MLA hole haosa ho koijoh ngoh diham (Henglep lampi kisei melse dehset)

MLA hole haosa ho koijoh ngoh diham (Henglep lampi kisei melse dehset)

411
0
SHARE

MLA hole haosa ho koijoh ngoh diham
(Henglep lampi kisei melse dehset)

Henglep lamlen’ah adammo hospital jonding gollhang phabep hon go (bamboo) kikankhom a aputtho u thu kithejalji hi agam mipi gentheidan tahlangna ahivanga lamlen phatlou hi agam alhanga thunei vaipo ho dia thaset umtah hidi ahi. Tukum chuhlai sehseh a Henglep lampi a hitobang adammo kipohna hi alivei channa ahi akiti. Lamlen phatlou, kisemlou kiti hi midang dang themmo chan masanga amasapen tah a agam mipi leh haosa ho themmo chan masat di ahi. MLA ho taimona dia lamlen phatmodan kitahlang ahileh kon vote apeh a MLA ho kisondoh ham ti hi gel masat ditah ahibouve. Hoilai lhang hileh thinglhang gam atamjoa hi mipin vote aneija apehji vanga haosa ho thu thu ahijeh in mipi sanga haosa ho akigelphat diu ngaijo kit ahi. Tulai thingnoi khang’in ihinphah kit tah jeh un haosa honjong seileu keiho thu thu ahitapoi tiloi umkit maithei u ahi. Achutileh gamkai khatna lamlen kisuhlou hi MLA ho jangpetna ngoh sanga MLA sondoh hojoh ngoh didan ahi. Hiche henasa a indirect tah a govt vaipo ho ham ki ngoh jeng hi hetlou jeh ham, mula munang seila seiponge kiti khat jeh ham hidi ahi. Henglep lampi keu ahipon tu chuhlai gojuh jeh a bonlhona mun lamlen hi tam ahi. Henglep lampi tidautin Manipur hinna lamlen thupi cheh 2 National Highway 2 leh 37 teni a jong gari kisaidenna loi, twilah bonlah a oltah tah a gari chena loi um ahi. Tamenglong/Noney district thinglhang kochong jep langa jong lamlen umlou jeh a ana adamo, naoneidi ho gei pasal hon aputtho u kumsehleh thuso a kimujing ahi.

Thinglhang lang lamlen titah louva Imphal khopi sungleh anaivel’a lamlen munkhat khat jong phailei kibolna banga bonlhona um ahi. Hiche jeh a khatveini vel’a Lilong langa lamlen setna munkhatna mipi hon engkhan tah a bon lhona laitah a chang aphu uva thusomi ho avetsah u ahi. Ahin mundang dang’a jong hitobang lamlen setna aum’e tia Henglep lampi aphapoi ti kilhamon’a di hidehlou ahi. Khantouna kiti mutheina baipen chu lamlen pha hi ahi. Henglep lhang akhangtoupoi kitina hi sotlaija pat ahitan tuni geija khantouna aumpoi kiti hi govt ngoh di ahinai. Ahin achesa kum 30/40 sunga MLA koikoi anahia lamlen semna dia ipipi anabol uva ima anabollou uham ti jong vet thei ahi. Tuchung Henglep MLA resign hung kibol jeh a Henglep lamlen hitobang bepseu dinmun ahi tithei hideh lou ahi. Alang khatna, achesa kum 4/5 sunga Churachandpur district a Singat leh Thanlon AC sunga Guite Road, Behiang Road, Churachanpur-Sugnu Road muthei tah a kisempha khu local MLA ho, haosa holeh mipi kithokhom jeh ahikitne. Local MLA hon chempong le tupeh akipat masatleh mipi le govt ninjong apanna theichan aboldi mong ahi. Thinglhang hijongleh MLA kisuhna a chu kho khat le kho khat kijotmatna lamlen (IVR) hojong black top lamlen tam ahitai. MLA honjong thil khat agelkhoh tahbah uleh Term khat sunga jong mipi gahmu thei lamlen Km ijat hamkhat beh aboldoh thei mama di ahi. Thinglhang kho haosa atamjo khopi (town) hoa permanent a cheng tamna chu thinglhang kho hoa ipi khantouna um’intin lamlen phatah, PHC le School kisuhtah ho uminte ti kineplou di ahi. Ahin Sub division HQ lui tah Henglep kho a vang adamo akhohten ho gahboipi thei doctor, nurse khat le ni beh aumjing divang ngai ahin aumlou hi lamlen phatlou ngoh thei ahipoi.