MLA jaona a mi 10 kikaplih (Arunachal MLA khat kitha hi...

MLA jaona a mi 10 kikaplih (Arunachal MLA khat kitha hi Ipi politics ahitadem)

300
0
SHARE

MLA jaona a mi 10 kikaplih

(Arunachal MLA khat kitha hi Ipi politics ahitadem)

                Arunachal Pradesh a NPP MLA Milun Tirong Aboh thingnoimi hon ‘ambush’ abol uva ama keu hilouva achapa leh ainsungmi ho agom’a mi 10 lang athilo chu Election thuto kisai ahidi hetsa ahi. Hiche lamtin’a kibuluna (ambush) chu Arunachal Pradesh Tirap district sung’a soh ahi. Tirong Aboh hi ‘Sitting MLA’ ahiban’a tuchung Lok Sabha Election to kibolkhom Assembly Election’a Khonsa constituency mama a atet kit ahin akai dile akailou di jong tuni, May 23 (2019) mama a result kihe di ahi. Vote lhah kichai ahitan akai ding het masat (ginchat) jeh a avetda hon thadohdi atiu jong hithei ahi. MLA-pu tha dia kitup ahijongleh thukhat ahin tua acha leh anungjui insungmite gari a atoukhompi hogeija kibantha tha hi koi natoh hileh mihem hina lutlou ahi.  Kon ipi jeh chetna hitobang buluna natoh anei ham ti chu tutun achen achai kihe hih jongleh MLA kithatpa leh athat hon ahet diu, chomkhat jouleh mipin ahinhet thou thou di ahi. NSCN-IM hon gihna ananeisa mi khat ahijeh in mithat hi koidang ahiloudi jong acham’a lhasa ahi.  Arunachal a Tirap leh Changlang district hi Nagaland to kigamgit keu hilouva agam mi hojong Arunachal Tribe ahivang uva Naga a kihe atamjo ahiuve. NSCN-IM leh NSCN-K ho hiche district teni’a hi ana umjing ahiuvin tulang’a K ho ahung chehchao uva ahung thip lang uva hi IM hobou um tobang ahitai. Hilai gamkaija hi IM holeh Assam Rifles ho jong kikaptojing u ahi.

                Arunachal a NPP ho kitup dehset abah hi ‘politics’ thuh thim lut di ahi. March lang’a jong NPP Worker (Tirong Aboh mi) khat ana kithat ahi. MLA Tirong kitha hi Arunachal mi ho kah a politics kiboltona jong hikhat nante. Ahin MLA election politics ho jeh maimai ahidi tahsan umlou ahi. Tu masang jepma chu Arunachal a Naga ho tamna Chanlang leh Tirap district sung’a cheng Naga hohi Any Naga Tribe a govt recognition ahinmudi kontah uva boina khat anasohdoh a Local MLA holeh Arunachali Student kiloikhomna ho jahda jeh a Any Naga Tribe recognition chu ana chelha talouva Arunachal Tribe ahinau cheh a umjom dia hung kichai anahi. Hitobang politics hi Naga thingnoi holah a kon thangtomna anei di ham ti hi sei ngai louva gah het jengthei ahi. IM leh Centre in kihouna aneina’a Arunachal a Naga te chenna hojong Nagalim (greater Nagaland) kivaipohna sung’a jaothasah di ti ngehna um ahi. Hijeh a hi MLA Tirong Aboh kitha hi athatna ginmo um ho ivetleh MLA let le lal di kichuna maimai hilou maithei ahi. Tuchung MLA-pa that IM ho ahitahbah uleh ‘Ceasefire’ kiti hi Nagaland sung tilou IM hon mundang’a anopnop phat phat uleh adeidei atha theina diu phalna tobang ahi. Ceasefire umjouva Manipur’a jong kon koikoi atha a abulu am ti mijouse het ahi. Centre in mithat ho ima ahinlo louleh mithat hoto pangkhom tithei hidi ahi.