Mona neilou Kukite 1000 val NSCN-IM hon anatha nao Centre leh State...

Mona neilou Kukite 1000 val NSCN-IM hon anatha nao Centre leh State Govt. in thudih’a thutan na anei tokah’a “Sahnit Ni” kinit jing ding ahi: KIM President, Khaimang Chonglo

111
0
SHARE

Mona neilou Kukite 1000 val NSCN-IM hon anatha nao Centre leh State Govt. in thudih’a thutan na anei tokah’a “Sahnit Ni” kinit jing ding ahi: KIM President, Khaimang Chongloi

B.Lalboi Gangte

CCpur. Sept. 14 (ET): Kuki Inpi in “Sahnit Ni” 2020 (Kuki Black Day) hi Kuki te chenna gam leh khotin’a ama um nacheh’a Ponvom inson’a akikhai uva taona nikho leh thilsoh umchan kihilna’a mancheh ding’a thupeh anei dungjui’a Kuki chaten achennao jouse’a kitup tah in Sahnit Ni-kho nit na ananei uvin ahi.
Hettehi khat chu Manipur leh Nagaland gamkai sung’a um Kuki ten Kuki Black Day anit nao ajeh hi National Socialist Council of Nagaland (NSCN-IM) in kiging manlou hel’a Kuki te chung’a gaal anabol khum uva chuleh United Naga Council, Manipur (UNCM) in Oct. 22, 1992  nikhon “Quit Notice” anape in ahi. Chu jou in NSCN (IM) in bannei chan Kuki chate mona neilou ho anatha nao tamnapen Sept. 13, 1993 nikho’a mihem 100 val hinkho analah utoh lhon’a Kuki Inpi in  mithi tamnapen nikho Sept. 13 hi “Kuki Black Day” tin ana minvo ahi. Hiche kum akipat chun Kuki hon NSCN-IM chung’a State leh Centre Govt. in thudih’a thutan na (Justice) anei lou jeh’a  Kuki Balck Day hi kum seh’a Kuki chaten aum natin’a nitna anei jing’u ahi.

Hiche toh lhon’a Sept. 13,2020 nikhon Kuki Inpi Manipur leh Kuki Inpi-CCpur lamkai nan 1990 akipat 1997 kum sung’a NSCN-IM khut’a Kuki hi jeh’a thina anatoh mihem 1,157 ho het jing nading’a Janglum-song atunpeh nao mun KIC, Complex, Tuibong, Churachandpur mun’a “Lest we forget-seeking for Justice and the way forward” kiti thupi mangchan amaho geldoh naleh jana peh nakin Kuki Civil Society Oragnisation ho jouse leh mipi hon ananei uvin ahi. Hiche kin’a Janglum-song kitun peh namun’a Kuki Chief Association (KCA) ana mollem saho jana vetsah nan Meipum Longkhat cheh kapging na (Guns Salute) ananei uvin chuleh Mollem saho jabol napeh kichai in amaho cheng geldoh naleh janan minute 1thep chet in ajanao ana vetsah uvin ahi. Chule Condolence Messages leh dedication of offering chu Sr.Pastor. Ginkhanmung Zou in aneichai in Janglum-song’a KNO,KIM,KIC, KSO, KKL, KWU, KWOHR, PTC, STC,MPC, KSCF leh UZO lamkai hon pahvui pehna ananei uvin ahi.

Kingon phatsung’a Khaimang Chongloi, President KIM houlimna aneina’a Kukite chena lhongpi tonna pat ipu ipa teuvin tolthi ho thi-op na Selnit leh Sahnit tin ahin che pi uvin ahi. Mihem thipha ‘a thiho ajing nikho leh thi-op na aneijun hichu Selnit ati uvin chuleh mihem thipha louva thi tichu mihem khat amonna umlouva kithat tolthi hochu daan dungjui’a achung thu kisei chai masang se’a ananit jing’u thi-op nachu Sahnit ti’a tukhang’a Kuki ten ichepi’u ahi. Tonna pat Kuki ten jolle golla ihin chenkhom pi uva nopni hihen dani hijong leh kingailu tah’a ihung khosah khompi’u Naga te ahi uvin hinlah vangset umtah in Manipur a Nagate kiloikhomna United Naga Council (UNC) in Oct. nisim 22, 1992 nikho’a Kukite Quit Notice eina soden khum uvin ahi. Hiche jouva pat chun Nagate chamlhat gaalsat Tangkhul te lamkai na NSCN-IM hon alamlou tah leh ajeh kihelou vin monna neilou Kukite bannei cha in eihin thatpan taovin hijeh chun 1992 -1995 sung in mihem 1,158 val eina that un, kho 360 val ahallhah/ asumang un chule mihem 1,00,000 val chenna ge-na neilou (Refuge) in eina koi uvin ahi. Ahin adeh’a Sept. nisim 13, 1993 nikho ahin Zoupi 1eh Janglenphai agom’a mihem 87 vel Tamei khopam’a anathat uvin hiche naban’a Gelnel kho mi 17 leh Santing kho mi 4 jong anathat uvin agom’a hiche nikho seh seh chun  mihem 108 anathat uvin ahi. Hiche thilsoh chung thu’a Kuki Nam lamkai (KIM) hon avel vel lin Nagate kiloikhomna UNC lamkai ho heng’a epi jeh’a hitobang kitha gimnei leh khan git louna um ham tin dohna ana nei uvin hinlah donbutna apethei pouvin ahi. Hiche chung thu’a ichen nao India leh Manipur gamvaipo hon tolthi ho chung thu seichaina nei neipeh un tin ngehna vel tamtah ana kinei toh lhon in achesa Feb. nisim 10, 1996 nikhon Imphal tolpi’a Kuki chate mi 1,00,000 val in kiphinna leh kijot na (Protest/Coffin Rally) anakinei chuleh gam vaipo (Government) in Tolthi ho chungthu thudih’a thutan na aneichai tokah’a Nampi lunghem, lhaset leh lungjin nikho Sahnit (Black Day) hi kum seh’a 13th  September nikho hi man ding ahi ti’a Kuki Nampin achesa Sept. nisim 7, 1995 nikho’a kilolna ana kinei ahi. Chule tuni chan in kum seh’a ihin man jing utoh lhon’a tukum ajong Kukiten ium namun cheh uva kiman ahi. Hiche nikho hi koima chi leh nam dou naleh hotna’a kibol hilouvin ipu ipateu va kon ilahson’u custom dungui’a thi-op na inei’u ahin chuleh gamvaipo (India/Manipur govt.) hon Tolthi ho chung thu aseichai loina ding’u deisah na’a kibol ahi naban’a Tolthi ho chung thu akisei chai tokah’a kibol jing ding ahi tin jong aphongdoh in ahi.

Alangkhat’a vannoi khang masa lai chun lengkhat in lengkhat asat in ahatpan ahatloupa athat in gam khat in gamkhat asem in mihem hinkho alulna (Human Rights) ana umpon hinlah tukhang adeh in vannoi ja United Nation ahung kiphudoh jouvin “The Universal Declaration of Human Righ ”tin vanoi hetding leh chepi ding achesa Dec. nisim 10, 1948 nikhonUN in ana phongdoh tan ahi. Chuleh India jong UN apang chuleh channei ahitoh lhon’a agam sung’a hitobang kitha gimnei chungthu asei chai louleh ama (India) jong themmo changthei ahi jeh’a hichan gei’a hi India Govt. heng’a thudih’a thu atan nadng’a hung kisei jing ahi ati.

