Mogadishu a car bomb nasatah pohkeh jeh’a mi 90 val thi

Mogadishu a car bomb nasatah pohkeh jeh’a mi 90 val thi

369
0
SHARE

Mogadishu a car bomb nasatah pohkeh jeh’a mi 90 val thi

Mogadishu, Dec 28: Mogadishu khopi mi tamna mun a tuni car bomb nasatah pohkeh jeh in mi 90 lang in thina atoh in athi ho lah a atamjo university simlai ahin chule Turkish gam mi 2 ajaove tin Somali foreign minister thulhut chun aseiyin ahi. Hiche car bomb kikam chu Somali khopi sahlam gari tampet tah a security checkpoint le tax office kom a pohjah ahi.

Akisukha ho chu amun a kon mi pohna mang in lhohdoh ahi in hinla gari se le meikah nung ho chu donlou in bomb poh namun ah aumden e.

Hetding chu Mogadishu hi Al-Qaeda toh kijop Al-Shabaab Islamist galguh hon phatsih a car bomb a abulu jing lah a kum 2 sung a dia tuni thilsoh hi agimnei pen, thina toh lah a Turkish gam mi 2 jong apang in, atam thi pen chu university simlai ho ahi e tin police hon aseiye.

International organisation akon report kimu dung juiyin thina toh mi 90 val ahi atin chule Somali MP in aseina ah thina toh mi 90 val ahin amaho lah a police offer 17 pang ahi ati.

Private Aamin Ambulance service director Abdukadir Abdirahman Haji in AFP ahetsahna ah akisukha mi 70 ahi in, thina toh umbe thei nalai ahi ati.

Police officer Ibrahim Mohamed in bomb poh chu agimnei lheh jeng in, lampi sem a pang Turkish mi 2 jong athi in, adang thuchen vang het ahipoi, ati. Ahin Mogadishu Mayor Omar Mohamud Mohamed in amollem jat kichehsel akihet lou vang in akisukha hi mi 90 vel ahi, ati.  Mit a mu Muhibo Ahmed in bomb pohjah pet a chu mi tamtah touna bus jong atohkhah ahi in agimnei lheh e, ati. Chule bomb pohjah pet tohkha Sakariye Abdukadir in bomb hal leng le in ka car kot phabep asuse in mihem tahsa bomb in asethang le chu kamu e, ati.

Mogadishu hi Al-Shabaab galguh hon phatsih tobang a abulu jing ahivang in tuni thilsoh a kiphong tuchan in koima aum naipon ahi.

Hiche a galguh hohi phat khat lai a central le south Somalia ana toupha sepai 5000 le 9000 kikah nei Islamic Courts Union a kipan galguh ho ahi e.

Shabaab galguh chu 2010 kum a Al-Qaeda toh pangkhom pan chu 2011 kum a Mogadishu a ahat nao mun se ana lhaso vang uva mun phabep a hat jing nalai ahiuve.

Geldoh ding chu hapta 2 masang a Shabaab galguh hon politician, army officer le diplomat ho umna Mogadishu hotel abulu a chu mi 5 tah in thina ana to ahi.

AFP in asei na ah 2015 a Somalia 13 vei kibulu chun mi 20 sang a tamjo athi in chuche lah a mi 11 chu Mogadishu mi ahi e, ati. Somalia gam a achesa October 2017 kum a truck bomb kikam pojah a mi 512 thina le mi 295 kisuhkhah na thilsoh chu Somalia a thilsoh gimnei pen a kihe chu ahitai.

BJP in CAA tosotna a ‘mass rally cum public meeting’ bol; gamsunga CAA thu sei nading dinmun aumpoi, tia Chief Minister in sei

Imphal, Dec 28(ET):  BJP Manipur Pradesh in Basu lentol, Thoubal district a Citizenship Amendment Act (CAA) tosotna a ‘mass rally cum public meeting’ abol uvin ahi.

CAA tosotna rally a Meitei Pangal ho panna a Thoubal district a kon BJP worker tamtah in pan ala uvin, ahin, Centre sorkar in CAA a kon Manipur gam huhna dinga Inner Line Permit aphatsah jeh a akipanau thu kijihna lekha akichoi uvin ahi. Chief Minister N Biren Singh in ahoulimna a sorkar in Manipur gam a Bengal Eastern Frontier Regulation noiya Inner Line Permit System chepi nadinga kigotna lhingset anei ahitan, hiche a dinga jing nikho teng le cabinet chule mopohna nei officer hotoh kihouna achaina kisem ding ahi, tin aseiyin ahi.

