahi ati. Isolation ward a kikoi ho blood test kibol a gampam a result kivetsah ding ahi dan jong tahlang na ana nei in ahi.

Alangkhat a director, Manipur Health department Dr K Rajo in thuso miho toh akihou limna a mipi ho in hai thei lou na le tahsa lhahsam na natna anei ule doctor akivetsah ding uvin temna ana nei in ahi.

Speaker’s Tribunal in Minister Shyamkumar ‘disqualification case’ thu’a tuni ‘final hearing’ bol ding

Imphal, Feb 3(ET): Manipur Legislative Assembly Speaker’s Tribunal in Forest and Environment Minister Th Shyamkumar douna a kisem ‘disqualification case’ chungchang a ‘final hearing’ Tuesday nikho teng bol dinga kigotna anei tauvin ahi.

Speakers Tribunal in February nisim 4, jingkah nidan 10.30 teng disqualification case a ‘hearing’ achaina pen um dinga phat anatep ahi. M Ramani, Secretary, Manipur Legislative Assembly injong party hon February nisim 3 masanga document apehlut diuva notice asodoh ahitai.

Hetthei khat chu Minister Th Shyamkumar hin Andro Assembly constituency a kon Congress ticket a 2017 State assembly election a goljona aneiya, hiche jou, MLA dinga kihahselna anei masanga BJP a lut ahi. N Biren sorkar noiya chomkhat jouva Minister portfolio apeh uva, MAHUD, Forest & Environment, Horticulture and Soil conservation mopohna atuh pai ahi.

Hiche jouva Congress MLA phabep in Speakers’ Tribunal court a Minister Th Shyamkumar disqualify bol nadinga hehna asem uva, Minister pa in Constitution 10th Schedule (Anti-defection law tia jong kihe) dan apalkeh ahi, tia ngohna aneiyu ahi. Speakers’ Tribunal in thutanna anei vah loujeh a lunglhai lou petitioner hon Manipur High Court a jong athu apohdoh u ahi’in, ahivanga court in July 24, 2019 kum a 10th schedule noiya jurisdiction alhingpoi, tia thutanna anei lou ahi. Ahivanga Speakers’ Tribunal in thulhuhna aneilou jeh a court in alung lhai louna thu anasei ahi.

Chomkhat jouva Congress MLA ni- K Meghachandra leh Md Fajur Rahim in Supreme Court a Minister pa disqualify’ akibol nadinga petition apeh lut ahi. Supreme Court thuhilna dungjuiya Speakers’ Tribunal in kal li sunga Minister Shyamkumar thu aseilhah dinga thutanna aneiya, Speakers Tribunal mopohna apeh ahi.

MLA K Meghachandra leh MLA Md Fajur Rahim counsel a pang SG Hasnain, Advocate in tu naicha SC thutanna copy hi Speakers’ Tribunal henga apehdoh ahitai. Alangkhat a Speakers Tribunal in Congress MLA a kon BJP a lut MLA sagi- Oinam Lukhoi, Wangoi AC, P Brojen, Wangjing Tentha AC, Ngamthang Haokip, Saitu AC, Ksh Biren, Lamlai AC, Y Surchandra, Kakching AC, S Bira, Kumbi AC, Ginsuanhau Zou, Singhat AC douna a disqualification case ma ma akisem thu a hearing hi February 11, jingkah nidan 10.30 teng umdinga aphat atep ahitai.

Hiche thu a party hon February nisim 7 kah a thon louva document apehlut diuva Assembly Secretary in notice aso ahitai. Minister Th Shyamkumar tilouva Congress MLA adang sagi hohi opposition bench a tou nalaiyu ahi. Tuchan geiya Congress in amaho hi party a kon akinodoh na order asodoh peh loulai ahi.

Hetthei khat chu 2017 Assembly election a Congress in seat 28 amu’a, BJP in seat 21 amu ahi’in, ahivanga BJP in NPF MLA 4, NPP MLA 4, LJP MLA 1, TMC MLA 1, Independent MLA 1 chule Congress a kon jamdoh MLA khat tosotna a sorkar asem ahi. Hiche jouva Congress MLA adang 7 injong BJP ajuiya, BJP camp a agom a tua hi member 40 lhing ahi.

 

Social Welfare Department in PMMVY kichepi na a ‘third position’ hina award sang

Imphal, Feb 3(ET): Social Welfare Department in Matry Vandana Saptah kin kiman sunga Pradhan Mantri Matru Vandana Yojana (PMMVY) scheme kichepina a vetjui thei tah a panlah jeh a third position amu in ahi.

Manipur gam hi hiche kipaman sang dinga mihem crore khat noi umna States/UTs category a kon kilhengdoh ahi. Dadra & Nagar Haveli chule Sikkim in hiche category a first leh second position cheh amu ahi. Director, Social Welfare, Manipur Ng Uttam Singh leh Deputy Secretary, Social Welfare, Manipur Dr Sonia Oinam in Union Minister of Women and Child Development Smriti Irani khut a konin New Delhi a award function a third position hina award asang lhonin ahi.

Union Minister Irani in achesa kum khat sunga Pradhan Mantri Matru Vandana Yojana noiya enrolment 29% a kon 71% a akal akipapina thu aseiyin ahi. Social Welfare and Cooperation Minister Nemcha Kipgen in lolhinna chunga Department akipapina thu aseiyin, mopohna nei official ho, officer chule line department ho panlah khom jal a gamsung in hitobang award amu ahi, ati. Chule gamsung phatchomna dinga scheme chom chom mangcha a pan hatah a lahkhom dinga tilkhouna thu jong aseiyin ahi.

Manipur gam a scheme kipat a kon agom a beneficiary 30,481 enrolled kibol ahitai. Matru Vandana Saptah sunga government hospital, CHC, PHC, Sub-centre leh private hospital jouse a PMMVY noiya achang ding dol beneficiary ho min khumna dinga ‘special enrolment desk’ kihong ahi.

IM thingnoi ho gari khat kihal

Ukhrul, Feb 3 9ET): Ukhrul District hopsung Somdal Police Station sung’a um Hoome kho sung miten IM thingnoi ho gari (Balero) anahal lhah peh uvin ahi tin thulhut chun aseiyin ahi. Thilsoh umdan hi IM cadre phabep Hoome kho sung’a analut uva khosung’a golvah khat um nading thu’a anaki kumlut’u ahi. Hetthei khat chu hiche golvah ding chung chan thu hi phat masa lam’a kon local Pastor in phalna anapeh lou nachung’a hunam’a phalna apeh ding’a anagih jeh uva khosung mi lungsao hon anahal lhah peh ahi.

Hiche toh lhon’a hiche thilsoh chung thu’a ahung lhung ding Feb. nisim 17 nikho leh houbung upa holeh houbung lamkai hotoh TNL office mun’a kihoukhom na anei ding’u ahi.

Thingnoi hon Indo-Myanmar jui Phaisanjang a Army camp bulu

Moreh Feb 3(ET): Indo-Myanmar jui Phaisanjang a um Army camp koi ahi kihelou thingnoimi hon tuni nilhah a abulu uvin ahi.

Thulhut dungjuiya mel hetlou thingnoi hon Monday nilhah nidan 4 don a Phaisanjang kho a um 28 Rajput camp a bomb 4-5 asuhpoh u ahi. Thilsoh a akisukha aumpoi, tin thulhut in aseibe in ahi.