PS Haokip, President KNO in houlimna aneina’a Kuki Nam mite hon ichen nao gamkai tin’a Sahnit-nikho akinit jing hi Kuki te khang thusim’a suhbei thei thil ahipon chuleh Kuki chate mona neilou NSCN-IM in anatha hi India Govt. in thutan lhahna aneito kah’a Naga toh chamna thu kisei lou ding chuleh Kuki Nam mipi te kinom louding ahi tin aphongdoh in ahi. Chuleh iham tia Govt. in Kuki chate kitha nachungthu’a thudih’a thutan na anei leh athutan dungjui’a chamna kisem ding ahin India Govt. in thina toh ho chung thu thutan lhahna aneito kah’a Naga Frame Work Agreement NSCN-IM toh anei hi chelha lou ding, doudalna natoh hi kakin ahi tia kichelhah pi jing ding ahi tinjong aseibei.

Kuki Inpi CCpur in CCpur Distrct sung’a kho tin’a Sahnit nikho nit ding leh Maicham sepna houbung tin leh kho jouse in nei ding’a hetsah na anei toh lhon’a kho tin’a Sahnit nikho nit leh maicham sepna nikho’a mang jouse in Sept. 17 ,2020 nikho chan’a report KIC kom’a pelut ding in jong kho tin’a haosa hokom’a jong hetsah na anei in ahi.

Xxxxxx

Kuki te chenna mun ho a ‘Sahnit Ni’ nikho nit a um

Imphal, Sept. 14(UNA): Kumseh leh Kuki te chenna un jouse a lunghem puldouna nikho a ana kinit jing leh melma khut a hinkho ana chan ho jouse geldoh jingna a ana kinit jing bang in September nisim 13, 2020 nikho injong a 27th channa SAHNIT NI chu mihem hinkho asang a sim ho Th. Muivah lamkaina NSCN-IM ho khut noiya 1990s laiya hinkho anachan ho leh geldoh jingna in leiset kolningli a um Kuki te umna mun jouse ah nit in ana um in ahi.

Hiche SAHNIT NI ahilou leh Kuki Black Day tia ana kinit jing hi adeh a milham khohelou sangval kitha na leh in le lou lakh val a sim kihalvam a kho le veng jakhat val kisuhmanga chunga NSCN-IM a luboh Th. Muivah chunga adih a thutan na leh gotna peh ding hi atup leh adoi khat ana hijing in ahi.

Kuki te dinga September 13 hi mujin nikho leh vangset hamsetna nikho ana hijing in ahi.  Hiche nikho a hi NSCN-IM hon nikhat sung(13 September) nikho a numei chapang jaona a nikhat thu a mihem 115 hinkho analah mang nikho uchu ana hi in ahi. Chuleh kum 5 sung NSCN-IM ho chavalna jeh in Kuki te kho 350 val halvam leh suhmang in ana um in chuleh nunao chapang jaona in mihem asanga sim hinkho melse tah in ana kithat in a lakh a sim in le lou neilou in ana umsah in ahi.

Hiche sahnit nikho hin ponlap vom intin a tahdoh in ana um in ahi. National Highway pam jouse leh Kangpokpi DHQ ho ah muthei in aum in, chuleh Sahnit ni kinit hetthei na in von vom a kivon jong muthei in ana um in ahi. Ponlap lentah a “13 September Kuki Black Day” tia kitahdoh jong Kangpokpi Bazar leh IT Road lambom lah a muthei in ana kitahdoh in ahi. Hinla Covid-19 natna hilen laitah ahijeh in deibangin japi kitit khomna umthei hih jong leh Hou-inn tin ah lunghem na leh a muolliem ho insung mite lhamon na ding in jong taokhomna in ana kimangin, lunghemna vetsah na in candle lighting jong ana um in ahi.

Kangpokpi Town Committee vaisaina in taokhomna kingon jong ana um in, Kangpokpi Women Welfare Organization, Kangpokpi Youth Union, Town committee member ho leh Kangpokpi Town Churches Fellowship lamkai honjong pan ana lauvin ahi.

Alangkhat ah, Kangpokpi district hopsunga um Gelnel Khopi ah a muolliemsa ho geldoh na in pahvui leh gun salute jong ana bol un, chuleh Joupi kho mun ah dahpi chup naleh NSCN-IM ho khut a muolliem ho hetjing na suong hondohna jong ana um in ahi.

Kuki Inpi Kangpokpi betsui na in Sahnit Nikho chu Covid-19 dan leh thupeh ho jui pumin Kuki ho chenna mun tin ah nit in ana um in ahi.

Langkhat ah, Kuki Inpi Manipur in achesa 1992-1997 sunga lungsetna bei a kitha na hi India thusim dinga dei umleh ana umkha lou ahidan atahlang in ahi. KIM in aseibe na ah NSCN-IM lamkaina a melse tah a Kuki te chunga kithana melse tah hi India Constitution 21-Right to life and personal liberty (fundamental right) leh Article 31 Right to property (constitutional right) leh Article 38, Article 39A, Article 142 palkeh a anatoh nau ahi ati. India government in hiche  dan palkeh leh Kukite chunga melse tah a chatloh NSCN-IM chunga gotna leh thutanna anei lou hi UNO Convention 29th November, 1949 kithulhuhna palkeh leh jana neilou ahidan atahlang in ahi. Kum 20 val achetah vang in hitobang dan kal a chatloh leh tolthat ho chungah tuni chan in dan dungjuiya thutan nading thupeh leh gelphah in jong aum naipon ahi. Hiche a kon a mudoh thei chu State government leh centre injong Kukite chunga melse tah a chatloh ho thu hi kihetmosah leh ngaisah injong akoi pouve ti aphochen in ahi. Hinla kum 27 che jou nung hita jong leh khutkhel na nei NSCN-IM in athilbol khel ho chunga kisihna leh kisuhtheng na aneinom leh kot lentah akihong jinge tinjong KIM a kon thulhut chun atahlangin ahi.

Xxxxxxxx

Chief Minister Tests negative; COVID-19 thah 96 kimube, agoma 7971 lhingta, Recovery rate 79% phata

IMPHAL,  Sept. 14(ET): Chief Minister N Biren, in achesa September nisim 11 nikho a Minister Th Bishwajit toh City Convention a kin kiman na a ana chekhom ahi nung in Covid-19 test akibol toh kilhon in negative ahi.

Thulhut kimu dungjui in Works Minister Th Bishwajit chu COVID-19 positive ahi hetdoh in ana um in ahi. Achesa September nisim 11 nikho chun Chief Minister N Biren leh Works Minister Th Bishwajit chu City Convention Centre munah Manipur Start up conclave kin-gon kiman na ah pan ana lakhom lhon in ahi. Works Minister Th Bishwajit COVID-19 positive a matdoh ahitoh kilhon in Chief Minister leh a CM Secretariat a staff phabep jong test akibol pai in, hinla Chief Minister N. Biren Singh chu negative ahi hetdoh ahi.

 Achesa nidan 24 sung chun Covid-19 positive thahbeh 96 mudoh ahitoh kilhon in agomin 7971 alhing tan ahi. State in phatlam amano toh kilhon in recovery rate 79.53 aphatan chuleh adamdoh hi agomin 6340 alhing tan ahi.