“CAA thu sei angaina ipi um em? Gamsunga ILP chepi nadinga pan sangtah akilah lai ahi”, tin CAA chungchanga CM in aseiyin ahi. Ahivanga gamsunga hunglut ding koi phalna peh ding ham tihi India gam mi hon alhendiu ahi. Pakistan, USA ahilouleh gam dang dang peh ding ahipoiu”, tin CAA chungchanga BJP lamkaina sorkar dinmun atosotna thu aseiyin ahi.

PM Narendra Modi, Home Minister Amit Shah, Defence Minister Rajnath leh Tourism Minister Ram Madhav panna a khonung ding gel a BJP lamkai hon gamsung huhna dinga kinepna eipeh u ahi’in, kipapi angaiye, tin Biren in aseiyin chule kahin kho a PM Modi, Amit Shah leh Rajnath tobang lamkai adang katoh khapoi, ati.

CAA douna a pan la ho chungchang a CM in, “Amahon CAA hi ipi ahi ahet uvem? Kinel uhite. Act hin Article 14 apalkeh a ahile ‘surrender’ kakibol ding ahi. Hou akilheng chom deldoh dinga akiseina um em. Leftist hon boina sem nadinga adei deiyu aseiyu ahi”, ati. “PM Modi leh Home Minister Amit Shah inbou gamsung ahuhbit ding ahi”, tin aseibe in ahi.

Kum thum masanga gamsung dinmun thu aseiyin, Congress ho demna thu CM in aseiyin ahi. ‘Fake encounter’ a mi tamtah thi a, jan teng le koima chedoh ngamlou ahi, tin jong aseiyin ahi. PWD Minister Th Bishwajit in ahoulimna a Manipur gamsung hi koi political party in asuhset ham tihi ahetdiu ahi, ati.

INC134th Foundation day

Constitution in boina sangtah ato thei dinmun a um ahi’in, anivei channa dinga chamlhatna del kit ngai ahi, tia Gaikhangam in sei

Imphal, Dec 28(ET): Indian National Congress 134th Foundation Day nikho a Manipur Pradesh Congress party in centre chule state a BJP lamkaina sorkar demna sangtah anei uvin ahi.

Opposition lamkai Okram Ibobi in Indian democracy chule Indian Constitution khonung ding alungkhampina thu aseiyin ahi. Chule CM N. Biren thusei adonbutna achun, Biren in Congress hon thinglhang leh phaicham asuhkhen ahi tia asei hi bul le bal neilou ahi in Congress hon thinglhang gam Khengjoy, Tousem, Tamei, Noney, Jessami, Tipaimukh, Vangai range, Shivapurikhan chule mun dang dang ho ah khantou malchalna natoh ho akipohdoh peh in hinlah Ukhrul hospital a dammo ho lupna ding lupna 50 hondoh ding chung a NSCN-IM hon eibulu tailou adang aum poi ati. Chule Congress ho pohlai in phaicham a chengho leh thinglhang a chengho kikah a kihetthemmona aumpoi ati.

MPCC President M Okendro in ijong aseina achun, government in adihlou abolgot ho kimaitopi ding a kisa jousa a umjing ahidan asei in chule BJP hon mipi ho deilou bang a thil aboldoh jeh uvin tulah a state dangho election ah BJP hon nasatah a guollelna anei uvin masang a Congress Mukt Bharat tia kihe chu tua hi BJP Mukt Bharat tia kihe ahitai ati. Gamsung mihon 2nd Independence movement hi tua angaichat ahi, tin Congress Working Committee member Gaikhangam in aseiyin ahi. “Gamsung miho ‘fundamental rights’ jana kipelou, gamsung miho hi gamsung doudal banga kibol a kiman ahi. India in British vaipohna a kon chamlhatna amu ahitan, tua vaipohna a kon chamlhatna anei kit ngai ahi”, tin Gaikhangam in Congress Bhavan, BT Road Imphal a INC in 134th Foundation Day amanna a aseiyin ahi.

