MLA 17 kiphin hon Adu kinehtau (Haina lekha peho Disqualify hilo...

MLA 17 kiphin hon Adu kinehtau (Haina lekha peho Disqualify hilo u)

603
0
SHARE

MLA 17 kiphin hon Adu kinehtau

(Haina lekha peho Disqualify hilo u)

                                  Kiphinna’a haina lekha (resignation letter) anape Karnataka a Congress leh JD-S MLA agom’a 17 ho chu adu aneh u ahitai. Haina lekha kipeleh Cabinet minister din eikijol inte ti ahiu hetsa chu tua koi minister hi malah MLA ahinaova kon kahlhah (disqualify) a umlo ahitaovin Term kichai  – 2023 kah a lahlouva kitung diu tina ahitai. Ijem tia Karnataka govt sung’a boina jat khat ahung umjing’a ‘Mid Term Election’ ahung umdoh ngal louleh tua MLA disqualify kibol hohi ehche manna mang gop u ahitai. Alang khatna hiche disqualify kibol MLA 17 hohi BJP hon guhthim’a ana tilset keu u hilouva sel jong anaseldoh uva Congress-JD-S govt phuhlhuh ahung hihia tua disqualify aneh u hi amaikhah u (adu aneh u) himaidi ahi. BJP govt hinna di khat hileu koi disqualify bol malah iti bang’in haina lekha pejongleu sanpeh pompeh ahiloudi jong hetsa ahi. Tua hi Karnataka a BJP govt tundoh ahung hitah jeh in tua ana kiphinnjing’a haina lekha anape Congress leh JD-S MLA ho hi alekhapeh u sanpeh louva akikoi uva MLA ahijing uleh BJP govt dia lhuhna hung hithei kit ahijeh a MLA ahina kisan’a kon paidoh ahiu hi BJP ho dia anavah-pen hijengdan ahitai. Manipur a bang’a BJP ho support bol’a phachom diu hileh disqualify kibol lou beh diu ahi. Karnataka Assembly Speaker Ramesh Kumar in hiche disqualify kibol hohi haina lekha apeh dungjui uva Anti defectuion Law to kitoh a disqualify kibol ahi akitinopsel jeng ahi. Tua hi disqualify kibol MLA phabep hon Court Case boldi atiu ahin ipi asei diu hitam datmo umtah ahi. Court ninjong “haina lekha napeh jeh uva disqualify nakibol u ahi” ahinti dijong mu masatsa tobang ahi. Hiche ‘dissident’ (akiphin) MLA disqualify kibol ho hi MLA hina’a kon haina lekha pelouva BJP a analut hileu Speaker in Anti Defection Law dungjuija ‘disqualify’ abol diu tahsan umkitlou ahi. Manipur a hiche chet ahin tua amaho (Manipur Congress MLA 7 BJP a chomlut ho disqualify bol dia Congress hon hehna le ngehna anei u thuseina dia hapta/kal 4 lang hung kivochon ahi. Lha khat jouleh athu kisei di, seichaina umteidi ahi tina jong umdehlou ahi.

            Achomlam tah a sei dia chu Anti Defection Law dungjuija MLA party khatna kon adangkhatna chomle ho MLA ahina kiladohdi (disqualify) kiti daan hi Centre a thunei vaipo a pang-pang hon amaho phatchomna dia aman u tina ahitai. Karnataka a Congress leh JD-S MLA hijajen Anti Defection Law kitahkhum’a disqualify akibol vang uva Manipur a Congress MLA 8 hohi kitahkhumloulai tina ahin ahung kitahkhum dijong tahsan umlou ahi. Ijem tia ahung kitahkhum tahbah ujongleh Term kichai dikon lang ham, tua govt sung’a Coalition party ho kah a kiboina leh BJP sung mama a kiboina hi akisuhfel’a govt ima titaponte ahung kitilang ham hung hidi ahi. Karnataka a Congress leh JD-S MLA disqualify kibol hohi Congress-JDS govt phuhlhuhna dia Dangka Crore 50 cheh kipeu ahi akiti chu atah ahijongleh disqualify kibolna di changei vang anahiloubeh di ahin lhepchatvaija umdoh u tina ahi. Haitang’e tia lekha kisepma mi’n asanpeh phatna kitomgogam uva Court channa hehna neidi atiu hi nuijat leh jachat umtah ahi.