Dr. Shasheekumar Manganga, Additional Director Health Department and Spokesperson Covid Common Control Room

a kon thuphon dungjui in milham 78 leh CAPF 18 jaona a case thah kimube 96 hohi

RIMS RTPCR- 5, JNIMS RTPCR-23, Chandel district – 4, Ukhrul district -2, Imphal East district – 6, Little Clinic -1, Imphal West -7, Noney -3, Raj Medicity-4, Thoubal-14, Churachandpur -8, Kangpokpi -1, Bishnupur-1, Jiribam -5, Babina Dianostic -8, Tamenglong -2, Samaraitan-2 ahi.

Athahbeh a case 78 kimube ho lah a case 66 hi travel history neilou chuleh locally transmitted ahidan hetdoh ahi. Ahung kondoh nau ahi leh Imphal West district -16, Imphal east-17, Thoubal-20, Churachandpur-10, Kangpokpi-1, Bishnupur-1, Noney-3, Chandel-5, Ukhrul district-2, Jiribam district-1 leh Tamenglong-2 ahiuve.

Athahbeh a thina toh vang het ahipon ahi. Nidan 24 sung chun mi 149 adamdoh un, discharged akibol in ahi, hitoh lhon chun recovery rate 79.53 aphatan ahi. Discharged kibol ho hi CAPF -16, RIMS-6, JNIMS-3, CCC UNACCO-49, CCC Lamding Thoubal-7, CCC Lamboikhongnangkhong -50 chuleh CCC Thoubal-21  akon ahiuvin, RT PCR test kibol jouva negative ahiu toh kilhon a discharged kibol ahiuvin ahi.

Tuchan a damdoh hi agomin mi 6141 alhing tan chuleh active Covid-19 agomin 1585 ahi nalai in ahi. Hiche lah a hin milham 1283 leh security personnel mi 302 ahiuve.

Health department in mipi tiemna anei na ah koitobang positive khat toh kitongkha/kisuhkhah na nei aum khah leh akinthei pen a chom um diu akinthei pen a test akibol diuvin hetsahna anei in, chuleh control room ahilou leh CMO akijahmatpi diuvin jong temna aneiyun ahi.

Xxxxxx

CCpur leh AR in gaal manchah kisem na mun khat kholchilna nei; Mi khat le manchah phabep kimandoh

B.Lalboi Gangte

CCpur. Sept. 14 (ET) : Churachandpur  Police leh Assam Rifles kithokhom nanoi in Dorcas Veng, New Lamka mun’a gaal manchah kisem na munpi’a asempa leh gaal manchah phabep anamandoh uvin ahi. CCpur Police akon thulhut kimu dungjui’a Dorcas Veng, New Lamka mun’a gaal manchah sem’a um ahidan thuguh akimu toh lhon’a  25 Assam Rifles, 33 Assam Rifles leh CCpur Police kithokhom nanoi’a janni (Sept 13) special joint operation ana kibol na’a gaal manchah semna’a kimangcha hi ding’a ginmo chenna inn khat’a local made sem Mangsuanleng (24) S/o (L) Hauthenlal of Dorcas Veng, Churachandpur ana kimadoh ahi.

Hiche toh lhon’a ama akon in gaal manchah 12 Bore Double Barrel Rifle-1, 12 Bore Single Barrel Rifle-2, 12 Bore Single Barrel butt umlou akisem lai khat, 12 Bore Barrel Rifle a mechanism um lou akisem lai khat, Air gun akisem lai 2, 9mm pistol body a barrel um nailou akisem khat, 9mm Magazine kisem khat, Trigger Mechanism 4, 12 Bore butt & forehand guard kito khat, 9mm ball round 2, Point 22 barrel kisem khat, 12 Bore Barrel kisem khat, 12 Bore mechanism kisem khat, gaal manchah ah man ding part chom chom 2, drill bit 2 leh wooden drill khat ahi anamudoh uvin ahi.

XXXXXXXX

HiDiPSAM in September 17 apat Themjil mun ho khah ding

Imphal, Sept 14(ET): The Hill District Private School Association Manipur (HiDiPSAM) hon government in June 20 a order aso anung lahdoh louleh ahunglhung ding September 17 apat September 21 gei Minipur sunga hill district a themjilna mun ho  kha ding in gihna thusodoh ana bol un ahi.

Kiloikhom thuphondoh a kimu in aseina ah themjilna mun a kimanchah na chom chom leh lam chom chom a kihilna hojong temporary a kikhah ding ahi. HiDiPSAM aseibe na ah ahunglhung ding September nisim 21 kah a education department in ngehna kibol ho gelkhohna adei deh lou leh

 kiphinna khaojo cheh a kibol ding ahi tin thusodoh chun akimun ahi.

Kiloikhomna in education department hengah June 20 a order kibol leh simlai ho akon a tuitin fee lahlou ding thu kisodoh anung lahdoh din jong ngehna abol un ahi.

HiDiPSAM President Richard L. Haokip min a thukisodoh in aseibe na ah education department in chenkhompi ikim ivel a northeastern state chom chom hon hitobang thu ho lolhing tah a akimai topi dan leh a suhfel dan ho avetjep diuvin jong temna aneiyin ahi.

State education department in acham cham a order abol ho lolhing tah leh galjou kisa lheh jong leh department lhinlelna leh lhasamna kimidohna joh ahi tin thusodoh chun atahlang in, chuleh HiDiPSAM in kiphinna ahin nei a dei umlou thilsoh ahung umkhah leh education department in mo akipoh ding ahi. Government in ngehna kineiho kihetmo sah na leh don le dai louva akoi jeh a kiphinna hung kibol pan ahi tinjong aseiyin ahi.

Kiloikhomna in hills district sunga um nulepa chuleh simlai hon kiphinna hi ahetthem uva, kiphinna hung kibol hi, simlai, nulepa, jilkung chuleh themjilna mun neiho jouse dinga gelna a kibol ahi dan hetthem peh ding injong kiloikhomna in temna aneiyun ahi.

Thuphon in aseibe na ah, Government in order abolsa alahdoh tei ding ahi, tuition fee themkhat beh akilah lou leh private school ho dinga jilkung ho lhalo peh ahasat dan atahlang in, jilkung beiya themjilna mun ho alou theilou a kha angaitan ahi tijong aseibe in ahi. Chuleh kiloikhomna HiDiPSAM in tribal simlai kiloikhom phabep in tuition fee lah ding leh lahlou ding chungchang thu a June 20 a order kibol ana deilou dan aphondohsa akihetpeh in ahi. Government in nahsah a akoilou jeh a kiphinna kichejom sah ahi.  All Naga Students Association Manipur, All Tribal Students Association Manipur leh Kuki Students Organisation general headquarter injong hiche order ana kibol adeilou dan ana phongdoh tan ahi. Chuleh alang langa pomthei ding order thah ahin sem ding injong tribal simlai kiloikhom honjong ngehna ana neisa ahitai tinjong HiDiPSAM thusodoh chun atahlang in ahi.

Xxxxxxx

CM in Lokayukta Office sahna ding song phuna nei

Imphal, Sept. 14(ET): Chief Minister Shri N. Biren Singh in Lamphelpat mun a Manipur Lokayukta building sahna ding song phuna tunichun aneiyin ahi.