Congress lamkai pa in BJP sorkar demna aneiyin, mi phabep a dinga bou vai ahom theilou diu ahi, ati. “Akiphong doh lou emergency um ahi’in, sorkar tohgon demna neiho koi hijong leh kiman ahi. Thuseina dinga chamlhatna eikipehna hi apanna umlou ahi”, tin Gaikhangam in aseiyin, mipi awgin aumlou teng leh ‘democracy’ dinga kichat um ahi, ati.

Opposition lamkai O Ibobi Singh in CPI lamkai L Sotinkumar kimat thu a sorkar demna aneiyin ahi. “Political party lamkai L Sotinkumar kiti ho akimat a ahileh democracy hoiya um ham”, tin Ibobi in aseiyin chule mipi awgin kisuthip a, media kisuthip a, democracy aboiding dinmun a um ahitai, tin aseiyin ahi.

Congress in thipbeh a thil umchan avetlou dinga jong aseiyin ahi. State sorkar kisem dan hi constitution toh kitoh ham kitoh louham, tin Ibobi in thudohna aneiyin ahi. Tu naicha Sharad Pawar in Maharashtra gamsung hi Manipur ahilouleh Goa a tobanga minority government akisem nading ahipoi, tia asei hi avetsahna phatah ahi, tin Ibobi in aseiyin chule Maharashtra sorkar kisem sunga thilsoh chom chom umho aseiyin ahi.

WAD panna a kiloikhomna phabep in vangsetna toh numei ho chunga gangtah a thudih a thutanna aumna dinga sorkar henga ngehna nei

Imphal, Dec 28(ET): Women Action for Development (WAD), Conflict Widow Forum, The People Action for Development (Kangpokpi district), Environment Conservation Network, People for Human Right and Climate Change chule Youth Action Committee for Protection of Indigenous People in gamsunga numei leh chapang hunam a kisuse a kithat ho thu a case ho thukholna leh athu kiseina aganna thei pen a abol diuvin ngehna anei uvin ahi.

Mangsatabam Sobita, Secretary, WAD in thuso aneina a Assam Rifles sepai numei khat in asuhgim Lamshi thu aseiyin ahi. Lamshi Lhungdim (31), w/o Th Lhungdi, M Chahnou, Tengnoupal district a cheng nu hi achesa November nisim 18 nikho a Assam Rifles numei khat in meithal a adoiya ajunthahna akhut a akhoipeh ahi. Ni phabep athi long ahi’in, AR hohin atahsa a dan in aphal lou thil apoh ding ginmona aneiyu ahi. Assam Rifles ho hitia achon hi thuthah ahipon, gamsung miho hunam a kisuhset, toltha na thilsoh chule AFSPA 1958 noiya hahsatna tamtah ato u ahi, ati. Themmona nei ho kiman loulai chule AR ho agin jeh uva thukholna machal lou ahi.

Achesa May 2015 kum a Arambam Santi (50) hi Moreh Gate 2 a nilhah nidan 4.30 don a AR check post a kon meter 5 vel gamlha a meichang som val a akaplih u ahi. Moreh a tou Assam Rifles hon Colonel AP lamkaina a athu kholding aphal louvu ahi. Themmona neiho kiman lou chule thukholna jong kipan loulai ding ahi.

Ngairangbam Bikram (47), s/o (L) Ibotombi Singh, Yorabung Panthoibi Leikai, Imphal East a cheng pa in achesa October nisim 1 nikho a North BOC a um Clinic khat a kum 21 vel hi a numei khat hunam a asuhset a tha dinga agih ahi. Bikram hi tua bail a kilhadoh ahi’in, numeinu insung miten case alahdoh diuva gihna anei jing ahi. Lamlai Police station injong numeinu medical report apeh lou hi Manipur High Court Order 17, 2016 kipalkehna ahi.

Haorang, Imphal West a kon kum 12 a upa numei khat August nisim 4, 2019 nikho a ama leh ama kithat ahi. Hiche nu hi February 2015 kum a Konthoujam Nando, s/o Ibohanbi, K Gandhi Singh, K Chinglen Singh leh adang dang in hunam a asuhset ahi. Case hi athu kholna kipan loulai chule phat sottah vaigei ahitai.

Borayangbi, Bishnupur district a cheng kum 10 bou hinalai anangong leh apao theilou Surmila hi 2010 kum a hunam a kisuse a kithat ahi. Tuchan a authority hon themmona neiho akimat loulai ahi’in, insung genthei a kon ahijeh ahi. Hitobang case tamtah um ahi’in, hitobang thilsoh a sohcha ho leh vangsetna toh ho insung miten thudih a thutanna aum ding anga jing nahlaiyu ahi.

Chief Minister leh Law Minister in thilsoh a vangsetna toh ho chunga thudih a thutanna aumna dinga kiloikhomna chom chom in pan alah dinga ngehna anei uvin ahi. Khudengthabi a Lamshi gimbol a Assam Rifle sepai ho akimat a, thukholna akipat nadinga ngehna anei uvin ahi. Justic Jeevan Reddy Commission report, 2005, Justice Shantosh Hedge (Supreme Court) Commission report 2013 chule Second Administrative Report recommendation jana peh a AFSPA 1958 lahdoh dinga ngehna anei uvin ahi.

Tengnoupal leh Khudengthabi a um Assam Rifles ho dan leh democracy jana pe a sepai hon akhel diuvin thumna anei uvin chule athu khol ding Independent Commission asemdoh uva Security Sector leh Criminal Justice System Reform in Manipur avettup diuva ngehna aneibe uvin ahi.

Malom Massacre Memorial Complex mun a ‘Candle Light Vigil’ abol uvin, Extra Judicial a pang ho chungthu kiseina a state commando ho bou hilouva Assam Rifles ho thu jong akisei theina dinga apan sah diuvin thumna anei uvin ahi.

Meghalaya gam a ILP chepi ding New Delhi in  phalpeh lou maithei

New Delhi, Dec 28: Meghalaya sorkar in agam a Inner Line Permit (ILP) chepi dinga proposal apeh hi New Delhi in phatsahna anei lou maithei ahi.

Meghalaya Assembly in January nisim 19 nikho a ILP chepi nadinga kilolna anei ahi’in, hill state a gamdang miho alut nadiu dan sem ding phatsahna aneiyu ahi. Resolution hi Chief Minister Conrad K Sangma in apohdoh a chule BJP panna a party dang dang hon atosot ahi.

January nisim 19 nikho a ILP chepi nadinga nikhat ‘special session’ anabol u ahi. Achesa kum som a sim atamjo simlai kiloikhom leh khangthah kiloikhom hon Meghalaya gam a ILP chepi ding thumna sangtah aneiyu ahi. Assembly in kilolna anei jouva  Meghalaya sorkar in Eastern Bengal Frontier Regulation, 1873 noiya ILP chepi dinga New Delhi henga ngehna anei ahi.

Home Affairs Ministry (MHA) in Meghalaya gam a ILP chepi nading tohgon tu dinmun a aneipoi, tin Saturday nikho thulhut in aseiyin ahi. ILP hi Manipur gam a achesa December nisim 11 nikho a chepi dinga phatsahna kinei ahi’in, President Ram Nath Kovind in order soi akai ahitai. Hiche thu a Ministry of Home Affairs in notification asodoh ahitai.

Meghalaya gam a tourism sector a machalna sangtah aum ho kive a Meghalaya gam a ILP chepi dinga sorkar in ngehna anei hi kiseilha loulai ahi, tin MHA thulhut chun aseiyin ahi. Meghalaya gam a ILP thumna umhi MHA in aseilhah loulai ahi. Meghalaya gamsung apumpi hi Bengal Eastern Frontoer Regulations, 1873 in ana hop soh khahlou ahi’in, British vaipoh sunga jong anahop tha lou ahi. Hiche jeh a gamsunga ILP chepi ding thu tua kiseilou ahi, tin MHA official hon asei uvin ahi.

Tu leh tua ILP hi Arunachal Pradesh, Nagaland, Manipur leh Mizoram gam a kichepi ahi. Meghalaya gam hi Sixth Schedule state ahijeh a gamsung huhna dinga ILP angaichatna aumpoi, tia kinelna jong um ahi. Meghalaya Governor Tathagata Roy in Meghalaya Residents Safety and Security Act, 2016 kisemphatna ordinance phatsahna anei ahi’in, hiche hin gamdang miho gamsung alut diu akikham gah ding hi New Delhi in aphatsah lou avetsah ahi.