Chief Minister Secretariat mun a kon a video conference a songphuna aneitolhon a Chief Minister in houlim amanna ah government in jochan in corruption free hina ding aki geljing in, BJP makaina noija government in agel khoh chu public service lah a corruption suhbei nadin Director General of Police makai ding in Anti-corruption Cell phudoh ahi, ati.

Chule Chief Minister in  ‘Meeyamgi Numit’ lhaseh a kingon ah mipi ho hahsat na aki vekol jing in e-office jong semdoh ahitai, ati.

PWD official ho komah jong phat kipe sunga natoh banho chaidin jong temna aneiyin ahi. Manipur Lokayukta a chairperson Justice T. Nandakumar in aseina ah Lokayukta hi gamsung pumpi a democracy suh hat nadia manchah phatah ahi, ati.

Manipur Lokayukta kisemdoh hi tu le tua BJP government lolhin na khat ahitai tin T. Nandakumar chun aseiye.

Hiche kin ah chun Minister for Law and Legislative Affairs Shri L. Jayantakumar Singh jaonan Member of Manipur Lokayukta Shri Ameising Luikham, Chief Secretary Dr. Rajesh Kumar, Administrative Secretaries hojong apang un ahi.

Xxxxxxxxx

Assam Rifles hon Khamnathei thil Crore val man mandoh

Imphal, Sept 14(ET): HQ IGAR (S) lamkaina in Assam Rifles troop hon tuni September nisim 14 nikho jinglam  nidan 08:00am vel chun ginmo a um Maruti Zen car (Brown Colour) registration number WB 02 U 0775 leh gari tol a pang Mr Paukhanmang Guite, kum-34 yrs, S/o Late Mr C Guite of Kamkhang village, Churachandpur subdivision, Churachandpur District, Manipur chu ana man un ahi.

Hiche ginmo a um gari sung kholchilna aum toh kilhon in gari sunga kon in Brown Sugar 1.07kg asum a 2.14 crore man chu ana mandoh un ahi. Akimandoh thil ho hi Moreh apat Imphal a thah dinha hung kipo ahi. Hitoh kilhon chun akimandohpa leh von kimandoh ho Moreh police ah kholchilna neibe dinga pehlut ahi.

xxxxxxxxx

Education Minister in National Webinar Hindi Diwas a thusei na nei

Imphal, Sept 14(ET): Education Minister Dr. Thokchom Radheshyam in National Hindi Diwas kiman na ah tuni chun India hatna hi pao chom chom a chenkhom hi ahipen in chule Hindi pao official a kimang hin India pumpi pao chom chom akankhom ahi e, ati.

Radheshyam in aseibena ah India hi pao chom chom tamtah um ahi in Hindi hin pao achamkim sah e, ati. Minister pa hin National Webinar a hi Jin-Gun hina in ‘Rashtriya Ekatmata Aur Hindi’, Manipur ti thupi mangcha a houlim aman ahi.

Dr. Radheshyam in asei na ah vannoi pumpi a Hindi hi mihem million 600 val in aman ahi in pao kimang lah a atam pen ahitai, ati. Hiche toh kisai a Hindi hi achal be a het nading tohgon angai e, ati . Aman aseibena ah September 14 hi Hindi Diwas  kumseh leh kimang ahi in 1949 kum a Constituent Assembly of India a Hindi hi India a dia official pao dia ana ki phondoh ahi, ati. India in hetthei in pao 2 akimang in khat chu English ahi in 22 scheduled language Republic of India a dinga pao kimang lah a khat ahitai tinjong aseiye.

Hiche WEBINAR chu Shri Jarnail Singh, Vice Chancellor, Manipur University jaonan Prof. Yashwant Singh HOD, Hindi Department, Manipur University; Prof. Hitendra Kumar Mishra Shiksha Sanskriti Utthan Nyas, NE Region; Dr. Awanijesh Awasthi, Department of Hindi, D.M. College of Arts, Imphal, Dr. E Vijay Lakshmi, Department of Hindi, Manipur University; research scholar le simlai tampi jong apang un ahi.

Xxxxxxxxxx

Minister Jayantakumar in khonung ding tohgon phatah madel angai e tia Ayush kikhop khomna a sei

Imphal, Sept. 14(ET)  Health and Family Welfare Minister Shri L Jayantakumar Singh in Ayush department a staff holeh officer ho komah khonung ding ve pum a tohgon neicheh ding in  tilkhouna anei e.

Imphal Lamphelpat lupna 50 umna Ayush Hospital mun a POSHAN MAAH kingon kimanna a Jin-Gun hina Minister Jayantakumar chun houlimna anei ahi.

Damthei nahi mi jousen angai chat pipen mi jousen mopoh na anei cheh in chule Government in jong mipi damthei na ding in tohgon chom chom aphatseh in apodoh jing e, ati.

Aman aseibe na ah department of social welfare in numei, chapang, tehse kumtam ho dingin scheme chom chom agong jing in, numei naovop ho dingin jong scheme chom chom abol peh jinge, ati. Ahin athu mei mei a lolhing joulou ding ahi in hitobang hi mipi in jong ahet thei nadia tahlang jing apoimo in, Ayush in mopohna lentah anei e, ati.

Hiche kikhop khomna chu Lamphelpat mun a um ahi in Dr. A. Guneshwor Sharma, member Secretary, State Ayush Society, Manipur Director AYUSH, Manipur jaonan Dr. Lukhoi Singh, Dr. Ng. Mema Medical Superintendent, AYUSH Hospital Lamphelpat leh AYUSH Department a konin official phabep ho jong kingon a chun apang un ahi.

Xxxxxx

Simlai kiloi khomna chom chom hon khamnathei machal thu a GoM kom a lekha thot pelut

IMPHAL, Sept. 14(UNA): Simlai kiloi khomna chom chom All Manipur Students’ Union (AMSU), Manipur Students’ Federation (MSF), Democratic Students’ Alliance of Manipur (DESAM), Kangleipak Students Association (KSA), Students’Union of Kangleipak (SUK) leh Apunba Ireipakki Maheiroi Sinpanglup (AIMS) ho’n tuni chun Principal Secretary (Social Welfare) kom ah Manipur a drugs apun thu ah lekha thot pehlut na anei tauvin ahi.

Manipur State Policy on Substance use, 2019 mangcha in Manipur a khangdong holah a khamna thei apun thua lekha thot hi ana pehlut u ahi. Lekha thot ah chun COVID-19 jeh a lockdown um sungin jong Manipur ah khamnathei matdoh ahi jing e, ati.

Government in hiche thu a dan thah Manipur State Policy on Substance use, 2019 ahin gondoh hi kipa umtah ahivang in khamna thei lou le aii kipo lut hi akem chompoi tin asei un ahi. Kiloikhomna chom chom akon lamkai gup hon soi akainau lekha thot chu Commissioner (SW) komah September 7, 2020 nia ana pelut uva ngehna phabep anei hou chu ahileh Narcotic Drug and Psychotropic Substance Rules noija international market a crore khat val khamna thei lou kimandoh lah a matdoh a umho koi hijong leh NCB, CBI chuleh NIA ho panglou a Manipur High Court in avetsui dia adeisah nao jong aphondoh u ahi.

Article 2.8 danthah jui a Home Department, NCB, NGOs, CBOs, CSOs leh mimal a thepna neihon section 46 mang a gam neihon kani tu nadinga agam u aphal hi NDPS Act,1985 dan dungjuiya mat angai e tin jong asei un ahi.

Government in model drug free village ti thupi mangcha a pan alah angai in, khamna thei lou le aii kipo lut hi chapang khangdong holah a akiha manpen e atiuvin ahi.

Dan thah dungjuiya article 11.1 apat a 11.10 kikah ah simlai kiloi khomna chom chom hon pan alah theilou dia kisei hi semphat angai e tia jong asei u ahi. Private school hihen lang government schools hijongleh simlai holah a khamna thei lou le aii hi vetsui jing apoimo pen e tia jong asei u ahi.

NDPS Act 1985, dungjuiya school hihen boarding munho hijongleh mopo khat um angai thu jong lekhathot a chun atahlang un ahi.

Xxxxxxxxx

Parliament toukhom kipan, coronavirus natna nei MP 25 umbe

New Delhi: MP khat jaonan MLA phabep injong thina anato jou nung in parliament session kipat in social distancing dan dungjuiya mobile app mangchan poly-carbon sheets in akhen uvin ahi.

Tuni Inpi toukhom kipatna a Lok Sabha MP 45 ho chun app mang in min akhumlut un ahi.

National Informatics Centre (NIC) in asem ‘ATTENDANCE APP’ hi mandia phatsah ahi. Hiche app mangcha a parliament sunga hi kihou nahi chelha ahi e. Member 350 tobang in monsoon session a hi pan alah u ahije. Hiche session hi October 1 a kichaibep ding ahi in hiche jong chu nikhat cha pel lou a chelha jing ding ahi.

Lok Sabha a kon in member 17 le Rajya sabha a kon member 8 ho chu natna nei ana hi uve. Natna nei holah a asangpen BJP a pat MP 12, YSR Congress a pat MP 2, Shiv Sena, DMK leh RLP a pat khat cheh  ahiuve.

Hiche a hin media ho jong ajao in ahi,  MP 785 lah ah hin 200 tobang hi  kum 65 chunglam mi ahi tauvin ahi. Masang deu ajong chu Union Minister Amit Shah jaona MP 25 hiche session kipat masang a chu mudoh ana hiuve.

xxxxxxxx

DHS, CCpur tohgon nanoi’a Community Volunteer Training kipanta

B.Lalboi Gangte

CCpur. Sept. 14 (ET) : District Health Society, Chrachandpur  tohgon nanoi’a tunin GNM Training Hall, IB Road mun’a Sept. nisim 17 chan chelha ding Community Volunteer Training ana kipan tan ahi. Chuleh training phatsung’a Resource person a Dr. Ngahneikim, District Surveillance Officer, Ccpur, Dr. Thanglalmuang, Rapid Response Team leh  Dr. Zamlianmang, Psychiatrist, District Hospital Ccpur ho cheng pang ding ahi.  Dr. Ngahneikim in ‘Briefing on COVID-19 IPC & Disinfection of common Places’ thupi mangcha in kichuhna ape in, Dr. Thanglalmuang in ‘Community surveillance/House to House Survey leh SOP toh kisai’a houlimna anei in, Dr. Zamlianmang in  ‘Psychological support & Stress Management for Volunteers’ thupi pansa in houlim na anei in chuleh Dr. Ngahneikim, Dr, Thanglalmuang hon jong houlimna ananei uvin ahi.

Hiche toh lhon’a Training achun kho chom chom akon village authority leh community a Volunteer a kimang jouse, Town ASHA facilitator hopsung’a ASHA nei leh neilou kho akon village authority ho chuleh Tuibong Area ASHA facilitator hopsung’a umho jouse in pan anala uvin ahi.

xxxxxxxxxxxxxx

Class-X (2020 Reading) ho ding’a First online mock test kibol na’a pachanna neiho kipa thilpeh kingon kibol

CCpur, Sept. 14 (ET) : Achesa August nisim 19 nikho’a Class-X (2020 Reading) first online mock test kibol na’a panchanna chan ho tunin (Sept. 14) Creative Academy (CA) Molnom, Ccpur mun’a pachanna neiho kipaman hopdohna kingon ana um in ahi. Hiche phatsung’a chun pachanna nei 1st position a St. Stephen English School, D. Pahilen, CCpur akon Mercy Chinneikim in kipaman Dk. 3000 leh Certificate anakisan in, 2nd position VK. Twana High, New Lamka, CCpur akon Chingbiakmuang in kipaman Dk. 2000 leh Certificate chuleh 3rd position Donbosco Hr. Sec., CCpur akon Jemngaihchoi in kipaman Dk. 1000 leh Certificate cheh anakisan uvin ahi.

Hiche toh lhon’a pachanna nei ho chung leh pan laho jouse chung’a Organising Committee in kipathu aphondoh in ahi. Chule tuchung’a pan lalou simlai chapang ho jong akit akigon kit teng jao cheh ding’a ki gong sa’a aum ding uvin T.Lhungdim Administrative Secretary Creative Academy (CA),Molnom, Ccpur in temna anei in ahi.

xxxxxxxxxxxx

Simlai kiloikhom hon Education Dept. Engineering Wing ho nehguh thu a kiphinna nei

Imphal, Sept 14: Simlai kiloikhom AIMS (Apunba Ireipakki Maheiroi Singlup) hon tuni chun government fund a sum phabep dan dihlou tah a mangcha a kimandoh Education department Engineering Wing a official ho gotna peh ahilou jeh un kiphinna ana nei un ahi.

Khumujam Romen, President of AIMS min a thusodoh khat a kimun dungjui in AIMS leh DESAM kiloikhom hon Heirok mun a DM University and Engineering College infrastructuresho semna dinga sum le pai hung ho  Education department Engineering Wing hon BCS architect kiti min mangcha a nehguh phabep abol u matdoh ahiuvin, hiche hi BCS architect a Pricipal Benson Chabungbam in amaho(BCS architect) ten ahetphah lou dan jong aphongdoh in ahi. AIMS thusodoh in aseibe na ah, nehguh bol ho kichehtah a phondoh ahi nung in jong kholchilna leh gotna peh ahilou dan atahlang in, hiche thu hi vigilance department leh akisaipi minister ho koma lhut ahi dan atahlang in ahi.

Xxxxxxxx

KPI auto khat in akitahna jal a mipi seiphat chang

KANGPOKPI, Sept. 14(UNA): Phat masa a Kangpokpi town sunga auto driver James Singh in akitahna jal a mipi pachatna leh adeh a Minister Nemcha Kipgen hetpehna geiya seiphat anachan nungin auto driver leh akitahna jal a japi seiphat leh pachatna chang mikitah dang khat jong ahung kisepdoh kit in ahi.

Kangpokpi District hopsunga Haijang kho a cheng Reverend K. Chongloi chapa kum 41 vel mi Ngulkhohao Chongloi in bag khat asunga lekha poimo phabep leh paisa phabep kikoi chu anamu in kituptah in anei dihtah ana holdoh in ahi.

Thusoh lakhom hotoh aki houlimna a chun Ngulkhohao Chongloi in achesa September nisim 8 passenger athah jouva Motbung apat inlam jon a hung kile lang chun National Highway-2 a um Sapormeina leh Gamgiphai kikah ah jan khojin nung nidan 8pm – 9pm chun bag kikhehsah khat ana mu in ahi. Hiche bag kamu mu chun kalung akidang in hinla kenjong kala in, inn kalhun lhun in adung kahongdoh in ahileh lekha poimo phabep leh paisa phabep kamu in, hitoh kilhon cbun anei dihtah holdoh ding chun ka umthim thei tapin ahi atin ahi.