Meghalaya gam a ILP akichepi a ahileh ‘transit passenger’ ho dinga boina lentah umding ahi. Alangkhat a Intelligence agency in NPP lamkaina sorkar in gamsung miho lunghan olsah nading tohgon anei ahi, ati. Tura MP Agatha K Sangma in CAB tosotna a vote apeh jeh a gamsung miho sangtah a lunghang ahi. Alangkhat a Meghalaya gam a ILP chepi dinga sorkar in tohgon anei hi Meghalaya gam a tourism business bol hon lunglhaina anei pouve, tin thulhut in aseibe in ahi.

North India gam dap akhohset toh kilhon a Uttar Pradesh gam a mi 28 thi

New Delhi, Dec 28: India gam a (northern state) dap nasatah in akhohse in, Uttar Pradesh gam a mi 28 athi tai, tin thulhut in aseiyin chule Weather Department in Sunday nikho hi December a dinga adap ni pen hiding aseiyin ahi.

Ahin, sorkar in athi jat chule district chom chom a thina toh jat official tah a asodoh loulai ahi. Tuchan geiya Kanpur a mi 10 thi a, Varanasi leh Mahoba a mi 4 cheh thi a, Shravasti, Banda leh Mainpuri a mi 2 cheh chule Lucknow a mikhat athi e, tia kisei ahi. Uttar Pradesh gam a dinga Aligarh hi adap napen ahi’in, temperature anem pen a 3.6 degree Celsius a um a chule asangpen a 11.2 a um ahi. Lucknow khopi a temperature anempen 7.7 degree Celsius hi a achule asangpen a 14.4 degree Celsius ahi.

North India mun chom chom a adap jom in, Friday nikho a Delhi a temperature anempen na record abol uvin chule December nisim 31 a kon gamkaiya dap oljep dinga IMD in aseiyin ahi. Delhi a anempen a 4.2 degree Celsius hi ahi’in, angaiya sanga degree thum a nemjo ahi. Kho phat loujeh a train 21 nidan 6 avaigei in ahi.

Punjab, Haryana, Chandigarh, Delhi, North Rajasthan leh Uttar Pradesh gam a ahung lhung ding ni ni sunga dap hi khohse cheh dinga IMD in aseiyin chule December 31 jouva kon oljep dinga asei ahi. Punjab, Haryana, Chandigarh, Delhi, north Rajasthan leh Uttar Pradesh gam a nithum sung meikai ding chule Madhya Pradesh, Bihar, Jharkhand, sub-Himalayan West Bengal, Sikkim leh Odisha gam a ni –ni sung chule Northeast a ni4-5 meikai dinga asei ahi.

Lhumlam gamkaiya kon huinun jeh a Northwest leh Central India a go ju ding, mun phabep a December 31 a kon January 1 sunga hui hat dinga kisei ahi.

MANPAC in BJP lamkaina NDA state sorkar demna nei

Imphal, Dec 28(ET): Manipur Peoples against Citizenship Amendment Bill (MANPAC) in BJP lamkaina NDA state sorkar demna aneiyin, gamsung miho thuseina dinga chamlhatna chule fundamental rights ho alahpeh ahi, tin asei uvin ahi.

MANPAC convenor Yumnamcha Dilipkumar in thuso miho akimupi na’a, December 29, 2019 ni a BJP in mass rally abol ding thu aseiyin ahi. Lamphel police station team holeh Imphal West commando team hon Friday nikho a MANPAC convenor pa a inmun Lamboi khongnangkhong a kon jan nidan 11 don a amat u ahi. Ipijeh a amat uham ti thudohna anei leh police hon police station a athu seiding a adonbut ahi, tin Dilipkumar in aseiyin ahi.

Lamphel police station a convenor pa jan khovah a akoi uva Saturday jingkah nidan 10 don a alhadoh u ahi. India tobang democracy umna gam lentah a BJP state sorkar in fundamental rights ho alahmang ahi, tin state convenor MANPAC in aseiyin ahi. MANPAC Convenor pa kimat hin gamsung pumpi awgin asuhthip louding ahi, tin aseiyin chule state sorkar in gamsunga um CSO chom chom hohi aphatna a avet dinga ngehna aneiyin ahi.