Aman aseibe na ah, thachol tah a inlhung kahi vang in kajinu call kabol masa pen in, chukit leh bag sunga number kamu jouse call kabolkit in ahi. Achaina in numei phatah khat in ka call ahinla in hiche a kon chun anei dihtah kahin hedoh in bag kimansah chu kana pedoh thei in ahi tin Chongloi chun adeiyin ahi.

Kipana jal in bag neinu H. Nancy Kipgen, Churachandpur chun bag kimansah hin mudoh leh anei dihtah holdoh auto driver pa chu akitahna jal in kipaman kilomtah leh Memento khat Kangpokpi Youth Union office mun ah KYU leaders, Kangpokpi Auto Owners’ Association leh Kanggui Post Admins ho jaona in pehdohna ana neiyin ahi.

  1. Nancy Kipgen in hiche ni jan chun kanu damlou jeh in kakino behseh jeh in garineo katol a kon a ka bag kakhehsah lam jong kahepon, Gamgiphai kalhun in kahedoh pan bep in hinla kanungmu ding hi kagel pha pon hinla Sapormeina a che a police koma report bol a mikitah khat beh in ana mu a kanungmu thei khahle tin kagel in ahi. Auto driver khat a kon a call kamu jeng chu kalung akidang lheh in ka bag mansah amu dan leh einungpeh nomdan thu kajah chu kidang kasa lheh in ahi. Kipana in kadim in, hitobang mikitah in tulai tah in akivang lheh in ahi. Kanggui Post admin hon chunga jing kakipah lheh e tin bag mansah a nungmun Nancy chu aseiyin ahi.

Bag sunga hi asum a Dk. 18,000/-, lou le ai Dk. 18,200/- man, lekha poimo Aadhaar card, PAN Card, ATM Card, Driving Licence, le adang dang ahi.

Cha thum nei mikitah leh auto driver Ngulkhohao Chongloi hin phat masa jep injong Dk. 1,50,000/- kimansah ana mu in anei dihtah ho khut ah ana nungpeh in ahi.

Xxxxxxxxx

Nagaland a Covid-19 positive case thah 131 kimube

Kohima, Sept 14: Nagaland a tunin covid-19 case thah 131 akimudohbe toh lhon in tuhin state sung’a case 5,214 aphatan ahi.  Case kimube ho chu sample 459 test kibol ho akonkimu doh ahi

Case thah 131 lah a 77 chu security personnel ahin, 45 chu milham kholjinna neilou ahin, mi 7 chu gampam a kon hung kile mi 2 chu frontline worker ahi.

Amaho chu Kohima-70, Dimapur-60, Mon akon 1 ahi.

Chule natna nei mi 14 tunin discharged akibol kit uvin ahi.

Xxxxxxxxxxxx

Assam Rilfes hon Old Age Home le Orphanage Home kithopina pe

CCpur. September 14 (ET): Khuga Dam aum Singngat Battalion 2nd Assam Rifles in tunin New Mata a Old Age Home khat leh Orphanage home khat agavil uvin, thil chom chom kithopina peh na anei uvin ahi. Vilna neinao teni chu Social Human Action for Rural empowerment (SHARE) Society in avetkol namun Tehse ho kikoina mun Themnu Old aged Care Home le Chaga ho vetkol namun Cha Cha Nehru Bal Bhavan ahi.

Hiche kin’a  2nd Assam Rifles Major Sudarshan Gaikwad leh Assam Rifles personnel hon Themnu Old aged Care home umho  neh ding in Anchang Kg 20, A-ta Kg 20, Chini Kg 10, Chapati Kg 2, Bongnoi litre 24 leh thao Litre 15 apeuvin chule Cha Cha Nehru Bal Bhavan a aum chapang ho nehding in nehthei chom chom jaona vonchom chom jong apeuvin ahi.

 2nd Battalion Assam rifles in hiche natoh anei hi Distribution of Relief Material in COVID-19 Pandemic ti thupi pansa a thilpeh na aneiyu ahi in, Themnu Old Aged Care Home ahileh 2017-18 ah kisemdoh ahi in, tuhin avetup ding neilou tehsi 35 aum in, Chacha Nehru Bal Bhavan ah chapang mi 46 aum vin ahi.

Hiche kin’a Major. Gaikwad in aseina, Covid-19 jeh’a mipi jousen boina ato ahi in, neh leh chah holna hita leh natoh na hita leh mitin n boina ato ahi in, hitobang a gen theina leh hahsatna nasatah akito lai ah vetup ding umlou leh Nu leh pa neilou ho ngeilut na jeh’a panpi na hung kinei ahi ati.

Xxxxxxx

India a nidan 24 sung’a case thah 92,000 kimube, agom a lakh 48 hita; Thina toh 79,722 hita

New Delhi, Sept 14: India a nidan 24 sung’a COVID-19 case thah 92,071 akimube toh lhon in tuhin agom a case lakh 48 aphatan ahi. Chule tuhin akijendam 37,80,107 ahitoh lhon in recovery rate 78 per cent aphatai tin Union Health Ministry data in aseiyin ahi. Natna nei agom a 48,46,427 aum in chule tuni mi 1,136 thina atobe toh lhon in thina toh 79,722 aphatan active case 9,86,598 ahi.

Tuni thina toh 1,136 ho chu Maharashtra-416, Karnataka-104, Uttar Pradesh-80, Tamil Nadu- 74, Punjab-68, Andhra Pradesh-66, West Bengal-58, Madhya Pradesh-34, Delhi-29, Haryana-19, Assam le Chhattisgarh-16, Puducherry, Rajasthan, Gujarat-15, Kerala, Bihar le Jammu and Kashmir-14, Jharkhand le Telangana-13, Uttarakhand-12, Odisha-10, Tripura-6, Goa le Himachal Pradesh-4, Sikkim-3, Chandigarh, Ladakh, Manipur le Meghalaya a khat cheh ahi.

Thina toh  79,722 hohi Maharashtra state a 29,531 ahin thinatoh tamna pen state in apang in chule Tamil Nadi a 8,381, Karnataka a 7,265, Andra Pradesh a 4,912, Delhi a 4,744, Utter Pradesh a 4,429, West Bengal a 3,945, Gujarat a 3,210 leh Punjab a 2,356, Madhya Pradesh a 1,762 Rajasthan a 1,236,Haryana a  975, Telangana a 974, J&K 878, Bihar a 822, Odisha 626, Jharkhand  leh Chhattisgarh 555, Assam 469, Kerala 439, Uttarakhand 414, Puducherry 385, Goa 290, Tripura 200, Chandigarh 93, Himachal Pradesh 77, Andaman and Nicobar Islands 51, Manipur 46, Ladakh 40, Meghalaya 26, Sikkim 14, Nagaland leh Arunachal Pradesh 10, Dadra and Nagar Haveli leh Daman and Diu 2 cheh ahi.

Xxxxxxxxxxxx

Dr. Esther Lalmoite Touthang in MBBS Gold medal ni kisan

Imphal, Sept 14(ET): Tuni Regional Institute Of Medical Science, Imphal (RIMS) in 49th Foundation Day kingon aman nauva Manipur University noiya MBBS Final Exam a lolhinna neiho lah a athem chungnung ho kipapina hopdohna anei nauva Dr Esther Lalmoite Touthang in ‘General Surgery’ subject a mark tampen amu toh kilhon in Gold Medal ni Aribam Surjaylal Sharma Memorial Gold Medal le Chongtham Thambou Singh Memorial Gold Medal ana kisan in ahi.

Dr. Esther hi Saikul gamkai Molkon kho a kon le (L) Khogen Touthang le Nemkhohat Touthang chanu nichanna ahin, tu le tu a NGV, Imphal a cheng ahi.

Dr. Esther hi aneo a pat gunchu tah a lekha sim jing ahito lhon a lolhinna sangtah tah hin neijing khat hin, HSLC Exam 2012 a thinglhangmi lah a Science Subject a topper anahi jeh ban a Senapati DC a kon Dr Ambedkar Meritorious Award anakisan a chuleh BOSEM a kon a jong cash Award ana kisan in ahi.

Xxxxxxxxxxx

Moreh khopi sung a PMJY le CMHT card sem kipan ta

Tengnoupal, Sept 14- Ayushman Bharat (PMJY) enrollment le CMHT Card sem Moreh khopi sung ading chu jani in ana kipan tan ahi.  Hiche enrollment le card semna kingon chu Social workers  youth club Premnagar ward no 4 Mongyamba leikai mun a kibol ahi. India sung Prime Minister Modi birthday toh kisai inprogramme coordinator,   Sharatchandra le  J. Khongsai, vice President, St Morcha BJP Manipur Pradesh in achesa nisim 13 le 16 kikah a bol ding a hiche kingon chu ana bol pan lhon ahi. M. Thoiba Singh, President SWYC Premnagar Mongyamba leikai  ward no (4) in ahou limna a Moreh khopi sung a tahlal mi ijat ham in ki jan na ding sum le pai ana nei ji lou utoh lhon a PMJY- CMHT card ho bolpeh ding a tohgon hung kinei ahi tin phondoh na ana nei in chuleh J Khongsai chung a jong kipa thu seina ana nei in ahi. Hitabang tohgon hi khopi sung a tahlal ho nasatah a kihtopi na ahin nei ding ahi tin Thoiba chun ana sei in ahi.

Xxxxxx

Moreh ICP Bypass kom a um inn ho phet ding a thupeh kinei

Tengnoupal, Sept 14- Moreh ICP Bypass Road kom a um inn kisa ho le thil um hop het ahi na ding in Tengnoupal DC in thupeh ahin nei in ahi. Hiche phet na natoh chu ahunglhungding nisim 25 kah a bol ding ahidan jong hetsah na ahung kinei in ahi. Tuni a Shijang Veng Community Hall a kibol kingon achun Moreh ICP Bypass Road  structure Committee a Chairman Holpao Baite in DC thupeh chu mipi hetsah na ana nei in ahi.  Holpao in asei na a  Tengnoupal DC in achesa nisim 11 nikho a thupeh ana nei bang a Moreh ICP Bypass road a um inn kisa le thil um ho hi ahunglhungding nisim 25 kah a phet ahi na ding tohgon akinei dan chu mipi ang a hetsah na ana nei in ahi. Hiche inn kisa ho chu Tengnoupal DC le innei ho in kihou lhah na anei tokah uva phet ding ahi thei louding danjong  hetsah na ana kinei in ahi. Hiche in ho hi joh ding a kisa ahi loudan le chenna ding a kisa ahi toh lhon a hitabang a phet ding tohgon hi kinomlou ding ahi tinjong tahlang na ahung kinei in ahi. Hiche lampi gei a inn kisa ho DC in innei hotoh kihou lhah na beihel a hitabang a inn phet ding a thupeh ahin nei hi daan toh kikal ahin angai na jong ahi pon ahi tin Committee in hetsah na ahin nei uvin ahi. Achesa nisim 7 nikho a DC memorandum kipeh na a veng sung mipi ho in adei dan u hetsah na ana kinei jou a DC in kihetmosah a hitabang thupeh ahin nei na chung a nopmo asah na u hetsah na ahin nei utoh lhon in, ahunglhungding nisim 20 kah a DC in vengsung mipi ho kihou lhah pina anei lou le kiphinna kinei pan ding ahi tin committee in phondoh na ana nei uvin ahi.

Xxxxxxxxxxxxxxxxxxxxxxxx

Zoujangtek le Nungsai kho teni kikaha boina um

Noney, Sept 14(ET): Achesa Pathennii nilhah lam nidan 4 vel a Zoujangtek- Nungsai  lhang sung a kho teni kikah a boina ana so thu akijah toh lhon in Bishnupur police ho in ana dal lut uvin, khosung teni ana vetup uvin ahi. Hiche kiboina chu kho sung teni kikah a gam chungchang a boina an aum jing court a case chelha jing nalai chung a natong ho in lei phabep mun khat a ana koi khom utoh lhon a boina hung soh pan ahi akiti. Noney SP in jong lhosung teni chu vilna ana nei in khosung miho toh kihou na ana nei in ahi akiti. Kho teni kikah a boina um nalouding in amun a sepai akikoi in ahi.

Zoujangtel khosung mi ho akon thuso kimu dungjui in Khopi khep jep lampi koi lai a innmun dinga lei anaki sun sah Longsai Pasal them khat in ana mu utoh lhon a, akholam u ana jot uva mi phabep gypsy a ahung kitol uva thingtum le songtum ahin jah utoh lhon a Zoujantek mipi in kithokhom a ana kidal a a inn cheh chan uva an akidal lut ahi akiti. Zoujangtek mipi ho chu ahung kile kit lam uvin Longsai techu  ahung thah kon kit uvin, Zoujangtek te in anung dal uvin, a sign board ho u jong asuh set peh uvin, Longsai te in jong song ahin se jeh uvin ZOujangtek khomi 2 le 3 ana kitong kha in ahi akiti. Longsai khomi ho mobile phone 2 l3 lam jong Zoujangtek te in ana suh set  peh uvin, akinoto na uva jong ana voh utoh lhon in a inn chan in ana dal lut ji uvin ahi akiti.

xxxxxxxxxxxxxxxxxxxxxxxxxxxxxxxxxxxxxxxxxx

HAC Chairman thah

Imphal, Sept 14(ET)- Hill Area Committee Chairman TT Haokip in apanmun akon ngahna ana nei toh lhon in Awangbou Newmai chu HAC Chairman kilhen na ding a presiding officer ding in  lhendoh na ana kinei in ahi. Ahunglhungding Sept 16 nikho a HAC Chairman election umkah a HAC natohna jouse ki sutangding ahi tan ahi akiti.

xxxxxxxxxxxxxxxxxxxxxxxxxxxxx

AMPFA in chang lou kisuhmang jeh a compensation thum

IMPHAL, Sept. 13(UNA): All Manipur Progressive farmer’s Association (AMPFA) in state vaipo ho ang a tu naicha a Imphal Airport lhangsung a chang lou ana kisuse ho chung chang a compensation thumna ahin nei uvin ahi. AMPFA general secretary W. Inao in aseina airport authority in hitabang na toh an anei uhi state economy tongkha thei ahin, hitabang natoh na maban a akibol kit tah na louding in hetsah na ahinnei uvin ahi. Hitabang loubol chu abol ho ding a akiveh na ule akihinso na u ahi toh lhon a compensation peh angaiding dan jong hetsah na ahin nei uvin ahi. Kiloikhomna lamkai pa chun aseina a hiche loubol na ahi loubol ho in hectre khat a dangka 15,000 lam asuh lut u ahin, tukum tabanga um hahsat kum a hitabang natoh na kinei hi vangset umtah ahi tin phondoh na ana nei uvin ahi. Tu chung a covid -19 jeh a thil man jouse khan toh lhon a loubol ho in sum lut ding jat hi ajat ni a asuh lut dan u thu jong tahlang na ana nei in ahi.