Alunggel seidoh a phatah a kimangcha khat akimat hi vangset umtah ahi’in, hiche hi MANPAC awso suhthip nading leh ‘fundamental rights’ kilahpehna ahi, tin MANPAC Convenor in aseiyin ahi. MANPAC leh gamsung mihon CAA douna a pan alah ahi. Gamsung mihon CAA tosotna a mass rally kibol hi adih hinam adihlou ham ti akholtoh masat diuvin temna aneiyin ahi. Convenor Y Dilipkumar in thuso chom chom aneijeh a kiman ahi, tin MANPAC convenor in aseibe in ahi.

State sorkar in mipi thaneina amoh lahpeh louding chule mipi awgin asuhthip loudinga temna aneibe in ahi. MANPAC kiloikhomna hi Citizenship (Amendment) Bill, 2016 douna dinga kisemdoh ahi, tin Co-convenor, MANPAC L Jadumani in aseiyin ahi. Tua CAB phatsahna um a Act a kisem ahitan, gamsunga ILP kikehlen ahi. MANPAC in dan kisem alamto in, tua hi lungmong a hai thei ahi, ahivanga Bill douna a kiloikhomna in pan alah jom ding ahi. December nisim 29 ni a CAA thu a mass rally douna a thusei jeh a MANPAC convenor akimat a jan khat police station a akium sah hi vangset umtah ahi, ati.

State sorkar in hitobang thil abol kit loudinga temna jong aneiyin ahi. MANPAC Co-convenor Abdullah Phundreimayum in thuso miho akimupi na’a MANPAC convenor akimat demna sangtah aneiyin ahi. Hitia thil kibol hin mipi awgin asuhthip louding ahi’in, state sorkar in ahetthem ding ahi, ati. Phat masanga Chief Minister in CAB douna a goljona um kipapina kin loupitah a anabol ahi’in, tua Bill hi Act a phatsahna aum jouva state BJP sorkar in December nisim 29 nikho teng CAA tosotna a rally bol ding agot ahi, ati.

State sorkar tohgon a gamsung mihon pan alah diuham alah loudiu ham tihi phatah a agel toh masat ngai ahi, tin aseibe in ahi.

‘Radio-tagged’ kibol Amur Falcon Southern Africa lhung ta

Imphal, Dec 28(ET): Manipur gam a ‘satellite transmitter’ kikoi peh a Amur Falcon achal khat Southern Africa alhung tan ahi.

“Manipur gam a kon achena kive a (track) Amur Falcon khat Southern Africa alhunna amasapen ahi”, tin Suresh Kumar, scientist, Dehradun based Wildlife Institute of India (WII) in aseiyin ahi. Tamenglong district a um ‘Chiulon’ kiti khosung khat kiminput sah a vacha hi ‘tag’ akibol a kon km 12,000 nailam leng doh ahitai.

Kumar lamkaina a member 5 umna WII team hon achal ni panna a Amur Falcon vacha nga Puching kho a achesa October nisim 31 leh November nisim 1 nikho a ‘radio-tagged’ abol ahi. State Forest department, Tamenglong district administration, Rainforest Club, Tamenglong leh khosung mihon tohgon atosot ahi.

Vapal tebep vacha nga hohi amin ‘Chiulon, Puching leh Phalong’ (Manipur gam a um khosung chom chom min) chule ‘Irang leh Barak’ (vadung min) asah u ahi. Chiulon hi December nisim 25 nikho a Botswana, Southern Africa gam a um ahi. ‘Barak leh Irang hi anukhah pen a Tanzania gam a aum kihe ahi’in, southern Africa a Chiulon umna lang ajot diu ginchat hi ahi”, tin forest official khat in aseiyin ahi.

Chiulon hin November 17 ni a Goa-Karnataka gamgi adalhah a Somalia gam, Africa November 24 nikho a kinga louva leng lhung ahi. Amur Falcon ni- Tamenglong leh ‘Manipur’ hi kum masa November nisim 4 nikho a ‘radio tagged’ abol u ahi’in, ahivanga ‘Manipur’ hi ni li jouva thi a chule ‘Tamenglong’ hi kum masa December lha a Zambia alhun jouva aumna kihe talou ahi.

Amur Falcon vacha hohin nipi lai China (northern) a um uva chule phalbi teng leh South Africa a kichon jiu ahi.