Xxxxxxx

Congress lamkai Gaikhangam CWC a thah lut lah na kinei kit

Imphal, Sept 14: Manipur Congress lamkai  Gaikhangam Gangmei  chu Congress Working Committee (CWC) member ding in lahlut na ana kinei kit tan ahi. Hiche lahlut na ding a thupeh chu Indian National Congress (INC) president Sonia Gandhi in ana nei ahi. Gaikhangam chu CWC a lah lut na kinei thah 22 ho lah a jao ahi. CWC a lah lut na kinei kit na chung a Gaikhangam in kipa thu seina ana nei in ahi.

Xxxxxxxxxxxx

Charoipandongba le Sehjang kho kikah a boina um

Kpi, Sept 14: Charoipandongba(Rongmei Naga Village) le Sehjang (kuki village) kikah in boina aum in ahi tin Kangpokpi SP akon thuso kimu chun asei in ahi. Hiche kho teni hi New Keitlhelmanbi lhang sung a um ahi lhon ahin, thuso kimu dungjui in Rongmei kho haosa pa chu Seijang kho a kho teni kikah a kihou na um na ding a achene a Sehjang khomite in ahin hendan u ahi akiti. Hiche chung chang thu ahin police lam akon 2nd OC khat le KSO lamkai khat in athu kholchil na nei ding le chamna semnading in vai kon doh na ana nei lhon in ahi akiti.

Xxxxxxxxxxxxxxxxxxxxxx

Khango Konyak in Isak Sumi lahdoh na ding thupeh akinung lahdoh ding a hetsah na kinei

Imphal, Sept 14: NSCN/GPRN (Khango)  ho in tuni in kiloikhomna President Khango Konyak in achesa phabep pahbep masang a general secretary Col. (Rtd.) Isak Sumi kah lhah na thuso ana nei chu akinung lahdoh ding in hetsah na ahin nei uvin ahi. Hitabang natoh ho akon hi NNPG sung boithei ahi tin jong hetsah na ahin nei uvin ahi. Isak SUmi huhnading a panla ho chu kiloikhomna sung a mi atam jo ahidan jong hetsah na ana kinei in ahi. NSCN-R akon hung chom lut khat Isak panmun lo na ding a lhendoh na kinei na chung a jong kiloikhomna lamkai dangho in apom thei loudan u tahlang na ana nei uvin ahi. NNPG sung a Angami REGION, Sangtam Region, Sumi Region, Chakasang Region, UT-1, Lotha Region, Khiamniungan Region le  Yimchunger Region ho in jong president pa in athupeh akhel na ding le akinung lahdoh an ding in hetsah na ahin nei uvin ahi.

Xxxxxxxxxxxxxxxxx

Dr. Dhabali in Cancer hospital hondoh na nei

Imphal, Sept 14: Chairman, Babina Group of Companies, Dr. Thangjam Dhabali in tuni in Manipur sung a Cancer Hospital masa pen  “Babina Speciality Hospital” chu Sajiwa mun a hondoh na ana nei in ahi. Hiche hospital chu American Oncology Institute toh kihtokhom a cancer natna nei ho jan na ding a kisem ahi akiti. Hospital ahi kijanna jat chom Medical Oncology, Radiation Oncology, Surgical Oncology, Nuclear Medicine, Haemato-Oncology, ENT/Head & Neck Surgery, Urology le adang dang ho umthei ding ahi akiti.

xxxxxxxxxxxxxxxxxxxxxxxxxxxxxx

Serum Institute Chief in Covid19 vaccine hi 2024 kichai lam tokah mi jouse chang soh louding ahi ti

Pune, Sept 14: Serum Institute a lamkai Adar Poonawalla  in covid-19 vaccine hi 2024 kichai lam tokah a koima chang soh lou ding ahi tin hetsah na ahin nei in ahi. Hiche vaccine hi mijouse channa ding ahi kum 5 lam alut ding dan hetsah n ahin nei in ahi. Hiche vaccine hi dose 2 ahi le leiset chung a angai cha ding hi 15 billion dose hiding ahi akiti. Serum Institute hin hiche vaccine semna ahi company 5 lam toh kithokhomna anei u ahi akiti. Company in vaccine kisem na a pan ki ha lah toh lhon a company dang sem sang a amachal jig dan u tahlang na jong ahin nei uvin ahi.

Xxxxxxxxxxxxxxxxxxxxxxxxxxxxxxxxx

Rajya Sabha a state chom chom akon MP 15 lam in kihahsel na nei

New Delhi, Sept 14: State chom chom akon MP 15 lam in tuni in Rajya Sabha (RS) a kihahsel na ana nei uvin ahi. Tuni a kihasel na nei ho chu achesa phat phabep sung a lhendoh na ana kinei ho ahi akiti. COvid-19 jeh a monsoom season chu aphatcha a an akibol thei lou ahi. Jharkhand chief minister lui Shibu Soren, railway minister anahi Dinesh Trivedi, Tiruchi Siva, Dravida Munnetra Kazhagam (DMK)  le Bharatiya Janata Party spokesperson Syed Zafar Islam ho chu tuni a kihahsel ho lah a ana pang uvin ahi. Tuni a kiahsel na nei ho chu Ajit Kumar Bhuyan, Independent; Phulo Devi Netam, Congress; Shibu Soren, Jharkhand Mukti Morcha (JMM); MV Shreyams Kumar, Loktantrik Janata Dal (LJD); Fauzia Khan, Nationalist Congress Party (NCP); Wanweiroy Kharlukhi, Nationalist People’s Party (NPP); NR Elango (DMK); AP Selvarasu (DMK), T Siva (DMK), K Keshava Rao, Telangana Rashtriya Samithi (TRS); KR Suresh Reddy (TRS); Syed Zafar Islam (BJP); Jai Prakash Nishad (BJP); Arpita Ghosh, Trinamool Congress (TMC)  le Dinesh Trivedi (TMC) ahiuvin ahi.

xxxxxxxxxxxxxxxxxxxxxxxxxxxxxxxx

Rohingya mi khat Myanmar vaipo ho ana kipedoh

Agartala, Sept 14(ET): Ministry of Home Affairs Foreign Division, GOI thupeh noi  in Myanmar sung a Rohingya mi khat Tripura a lha gup lam jail a ana kikoi chu tuni in Myanmar vai po ho ang a pehdoh na ana kinei in ahi. Pehdoh na kinei nu chu Sonowara Begum (21yrs) D/o Abdul Halak, Mongdaw Township, Rakhine State, Myanmar akon ahi akiti. Amanu chu Tripura police in ahin poh uva jani a Moreh analhut uva, Senior Immigration Officer YK. Anand Singh Government of India  in Aung Kyaw Soe Immigration Officer , Tamu TownShip Government of Myanmar ang a pehdoh na ana nei ahi.